[290] Atha kho āyasmā kumārakassapo tassā rattiyā
accayena yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ nisīdi. Ekamantaṁ nisinno kho āyasmā
kumārakassapo bhagavantaṁ etadavoca imaṁ bhante rattiṁ aññatarā
devatā abhikkantāya rattiyā abhikkantavaṇṇā kevalakappaṁ andhavanaṁ
Obhāsetvā yenāhaṁ tenupasaṅkami upasaṅkamitvā ekamantaṁ aṭṭhāsi.
Ekamantaṁ ṭhitā kho bhante sā devatā maṁ etadavoca bhikkhu bhikkhu
ayaṁ vammiko rattiṁ dhūmāyati divā pajjalati brāhmaṇo evamāha
abhikkhana sumedha satthaṁ ādāyāti. Abhikkhananto sumedho satthaṁ
ādāya addasa paliṅgaṁ paliṅgā bhanteti. Brāhmaṇo evamāha
ukkhipa paliṅgaṁ abhikkhana sumedha satthaṁ ādāyāti. Abhikkhananto
sumedho satthaṁ ādāya addasa uddhumāyikaṁ uddhumāyikā bhanteti
.pe. Addasa nāgaṁ nāgo bhanteti. Brāhmaṇo evamāha
tiṭṭhatu nāgo mā nāgaṁ ghaṭṭesi namo karohi nāgassāti.
Ime kho tvaṁ bhikkhu paṇṇarasa pañhe bhagavantaṁ upasaṅkamitvā
puccheyyāsi yathā te bhagavā byākaroti tathā naṁ dhāreyyāsi.
Nāhantaṁ bhikkhu passāmi sadevake loke samārake sabrahmake
sassamaṇabrāhmaṇiyā pajāya sadevamanussāya yo imesaṁ pañhānaṁ
veyyākaraṇena cittaṁ ārādheyya aññatra tathāgatena vā tathāgatasāvakena
vā ito vā pana sutvāti. Idamavoca bhante
sā devatā idaṁ vatvā tattheva antaradhāyi. Ko nu kho
bhante vammiko kā rattiṁ dhūmāyanā kā divā pajjalanā ko
brāhmaṇo ko sumedho kiṁ satthaṁ kā abhikkhanā 1 kā paliṅgī
kā uddhumāyikā ko dvidhāpatho kiṁ paṅkavāraṁ ko kummo kā
1 Yu. kiṁ abhikkhaṇaṁ.
Asisūnā kā maṁsapesi ko nāgoti.

[291] Vammikoti kho bhikkhu imassetaṁ cātummahābhūtikassa
kāyassa adhivacanaṁ mātāpettikasambhavassa odanakummāsūpacayassa
aniccucchādanaparimaddanabhedanavidhaṁsanadhammassa. Kā rattiṁ dhūmāyanāti
yaṁ kho bhikkhu divā kammante ārabbha rattiṁ anuvitakketi anuvicāreti
ayaṁ rattiṁ dhūmāyanā. Kā divā pajjalanāti yaṁ kho bhikkhu rattiṁ
anuvitakketvā anuvicāretvā divā kammante payojeti kāyena
vācāya ayaṁ divā pajjalanā. Brāhmaṇoti kho bhikkhu tathāgatassetaṁ
adhivacanaṁ arahato sammāsambuddhassa. Sumedhoti kho bhikkhu sekhassetaṁ
bhikkhuno adhivacanaṁ. Satthanti kho bhikkhu ariyāyetaṁ paññāya adhivacanaṁ.
Abhikkhanāti kho bhikkhu viriyārambhassetaṁ adhivacanaṁ. Paliṅgīti kho
bhikkhu avijjāyetaṁ adhivacanaṁ. Ukkhipa paliṅgaṁ pajaha avijjaṁ abhikkhana
sumedha satthaṁ ādāyāti ayametassa attho. Uddhumāyikāti kho
bhikkhu kodhupāyāsassetaṁ adhivacanaṁ. Ukkhipa uddhumāyikaṁ pajaha
kodhupāyāsaṁ abhikkhana sumedha satthaṁ ādāyāti ayametassa attho.
Dvidhāpathoti kho bhikkhu vicikicchāyetaṁ adhivacanaṁ. Ukkhipa dvidhāpathaṁ
pajaha vicikicchaṁ abhikkhana sumedha satthaṁ ādāyāti ayametassa attho.
Paṅkavāranti kho bhikkhu pañcannetaṁ nīvaraṇānaṁ adhivacanaṁ kāmachandanīvaraṇassa
byāpādanīvaraṇassa thīnamiddhanīvaraṇassa uddhaccakukkuccanīvaraṇassa
vicikicchānīvaraṇāya. Ukkhipa paṅkavāraṁ pajaha pañca
Nīvaraṇe abhikkhana sumedha satthaṁ ādāyāti ayametassa attho.
Kummoti kho bhikkhu pañcannetaṁ upādānakkhandhānaṁ adhivacanaṁ seyyathīdaṁ
rūpūpādānakkhandhassa vedanūpādānakkhandhassa saññūpādānakkhandhassa
saṅkhārūpādānakkhandhassa viññāṇūpādānakkhandhassa. Ukkhipa kummaṁ
pajaha pañcupādānakkhandhe abhikkhana sumedha satthaṁ ādāyāti
ayametassa attho. Asisūnāti kho bhikkhu pañcannetaṁ kāmaguṇānaṁ
adhivacanaṁ cakkhuviññeyyānaṁ rūpānaṁ iṭṭhānaṁ kantānaṁ manāpānaṁ
piyarūpānaṁ kāmūpasañhitānaṁ rajanīyānaṁ sotaviññeyyānaṁ saddānaṁ ...
Ghānaviññeyyānaṁ gandhānaṁ ... Jivhāviññeyyānaṁ rasānaṁ ... Kāyaviññeyyānaṁ
phoṭṭhabbānaṁ iṭṭhānaṁ kantānaṁ manāpānaṁ piyarūpānaṁ
kāmūpasañhitānaṁ rajanīyānaṁ. Ukkhipa asisūnaṁ pajaha pañca kāmaguṇe
abhikkhana sumedha satthaṁ ādāyāti ayametassa attho. Maṁsapesīti
kho bhikkhu nandirāgassetaṁ adhivacanaṁ. Ukkhipa maṁsapesiṁ pajaha
nandirāgaṁ abhikkhana sumedha satthaṁ ādāyāti ayametassa attho.
Nāgoti kho bhikkhu khīṇāsavassetaṁ bhikkhuno adhivacanaṁ. Tiṭṭhatu nāgo
mā nāgaṁ ghaṭṭesi namo karohi nāgassāti ayametassa atthoti.
Idamavoca bhagavā attamano āyasmā kumārakassapo bhagavato
bhāsitaṁ abhinandīti.
Vammikasuttaṁ niṭṭhitaṁ tatiyaṁ.
--------
Rathavinītasuttaṁ

[292] Evamme sutaṁ ekaṁ samayaṁ bhagavā rājagahe viharati
veḷuvane kalandakanivāpe. Atha kho sambahulā jātibhūmikā 1 bhikkhū
jātibhūmiyaṁ vassaṁ vuṭṭhā yena bhagavā tenupasaṅkamiṁsu upasaṅkamitvā
bhagavantaṁ abhivādetvā ekamantaṁ nisīdiṁsu. Ekamantaṁ nisinne kho te
bhikkhū bhagavā etadavoca ko nu kho bhikkhave jātibhūmiyaṁ jātibhūmikānaṁ
bhikkhūnaṁ sabrahmacārīnaṁ evaṁ sambhāvito attanā ca appiccho
appicchakathañca bhikkhūnaṁ kattā attanā ca santuṭṭho santuṭṭhikathañca
bhikkhūnaṁ kattā attanā ca pavivitto vivekakathañca bhikkhūnaṁ
kattā attanā ca asaṁsaṭṭho asaṁsaggakathañca bhikkhūnaṁ kattā attanā
ca āraddhaviriyo viriyārambhakathañca bhikkhūnaṁ kattā attanā ca
sīlasampanno sīlasampadākathañca bhikkhūnaṁ kattā attanā ca samādhisampanno
samādhisampadākathañca bhikkhūnaṁ kattā attanā ca paññāsampanno
paññāsampadākathañca bhikkhūnaṁ kattā attanā ca
vimuttisampanno vimuttisampadākathañca bhikkhūnaṁ kattā attanā ca
vimuttiñāṇadassanasampanno vimuttiñāṇadassanasampadākathañca bhikkhūnaṁ
kattā ovādako viññāpako sandassako samādapako samuttejako
sampahaṁsako sabrahmacārīnanti. Puṇṇo nāma bhante āyasmā
1 Sī. Yu. jātibhūmakā.
Mantāṇiputto jātibhūmiyaṁ jātibhūmikānaṁ bhikkhūnaṁ sabrahmacārīnaṁ evaṁ
sambhāvito attanā ca appiccho appicchakathañca bhikkhūnaṁ kattā
attanā ca santuṭṭho .pe. Attanā ca pavivitto ... Attanā
ca asaṁsaṭṭho ... Attanā ca āraddhaviriyo ... Attanā ca sīlasampanno ...
Attanā ca samādhisampanno ... Attanā ca paññāsampanno ...
Attanā ca vimuttisampanno ... Attanā ca vimuttiñāṇadassanasampanno
vimuttiñāṇadassanasampadākathañca bhikkhūnaṁ kattā
ovādako viññāpako sandassako samādapako samuttejako sampahaṁsako
sabrahmacārīnanti.

[293] Tena kho pana samayena āyasmā sārīputto bhagavato
avidūre nisinno hoti. Atha kho āyasmato sārīputtassa
etadahosi lābhā āyasmato puṇṇassa mantāṇiputtassa suladdhaṁ
āyasmato puṇṇassa mantāṇiputtassa yassa viññū sabrahmacārī
satthu sammukhā anumāssa anumāssa vaṇṇaṁ bhāsanti tañca satthā
abbhanumodati appevanāma mayampi kadāci karahaci āyasmatā
puṇṇena mantāṇiputtena saddhiṁ samāgamaṁ gaccheyyāma appevanāma
siyā kocideva kathāsallāpoti.

[294] Atha kho bhagavā rājagahe yathābhirantaṁ viharitvā yena
sāvatthī tena cārikaṁ pakkāmi anupubbena cārikañcaramāno yena
sāvatthī tadavasari. Tatra sudaṁ bhagavā sāvatthiyaṁ viharati jetavane
Anāthapiṇḍikassa ārāme. Assosi kho āyasmā puṇṇo
mantāṇiputto bhagavā kira sāvatthiṁ anuppatto sāvatthiyaṁ viharati
jetavane anāthapiṇḍikassa ārāmeti. Atha kho āyasmā puṇṇo
mantāṇiputto senāsanaṁ saṁsāmetvā pattacīvaraṁ ādāya yena sāvatthī
tena cārikaṁ pakkāmi anupubbena cārikañcaramāno yena sāvatthī
jetavanaṁ anāthapiṇḍikassa ārāmo yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi. Ekamantaṁ
nisinnaṁ kho āyasmantaṁ puṇṇaṁ mantāṇiputtaṁ bhagavā dhammiyā
kathāya sandassesi samādapesi samuttejesi sampahaṁsesi. Atha kho
āyasmā puṇṇo mantāṇiputto bhagavatā dhammiyā kathāya
sandassito samādapito samuttejito sampahaṁsito bhagavato bhāsitaṁ
abhinanditvā anumoditvā uṭṭhāyāsanā bhagavantaṁ abhivādetvā
padakkhiṇaṁ katvā yena andhavanaṁ tenupasaṅkami divāvihārāya.

[295] Atha kho aññataro bhikkhu yenāyasmā sārīputto
tenupasaṅkami upasaṅkamitvā āyasmantaṁ sārīputtaṁ etadavoca yassa
kho tvaṁ āvuso sārīputta puṇṇassa nāma bhikkhuno mantāṇiputtassa
abhiṇhaṁ kittayamāno ahosi so bhagavatā dhammiyā kathāya
sandassito samādapito samuttejito sampahaṁsito bhagavato bhāsitaṁ
abhinanditvā anumoditvā uṭṭhāyāsanā bhagavantaṁ abhivādetvā
padakkhiṇaṁ katvā yena andhavanaṁ tena pakkanto divāvihārāyāti.
Atha kho āyasmā sārīputto taramānarūpo nisīdanaṁ ādāya āyasmantaṁ
puṇṇaṁ mantāṇiputataṁ piṭṭhito piṭṭhito anubandhi sīsānulokī.
Atha kho āyasmā puṇṇo mantāṇiputto andhavanaṁ ajjhogāhetvā
aññatarasmiṁ rukkhamūle divāvihāraṁ nisīdi āyasmāpi kho sārīputto
andhavanaṁ ajjhogāhetvā aññatarasmiṁ rukkhamūle divāvihāraṁ nisīdi.

[296] Atha kho āyasmā sārīputto sāyaṇhasamayaṁ paṭisallānā
vuṭṭhito yenāyasmā puṇṇo mantāṇiputto tenupasaṅkami upasaṅkamitvā
āyasmatā puṇṇena mantāṇiputtena saddhiṁ sammodi
sammodanīyaṁ kathaṁ sārāṇīyaṁ vītisāretvā ekamantaṁ nisīdi. Ekamantaṁ
nisinno kho āyasmā sārīputto āyasmantaṁ puṇṇaṁ mantāṇiputtaṁ
etadavoca bhagavati no āvuso brahmacariyaṁ vussatīti.
Evamāvusoti. Kinnu kho āvuso sīlavisuddhatthaṁ bhagavataṁ brahmacariyaṁ
vussatīti. No hidaṁ āvuso. Kiṁ panāvuso cittavisuddhatthaṁ bhagavati
brahmacariyaṁ vussatīti. No hidaṁ āvuso. Kinnu kho āvuso
diṭṭhivisuddhatthaṁ bhagavati brahmacariyaṁ vussatīti. No hidaṁ āvuso.
Kiṁ panāvuso kaṅkhāvitaraṇavisuddhatthaṁ bhagavati brahmacariyaṁ vussatīti.
No hidaṁ āvuso. Kinnu kho āvuso maggāmaggañāṇadassanavisuddhatthaṁ
bhagavati brahmacariyaṁ vussatīti. No hidaṁ āvuso.
Kiṁ panāvuso paṭipadāñāṇadassanavisuddhatthaṁ bhagavati brahmacariyaṁ
vussatīti. No hidaṁ āvuso. Kinnu kho āvuso ñāṇadassanavisuddhatthaṁ
Bhagavati brahmacariyaṁ vussatīti. No hidaṁ āvuso.
Kinnu kho āvuso sīlavisuddhatthaṁ bhagavati brahmacariyaṁ vussatīti iti
puṭṭho samāno no hidaṁ āvusoti vadesi kiṁ panāvuso cittavisuddhatthaṁ
bhagavati brahmacariyaṁ vussatīti iti puṭṭho samāno no
hidaṁ āvusoti vadesi kinnu kho āvuso diṭṭhivisuddhatthaṁ bhagavati
brahmacariyaṁ vussatīti iti puṭṭho samāno no hidaṁ āvusoti
vadesi kiṁ panāvuso kaṅkhāvitaraṇavisuddhatthaṁ ... Kinnu kho āvuso
maggāmaggañāṇadassanavisuddhatthaṁ ... Kiṁ panāvuso paṭipadāñāṇadassana-
visuddhatthaṁ ... Kinnu kho āvuso ñāṇadassanavisuddhatthaṁ bhagavati brahmacariyaṁ
vussatīti iti puṭṭho samāno no hidaṁ āvusoti vadesi
kimatthaṁ carahāvuso bhagavati brahmacariyaṁ vussatīti. Anupādāparinibbānatthaṁ
kho āvuso bhagavati brahmacariyaṁ vussatīti. Kinnu kho
āvuso sīlavisuddhi anupādāparinibbānanti. No hidaṁ āvuso. Kiṁ
panāvuso cittavisuddhi anupādāparinibbānanti. No hidaṁ āvuso.
Kinnu kho āvuso diṭṭhivisuddhi anupādāparinibbānanti. No hidaṁ
āvuso. Kiṁ panāvuso kaṅkhāvitaraṇavisuddhi anupādāparinibbānanti.
No hidaṁ āvuso. Kinnu kho āvuso maggāmaggañāṇadassanavisuddhi
anupādāparinibbānanti. No hidaṁ āvuso. Kiṁ panāvuso
paṭipadāñāṇadassanavisuddhi anupādāparinibbānanti. No hidaṁ āvuso.
Kinnu kho āvuso ñāṇadassanavisuddhi anupādāparinibbānanti. No
Hidaṁ āvuso. Kiṁ panāvuso aññatra imehi dhammehi anupādāparinibbānanti.
No hidaṁ āvuso. Kinnu kho āvuso sīlavisuddhi
anupādāparinibbānanti iti puṭṭho samāno no hidaṁ āvusoti
vadesi kiṁ panāvuso cittavisuddhi anupādāparinibbānanti iti puṭṭho
samāno no hidaṁ āvusoti vadesi kinnu kho āvuso diṭṭhivisuddhi
anupādāparinibbānanti .pe. Kiṁ panāvuso kaṅkhāvitaraṇavisuddhi ...
Kinnu kho āvuso maggāmaggañāṇadassanavisuddhi ... Kiṁ panāvuso
paṭipadāñāṇadassanavisuddhi ... Kinnu kho āvuso ñāṇadassanavisuddhi
anupādāparinibbānanti iti puṭṭho samāno no hidaṁ āvusoti
vadesi kiṁ panāvuso aññatra imehi dhammehi anupādāparinibbānanti
iti puṭṭho samāno no hidaṁ āvusoti vadesi yathākathaṁ
panāvuso imassa bhāsitassa attho daṭṭhabboti.

[297] Sīlavisuddhiṁ ce āvuso bhagavā anupādāparinibbānaṁ
paññāpessa saupādānaññeva samānaṁ anupādāparinibbānaṁ
paññāpessa. Cittavisuddhiṁ ce āvuso bhagavā anupādāparinibbānaṁ
paññāpessa saupādānaññeva samānaṁ anupādāparinibbānaṁ
paññāpessa. Diṭṭhivisuddhiṁ ce āvuso bhagavā anupādāparinibbānaṁ
paññāpessa saupādānaññeva samānaṁ anupādāparinibbānaṁ
paññāpessa. Kaṅkhāvitaraṇavisuddhiṁ ce āvuso bhagavā anupādāparinibbānaṁ
paññāpessa saupādānaññeva samānaṁ anupādāparinibbānaṁ
Paññāpessa. Maggāmaggañāṇadassanavisuddhiṁ ce āvuso bhagavā
anupādāparinibbānaṁ paññāpessa saupādānaññeva samānaṁ
anupādāparinibbānaṁ paññāpessa. Paṭipadāñāṇadassanavisuddhiṁ ce āvuso
bhagavā anupādāparinibbānaṁ paññāpessa saupādānaññeva samānaṁ
anupādāparinibbānaṁ paññāpessa. Ñāṇadassanavisuddhiṁ ce āvuso
bhagavā anupādāparinibbānaṁ paññāpessa saupādānaññeva samānaṁ
anupādāparinibbānaṁ paññāpessa. Aññatra ce āvuso imehi
dhammehi anupādāparinibbānaṁ abhavissa puthujjano parinibbāyeyya
puthujjano hi āvuso aññatra imehi dhammehi. Tenahāvuso
upamante karissāmi upamāyapidhekacce viññū purisā bhāsitassa atthaṁ
ājānanti.

[298] Seyyathāpi āvuso rañño pasenadissa kosalassa
sāvatthiyaṁ paṭivasantassa sākete kiñcideva accāyikaṁ karaṇīyaṁ
uppajjeyya tassa antarā ca sāvatthiṁ antarā ca sāketaṁ satta
rathavinītāni upaṭṭhapeyyuṁ atha kho āvuso rājā pasenadi kosalo
sāvatthiyā nikkhamitvā antepuradvāre paṭhamaṁ rathavinītaṁ abhirūheyya
paṭhamena rathavinītena dutiyaṁ rathavinītaṁ pāpuṇeyya paṭhamaṁ rathavinītaṁ
vissajjeyya dutiyaṁ rathavinītaṁ abhirūheyya dutiyena rathavinītena tatiyaṁ
rathavinītaṁ pāpuṇeyya dutiyaṁ rathavinītaṁ vissajjeyya tatiyaṁ rathavinītaṁ
abhirūheyya tatiyena rathavinītena catutthaṁ rathavinītaṁ pāpuṇeyya tatiyaṁ
Rathavinītaṁ vissajjeyya catutthaṁ rathavinītaṁ abhirūheyya catutthena rathavinītena
pañcamaṁ rathavinītaṁ pāpuṇeyya catutthaṁ rathavinītaṁ vissajjeyya pañcamaṁ
rathavinītaṁ abhirūheyya pañcamena rathavinītena chaṭṭhaṁ rathavinītaṁ pāpuṇeyya
pañcamaṁ rathavinītaṁ vissajjeyya chaṭṭhaṁ rathavinītaṁ abhirūheyya chaṭṭhena
rathavinītena sattamaṁ rathavinītaṁ pāpuṇeyya chaṭṭhaṁ rathavinītaṁ vissajjeyya
sattamaṁ rathavinītaṁ abhirūheyya sattamena rathavinītena sāketaṁ anupāpuṇeyya
antepuradvāraṁ tamenaṁ antepuradvāragataṁ samānaṁ mittāmaccā
ñātisālohitā evaṁ puccheyyuṁ iminā tvaṁ mahārāja
rathavinītena sāvatthiyaṁ sāketaṁ anuppatto antepuradvāranti kathaṁ
byākaramāno nu kho āvuso mahārājā pasenadi kosalo sammā
byākaramāno byākareyyāti. Evaṁ byākaramāno kho āvuso
rājā pasenadi kosalo sammā byākaramāno byākareyya idha
me sāvatthiyaṁ paṭivasantassa sākete kiñcideva accāyikaṁ karaṇīyaṁ
uppajji tassa me antarā ca sāvatthiṁ antarā ca sāketaṁ
satta rathavinītāni upaṭṭhapesuṁ atha khvāhaṁ sāvatthiyā nikkhamitvā
antepuradvāre paṭhamaṁ rathavinītaṁ abhiruyhiṁ paṭhamena rathavinītena dutiyaṁ
rathavinītaṁ pāpuṇiṁ paṭhamaṁ rathavinītaṁ nissajjiṁ dutiyaṁ rathavinītaṁ abhiruyhiṁ
dutiyena rathavinītena tatiyaṁ rathavinītaṁ pāpuṇiṁ dutiyaṁ rathavinītaṁ nissajjiṁ
tatiyaṁ rathavinītaṁ abhiruyhiṁ tatiyena rathavinītena catutthaṁ rathavinītaṁ pāpuṇiṁ
tatiyaṁ rathavinītaṁ nissajjiṁ catutthaṁ rathavinītaṁ abhiruyhiṁ catutthena rathavinītena
Pañcamaṁ rathavinītaṁ pāpuṇiṁ catutthaṁ rathavinītaṁ nissajjiṁ pañcamaṁ rathavinītaṁ
abhiruyhiṁ pañcamena rathavinītena chaṭṭhaṁ rathavinītaṁ pāpuṇiṁ pañcamaṁ
rathavinītaṁ nissajjiṁ chaṭṭhaṁ rathavinītaṁ abhiruyhiṁ chaṭṭhena rathavinītena
sattamaṁ rathavinītaṁ pāpuṇiṁ chaṭṭhaṁ rathavinītaṁ nissajjiṁ sattamaṁ rathavinītaṁ
abhiruyhiṁ sattamena rathavinītena sāketaṁ anuppatto antepuradvāranti
evaṁ byākaramāno kho āvuso rājā pasenadi kosalo sammā
byākaramāno byākareyyāti evameva kho āvuso sīlavisuddhi
yāvadeva cittavisuddhatthā cittavisuddhi yāvadeva diṭṭhivisuddhatthā
diṭṭhivisuddhi yāvadeva kaṅkhāvitaraṇavisuddhatthā kaṅkhāvitaraṇavisuddhi
yāvadeva maggāmaggañāṇadassanavisuddhatthā maggāmaggañāṇadassanavisuddhi
yāvadeva paṭipadāñāṇadassanavisuddhatthā paṭipadāñāṇadassanavisuddhi
yāvadeva ñāṇadassanavisuddhatthā ñāṇadassanavisuddhi yāvadeva
anupādāparinibbānatthā anupādāparinibbānatthaṁ kho āvuso bhagavati
brahmacariyaṁ vussatīti.

[299] Evaṁ vutte āyasmā sārīputto āyasmantaṁ puṇṇaṁ
mantāṇiputtaṁ etadavoca ko nāmo āyasmā kathañca panāyasmantaṁ
sabrahmacārī jānantīti. Puṇṇoti kho me āvuso nāmaṁ mantāṇiputtoti
ca pana maṁ sabrahmacārī jānantīti. Acchariyaṁ āvuso
abbhūtaṁ āvuso yathātaṁ sutavatā sāvakena sammadeva satthu sāsanaṁ
ājānantena evamevaṁ āyasmatā puṇṇena mantāṇiputtena
Gambhīrā gambhīrā paññā anumāssa anumāssa byākatā lābhā
sabrahmacārīnaṁ suladdhaṁ sabrahmacārīnaṁ ye āyasmantaṁ puṇṇaṁ mantāṇiputtaṁ
labhanti dassanāya labhanti payirupāsanāya velaṇḍukena 1 cepi
sabrahmacārī āyasmantaṁ mantāṇiputtaṁ muddhanā pariharantā labheyyuṁ
dassanāya labheyyuṁ payirupāsanāya tesampi lābhā tesampi suladdhaṁ
amhākampi lābhā amhākampi suladdhaṁ ye mayaṁ āyasmantaṁ puṇṇaṁ
mantāṇiputtaṁ labhāma dassanāya labhāma payirupāsanāyāti.