[403] Evamme sutaṁ ekaṁ samayaṁ bhagavā kosalesu cārikaṁ
carati mahatā bhikkhusaṅghena saddhiṁ. Atha kho bhagavā maggā
okkamma aññatarasmiṁ padese sitaṁ pātvākāsi. Atha kho
āyasmato ānandassa etadahosi ko nu kho hetu ko paccayo
bhagavato sitassa pātukammāya na akāraṇena tathāgatā sitaṁ pātukarontīti.
Atha kho āyasmā ānando ekaṁsaṁ uttarāsaṅgaṁ 1
karitvā yena bhagavā tenañjalimpaṇāmetvā bhagavantaṁ etadavoca
ko nu kho bhante hetu ko paccayo bhagavato sitassa pātukammāya
na akāraṇena tathāgatā sitaṁ pātukarontīti.

[404] Bhūtapubbaṁ ānanda imasmiṁ padese vebhaḷigaṁ 2 nāma
nigamo 3 ahosi iddho ceva phīto ca bahujano ākiṇṇamanusso.
Vebhaḷigaṁ kho ānanda nigamaṁ kassapo bhagavā arahaṁ sammāsambuddho
upanissāya vihāsi. Idha sudaṁ ānanda kassapassa bhagavato arahato
sammāsambuddhassa ārāmo ahosi. Idha sudaṁ ānanda kassapo
bhagavā arahaṁ sammāsambuddho nisinno bhikkhusaṅghaṁ ovadatīti.
1 Sī. Yu. cīvaraṁ. 2 Sī. Ma. vebhaḷiṅgaṁ. 3 Yu. gāmanigamo.

[405] Atha kho āyasmā ānando catuguṇaṁ saṅghāṭiṁ
paññāpetvā bhagavantaṁ etadavoca tenahi bhante bhagavā nisīdatu
evāyaṁ bhūmippadeso dvīhi arahantehi sammāsambuddhehi paribhutto
bhavissatīti. Nisīdi bhagavā paññatte āsane. Nisajja kho
bhagavā āyasmantaṁ ānandaṁ āmantesi bhūtapubbaṁ ānanda imasmiṁ
padese vebhaḷigaṁ nāma nigamo ahosi iddho ceva phīto ca bahujano
ākiṇṇamanusso. Vebhaḷigaṁ kho ānanda nigamaṁ kassapo bhagavā
arahaṁ sammāsambuddho upanissāya vihāsi. Idha sudaṁ ānanda
kassapassa bhagavato arahato sammāsambuddhassa ārāmo ahosi.
Idha sudaṁ ānanda kassapo bhagavā arahaṁ sammāsambuddho nisinno 1
bhikkhusaṅghaṁ ovadati. Vebhaḷige 2 kho ānanda nigame ghaṭikāro nāma
kumbhakāro kassapassa bhagavato arahato sammāsambuddhassa upaṭṭhāko
ahosi aggupaṭṭhāko. Ghaṭikārassa kho ānanda kumbhakārassa
jotipālo nāma māṇavo sahāyo ahosi piyasahāyo. Atha
kho ānanda ghaṭikāro kumbhakāro jotipālaṁ māṇavaṁ ānantesi
āyāma samma jotipāla kassapaṁ bhagavantaṁ arahantaṁ sammāsambuddhaṁ
dassanāya upasaṅkamissāma sādhusammatañhi me tassa bhagavato
dassanaṁ arahato sammāsambuddhassāti.

[406] Evaṁ vutte ānanda jotipālo māṇavo ghaṭikāraṁ
kumbhakāraṁ etadavoca alaṁ samma ghaṭikāra kiṁ pana tena muṇḍakena
1 Yu. nisinnako. 2 Yu. vebhaḷiṅge.
Samaṇakena diṭṭhenāti. Dutiyampi kho ānanda .pe. Tatiyampi
kho ānanda ghaṭikāro kumbhakāro jotipālaṁ māṇavaṁ etadavoca
āyāma samma jotipāla kassapaṁ bhagavantaṁ arahantaṁ sammāsambuddhaṁ
dassanāya upasaṅkamissāma sādhusammatañhi me tassa bhagavato
dassanaṁ arahato sammāsambuddhassāti. Tatiyampi kho ānanda
jotipālo māṇavo ghaṭikāraṁ kumbhakāraṁ etadavoca alaṁ samma
ghaṭikāra kiṁ pana tena muṇḍakena samaṇakena diṭṭhenāti.
Tenahi samma jotipāla sottisinānaṁ 1 ādāya nadiṁ gamissāma
sināyitunti. Evaṁ sammāti kho ānanda jotipālo māṇavo
ghaṭikārassa kumbhakārassa paccassosi.

[407] Atha kho ānanda ghaṭikāro ca kumbhakāro jotipālo
ca māṇavo sottisinānaṁ ādāya nadiṁ agamaṁsu sināyituṁ. Atha
kho ānanda ghaṭikāro kumbhakāro jotipālaṁ māṇavaṁ āmantesi
ayaṁ samma jotipāla kassapassa bhagavato arahato sammāsambuddhassa
avidūre ārāmo āyāma samma jotipāla kassapaṁ bhagavantaṁ
arahantaṁ sammāsambuddhaṁ dassanāya upasaṅkamissāma sādhusammatañhi
me tassa bhagavato dassanaṁ arahato sammāsambuddhassāti.

[408] Evaṁ vutte ānanda jotipālo māṇavo ghaṭikāraṁ
kumbhakāraṁ etadavoca alaṁ samma ghaṭikāra kiṁ pana tena muṇḍakena
1 Sī. Yu. sottiṁ sināniṁ.
Samaṇakena diṭṭhenāti. Dutiyampi kho ānanda .pe. Tatiyampi
kho ānanda ghaṭikāro kumbhakāro jotipālaṁ māṇavaṁ etadavoca
ayaṁ samma jotipāla kassapassa bhagavato arahato sammāsambuddhassa
avidūre ārāmo āyāma samma jotipāla kassapaṁ bhagavantaṁ
arahantaṁ sammāsambuddhaṁ dassanāya upasaṅkamissāma sādhusammatañhi
me tassa bhagavato dassanaṁ arahato sammāsambuddhassāti. Tatiyampi
kho ānanda jotipālo māṇavo ghaṭikāraṁ kumbhakāraṁ etadavoca alaṁ
samma ghaṭikāra kiṁ pana tena muṇḍakena samaṇakena diṭṭhenāti.

[409] Atha kho ānanda ghaṭikāro kumbhakāro jotipālaṁ
māṇavaṁ ovaṭṭikāya parāmasitvā etadavoca ayaṁ samma jotipāla
kassapassa bhagavato arahato sammāsambuddhassa avidūre ārāmo
āyāma samma jotipāla kassapaṁ bhagavantaṁ arahantaṁ sammāsambuddhaṁ
dassanāya upasaṅkamissāma sādhusammatañhi me tassa bhagavato
dassanaṁ arahato sammāsambuddhassāti. Atha kho ānanda jotipālo
māṇavo ovaṭṭikaṁ viniveṭhetvā ghaṭikāraṁ kumbhakāraṁ etadavoca alaṁ
samma ghaṭikāra kiṁ pana tena muṇḍakena samaṇakena diṭṭhenāti.
Atha kho ānanda ghaṭikāro kumbhakāro jotipālaṁ māṇavaṁ sīsanhātaṁ
kesesu parāmasitvā etadavoca ayaṁ samma jotipāla kassapassa
bhagavato arahato sammāsambuddhassa avidūre ārāmo āyāma
samma jotipāla kassapaṁ bhagavantaṁ arahantaṁ sammāsambuddhaṁ dassanāya
Upasaṅkamissāma sādhusammatañhi me tassa bhagavato dassanaṁ
arahato sammāsambuddhassāti. Atha kho ānanda jotipālassa
māṇavassa etadahosi acchariyaṁ vata bho abbhūtaṁ vata bho yatra
hi nāmāyaṁ ghaṭikāro kumbhakāro ittarajacco samāno amhākaṁ
sīsanhātānaṁ kesesu parāmasitvā 1 maññissati na vatidaṁ orakaṁ
maññe bhavissatīti. Ghaṭikāraṁ kumbhakāraṁ etadavoca yāvetadohipi
samma ghaṭikārāti. Yāvetadohipi samma jotipāla tathā hi
pana me sādhu samma taṁ tassa bhagavato dassanaṁ arahato sammāsambuddhassāti.
Tenahi samma ghaṭikāra muñca gamissāmāti.

[410] Atha kho ānanda ghaṭikāro ca kumbhakāro jotipālo
ca māṇavo yena kassapo bhagavā arahaṁ sammāsambuddho tenupasaṅkamiṁsu
upasaṅkamitvā ghaṭikāro kumbhakāro kassapaṁ bhagavantaṁ
arahantaṁ sammāsambuddhaṁ abhivādetvā ekamantaṁ nisīdi. Jotipālo
pana māṇavo kassapena bhagavatā arahatā sammāsambuddhena saddhiṁ
sammodi sammodanīyaṁ kathaṁ sārāṇīyaṁ vītisāretvā ekamantaṁ
nisīdi. Ekamantaṁ nisinno kho 2 ghaṭikāro kumbhakāro kassapaṁ
bhagavantaṁ arahantaṁ sammāsambuddhaṁ etadavoca ayaṁ me bhante
jotipālo māṇavo sahāyo piyasahāyo imassa bhagavā dhammaṁ
desetūti.

[411] Atha kho ānanda kassapo bhagavā arahaṁ sammāsambuddho
1 Yu. parāmasitabbaṁ. 2 Yu. etthantare ānandāti ālapanaṁ dissati.
Ghaṭikārañca kumbhakāraṁ jotipālañca māṇavaṁ dhammiyā kathāya
sandassesi samādapesi samuttejesi sampahaṁsesi. Atha kho ānanda
ghaṭikāro ca kumbhakāro jotipālo ca māṇavo kassapena bhagavatā
arahatā sammāsambuddhena dhammiyā kathāya sandassitā samādapitā
samuttejitā sampahaṁsitā kassapassa bhagavato arahato sammāsambuddhassa
bhāsitaṁ abhinanditvā anumoditvā uṭṭhāyāsanā kassapaṁ
bhagavantaṁ arahantaṁ sammāsambuddhaṁ abhivādetvā padakkhiṇaṁ katvā
pakkamiṁsu.

[412] Atha kho ānanda jotipālo māṇavo ghaṭikāraṁ kumbhakāraṁ
etadavoca imaṁ nu tvaṁ samma ghaṭikāra dhammaṁ suṇanto
atha ca pana 1 agārasmā anagāriyaṁ pabbajasīti. Nanu ca maṁ samma
jotipāla jānāsi andhe jiṇṇe mātāpitaro posemīti. Tenahi
samma ghaṭikāra ahaṁ agārasmā anagāriyaṁ pabbajissāmīti.