[32] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena aññatarassa
bhikkhuno akālacīvaraṁ uppannaṁ hoti tassa taṁ cīvaraṁ kayiramānaṁ
nappahoti. Athakho so bhikkhu taṁ cīvaraṁ ussāpetvā punappunaṁ
vimajjati. Addasā kho bhagavā senāsanacārikaṁ āhiṇḍanto taṁ
bhikkhuṁ taṁ cīvaraṁ ussāpetvā punappunaṁ vimajjantaṁ disvāna yena
so bhikkhu tenupasaṅkami upasaṅkamitvā taṁ bhikkhuṁ etadavoca
kissa tvaṁ bhikkhu imaṁ cīvaraṁ ussāpetvā punappunaṁ vimajjasīti. Idaṁ
me bhante akālacīvaraṁ uppannaṁ kayiramānaṁ nappahoti tenāhaṁ
imaṁ cīvaraṁ ussāpetvā punappunaṁ vimajjāmīti. Atthi pana te
bhikkhu cīvarapaccāsāti. Atthi bhagavāti. Athakho bhagavā etasmiṁ
nidāne etasmiṁ pakaraṇe dhammiṁ kathaṁ katvā bhikkhū āmantesi
anujānāmi bhikkhave akālacīvaraṁ paṭiggahetvā cīvarapaccāsāya 1
nikkhipitunti.

[33] Tena kho pana samayena bhikkhū bhagavatā anuññātaṁ
akālacīvaraṁ paṭiggahetvā cīvarapaccāsāya 2 nikkhipitunti akālacīvaraṁ 3
1-2 Ma. Yu. cīvarapaccāsā. 3 Ma. Yu. akālacīvarāni.
Paṭiggahetvā atirekamāsaṁ nikkhipanti. Tāni cīvarāni cīvaravaṁse
bhaṇḍikābaddhāni tiṭṭhanti. Addasā kho āyasmā ānando
senāsanacārikaṁ āhiṇḍanto tāni cīvarāni cīvaravaṁse bhaṇḍikābaddhāni
ṭhitāni 1 disvāna bhikkhū āmantesi kassimāni āvuso cīvarāni
cīvaravaṁse bhaṇḍikābaddhāni tiṭṭhantīti. Amhākaṁ āvuso imāni 2
akālacīvarāni cīvarapaccāsāya 3 nikkhittānīti. Kīvaciraṁ panāvuso imāni
cīvarāni nikkhittānīti. Atirekamāsaṁ āvusoti. Āyasmā ānando
ujjhāyati khīyati vipāceti kathaṁ hi nāma bhikkhū akālacīvaraṁ paṭiggahetvā
atirekamāsaṁ nikkhipissantīti. Athakho āyasmā ānando [4]- bhagavato
etamatthaṁ ārocesi. Athakho bhagavā etasmiṁ nidāne etasmiṁ
pakaraṇe bhikkhusaṅghaṁ sannipātāpetvā bhikkhū paṭipucchi saccaṁ kira
bhikkhave bhikkhū akālacīvaraṁ paṭiggahetvā atirekamāsaṁ nikkhipantīti.
Saccaṁ bhagavāti. Vigarahi buddho bhagavā kathaṁ hi nāma te
bhikkhave moghapurisā akālacīvaraṁ paṭiggahetvā atirekamāsaṁ nikkhipissanti
netaṁ bhikkhave appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha
niṭṭhitacīvarasmiṁ bhikkhunā ubbhatasmiṁ kaṭhine bhikkhuno paneva akālacīvaraṁ
uppajjeyya ākaṅkhamānena bhikkhunā paṭiggahetabbaṁ
paṭiggahetvā khippameva kāretabbaṁ no cassa pāripūri māsaparamantena
1 Ma. Yu. tiṭṭhante. 2 Ma. ayaṁ pāṭho natthi. 3 Ma. Yu. cīvarapaccāsā.
4 Ma. te bhikkhū anekapariyāyena vigarahitvā.
Bhikkhunā taṁ cīvaraṁ nikkhipitabbaṁ ūnassa pāripūriyā satiyā paccāsāya
tato ce uttariṁ 1 nikkhipeyya satiyāpi paccāsāya nissaggiyaṁ
pācittiyanti.

[34] Niṭṭhitacīvarasmiṁ bhikkhunāti bhikkhuno cīvaraṁ kataṁ vā hoti
naṭṭhaṁ vā vinaṭṭhaṁ vā daḍḍhaṁ vā cīvarāsā vā upacchinnā.
Ubbhatasmiṁ kaṭhineti aṭṭhannaṁ mātikānaṁ aññatarāya mātikāya ubbhataṁ
hoti saṅghena vā antarā ubbhataṁ hoti. Akālacīvaraṁ nāma
anatthate kaṭhine ekādasamāse uppannaṁ atthate kaṭhine sattamāse
uppannaṁ kālepi ādissa dinnaṁ etaṁ akālacīvaraṁ nāma.
Uppajjeyyāti uppajjeyya saṅghato vā gaṇato vā ñātito vā
mittato vā paṁsukūlato 2 vā attano vā dhanena.

[35] Ākaṅkhamānenāti icchamānena paṭiggahetabbaṁ.
Paṭiggahetvā khippameva kāretabbanti dasāhā kāretabbaṁ.

[36] No cassa pāripūrīti kayiramānaṁ nappahoti. Māsaparamantena
bhikkhunā taṁ cīvaraṁ nikkhipitabbanti māsaparamatā nikkhipitabbaṁ. Ūnassa
pāripūriyāti ūnassa pāripūratthāya. Satiyā paccāsāyāti paccāsā
hoti saṅghato vā gaṇato vā ñātito vā mittato vā paṁsukūlato 3
vā attano vā dhanena.

[37] Tato ce uttariṁ nikkhipeyya satiyāpi paccāsāyāti
1 Ma. uttari. evamuparipi. 2-3 Ma. Yu. paṁsukulaṁ.
Tadahuppanne mūlacīvare paccāsācīvaraṁ uppajjati dasāhā
kāretabbaṁ. Dvīhuppanne mūlacīvare ... Tīhuppanne mūlacīvare ...
Catūhuppanne mūlacīvare ... Pañcāhuppanne mūlacīvare ... Chāhuppanne
mūlacīvare ... Sattāhuppanne mūlacīvare ... Aṭṭhāhuppanne mūlacīvare ...
Navāhuppanne mūlacīvare ... Dasāhuppanne mūlacīvare ... Paccāsācīvaraṁ
uppajjati dasāhā kāretabbaṁ. Ekādase uppanne mūlacīvare ...
Dvādase uppanne mūlacīvare ... Terase uppanne mūlacīvare ... Cuddase
uppanne mūlacīvare ... Paṇṇarase uppanne mūlacīvare ... Soḷase
uppanne mūlacīvare ... Sattarase uppanne mūlacīvare ... Aṭṭhārase
uppanne mūlacīvare ... Ekūnavīse uppanne mūlacīvare ... Vīse uppanne
mūlacīvare paccāsācīvaraṁ uppajjati dasāhā kāretabbaṁ. Ekavīse
uppanne mūlacīvare paccāsācīvaraṁ uppajjati navāhā kāretabbaṁ.
Dvāvīse uppanne mūlacīvare paccāsācīvaraṁ uppajjati aṭṭhāhā
kāretabbaṁ. Tevīse uppanne mūlacīvare ... Sattāhā kāretabbaṁ.
Catuvīse uppanne mūlacīvare ... Chāhā kāretabbaṁ. Pañcavīse
uppanne mūlacīvare ... Pañcāhā kāretabbaṁ. Chabbīse uppanne
mūlacīvare ... Catūhā kāretabbaṁ. Sattavīse uppanne mūlacīvare ...
Tīhā kāretabbaṁ. Aṭṭhavīse uppanne mūlacīvare ... Dvīhā
kāretabbaṁ. Ekūnatiṁse uppanne mūlacīvare paccāsācīvaraṁ uppajjati
ekāhaṁ kāretabbaṁ. Tiṁse uppanne mūlacīvare paccāsācīvaraṁ
Uppajjati tadaheva adhiṭṭhātabbaṁ vikappetabbaṁ vissajjetabbaṁ.
No ce adhiṭṭhaheyya vā vikappeyya vā vissajjeyya vā ekatiṁse
aruṇuggamane nissaggiyaṁ hoti nissajjitabbaṁ saṅghassa vā gaṇassa vā
puggalassa vā. Evañca pana bhikkhave nissajjitabbaṁ .pe. Idaṁ
me bhante akālacīvaraṁ māsātikkantaṁ nissaggiyaṁ imāhaṁ saṅghassa
nissajjāmīti .pe. Dadeyyāti .pe. Dadeyyunti .pe. Āyasmato
dammīti.

[38] Visabhāge uppanne mūlacīvare paccāsācīvaraṁ uppajjati
rattiyo ca sesā honti na akāmā kāretabbaṁ.

[39] Māsātikkante atikkantasaññī nissaggiyaṁ pācittiyaṁ.
Māsātikkante vematiko nissaggiyaṁ pācittiyaṁ. Māsātikkante
anatikkantasaññī nissaggiyaṁ pācittiyaṁ. Anadhiṭṭhite adhiṭṭhitasaññī
avikkappite vikappitasaññī avissajjite vissajjitasaññī
anaṭṭhe naṭṭhasaññī avinaṭṭhe vinaṭṭhasaññī adaḍḍhe daḍḍhasaññī
avilutte viluttasaññī nissaggiyaṁ pācittiyaṁ.

[40] Nissaggiyaṁ cīvaraṁ anissajjitvā paribhuñjati āpatti
dukkaṭassa. Māsānatikkante atikkantasaññī āpatti dukkaṭassa.
Māsānatikkante vematiko āpatti dukkaṭassa. Māsānatikkante
anatikkantasaññī anāpatti.

[41] Anāpatti antomāse adhiṭṭheti vikappeti vissajjeti
Nassati vinassati dayhati acchinditvā gaṇhāti 1 vissāsaṁ gaṇhāti 2
ummattakassa ādikammikassāti.
Tatiyasikkhāpadaṁ niṭṭhitaṁ.
-------
1-2 Ma. Yu. gaṇhanti.
Catutthasikkhāpadaṁ