[72] Atirekatikkhattuṁ codanāya atirekachakkhattuṁ ṭhāne 1
atirekasaññī abhinipphādeti nissaggiyaṁ pācittiyaṁ. Atirekatikkhattuṁ
codanāya atirekachakkhattuṁ ṭhāne vematiko abhinipphādeti nissaggiyaṁ
pācittiyaṁ. Atirekatikkhattuṁ codanāya atirekachakkhattuṁ ṭhāne ūnakasaññī
abhinipphādeti nissaggiyaṁ pācittiyaṁ. Ūnakatikkhattuṁ codanāya
ūnakachakkhattuṁ ṭhāne atirekasaññī āpatti dukkaṭassa.
Ūnakatikkhattuṁ codanāya ūnakachakkhattuṁ ṭhāne vematiko āpatti
dukkaṭassa. Ūnakatikkhattuṁ codanāya ūnakachakkhattuṁ ṭhāne
ūnakasaññī anāpatti.

[73] Anāpatti tikkhattuṁ codanāya chakkhattuṁ ṭhānena
ūnakatikkhattuṁ codanāya ūnakachakkhattuṁ ṭhānena acodiyamāno deti
1 sabbattha ṭhānenāti dissati.
Sāmiko codetvā deti 1 ummattakassa ādikammikassāti.
Dasamasikkhāpadaṁ niṭṭhitaṁ 2 .
Cīvaravaggo 3 paṭhamo.
-------
Tassuddānaṁ
dasekaratti māso ca 4 dhovāpanaṁ 5 paṭiggaho
aññātakañca uddissa 6 ubhinnaṁ dūtakena cāti 7 .
-------
1 Ma. Yu. sāmikā codetvā denti. 2 Ma. rājasikkhāpadaṁ niṭṭhitaṁ dasamaṁ.
3 Ma. Yu. kaṭhinavaggo. 4 Ma. ubbhataṁ kathinaṁ tīṇi. 5 Ma. Yu. dhovanañca.
6 Ma. Yu. aññātakāni tīṇeva. 7 Yu. itisaddo natthi.
Kosiyavaggassa paṭhamasikkhāpadaṁ

[74] Tena samayena buddho bhagavā āḷaviyaṁ viharati aggāḷave
cetiye. Tena kho pana samayena chabbaggiyā bhikkhū kosiyakārake
upasaṅkamitvā evaṁ vadenti 1 bahū āvuso kosakārake pacatha
amhākaṁpi dassatha mayaṁpi icchāma kosiyamissakaṁ santhataṁ kātunti.
Te ujjhāyanti khīyanti vipācenti kathaṁ hi nāma samaṇā
sakyaputtiyā amhe upasaṅkamitvā evaṁ vakkhanti bahū āvuso
kosakārake pacatha amhākaṁpi dassatha mayaṁpi icchāma kosiyamissakaṁ
santhataṁ kātunti amhākaṁpi alābhā amhākaṁpi dulladdhaṁ ye mayaṁ
ājīvassa hetu puttadārassa kāraṇā bahū khuddake pāṇe saṅghātaṁ
āpādemāti. Assosuṁ kho bhikkhū tesaṁ ujjhāyantānaṁ khīyantānaṁ
vipācentānaṁ. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma chabbaggiyā bhikkhū kosiyakārake
upasaṅkamitvā evaṁ vakkhanti bahū āvuso kosakārake pacatha
amhākaṁpi dassatha mayaṁpi icchāma kosiyamissakaṁ santhataṁ kātunti.
Athakho te bhikkhū bhagavato etamatthaṁ ārocesuṁ. Saccaṁ kira tumhe
bhikkhave kosiyakārake upasaṅkamitvā evaṁ vadetha bahū āvuso
kosakārake pacatha amhākaṁpi dassatha mayaṁpi icchāma kosiyamissakaṁ
1 Ma. vadanti.
Santhataṁ kātunti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā kosiyakārake upasaṅkamitvā evaṁ vakkhatha
bahū āvuso kosakārake pacatha amhākaṁpi dassatha mayaṁpi icchāma
kosiyamissakaṁ santhataṁ kātunti netaṁ moghapurisā appasannānaṁ vā
pasādāya pasannānaṁ vā bhiyyobhāvāya .pe. Evañca pana bhikkhave
imaṁ sikkhāpadaṁ uddiseyyātha yo pana bhikkhu kosiyamissakaṁ santhataṁ
kārāpeyya nissaggiyaṁ pācittiyanti.

[75] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Santhataṁ nāma santharitvā kataṁ
hoti avāyimaṁ. Kārāpeyyāti ekenapi kosiyaṁsunā missitvā
karoti vā kārāpeti vā payoge dukkaṭaṁ paṭilābhena nissaggiyaṁ
hoti nissajjitabbaṁ saṅghassa vā gaṇassa vā puggalassa vā.
Evañca pana bhikkhave nissajjitabbaṁ .pe. Idaṁ me bhante kosiyamissakaṁ
santhataṁ kārāpitaṁ nissaggiyaṁ imāhaṁ saṅghassa nissajjāmīti .pe.
Dadeyyāti .pe. Dadeyyunti .pe. Āyasmato dammīti.

[76] Attanā vippakataṁ attanā pariyosāpeti nissaggiyaṁ
pācittiyaṁ. Attanā vippakataṁ parehi pariyosāpeti nissaggiyaṁ
pācittiyaṁ. Parehi vippakataṁ attanā pariyosāpeti nissaggiyaṁ
pācittiyaṁ. Parehi vippakataṁ parehi pariyosāpeti nissaggiyaṁ
pācittiyaṁ. Aññassatthāya karoti vā kārāpeti vā āpatti
Dukkaṭassa. Aññena kataṁ paṭilabhitvā paribhuñjati āpatti
dukkaṭassa.

[77] Anāpatti vitānaṁ vā bhummattharaṇaṁ vā
sāṇipākāraṁ vā bhisiṁ vā bimbohanaṁ vā karoti ummattakassa
ādikammikassāti.
Paṭhamasikkhāpadaṁ niṭṭhitaṁ.
-------
Dutiyasikkhāpadaṁ

[78] Tena samayena buddho bhagavā vesāliyaṁ viharati mahāvane
kūṭāgārasālāyaṁ. Tena kho pana samayena chabbaggiyā bhikkhū
suddhakāḷakānaṁ eḷakalomānaṁ santhataṁ kārāpenti. Manussā vihāracārikaṁ
āhiṇḍantā passitvā ujjhāyanti khīyanti vipācenti kathaṁ
hi nāma ime samaṇā sakyaputtiyā suddhakāḷakānaṁ eḷakalomānaṁ
santhataṁ kārāpessanti seyyathāpi gihī kāmabhoginoti. Assosuṁ
kho bhikkhū tesaṁ manussānaṁ ujjhāyantānaṁ khīyantānaṁ vipācentānaṁ.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma chabbaggiyā bhikkhū suddhakāḷakānaṁ eḷakalomānaṁ santhataṁ
kārāpessantīti. Athakho te bhikkhū bhagavato etamatthaṁ ārocesuṁ.
Saccaṁ kira tumhe bhikkhave suddhakāḷakānaṁ eḷakalomānaṁ santhataṁ
kārāpethāti. Saccaṁ bhagavāti. Vigarahi buddho bhagavā kathaṁ hi
nāma tumhe moghapurisā suddhakāḷakānaṁ eḷakalomānaṁ santhataṁ
kārāpessatha netaṁ moghapurisā appasannānaṁ vā pasādāya pasannānaṁ
vā bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha yo pana bhikkhu suddhakāḷakānaṁ eḷakalomānaṁ santhataṁ
kārāpeyya nissaggiyaṁ pācittiyanti.

[79] Yo panāti yo yādiso .pe. Bhikkhūti .pe. Ayaṁ
Imasmiṁ atthe adhippeto bhikkhūti. Kāḷakaṁ nāma dve kāḷakāni
jātiyā kāḷakaṁ vā rajanakāḷakaṁ vā. Santhataṁ nāma santharitvā
kataṁ hoti avāyimaṁ. Kārāpeyyāti karoti vā kārāpeti vā
payoge dukkaṭaṁ paṭilābhena nissaggiyaṁ hoti nissajjitabbaṁ saṅghassa
vā gaṇassa vā puggalassa vā. Evañca pana bhikkhave nissajjitabbaṁ
.pe. Idaṁ me bhante suddhakāḷakānaṁ eḷakalomānaṁ santhataṁ
kārāpitaṁ nissaggiyaṁ imāhaṁ saṅghassa nissajjāmīti .pe.
Dadeyyāti .pe. Dadeyyunti .pe. Āyasmato dammīti.

[80] Attanā vippakataṁ attanā pariyosāpeti nissaggiyaṁ
pācittiyaṁ. Attanā vippakataṁ parehi pariyosāpeti nissaggiyaṁ
pācittiyaṁ. Parehi vippakataṁ attanā pariyosāpeti nissaggiyaṁ
pācittiyaṁ. Parehi vippakataṁ parehi pariyosāpeti nissaggiyaṁ
pācittiyaṁ. Aññassatthāya karoti vā kārāpeti vā āpatti
dukkaṭassa. Aññena kataṁ paṭilabhitvā paribhuñjati āpatti
dukkaṭassa.

[81] Anāpatti vitānaṁ vā bhummattharaṇaṁ vā sāṇipākāraṁ vā
bhisiṁ vā bimbohanaṁ vā karoti ummattakassa ādikammikassāti.
Dutiyasikkhāpadaṁ niṭṭhitaṁ.
-------
Tatiyasikkhāpadaṁ