[320] So kho ahaṁ bhikkhave attanā jātidhammo samāno
jātidhamme ādīnavaṁ viditvā ajātaṁ anuttaraṁ yogakkhemaṁ nibbānaṁ
pariyesamāno ajātaṁ anuttaraṁ yogakkhemaṁ nibbānaṁ ajjhagamaṁ attanā
jarādhammo samāno ... Attanā byādhidhammo samāno ... Attanā
maraṇadhammo samāno ... Attanā sokadhammo samāno ... Attanā
saṅkilesadhammo samāno saṅkilesadhamme ādīnavaṁ viditvā asaṅkiliṭṭhaṁ
anuttaraṁ yogakkhemaṁ nibbānaṁ pariyesamāno asaṅkiliṭṭhaṁ anuttaraṁ
yogakkhemaṁ nibbānaṁ ajjhagamaṁ ñāṇañca pana me dassanaṁ udapādi
akuppā me vimutti ayamantimā jāti natthidāni punabbhavoti.

[321] Tassa mayhaṁ bhikkhave etadahosi adhigato kho myāyaṁ
dhammo gambhīro duddaso duranubodho santo paṇīto atakkāvacaro
nipuṇo paṇḍitavedanīyo ālayarāmā kho panāyaṁ pajā ālayaratā
ālayasammuditā ālayarāmāya kho 1 pajāya ālayaratāya ālayasammuditāya
duddasaṁ idaṁ ṭhānaṁ yadidaṁ idappaccayatāpaṭiccasamuppādo idampi
kho ṭhānaṁ duddasaṁ yadidaṁ sabbasaṅkhārasamatho sabbūpadhipaṭinissaggo
1 Ma. Yu. kho pana.
Taṇhakkhayo virāgo nirodho nibbānaṁ ahañceva kho pana dhammaṁ
deseyyaṁ pare ca me na ājāneyyuṁ so mamassa kilamatho sā
mamassa vihesāti. Apissu maṁ bhikkhave imā anacchariyā gāthā
paṭibhaṁsu pubbe assutapubbā
kicchena me adhigataṁ halandāni pakāsituṁ
rāgadosaparetehi nāyaṁ dhammo susambudho
paṭisotagāmiṁ nipuṇaṁ gambhīraṁ duddasaṁ aṇuṁ
rāgarattā na dakkhanti tamokkhandhena āvutāti.
Itiha me bhikkhave paṭisañcikkhato appossukkatāya cittaṁ namati
no dhammadesanāyāti.

[322] Atha kho bhikkhave brahmuno sahampatissa mama cetasā
cetoparivitakkamaññāya etadahosi nassati vata bho loko vinassati
vata bho loko yatra hi nāma tathāgatassa arahato sammāsambuddhassa
appossukkatāya cittaṁ namati no dhammadesanāyāti. Atha kho
bhikkhave brahmā sahampati seyyathāpi nāma balavā puriso sammiñjitaṁ
vā bāhaṁ pasāreyya pasāritaṁ vā bāhaṁ sammiñjeyya evameva 1 kho 2
brahmaloke antarahito mama purato pāturahosi. Atha kho bhikkhave
brahmā sahampati ekaṁsaṁ uttarāsaṅgaṁ karitvā yenāhaṁ
tenañjalimpaṇāmetvā maṁ etadavoca desetu me bhante bhagavā dhammaṁ
1 Sī. Yu. evamevaṁ. 2 Ma. Yu. khoti saddo natthi.
Desetu sugato dhammaṁ santi sattā apparajakkhajātikā assavanatā
dhammassa parihāyanti bhavissanti dhammassa aññātāroti. Idamavoca
bhikkhave brahmā sahampati idaṁ vatvāna athāparaṁ etadavoca
pāturahosi magadhesu pubbe
dhammo asuddho samalehi cintito
apāpuretaṁ amatassa dvāraṁ
suṇantu dhammaṁ vimalenānubuddhaṁ
sele yathā pabbatamuddhaniṭṭhito
yathāpi passe janataṁ samantato
tathūpamaṁ dhammamayaṁ sumedha
pāsādamāruyha samantacakkhu
sokāvakiṇṇaṁ 1 janatamapetasoko
avekkhassu jātijarābhibhūtaṁ
uṭṭhehi vīra vijitasaṅgāma
satthavāha anaṇa vicara loke
desetu 2 bhagavā dhammaṁ aññātāro bhavissantīti.

[323] Atha khvāhaṁ bhikkhave brahmuno ca ajjhesanaṁ viditvā
sattesu ca kāruññataṁ paṭicca buddhacakkhunā lokaṁ volokesiṁ.
Addasaṁ kho ahaṁ bhikkhave buddhacakkhunā lokaṁ volokento satte
1 Sī. Ma. Yu. sokāvatiṇṇaṁ. 2 Sī. Ma. Yu. desassu.
Apparajakkhe mahārajakkhe tikkhindriye mudindriye svākāre dvākāre
suviññāpaye duviññāpaye appekacce paralokavajjabhayadassāvino 1
viharante 2 . Seyyathāpi nāma uppaliniyaṁ vā paduminiyaṁ vā puṇḍarīkiniyaṁ
vā appekaccāni uppalāni vā padumāni vā puṇḍarīkāni vā
udake jātāni udake saṁvaddhāni udakānuggatāni antonimuggapositāni
appekaccāni uppalāni vā padumāni vā puṇḍarīkāni vā udake
jātāni udake saṁvaddhāni udakānuggatāni samodakaṇṭhitāni appekaccāni
uppalāni vā padumāni vā puṇḍarīkāni vā udake jātāni
udake saṁvaddhāni udakaṁ accuggamma tiṭṭhanti 3 anuppalittāni udakena
evameva kho ahaṁ bhikkhave buddhacakkhunā lokaṁ volokento addasaṁ
satte apparajakkhe mahārajakkhe tikkhindriye mudindriye svākāre
dvākāre suviññāpaye duviññāpaye appekacce paralokavajjabhayadassāvino
viharante. Atha khvāhaṁ bhikkhave brahmānaṁ sahampatiṁ
gāthāya ajjhabhāsiṁ 4
apārutā tesaṁ amatassa dvārā
ye sotavanto pamuñcantu saddhaṁ
vihiṁsasaññī paguṇaṁ na bhāsiṁ
dhammaṁ paṇītaṁ manujesu brahmeti.
Atha kho bhikkhave brahmā sahampati katāvakāso khomhi bhagavatā
dhammadesanāyāti maṁ abhivādetvā padakkhiṇaṁ katvā tatthevantaradhāyi.
1 Ma. Yu. paralokavajjabhayadassāvine. 2 Ma. ito paraṁ appekacce na
paralokavajjabhayadassāvine viharanteti dissati. 3 Ma. ṭhitāni. 4 Ma. Yu. paccabhāsiṁ.

[324] Tassa mayhaṁ bhikkhave etadahosi kassa nu kho ahaṁ
paṭhamaṁ dhammaṁ deseyyaṁ ko imaṁ dhammaṁ khippameva ājānissatīti.
Tassa mayhaṁ bhikkhave etadahosi ayaṁ kho āḷāro kālāmo
paṇḍito viyatto medhāvī dīgharattaṁ apparajakkhajātiko yannūnāhaṁ
āḷārassa kālāmassa paṭhamaṁ dhammaṁ deseyyaṁ so imaṁ dhammaṁ khippameva
ājānissatīti. Atha kho maṁ bhikkhave devatā upasaṅkamitvā etadavoca 1
sattāhakālakato bhante āḷāro kālāmoti. Ñāṇañca pana me
dassanaṁ udapādi sattāhakālakato āḷāro kālāmoti. Tassa
mayhaṁ bhikkhave etadahosi mahājāniyo kho āḷāro kālāmo
sace hi so imaṁ dhammaṁ suṇeyya khippameva ājāneyyāti. Tassa
mayhaṁ bhikkhave etadahosi kassa nu kho paṭhamaṁ dhammaṁ deseyyaṁ
ko imaṁ dhammaṁ khippameva ājānissatīti. Tassa mayhaṁ bhikkhave
etadahosi ayaṁ kho uddako rāmaputto paṇḍito viyatto medhāvī
dīgharattaṁ apparajakkhajātiko yannūnāhaṁ uddakassa rāmaputtassa
paṭhamaṁ dhammaṁ deseyyaṁ so imaṁ dhammaṁ khippameva ājānissatīti.
Atha kho maṁ bhikkhave devatā upasaṅkamitvā etadavoca 2 abhidosakālakato
bhante uddako rāmaputtoti. Ñāṇañca pana me
dassanaṁ udapādi abhidosakālakato uddako rāmaputtoti. Tassa
mayhaṁ bhikkhave etadahosi mahājāniyo kho uddako rāmaputto
sace hi so imaṁ dhammaṁ suṇeyya khippameva ājāneyyāti. Tassa
1-2 Yu. etadavocuṁ.
Mayhaṁ bhikkhave etadahosi kassa nu kho ahaṁ paṭhamaṁ dhammaṁ deseyyaṁ
ko imaṁ dhammaṁ khippameva ājānissatīti. Tassa mayhaṁ bhikkhave
etadahosi bahukārā kho me pañcavaggiyā bhikkhū ye maṁ padhānapahitattaṁ
upaṭṭhahiṁsu yannūnāhaṁ pañcavaggiyānaṁ bhikkhūnaṁ paṭhamaṁ dhammaṁ
deseyyanti. Tassa mayhaṁ bhikkhave etadahosi kahaṁ nu kho
etarahi pañcavaggiyā bhikkhū viharantīti. Addasaṁ kho bhikkhave
dibbena cakkhunā visuddhena atikkantamānusakena pañcavaggiye bhikkhū
bārāṇasiyaṁ viharante isipatane migadāye. Atha khvāhaṁ bhikkhave
uruvelāyaṁ yathābhirantaṁ viharitvā yena bārāṇasī tena cārikaṁ pakkāmiṁ.

[325] Addasā kho maṁ bhikkhave upako ājīvako antarā ca
gayaṁ antarā ca bodhiṁ addhānamaggapaṭipannaṁ disvāna maṁ etadavoca
vippasannāni kho te āvuso indriyāni parisuddho chavivaṇṇo
pariyodāto kaṁsi tvaṁ āvuso uddissa pabbajito ko vā te
satthā kassa vā taṁ dhammaṁ rocesīti. Evaṁ vutte ahaṁ bhikkhave
upakaṁ ājīvakaṁ gāthāya 1 ajjhabhāsiṁ
sabbābhibhū sabbavidūhamasmi
sabbesu dhammesu anūpalitto
sabbañjaho taṇhakkhaye vimutto
sayaṁ abhiññāya kamuddiseyyaṁ
1 Ma. Yu. gāthāhi.
Na me ācariyo atthi sadiso me na vijjati
sadevakasmi lokasmiṁ natthi me paṭipuggalo
ahañhi arahā loke ahaṁ satthā anuttaro
ekomhi sammāsambuddho sītibhūtosmi nibbuto
dhammacakkaṁ pavattetuṁ gacchāmi kāsinaṁ puraṁ
andhabhūtasmi lokasmiṁ āhaññiṁ 1 amatadundubhinti.
Yathā kho tvaṁ āvuso paṭijānāsi arahasi anantajinoti.
Mādisā ve jinā honti ye pattā āsavakkhayaṁ
jitā me pāpakā dhammā tasmāhaṁ upaka jinoti.
Evaṁ vutte bhikkhave so upako huveyyāvusoti 2 vatvā sīsaṁ okampetvā
ummaggaṁ gahetvā pakkāmi.

[326] Atha khvāhaṁ bhikkhave anupubbena cārikañcaramāno yena
bārāṇasī yena isipatanaṁ migadāyo yena pañcavaggiyā bhikkhū
tenupasaṅkamiṁ. Addasaṁsu 3 kho maṁ bhikkhave pañcavaggiyā bhikkhū
dūratova āgacchantaṁ disvāva aññamaññaṁ saṇṭhapesuṁ ayaṁ kho
āvuso samaṇo gotamo āgacchati bāhulliko padhānavibbhanto
āvatto bāhullāya so neva abhivādetabbo na paccuṭṭhātabbo
nāssa pattacīvaraṁ paṭiggahetabbaṁ apica kho āsanaṁ ṭhapetabbaṁ sace
ākaṅkhissati nisīdissatīti. Yathā yathā kho ahaṁ bhikkhave upasaṅkamiṁ 4
1 Ma. Yu. āhañchaṁ. 2. Ma. hupeyyapāvusoti. Yu. huveyyapāvusoti.
3 Yu. addasāsuṁ. 4 Yu. upasaṅkamāmi.
Tathā tathā pañcavaggiyā bhikkhū nāsakkhiṁsu sakāya katikāya saṇṭhātuṁ
appekacce maṁ paccuggantvā pattacīvaraṁ paṭiggahesuṁ appekacce
āsanaṁ paññāpesuṁ appekacce pādodakaṁ upaṭṭhapesuṁ apica
kho maṁ nāmena ca āvusovādena ca samudācaranti. [1]- Ahaṁ bhikkhave
pañcavaggiye bhikkhū etadavocaṁ mā bhikkhave tathāgataṁ nāmena ca
āvusovādena ca samudācarittha 2 arahaṁ bhikkhave tathāgato sammāsambuddho
odahatha bhikkhave sotaṁ amatamadhigataṁ ahamanusāsāmi ahaṁ dhammaṁ desemi
yathānusiṭṭhaṁ 3 paṭipajjamānā nacirasseva yassatthāya kulaputtā
sammadeva agārasmā anagāriyaṁ pabbajanti tadanuttaraṁ
brahmacariyapariyosānaṁ diṭṭheva dhamme sayaṁ abhiññā sacchikatvā
upasampajja viharissathāti. Evaṁ vutte bhikkhave pañcavaggiyā
bhikkhū maṁ etadavocuṁ tāyapi kho tvaṁ āvuso gotama ariyāya
tāya paṭipadāya tāya dukkarakārikāya nājjhagamā uttari manussadhammā
alamariyañāṇadassanavisesaṁ kiṁ pana tvaṁ etarahi bāhulliko padhānavibbhanto
āvatto bāhullāya adhigamissasi uttari manussadhammā
alamariyañāṇadassanavisesanti. Evaṁ vutte ahaṁ bhikkhave pañcavaggiye
bhikkhū etadavocaṁ na bhikkhave tathāgato bāhulliko na padhānavibbhanto
na āvatto bāhullāya arahaṁ bhikkhave tathāgato sammāsambuddho
odahatha bhikkhave sotaṁ amatamadhigataṁ ahamanusāsāmi ahaṁ dhammaṁ
desemi yathānusiṭṭhaṁ paṭipajjamānā nacirasseva yassatthāya
1 Ma. Yu. evaṁ vutteti dve pāṭhā dissanti. 2 Ma. samudācaratha.
3 Ma. Yu. ito paraṁ tathāsaddo dissati.
Kulaputtā sammadeva agārasmā anagāriyaṁ pabbajanti tadanuttaraṁ
brahmacariyapariyosānaṁ diṭṭheva dhamme sayaṁ abhiññā sacchikatvā
upasampajja viharissathāti. Dutiyampi kho bhikkhave pañcavaggiyā
bhikkhū maṁ etadavocuṁ tāyapi kho tvaṁ *- āvuso gotama ariyāya
tāya paṭipadāya tāya dukkarakārikāya nājjhagamā uttari manussadhammā
alamariyañāṇadassanavisesaṁ kiṁ pana tvaṁ etarahi bāhulliko
padhānavibbhanto āvatto bāhullāya adhigamissasi uttari manussadhammā
alamariyañāṇadassanavisesanti. Dutiyampi kho ahaṁ bhikkhave pañcavaggiye
bhikkhū etadavocaṁ na bhikkhave tathāgato bāhulliko .pe.
Upasampajja viharissathāti. Tatiyampi kho bhikkhave pañcavaggiyā bhikkhū
maṁ etadavocuṁ tāyapi kho tvaṁ āvuso gotama ariyāya tāya
paṭipadāya tāya dukkarakārikāya nājjhagamā uttari manussadhammā
alamariyañāṇadassanavisesaṁ kiṁ pana tvaṁ etarahi bāhulliko
padhānavibbhanto āvatto bāhullāya adhigamissasi uttari manussadhammā
alamariyañāṇadassanavisesanti. Evaṁ vutte ahaṁ bhikkhave pañcavaggiye
bhikkhū etadavocaṁ abhijānātha me no tumhe bhikkhave ito pubbe
evarūpaṁ bhāsitametanti. No hetaṁ bhante. Na bhikkhave tathāgato
bāhulliko na padhānavibbhanto na āvatto bāhullāya arahaṁ
bhikkhave tathāgato sammāsambuddho odahatha bhikkhave sotaṁ amatamadhigataṁ
ahamanusāsāmi ahaṁ dhammaṁ desemi yathānusiṭṭhaṁ paṭipajjamānā
* mīkārkkhag tavaṁ peḌna tvaṁ
Nacirasseva yassatthāya kulaputtā sammadeva agārasmā anagāriyaṁ
pabbajanti tadanuttaraṁ brahmacariyapariyosānaṁ diṭṭheva dhamme sayaṁ
abhiññā sacchikatvā upasampajja viharissathāti. Asakkhiṁ kho ahaṁ
bhikkhave pañcavaggiye bhikkhū saññāpetuṁ. Dvepi sudaṁ bhikkhave
bhikkhū ovadāmi tayo bhikkhū piṇḍāya caranti yaṁ tayo bhikkhū
piṇḍāya caritvā āharanti tena chabbaggā 1 yāpema. Tayopi
sudaṁ bhikkhave bhikkhū ovadāmi dvepi bhikkhū piṇḍāya caranti yaṁ
dvepi bhikkhū piṇḍāya caritvā āharanti tena chabbaggā yāpema.
Atha kho bhikkhave pañcavaggiyā bhikkhū mayā evaṁ ovadiyamānā evaṁ
anusāsiyamānā attanā jātidhammā samānā jātidhamme ādīnavaṁ
viditvā ajātaṁ anuttaraṁ yogakkhemaṁ nibbānaṁ pariyesamānā ajātaṁ
anuttaraṁ yogakkhemaṁ nibbānaṁ ajjhagamaṁsu attanā jarādhammā
samānā jarādhamme ādīnavaṁ viditvā ajaraṁ anuttaraṁ yogakkhemaṁ
nibbānaṁ pariyesamānā ajaraṁ anuttaraṁ yogakkhemaṁ nibbānaṁ ajjhagamaṁsu
attanā byādhidhammā samānā .pe. Attanā maraṇadhammā samānā ...
Attanā sokadhammā samānā ... Attanā saṅkilesadhammā samānā
saṅkilesadhamme ādīnavaṁ viditvā asaṅkiliṭṭhaṁ anuttaraṁ yogakkhemaṁ
nibbānaṁ pariyesamānā asaṅkiliṭṭhaṁ anuttaraṁ yogakkhemaṁ nibbānaṁ
ajjhagamaṁsu. Ñāṇañca pana nesaṁ dassanaṁ udapādi akuppā
1 Ma. chabbaggiyā. Yu. chabbaggo.
No vimutti ayamantimā jāti natthidāni punabbhavoti.

[327] Pañcime bhikkhave kāmaguṇā katame pañca cakkhuviññeyyā
rūpā iṭṭhā kantā manāpā piyarūpā kāmūpasañhitā rajanīyā
sotaviññeyyā saddā .pe. Ghānaviññeyyā gandhā ...
Jivhāviññeyyā rasā ... Kāyaviññeyyā phoṭṭhabbā iṭṭhā kantā
manāpā piyarūpā kāmūpasañhitā rajanīyā ime kho bhikkhave pañca
kāmaguṇā. Yekeci bhikkhave samaṇā vā brāhmaṇā vā ime
pañca kāmaguṇe gadhitā mucchitā ajjhāpannā anādīnavadassāvino
anissaraṇapaññā paribhuñjanti te evamassu veditabbā
anayamāpannā byasanamāpannā yathākāmakaraṇīyā pāpimato.

[328] Seyyathāpi bhikkhave āraññako migo 2 bandho pāsarāsiṁ
adhisayeyya so evamassa veditabbo anayamāpanno byasanamāpanno
yathākāmakaraṇīyo luddassa āgacchante ca ludde na yenakāmaṁ
pakkamissatīti evameva kho bhikkhave yekeci samaṇā vā brāhmaṇā
vā ime pañca kāmaguṇe gadhitā mucchitā ajjhāpannā anādīnavadassāvino
anissaraṇapaññā paribhuñjanti te evamassu veditabbā
anayamāpannā byasanamāpannā yathākāmakaraṇīyā pāpimato. Yekeci
bhikkhave samaṇā vā brāhmaṇā vā ime pañca kāmaguṇe agadhitā
amucchitā anajjhāpannā ādīnavadassāvino nissaraṇapaññā paribhuñjanti
te evamassu veditabbā na anayamāpannā na byasanamāpannā
1 Ma. Yu. mago.
Na yathākāmakaraṇīyā pāpimato. Seyyathāpi bhikkhave āraññako
migo abandho 1 pāsarāsiṁ adhisayeyya so evamassa veditabbo
na anayamāpanno na byasanamāpanno na yathākāmakaraṇīyo luddassa
āgacchante ca pana ludde yenakāmaṁ pakkamissatīti evameva
kho bhikkhave yekeci samaṇā vā brāhmaṇā vā ime pañca
kāmaguṇe agadhitā amucchitā anajjhāpannā ādīnavadassāvino
nissaraṇapaññā paribhuñjanti te evamassu veditabbā na anayamāpannā
na byasanamāpannā na yathākāmakaraṇīyā pāpimato.
Seyyathāpi bhikkhave āraññako migo araññe pavane caramāno
visaṭṭho gacchati visaṭṭho tiṭṭhati visaṭṭho nisīdati visaṭṭho seyyaṁ
kappeti taṁ kissa hetu anāpāthagato bhikkhave luddassa evameva
kho bhikkhave bhikkhu vivicceva kāmehi vivicca akusalehi dhammehi
savitakkaṁ savicāraṁ vivekajaṁ pītisukhaṁ paṭhamaṁ jhānaṁ upasampajja viharati
ayaṁ vuccati bhikkhave bhikkhu andhamakāsi māraṁ apadaṁ vadhitvā māracakkhuṁ
adassanaṁ gato pāpimato. Puna caparaṁ bhikkhave bhikkhu vitakkavicārānaṁ
vūpasamā ajjhattaṁ sampasādanaṁ cetaso ekodibhāvaṁ avitakkaṁ avicāraṁ
samādhijaṁ pītisukhaṁ dutiyaṁ jhānaṁ ... Tatiyaṁ jhānaṁ ... Catutthaṁ jhānaṁ
upasampajja viharati ayaṁ vuccati bhikkhave bhikkhu andhamakāsi māraṁ
apadaṁ vadhitvā māracakkhuṁ adassanaṁ gato pāpimato. Puna caparaṁ
bhikkhave bhikkhu sabbaso rūpasaññānaṁ samatikkamā paṭighasaññānaṁ
1 Ma. Yu. abaddho.
Aṭṭhaṅgamā nānattasaññānaṁ amanasikārā ananto ākāsoti
ākāsānañcāyatanaṁ upasampajja viharati ayaṁ vuccati bhikkhave bhikkhu
andhamakāsi māraṁ apadaṁ vadhitvā māracakkhuṁ adassanaṁ gato pāpimato.
Puna caparaṁ bhikkhave bhikkhu sabbaso ākāsānañcāyatanaṁ samatikkamma
anantaṁ viññāṇanti viññāṇañcāyatanaṁ upasampajja viharati .pe.
Puna caparaṁ bhikkhave bhikkhu sabbaso viññāṇañcāyatanaṁ samatikkamma
natthi kiñcīti ākiñcaññāyatanaṁ upasampajja viharati .pe. Puna
caparaṁ bhikkhave bhikkhu sabbaso ākiñcaññāyatanaṁ samatikkamma
nevasaññānāsaññāyatanaṁ upasampajja viharati .pe. Puna caparaṁ
bhikkhave bhikkhu sabbaso nevasaññānāsaññāyatanaṁ samatikkamma
saññāvedayitanirodhaṁ upasampajja viharati. Paññāyapassa disvā
āsavā parikkhīṇā honti ayaṁ vuccati bhikkhave bhikkhu andhamakāsi
māraṁ apadaṁ vadhitvā māracakkhuṁ adassanaṁ gato pāpimato. Tiṇṇo
loke visattikaṁ so visaṭṭho gacchati visaṭṭho tiṭṭhati visaṭṭho
nisīdati visaṭṭho seyyaṁ kappeti taṁ kissa hetu anāpāthagato
bhikkhave pāpimatoti.
Idamavoca bhagavā attamanā te bhikkhū bhagavato bhāsitaṁ
abhinandunti.
Pāsarāsisuttaṁ niṭṭhitaṁ chaṭṭhaṁ.
------------
Cūḷahatthipadopamasuttaṁ

[329] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tena kho pana samayena
jāṇussoṇi brāhmaṇo sabbasetena vaḷavābhirathena 1 sāvatthiyā
niyyāti divādivassa. Addasā kho jāṇussoṇi brāhmaṇo pilotikaṁ
paribbājakaṁ dūratova āgacchantaṁ disvāna pilotikaṁ paribbājakaṁ
etadavoca handa kuto nu bhavaṁ vacchāyano āgacchati divādivassāti.
Ito hi kho ahaṁ bho āgacchāmi samaṇassa gotamassa santikāti.
Kiṁ 2 bhavaṁ gotamassa paññāveyyattiyaṁ paṇḍito maññatīti. Ko cāhaṁ
bho 3 samaṇassa gotamassa paññāveyyattiyaṁ jānissāmi sopi nūnassa
tādisova yo samaṇassa gotamassa paññāveyyattiyaṁ jāneyyāti.
Uḷārāya khalu bhavaṁ vacchāyano samaṇaṁ gotamaṁ pasaṁsāya pasaṁsatīti.
Ko cāhaṁ bho samaṇaṁ gotamaṁ pasaṁsissāmi pasaṭṭhappasaṭṭhova so
bhavaṁ gotamo seṭṭho devamanussānanti. Taṁ pana bhavaṁ vacchāyano
atthavasaṁ passamāno samaṇe gotame evaṁ abhippasanno hotīti.