[102] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Aññātikā nāma mātito
vā pitito vā yāva sattamā pitāmahayugā asambaddhā. Bhikkhunī
nāma ubhatosaṅghe upasampannā. Dhovāti āṇāpeti āpatti
dukkaṭassa dhotāni nissaggiyāni honti. Rajāti āṇāpeti
āpatti dukkaṭassa rattāni nissaggiyāni honti. Vijaṭehīti
āṇāpeti āpatti dukkaṭassa vijaṭitāni nissaggiyāni honti
nissajjitabbāni saṅghassa vā gaṇassa vā puggalassa vā.
1 Ma. aññātikā.
Evañca pana bhikkhave nissajjitabbāni .pe. Imāni me bhante
eḷakalomāni aññātikāya bhikkhuniyā dhovāpitāni nissaggiyāni
imānāhaṁ saṅghassa nissajjāmīti .pe. Dadeyyāti .pe.
Dadeyyunti .pe. Āyasmato dammīti.

[103] Aññātikāya aññātikasaññī eḷakalomāni dhovāpeti
nissaggiyaṁ pācittiyaṁ. Aññātikāya aññātikasaññī eḷakalomāni
dhovāpeti rajāpeti nissaggiyena āpatti dukkaṭassa. Aññātikāya
aññātikasaññī eḷakalomāni dhovāpeti vijāṭāpeti nissaggiyena
āpatti dukkaṭassa. Aññātikāya aññātikasaññī eḷakalomāni
dhovāpeti rajāpeti vijaṭāpeti nissaggiyena āpatti dvinnaṁ
dukkaṭānaṁ. Aññātikāya aññātikasaññī eḷakalomāni rajāpeti
nissaggiyaṁ pācittiyaṁ. Aññātikāya aññātikasaññī eḷakalomāni
rajāpeti vijaṭāpeti nissaggiyena āpatti dukkaṭassa. Aññātikāya
aññātikasaññī eḷakalomāni rajāpeti dhovāpeti nissaggiyena
āpatti dukkaṭassa. Aññātikāya aññātikasaññī eḷakalomāni
rajāpeti vijaṭāpeti dhovāpeti nissaggiyena āpatti dvinnaṁ
dukkaṭānaṁ. Aññātikāya aññātikasaññī eḷakalomāni vijaṭāpeti
nissaggiyaṁ pācittiyaṁ. Aññātikāya aññātikasaññī eḷakalomāni
vijaṭāpeti dhovāpeti nissaggiyena āpatti dukkaṭassa. Aññātikāya
aññātikasaññī eḷakalomāni vijaṭāpeti rajāpeti nissaggiyena
Āpatti dukkaṭassa. Aññātikāya aññātikasaññī eḷakalomāni
vijaṭāpeti dhovāpeti rajāpeti nissaggiyena āpatti dvinnaṁ
dukkaṭānaṁ. Aññātikāya vematiko .pe. Aññātikāya ñātikasaññī
.pe. Aññassa eḷakalomāni dhovāpeti āpatti dukkaṭassa.
Ekato upasampannāya dhovāpeti āpatti dukkaṭassa. Ñātikāya
aññātikasaññī āpatti dukkaṭassa. Ñātikāya vematiko
āpatti dukkaṭassa. Ñātikāya ñātikasaññī anāpatti.

[104] Anāpatti ñātikāya dhovantiyā aññātikā dutiyā
hoti avuttā dhovati aparibhuttaṁ katabhaṇḍaṁ dhovāpeti sikkhamānāya
sāmaṇeriyā ummattakassa ādikammikassāti.
Sattamasikkhāpadaṁ niṭṭhitaṁ.
-------
Aṭṭhamasikkhāpadaṁ

[105] Tena samayena buddho bhagavā rājagahe viharati veḷuvane
kalandakanivāpe. Tena kho pana samayena āyasmā upanando
sakyaputto aññatarassa kulassa kulūpako hoti niccabhattiko.
Yaṁ tasmiṁ kule uppajjati khādanīyaṁ vā bhojanīyaṁ vā tato āyasmato
upanandassa sakyaputtassa paṭiviso ṭhapito hoti 1 . Tena kho pana
samayena sāyaṁ tasmiṁ kule maṁsaṁ uppannaṁ hoti. Tato āyasmato
upanandassa sakyaputtassa paṭiviso ṭhapito hoti. Tassa kulassa
dārako rattiyā paccūsasamayaṁ paccuṭṭhāya rodati maṁsaṁ me dethāti.
Athakho so puriso pajāpatiṁ etadavoca ayyassa paṭivisaṁ dārakassa
dehi aññaṁ cetāpetvā ayyassa dassāmāti. Athakho āyasmā
upanando sakyaputto pubbaṇhasamayaṁ nivāsetvā pattacīvaramādāya
yena taṁ kulaṁ tenupasaṅkami upasaṅkamitvā paññatte āsane
nisīdi. Athakho so puriso yenāyasmā upanando sakyaputto
tenupasaṅkami upasaṅkamitvā āyasmantaṁ upanandaṁ sakyaputtaṁ
abhivādetvā ekamantaṁ nisīdi. Ekamantaṁ nisinno kho so
puriso āyasmantaṁ upanandaṁ sakyaputtaṁ etadavoca hiyyo kho
bhante sāyaṁ maṁsaṁ uppannaṁ 2 tato ayyassa paṭiviso ṭhapito
1 Ma. Yu. ṭhapiyyati. 2 Ma. Yu. uppannaṁ ahosi.
Ayaṁ bhante dārako rattiyā paccūsasamayaṁ paccuṭṭhāya rodati maṁsaṁ
me dethāti ayyassa paṭiviso dārakassa dinno kahāpaṇena
bhante kiṁ āhariyatūti 1 . Pariccatto me āvuso kahāpaṇoti. Āma
bhante pariccattoti. Taññeva me āvuso kahāpaṇaṁ dehīti.
Athakho so puriso āyasmato upanandassa sakyaputtassa kahāpaṇaṁ
datvā ujjhāyati khīyati vipāceti yatheva mayaṁ rūpiyaṁ paṭiggaṇhāma
evamevime samaṇā sakyaputtiyā rūpiyaṁ paṭiggaṇhantīti. Assosuṁ
kho bhikkhū tassa purissa ujjhāyantassa khīyantassa vipācentassa.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma āyasmā upanando sakyaputto rūpiyaṁ paṭiggahessatīti.
Athakho te bhikkhū bhagavato etamatthaṁ ārocesuṁ. Saccaṁ kira tvaṁ
upananda rūpiyaṁ paṭiggaṇhāsīti 2 . Saccaṁ bhagavāti. Vigarahi buddho
bhagavā kathaṁ hi nāma tvaṁ moghapurisa rūpiyaṁ paṭiggahessasi netaṁ
moghapurisa appasannānaṁ vā pasādāya pasannānaṁ vā bhiyyobhāvāya
.pe. Evañca pana bhikkhave imaṁ sikkhāpadaṁ uddiseyyātha yo
pana bhikkhu jātarūparajataṁ uggaṇheyya vā uggaṇhāpeyya vā
upanikkhittaṁ vā sādiyeyya nissaggiyaṁ pācittiyanti.

[106] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Jātarūpaṁ nāma satthuvaṇṇo
1 Ma. Yu. āhariyyatūti. evamuparipi 2 sabbattha paṭiggahesīti dissati.
Vuccati. Rajataṁ nāma kahāpaṇo lohamāsako dārumāsako jatumāsako
ye vohāraṁ gacchanti. Uggaṇheyyāti sayaṁ gaṇhāti nissaggiyaṁ
hoti 1 . Uggaṇhāpeyyāti aññaṁ gaṇhāpeti nissaggiyaṁ hoti 2 .
Upanikkhittaṁ vā sādideyyāti idaṁ ayyassa hotūti upanikkhittaṁ
vā sādiyati nissaggiyaṁ hoti. Saṅghamajjhe nissajjitabbaṁ.
Evañca pana bhikkhave nissajjitabbaṁ. Tena bhikkhunā saṅghaṁ
upasaṅkamitvā ekaṁsaṁ uttarāsaṅgaṁ karitvā vuḍḍhānaṁ bhikkhūnaṁ pāde
vanditvā ukkuṭikaṁ nisīditvā añjaliṁ paggahetvā evamassa vacanīyo
ahaṁ bhante rūpiyaṁ paṭiggahesiṁ idaṁ me nissaggiyaṁ imāhaṁ saṅghassa
nissajjāmīti. Nissajjitvā āpatti desetabbā. Byattena
bhikkhunā paṭibalena āpatti paṭiggahetabbā. Sace tattha āgacchati
ārāmiko vā upāsako vā so vattabbo āvuso imaṁ
jānāhīti. Sace so bhaṇati iminā kiṁ āhariyatūti. Na
vattabbo imaṁ vā imaṁ vā āharāti. Kappiyaṁ ācikkhitabbaṁ
sappi vā telaṁ vā madhu vā phāṇitaṁ vā. Sace so tena
parivaṭṭetvā kappiyaṁ āharati rūpiyapaṭiggāhakaṁ ṭhapetvā sabbeheva
paribhuñjitabbaṁ evañcetaṁ labhetha iccetaṁ kusalaṁ no ce labhetha
so vattabbo āvuso imaṁ chaḍḍehīti. Sace so chaḍḍeti
iccetaṁ kusalaṁ no ce chaḍḍeti pañcahaṅgehi samannāgato
1-2 Ma. Yu. nissaggiyaṁ pācittiyaṁ. sabbattha īdisameva.
Bhikkhu rūpiyachaḍḍako sammannitabbo yo na chandāgatiṁ gaccheyya
na dosāgatiṁ gaccheyya na mohāgatiṁ gaccheyya na bhayāgatiṁ gaccheyya
chaḍḍitāchaḍḍitañca jāneyya. Evañca pana bhikkhave sammannitabbo.
Paṭhamaṁ bhikkhu yācitabbo. Yācitvā byattena bhikkhunā
paṭibalena saṅgho ñāpetabbo suṇātu me bhante saṅgho yadi
saṅghassa pattakallaṁ saṅgho itthannāmaṁ bhikkhuṁ rūpiyachaḍḍakaṁ
sammanneyya. Esā ñatti. Suṇātu me bhante saṅgho
saṅgho itthannāmaṁ bhikkhuṁ rūpiyachaḍḍakaṁ sammannati. Yassāyasmato
khamati itthannāmassa bhikkhuno rūpiyachaḍḍakassa sammati so
tuṇhassa yassa nakkhamati so bhāseyya. Sammato saṅghena
itthannāmo bhikkhu rūpiyachaḍḍako. Khamati saṅghassa tasmā
tuṇhī. Evametaṁ dhārayāmīti. Tena sammatena bhikkhunā animittaṁ
katvā pātetabbaṁ. Sace nimittaṁ katvā pāteti āpatti
dukkaṭassa.

[107] Rūpiye rūpiyasaññī rūpiyaṁ paṭiggaṇhāti nissaggiyaṁ
pācittiyaṁ. Rūpiye vematiko rūpiyaṁ paṭiggaṇhāti nissaggiyaṁ
pācittiyaṁ. Rūpiye arūpiyasaññī rūpiyaṁ paṭiggaṇhāti nissaggiyaṁ
pācittiyaṁ. Arūpiye rūpiyasaññī āpatti dukkaṭassa. Arūpiye
vematiko āpatti dukkaṭassa. Arūpiye arūpiyasaññī anāpatti.

[108] Anāpatti ajjhārāme vā ajjhāvasathe vā uggahetvā
Vā uggahāpetvā vā nikkhipati yassa bhavissati so harissatīti
ummattakassa ādikammikassāti.
Aṭṭhamasikkhāpadaṁ niṭṭhitaṁ
-------
Navamasikkhāpadaṁ

[109] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā bhikkhū
nānappakārakaṁ rūpiyasaṁvohāraṁ samāpajjanti. Manussā ujjhāyanti
khīyanti vipācenti kathaṁ hi nāma samaṇā sakyaputtiyā nānappakārakaṁ
rūpiyasaṁvohāraṁ samāpajjissanti seyyathāpi gihī kāmabhoginoti.
Assosuṁ kho bhikkhū tesaṁ manussānaṁ ujjhāyantānaṁ khīyantānaṁ
vipācentānaṁ. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma chabbaggiyā bhikkhū nānappakārakaṁ
rūpiyasaṁvohāraṁ samāpajjissantīti. Athakho te bhikkhū bhagavato
etamatthaṁ ārocesuṁ. Saccaṁ kira tumhe bhikkhave nānappakārakaṁ
rūpiyasaṁvohāraṁ samāpajjathāti. Saccaṁ bhagavāti. Vigarahi buddho
bhagavā kathaṁ hi nāma tumhe moghapurisā nānappakārakaṁ
rūpiyasaṁvohāraṁ samāpajjissatha netaṁ moghapurisā appasannānaṁ vā
pasādāya pasananānaṁ vā bhiyyobhāvāya .pe. Evañca pana bhikkhave
imaṁ sikkhāpadaṁ uddiseyyātha yo pana bhikkhu nānappakārakaṁ
rūpiyasaṁvohāraṁ samāpajjeyya nissaggiyaṁ pācittiyanti.

[110] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Nānappakārakaṁ nāma kataṁpi
Akataṁpi katākataṁpi. Kataṁ nāma sīsūpagaṁ gīvūpagaṁ hatthūpagaṁ pādūpagaṁ
kaṭūpagaṁ. Akataṁ nāma ghanakaṁ vuccati. Katākataṁ nāma tadubhayaṁ.
Rūpiyaṁ nāma satthuvaṇṇo kahāpaṇo lohamāsako dārumāsako
jatumāsako ye vohāraṁ gacchanti. Samāpajjeyyāti katena kataṁ
cetāpeti nissaggiyaṁ hoti. Katena akataṁ cetāpeti nissaggiyaṁ
hoti. Katena katākataṁ cetāpeti nissaggiyaṁ hoti. Akatena kataṁ
cetāpeti nissaggiyaṁ hoti. Akatena akataṁ cetāpeti nissaggiyaṁ
hoti. Akatena katākataṁ cetāpeti nissaggiyaṁ hoti. Katākatena
kataṁ cetāpeti nissaggiyaṁ hoti. Katākatena akataṁ cetāpeti
nissaggiyaṁ hoti. Katākatena katākataṁ cetāpeti nissaggiyaṁ hoti.
Saṅghamajjhe nissajjitabbaṁ. Evañca pana bhikkhave nissajjitabbaṁ.
Tena bhikkhunā saṅghaṁ upasaṅkamitvā ekaṁsaṁ uttarāsaṅgaṁ karitvā
vuḍḍhānaṁ bhikkhūnaṁ pāde vanditvā ukkuṭikaṁ nisīditvā añjaliṁ
paggahetvā evamassa vacanīyo ahaṁ bhante nānappakārakaṁ
rūpiyasaṁvohāraṁ samāpajjiṁ idaṁ me nissaggiyaṁ imāhaṁ saṅghassa
nissajjāmīti. Nissajjitvā āpatti desetabbā. Byattena
bhikkhunā paṭibalena āpatti paṭiggahetabbā. Sace tattha āgacchati
ārāmiko vā upāsako vā so vattabbo āvuso imaṁ
jānāhīti. Sace so bhaṇati iminā kiṁ āhariyatūti. Na vattabbo
Imaṁ vā imaṁ vā āharāti. Kappiyaṁ ācikkhitabbaṁ sappi vā telaṁ vā
madhu vā phāṇitaṁ vā. Sace so tena parivaṭṭitvā kappiyaṁ āharati
rūpiyacetāpakaṁ ṭhapetvā sabbeheva paribhuñjitabbaṁ. Evañcetaṁ
labhetha iccetaṁ kusalaṁ no ce labhetha so vattabbo āvuso
imaṁ chaḍḍehīti. Sace so chaḍḍeti iccetaṁ kusalaṁ no ce
chaḍḍeti pañcahaṅgehi samannāgato bhikkhu rūpiyachaḍḍako sammannitabbo
yo na chandāgatiṁ gaccheyya na dosāgatiṁ gaccheyya na
mohāgatiṁ gaccheyya na bhayāgatiṁ gaccheyya chaḍḍitāchaḍḍitañca
jāneyya. Evañca pana bhikkhave sammannitabbo. Paṭhamaṁ bhikkhu
yācitabbo. Yācitvā byattena bhikkhunā paṭibalena saṅgho
ñāpetabbo suṇātu me bhante saṅgho yadi saṅghassa pattakallaṁ
saṅgho itthannāmaṁ bhikkhuṁ rūpiyachaḍḍakaṁ sammanneyya. Esā ñatti.
Suṇātu me bhante saṅgho saṅgho itthannāmaṁ bhikkhuṁ rūpiyachaḍḍakaṁ
sammannati. Yassāyasmato khamati itthannāmassa bhikkhuno rūpiyachaḍḍakassa
sammati so tuṇhassa yassa nakkhamati so bhāseyya.
Sammato saṅghena itthannāmo bhikkhu rūpiyachaḍḍako. Khamati saṅghassa
tasmā tuṇhī. Evametaṁ dhārayāmīti. Tena sammatena bhikkhunā
animittaṁ katvā pātetabbaṁ. Sace nimittaṁ katvā pāteti āpatti
dukkaṭassa.

[111] Rūpiye rūpiyasaññī rūpiyaṁ cetāpeti nissaggiyaṁ pācittiyaṁ.
Rūpiye vematiko rūpiyaṁ cetāpeti nissaggiyaṁ pācittiyaṁ. Rūpiye
arūpiyasaññī rūpiyaṁ cetāpeti nissaggiyaṁ pācittiyaṁ. Arūpiye
rūpiyasaññī rūpiyaṁ cetāpeti nissaggiyaṁ pācittiyaṁ. Arūpiye
vematiko rūpiyaṁ cetāpeti nissaggiyaṁ pācittiyaṁ. Arūpiye
arūpiyasaññī rūpiyaṁ cetāpeti nissaggiyaṁ pācittiyaṁ. Arūpiye
rūpiyasaññī āpatti dukkaṭassa. Arūpiye vematiko āpatti
dukkaṭassa. Arūpiye arūpiyasaññī anāpatti.