[112] Anāpatti ummattakassa ādikammikassāti.
Navamasikkhāpadaṁ niṭṭhitaṁ.
-------
Dasamasikkhāpadaṁ

[113] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena āyasmā
upanando sakyaputto paṭṭho hoti cīvarakammaṁ kātuṁ. So
paṭapilotikānaṁ saṅghāṭiṁ karitvā surattaṁ suparikammakataṁ katvā pārupi.
Athakho aññataro paribbājako mahagghaṁ paṭaṁ pārupitvā yenāyasmā
upanando sakyaputto tenupasaṅkami upasaṅkamitvā āyasmantaṁ
upanandaṁ sakyaputtaṁ etadavoca sundarā kho tyāyaṁ āvuso
saṅghāṭi 1 dehi me paṭenāti. Jānāhi āvusoti. Āmāvuso
jānāmīti. Handāvusoti adāsi. Athakho so paribbājako taṁ
saṅghāṭiṁ pārupitvā paribbājakārāmaṁ agamāsi. Paribbājakā taṁ
paribbājakaṁ etadavocuṁ sundarā kho tyāyaṁ āvuso saṅghāṭi kuto
tayā laddhāti. Tena me āvuso paṭena parivaṭṭitāti 2 . Katihipi
tyāyaṁ āvuso saṅghāṭi bhavissati soyeva te paṭo varoti.
Athakho so paribbājako saccaṁ kho paribbājakā āhaṁsu katihipi
myāyaṁ saṅghāṭi bhavissati soyeva me paṭo varoti yenāyasmā
upanando sakyaputto tenupasaṅkami upasaṅkamitvā āyasmantaṁ
upanandaṁ sakyaputtaṁ etadavoca handa te āvuso saṅghāṭiṁ 3
dehi me paṭanti. Nanu tvaṁ āvuso mayā vutto jānāhi
1 Yu. saṅghāṭī. 2 Ma. Yu. sabbattha parivattitātīti dissati. 3 Ma. saṅghāṭi.
Āvusoti nāhaṁ dassāmīti. Athakho so paribbājako ujjhāyati
khīyati vipāceti gihipi 1 naṁ gihissa vippaṭisārissa deti 2 kiṁ pana
pabbajito pabbajitassa na dassatīti. Assosuṁ kho bhikkhū tassa
paribbājakassa ujjhāyantassa khīyantassa vipācentassa. Ye te
bhikkhū appicchā .pe. Te ujjhāyanti khīyanti vipācenti kathaṁ
hi nāma āyasmā upanando sakyaputto paribbājakena saddhiṁ
kayavikkayaṁ samāpajjissatīti. Athakho te bhikkhū bhagavato etamatthaṁ
ārocesuṁ. Saccaṁ kira tvaṁ upananda paribbājakena saddhiṁ kayavikkayaṁ
samāpajjasīti. Saccaṁ bhagavāti. Vigarahi buddho bhagavā kathaṁ hi nāma
tvaṁ moghapurisa paribbājakena saddhiṁ kayavikkayaṁ samāpajjissasi
netaṁ moghapurisa appasannānaṁ vā pasādāya pasannānaṁ vā
bhiyyobhāvāya .pe. Evañca pana bhikkhave imaṁ sikkhāpadaṁ
uddiseyyātha yo pana bhikkhu nānappakārakaṁ kayavikkayaṁ samāpajjeyya
nissaggiyaṁ pācittiyanti.

[114] Yo panāti yo yādiso .pe. Bhikkhūti .pe. Ayaṁ
imasmiṁ atthe adhippeto bhikkhūti. Nānappakārakaṁ nāma
cīvarapiṇḍapātasenāsanagilānapaccayabhesajjaparikkhārā antamaso cuṇṇapiṇḍopi
dantakaṭṭhaṁpi dasikasuttaṁpi. Kayavikkayaṁ samāpajjeyyāti
1 Ma. gihīpi. Yu. gihī naṁpi. gihīpi naṁ gihissāti ettha nanti nāmatthe
nipāto. gihipi nāma gihissāti vuttaṁ hotīti tabbaṇṇanā. 2 Ma. Yu. denti.
Iminā imaṁ dehi iminā imaṁ āhara iminā imaṁ parivaṭṭehi 1
iminā imaṁ cetāpehīti ajjhācarati āpatti dukkaṭassa yato
kayitañca hoti vikkītañca 2 attano bhaṇḍaṁ parahatthagataṁ parabhaṇḍaṁ
attano hatthagataṁ nissaggiyaṁ hoti nissajjitabbaṁ saṅghassa vā
gaṇassa vā puggalassa vā. Evañca pana bhikkhave
nissajjitabbaṁ .pe. Ahaṁ bhante nānappakārakaṁ kayavikkayaṁ samāpajjiṁ
idaṁ me nissaggiyaṁ imāhaṁ saṅghassa nissajjāmīti .pe.
Dadeyyāti .pe. Dadeyyunti .pe. Āyasmato dammīti.

[115] Kayavikkaye kayavikkayasaññī nissaggiyaṁ pācittiyaṁ.
Kayavikkaye vematiko nissaggiyaṁ pācittiyaṁ. Kayavikkaye
nakayavikkayasaññī nissaggiyaṁ pācittiyaṁ. Nakayavikkaye kayavikkayasaññī
āpatti dukkaṭassa. Nakayavikkaye vematiko āpatti dukkaṭassa.
Nakayavikkaye nakayavikkayasaññī anāpatti.

[116] Anāpatti agghaṁ pucchati kappiyakārakassa ācikkhati
idaṁ amhākaṁ atthi amhākañca iminā ca iminā ca atthoti
bhaṇati ummattakassa ādikammikassāti.
Dasamasikkhāpadaṁ niṭṭhitaṁ 3 .
Kosiyavaggo dutiyo.
1 Ma. Yu. sabbattha parivattehīti dissati. 2 Ma. Yu. vikkayitañca.
3 Ma. kayavikkayasikkhāpadaṁ niṭṭhitaṁ dasamaṁ.
Tassuddānaṁ
kosiyā 1 suddhadvebhāgā chabbassāni nisīdanaṁ
dve ca lomāni uggaṇhe ubho nānappakārakāti.
-------
1 Yu. kosiya ....
Pattavaggassa paṭhamasikkhāpadaṁ

[117] Tena samayena buddho bhagavā sāvatthiyaṁ viharati jetavane
anāthapiṇḍikassa ārāme. Tena kho pana samayena chabbaggiyā
bhikkhū bahū patte sannicayaṁ karonti. Manussā vihāracārikaṁ
āhiṇḍantā passitvā ujjhāyanti khīyanti vipācenti kathaṁ hi
nāma samaṇā sakyaputtiyā bahū patte sannicayaṁ karissanti
pattavaṇijjaṁ vā samaṇā sakyaputtiyā karissanti āmattikāpaṇaṁ vā
pasāressantīti. Assosuṁ kho bhikkhū tesaṁ manussānaṁ ujjhāyantānaṁ
khīyantānaṁ vipācentānaṁ. Ye te bhikkhū appicchā .pe. Te
ujjhāyanti khīyanti vipācenti kathaṁ hi nāma chabbaggiyā bhikkhū
atirekapattaṁ dhāressantīti. Athakho te bhikkhū bhagavato etamatthaṁ
ārocesuṁ. Saccaṁ kira tumhe bhikkhave atirekapattaṁ dhārethāti.
Saccaṁ bhagavāti. Vigarahi buddho bhagavā kathaṁ hi nāma tumhe
moghapurisā atirekapattaṁ dhāressatha netaṁ moghapurisā appasannānaṁ
vā pasādāya pasannānaṁ vā bhiyyobhāvāya .pe. Evañca pana
bhikkhave imaṁ sikkhāpadaṁ uddiseyyātha yo pana bhikkhu atirekapattaṁ
dhāreyya nissaggiyaṁ pācittiyanti. Evañcidaṁ bhagavatā bhikkhūnaṁ
sikkhāpadaṁ paññattaṁ hoti.

[118] Tena kho pana samayena āyasmato ānandassa atirekapatto
Uppanno hoti. Āyasmā ca ānando taṁ pattaṁ āyasmato
sārīputtassa dātukāmo hoti. Āyasmā ca sārīputto sākete
viharati. Athakho āyasmato ānandassa etadahosi bhagavatā
sikkhāpadaṁ paññattaṁ na atirekapatto dhāretabboti ayañca me
atirekapatto uppanno ahañcimaṁ pattaṁ āyasmato sārīputtassa
dātukāmo āyasmā ca sārīputto sākete viharati kathaṁ nu
kho mayā paṭipajjitabbanti. Athakho āyasmā ānando bhagavato
etamatthaṁ ārocesi. Kīvaciraṁ panānanda sārīputto āgacchissatīti.
Navamaṁ vā bhagavā divasaṁ dasamaṁ vāti. Athakho bhagavā etasmiṁ nidāne
etasmiṁ pakaraṇe dhammiṁ kathaṁ katvā bhikkhū āmantesi anujānāmi
bhikkhave dasāhaparamaṁ atirekapattaṁ dhāretuṁ evañca pana bhikkhave
imaṁ sikkhāpadaṁ uddiseyyātha dasāhaparamaṁ atirekapatto dhāretabbo
taṁ atikkāmayato nissaggiyaṁ pācittiyanti.

[119] Dasāhaparamanti dasāhaparamatā dhāretabbo. Atirekapatto
nāma anadhiṭṭhito avikappito. Patto nāma dve pattā
ayopatto mattikāpatto 1 . Tayo pattassa vaṇṇā ukkaṭṭho
patto majjhimo patto omako patto. Ukkaṭṭho nāma patto
aḍḍhāḷhakodanaṁ gaṇhāti catubhāgaṁ khādanīyaṁ 2 tadūpiyaṁ byañjanaṁ.
Majjhimo nāma patto nāḷikodanaṁ gaṇhāti catubhāgaṁ khādanīyaṁ
1 Ma. Yu. itisaddo dissati. 2 Ma. Yu. khādanaṁ. evamuparipi.
Tadūpiyaṁ byañjanaṁ. Omako nāma patto patthodanaṁ gaṇhāti
catubhāgaṁ khādanīyaṁ tadūpiyaṁ byañjanaṁ. Tato ukkaṭṭho apatto
omako apatto.

[120] Taṁ atikkāmayato nissaggiyo hoti 1 ekādase
aruṇuggamane nissaggiyo hoti nissajjitabbo saṅghassa vā gaṇassa
vā puggalassa vā. Evañca pana bhikkhave nissajjitabbo.

[121] Tena bhikkhunā saṅghaṁ upasaṅkamitvā ekaṁsaṁ uttarāsaṅgaṁ
karitvā vuḍḍhānaṁ bhikkhūnaṁ pāde vanditvā ukkuṭikaṁ nisīditvā
añjaliṁ paggahetvā evamassa vacanīyo ayaṁ me bhante patto
dasāhātikkanto nissaggiyo imāhaṁ saṅghassa nissajjāmīti.
Nissajjitvā āpatti desetabbā. Byattena bhikkhunā paṭibalena
āpatti paṭiggahetabbā. Nissaṭṭhapatto dātabbo suṇātu
me bhante saṅgho ayaṁ patto itthannāmassa bhikkhuno nissaggiyo
saṅghassa nissaṭṭho. Yadi saṅghassa pattakallaṁ saṅgho imaṁ pattaṁ
itthannāmassa bhikkhuno dadeyyāti.