[270] Seyyathāpi bhikkhave puriso āgaccheyya ādittaṁ tiṇukkaṁ
ādāya so evaṁ vadeyya ahaṁ imāya ādittāya tiṇukkāya
gaṅgaṁ nadiṁ santāpessāmi samparitāpessāmīti. Taṁ kiṁ maññatha
bhikkhave api nu so puriso ādittāya tiṇukkāya gaṅgaṁ nadiṁ
santāpeyya samparitāpeyyāti. No hetaṁ bhante taṁ kissa
hetu gaṅgā hi bhante nadī gambhīrā appameyyā sā na
sukarā ādittāya tiṇukkāya santāpetuṁ samparitāpetuṁ yāvadeva
ca pana so puriso kilamathassa vighātassa bhāgī assāti. Evameva kho
bhikkhave pañcime vacanapathā yehi vo pare vadamānā vadeyyuṁ kālena
vā akālena vā .pe. Tadārammaṇañca sabbāvantaṁ lokaṁ gaṅgāsamena
cetasā vīpulena mahaggatena appamāṇena averena abyāpajjhena
pharitvā viharissāmāti evañhi vo bhikkhave sikkhitabbaṁ.

[271] Seyyathāpi bhikkhave viḷārabhastā madditā sumadditā
suparimadditā mudukā tūlinī chinnasassarā chinnapabbharā atha puriso
āgaccheyya kaṭṭhaṁ vā kaṭhalaṁ vā ādāya so evaṁ vadeyya ahaṁ
imaṁ viḷārabhastaṁ madditaṁ sumadditaṁ suparimadditaṁ mudukaṁ tūliniṁ chinnasassaraṁ
chinnapabbharaṁ kaṭṭhena vā kaṭhalena vā sarasaraṁ karissāmi bharabharaṁ
Karissāmīti. Taṁ kiṁ maññatha bhikkhave api nu so puriso imaṁ 1
viḷārabhastaṁ madditaṁ sumadditaṁ suparimadditaṁ mudukaṁ tūliniṁ chinnasassaraṁ
chinnapabbharaṁ kaṭṭhena vā kaṭhalena vā sarasaraṁ kareyya bharabharaṁ
kareyyāti. No hetaṁ bhante taṁ kissa hetu ayañahi 2 bhante
viḷārabhastā madditā sumadditā suparimadditā mudukā tūlinī chinnasassarā
chinnapabbharā sā na sukarā kaṭṭhena vā kaṭhalena vā
sarasaraṁ kātuṁ bharabharaṁ kātuṁ yāvadeva ca pana so puriso kilamathassa
vighātassa bhāgī assāti. Evameva kho bhikkhave pañcime vacanapathā
yehi vo pare vadamānā vadeyyuṁ kālena vā akālena vā bhūtena
vā abhūtena vā saṇhena vā pharusena vā atthasañhitena vā
anatthasañhitena vā mettacittā vā dosantarā vā. Kālena
vā bhikkhave pare vadamānā vadeyyuṁ akālena vā bhūtena vā bhikkhave
pare vadamānā vadeyyuṁ abhūtena vā saṇhena vā bhikkhave pare
vadamānā vadeyyuṁ pharusena vā atthasañhitena vā bhikkhave pare
vadamānā vadeyyuṁ anatthasañhitena vā mettacittā vā bhikkhave
pare vadamānā vadeyyuṁ dosantarā vā. Tatrāpi vo bhikkhave
evaṁ sikkhitabbaṁ na ceva no cittaṁ vipariṇataṁ bhavissati na ca
pāpikaṁ vācaṁ nicchāressāma hitānukampī ca viharissāma mettacittā
na dosantarā tañca puggalaṁ mettāsahagatena cetasā pharitvā
viharissāma tadārammaṇañca sabbāvantaṁ lokaṁ viḷārabhastasamena
1 Ma. amuṁ. 2 Ma. am hi.
Cetasā vipulena mahaggatena appamāṇena averena abyāpajjhena
pharitvā viharissāmāti evañhi vo bhikkhave sikkhitabbaṁ.

[272] Ubhatodaṇḍakenapi ce bhikkhave kakacena corā vocarakā
aṅgamaṅgāni okanteyyuṁ tatrāpi yo mano padūseyya na me
so tena sāsanakaro. Tatrāpi vo bhikkhave evaṁ sikkhitabbaṁ na ceva
no cittaṁ vipariṇataṁ bhavissati na ca pāpikaṁ vācaṁ nicchāressāma
hitānukampī ca viharissāma mettacittā na dosantarā tañca
puggalaṁ mettāsahagatena cetasā pharitvā viharissāma tadārammaṇañca
sabbāvantaṁ lokaṁ mettāsahagatena cetasā vipulena mahaggatena
appamāṇena averena abyāpajjhena pharitvā viharissāmāti evañhi
vo bhikkhave sikkhitabbaṁ.

[273] Imañca tumhe bhikkhave kakacūpamaṁ ovādaṁ abhikkhaṇaṁ
manasikareyyātha passatha no tumhe bhikkhave tañca vacanapathaṁ aṇuṁ
vā thūlaṁ vā yaṁ tumhe nādhivāseyyāthāti. No hetaṁ bhante.
Tasmātiha bhikkhave imaṁ kakacūpamaṁ ovādaṁ abhikkhaṇaṁ manasikarotha
taṁ vo bhavissati dīgharattaṁ hitāya sukhāyāti.
Idamavoca bhagavā attamanā te bhikkhū bhagavato bhāsitaṁ
abhinandunti.
Kakacūpamasuttaṁ niṭṭhitaṁ paṭhamaṁ.
---------
Alagaddūpamasuttaṁ

[274] Evamme sutaṁ ekaṁ samayaṁ bhagavā sāvatthiyaṁ viharati
jetavane anāthapiṇḍikassa ārāme. Tena kho pana samayena
ariṭṭhassa nāma bhikkhuno gandhavādhipubbassa 1 evarūpaṁ pāpakaṁ diṭṭhigataṁ
uppannaṁ hoti tathāhaṁ bhagavatā dhammaṁ desitaṁ ājānāmi yathā
yeme antarāyikā dhammā vuttā bhagavatā te paṭisevato nālaṁ
antarāyāyāti. Assosuṁ kho sambahulā bhikkhū ariṭṭhassa kira
nāma bhikkhuno gandhavādhipubbassa evarūpaṁ pāpakaṁ diṭṭhigataṁ uppannaṁ
tathāhaṁ bhagavatā dhammaṁ desitaṁ ājānāmi yathā yeme antarāyikā
dhammā vuttā bhagavatā te paṭisevato nālaṁ antarāyāyāti.
Atha kho te bhikkhū yena ariṭṭho bhikkhu gandhavādhipubbo tenupasaṅkamiṁsu
upasaṅkamitvā ariṭṭhaṁ bhikkhuṁ gandhavādhipubbaṁ etadavocuṁ saccaṁ kira
te āvuso ariṭṭha evarūpaṁ pāpakaṁ diṭṭhigataṁ uppannaṁ tathāhaṁ
bhagavatā dhammaṁ desitaṁ ājānāmi yathā yeme antarāyikā dhammā
vuttā bhagavatā te paṭisevato nālaṁ antarāyāyāti. Evaṁ byā
kho ahaṁ āvuso bhagavatā dhammaṁ desitaṁ ājānāmi yathā
yeme antarāyikā dhammā vuttā bhagavatā te paṭisevato nālaṁ
antarāyāyāti. Atha kho te bhikkhū ariṭṭhaṁ bhikkhuṁ gandhavādhipubbaṁ
1 Ma. Yu. gaddhabādhi.... ito paraṁ evaṁ ñātabbaṁ.
Etasmā pāpakā diṭṭhigatā vivecetukāmā samanuyuñjanti
samanuggāhanti samanubhāsanti mā hevaṁ āvuso ariṭṭha avaca mā bhagavantaṁ
abbhācikkhi na hi sādhu bhagavato abbhakkhānaṁ na hi bhagavā evaṁ
vadeyya anekapariyāyena āvuso ariṭṭha antarāyikā dhammā vuttā
bhagavatā alañca pana te paṭisevato antarāyāya appassādā
kāmā vuttā bhagavatā bahudukkhā bahūpāyāsā ādīnavo ettha
bhiyyo aṭṭhikaṅkhalūpamā kāmā vuttā bhagavatā bahudukkhā bahūpāyāsā
ādīnavo ettha bhiyyo maṁsapesūpamā kāmā vuttā
bhagavatā .... Tiṇukkūpamā kāmā vuttā bhagavatā .... Aṅgārakāsūpamā
kāmā vuttā bhagavatā .... Supinakūpamā kāmā vuttā
bhagavatā .... Yācitakūpamā kāmā vuttā bhagavatā .... Rukkhaphalūpamā
kāmā vuttā bhagavatā .... Asisūnūpamā kāmā vuttā bhagavatā ....
Sattisūlūpamā kāmā vuttā bhagavatā .... Sappasirūpamā kāmā vuttā
bhagavatā bahudukkhā bahūpāyāsā ādīnavo ettha bhiyyoti. Evampi
kho ariṭṭho bhikkhu gandhavādhipubbo tehi bhikkhūhi samanuyuñjiyamāno
samanuggāhiyamāno samanubhāsiyamāno tadeva pāpakaṁ diṭṭhigataṁ thāmasā
parāmassa 1 abhinivissa voharati evaṁ byā kho ahaṁ āvuso bhagavatā
dhammaṁ desitaṁ ājānāmi yathā yeme antarāyikā dhammā vuttā
bhagavatā te paṭisevato nālaṁ antarāyāyāti.

[275] Yato kho te bhikkhū nāsakkhiṁsu ariṭṭhaṁ bhikkhuṁ
1 Po. Ma. parāmāsā.
Gandhavādhipubbaṁ etasmā pāpakā diṭṭhigatā vivecetuṁ atha kho te bhikkhū
yena bhagavā tenupasaṅkamiṁsu upasaṅkamitvā bhagavantaṁ abhivādetvā
ekamantaṁ nisīdiṁsu. Ekamantaṁ nisinnā kho te bhikkhū bhagavantaṁ
etadavocuṁ ariṭṭhassa nāma bhante bhikkhuno gandhavādhipubbassa evarūpaṁ
pāpakaṁ diṭṭhigataṁ uppannaṁ tathāhaṁ bhagavatā dhammaṁ desitaṁ ājānāmi
yathā yeme antarāyikā dhammā vuttā bhagavatā te paṭisevato
nālaṁ antarāyāyāti assumhā kho mayaṁ bhante ariṭṭhassa kira
nāma bhikkhuno gandhavādhipubbassa evarūpaṁ pāpakaṁ diṭṭhigataṁ uppannaṁ
tathāhaṁ bhagavatā dhammaṁ desitaṁ ājānāmi yathā yeme antarāyikā
dhammā vuttā bhagavatā te paṭisevato nālaṁ antarāyāyāti atha
kho mayaṁ bhante yena ariṭṭho bhikkhu gandhavādhipubbo tenupasaṅkamimhā
upasaṅkamitvā ariṭṭhaṁ bhikkhuṁ gandhavādhipubbaṁ etadavocumhā saccaṁ
kira te āvuso ariṭṭha evarūpaṁ pāpakaṁ diṭṭhigataṁ uppannaṁ tathāhaṁ
bhagavatā dhammaṁ desitaṁ ājānāmi yathā yeme antarāyikā dhammā
vuttā bhagavatā te paṭisevato nālaṁ antarāyāyāti evaṁ vutte bhante
ariṭṭho bhikkhu gandhavādhipubbo amhe etadavoca evaṁ byā kho
ahaṁ āvuso bhagavatā dhammaṁ desitaṁ ājānāmi yathā yeme
antarāyikā dhammā vuttā bhagavatā te paṭisevato nālaṁ antarāyāyāti
atha kho mayaṁ bhante ariṭṭhaṁ bhikkhuṁ gandhavādhipubbaṁ etasmā
pāpakā diṭṭhigatā vivecetukāmā samanuyuñjimhā samanuggāhimhā
Samanubhāsimhā mā hevaṁ āvuso ariṭṭha avaca mā bhagavantaṁ
abbhācikkhi na hi sādhu bhagavato abbhakkhānaṁ na hi bhagavā evaṁ
vadeyya anekapariyāyena āvuso ariṭṭha antarāyikā dhammā vuttā
bhagavatā alañca pana te paṭisevato antarāyāya appassādā
kāmā vuttā bhagavatā bahudukkhā bahūpāyāsā ādīnavo ettha
bhiyyo aṭṭhikaṅkhalūpamā kāmā vuttā bhagavatā bahudukkhā bahūpāyāsā
ādīnavo ettha bhiyyo .pe. Sappasirūpamā kāmā vuttā bhagavatā
bahudukkhā bahūpāyāsā ādīnavo ettha bhiyyoti evampi kho
bhante ariṭṭho bhikkhu gandhavādhipubbo amhehi samanuyuñjiyamāno
samanuggāhiyamāno samanubhāsiyamāno tadeva pāpakaṁ diṭṭhigataṁ thāmasā
parāmassa abhinivissa voharati evaṁ byā kho ahaṁ āvuso bhagavatā
dhammaṁ desitaṁ ājānāmi yathā yeme antarāyikā dhammā vuttā
bhagavatā te paṭisevato nālaṁ antarāyāyāti yato kho mayaṁ
bhante nāsakkhimhā ariṭṭhaṁ bhikkhuṁ gandhavādhipubbaṁ etasmā pāpakā
diṭṭhigatā vivecetuṁ atha mayaṁ etamatthaṁ bhagavato ārocemāti.

[276] Atha kho bhagavā aññataraṁ bhikkhuṁ āmantesi ehi
tvaṁ bhikkhu mama vacanena ariṭṭhaṁ bhikkhuṁ gandhavādhipubbaṁ āmantehi
satthā taṁ āvuso ariṭṭha āmantetīti. Evaṁ bhanteti kho so
bhikkhu bhagavato paṭissutvā yena ariṭṭho bhikkhu gandhavādhipubbo
tenupasaṅkami upasaṅkamitvā ariṭṭhaṁ bhikkhuṁ gandhavādhipubbaṁ etadavoca
Satthā taṁ āvuso ariṭṭha āmantetīti. Evamāvusoti kho ariṭṭho
bhikkhu gandhavādhipubbo tassa bhikkhuno paṭissutvā yena bhagavā
tenupasaṅkami upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinnaṁ kho ariṭṭhaṁ bhikkhuṁ gandhavādhipubbaṁ bhagavā etadavoca
saccaṁ kira te ariṭṭha evarūpaṁ pāpakaṁ diṭṭhigataṁ uppannaṁ tathāhaṁ
bhagavatā dhammaṁ desitaṁ ājānāmi yathā yeme antarāyikā dhammā
vuttā bhagavatā te paṭisevato nālaṁ antarāyāyāti. Evaṁ byā kho
ahaṁ bhante bhagavatā dhammaṁ desitaṁ ājānāmi yathā yeme antarāyikā
dhammā vuttā bhagavatā te paṭisevato nālaṁ antarāyāyāti.
Kassa kho nāma tvaṁ moghapurisa mayā evaṁ dhammaṁ desitaṁ ājānāsi.
Nanu mayā moghapurisa anekapariyāyena antarāyikā dhammā vuttā
alañca pana te paṭisevato antarāyāya appassādā kāmā
vuttā mayā bahudukkhā bahūpāyāsā ādīnavo ettha bhiyyo
aṭṭhikaṅkhalūpamā kāmā vuttā mayā .... Maṁsapesūpamā kāmā
vuttā mayā .... Tiṇukkūpamā kāmā vuttā mayā .... Aṅgārakāsūpamā
kāmā vuttā mayā .... Supinakūpamā kāmā vuttā mayā ....
Yācitakūpamā kāmā vuttā mayā .... Rukkhaphalūpamā kāmā vuttā
mayā .... Asisūnūpamā kāmā vuttā mayā .... Sattisūlūpamā
kāmā vuttā mayā .... Sappasirūpamā kāmā vuttā mayā bahudukkhā
bahūpāyāsā ādīnavo ettha bhiyyo atha ca pana tvaṁ moghapurisa attanā
Duggahitena amhe ceva abbhācikkhasi attānañca khanasi bahuñca apuññaṁ
pasavasi tañhi te moghapurisa bhavissati dīgharattaṁ ahitāya dukkhāyāti.
Atha kho bhagavā bhikkhū āmantesi taṁ kiṁ maññatha bhikkhave apināyaṁ 1
ariṭṭho bhikkhu gandhavādhipubbo usmikatopi imasmiṁ dhammavinayeti.
Kiñhi 2 siyā bhante no hetaṁ bhanteti. Evaṁ vutte ariṭṭho
bhikkhu gandhavādhipubbo tuṇhībhūto maṅkubhūto pattakkhandho adhomukho
pajjhāyanto appaṭibhāṇo nisīdi.

[277] Atha kho bhagavā ariṭṭhaṁ bhikkhuṁ gandhavādhipubbaṁ tuṇhībhūtaṁ
maṅkubhūtaṁ pattakkhandhaṁ adhomukhaṁ pajjhāyantaṁ appaṭibhāṇaṁ viditvā
ariṭṭhaṁ bhikkhuṁ gandhavādhipubbaṁ etadavoca paññāyissasi kho tvaṁ
moghapurisa etena sakena pāpakena diṭṭhigatena idhāhaṁ bhikkhū paṭipucchissāmīti.
Atha kho bhagavā bhikkhū āmantesi tumhepi me
bhikkhave evaṁ dhammaṁ desitaṁ ājānātha yathāyaṁ ariṭṭho bhikkhu gandhavādhipubbo
attanā duggahite amhe ceva abbhācikkhati attānañca
khanati bahuñca apuññaṁ pasavatīti. No hetaṁ bhante anekapariyāyena
hi no bhante antarāyikā dhammā vuttā bhagavatā alañca pana
te paṭisevato antarāyāya appassādā kāmā vuttā bhagavatā
bahudukkhā bahūpāyāsā ādīnavo ettha bhiyyo aṭṭhikaṅkhalūpamā
kāmā vuttā bhagavatā bahudukkhā bahūpāyāsā ādīnavo ettha
bhiyyo .pe. Sappasirūpamā kāmā vuttā bhagavatā bahudukkhā
1 Po. atha panāyaṁ. 2 Po. kiñci siyā.
Bahūpāyāsā ādīnavo ettha bhiyyoti. Sādhu 1 kho me tumhe
bhikkhave evaṁ dhammaṁ desitaṁ ājānātha anekapariyāyena hi vo
bhikkhave antarāyikā dhammā vuttā mayā alañca pana te paṭisevato
antarāyāya appassādā kāmā vuttā mayā bahudukkhā
bahūpāyāsā ādīnavo ettha bhiyyo aṭṭhikaṅkhalūpamā kāmā vuttā
mayā bahudukkhā bahūpāyāsā ādīnavo ettha bhiyyo .pe.
Sappasirūpamā kāmā vuttā mayā bahudukkhā bahūpāyāsā ādīnavo
ettha bhiyyo atha ca panāyaṁ ariṭṭho bhikkhu gandhavādhipubbo
attanā duggahitena amhe ceva abbhācikkhati attānañca khanati
bahuñca apuññaṁ pasavati tañhi tassa moghapurisassa bhavissati
dīgharattaṁ ahitāya dukkhāya. So vata bhikkhave aññatreva kāmehi
aññatra kāmasaññāya aññatra kāmavitakkehi kāme paṭisevissatīti
netaṁ ṭhānaṁ vijjati.

[278] Idha bhikkhave ekacce moghapurisā dhammaṁ pariyāpuṇanti
suttaṁ geyyaṁ veyyākaraṇaṁ gāthaṁ udānaṁ itivuttakaṁ jātakaṁ abbhūtadhammaṁ
vedallaṁ te taṁ dhammaṁ pariyāpuṇitvā tesaṁ dhammānaṁ paññāya
atthaṁ na upaparikkhanti tesaṁ te dhammā paññāya atthaṁ anupaparikkhataṁ
na nijjhānaṁ khamanti te upārambhānisaṁsā ceva dhammaṁ pariyāpuṇanti
itivādappamokkhānisaṁsā ca yassatthāya dhammaṁ pariyāpuṇanti tañcassa
1 Sī. Yu. sādhu bhikkhave. 2 Ma. sādhu sādhu bhikkhave.
Atthaṁ nānubhonti tesaṁ te dhammā duggahitā dīgharattaṁ ahitāya
dukkhāya saṁvattanti taṁ kissa hetu duggahitattā bhikkhave dhammānaṁ.
Seyyathāpi bhikkhave puriso alagaddatthiko alagaddagavesī alagaddapariyesanaṁ
caramāno so passeyya mahantaṁ alagaddaṁ tamenaṁ bhoge
vā naṅguṭṭhe vā gaṇheyya tassa so alagaddo paṭinivattitvā
hatthe vā bāhāya vā aññatarasmiṁ vā aṅgapaccaṅge ḍaṁseyya
so tatonidānaṁ maraṇaṁ vā niggaccheyya maraṇamattaṁ vā dukkhaṁ
taṁ kissa hetu duggahitattā bhikkhave alagaddassa evameva kho
bhikkhave idhekacce moghapurisā dhammaṁ pariyāpuṇanti suttaṁ geyyaṁ
veyyākaraṇaṁ gāthaṁ udānaṁ itivuttakaṁ jātakaṁ abbhūtadhammaṁ vedallaṁ
te taṁ dhammaṁ pariyāpuṇitvā tesaṁ dhammānaṁ paññāya atthaṁ na
upaparikkhanti tesaṁ te dhammā paññāya atthaṁ anupaparikkhataṁ na
nijjhānaṁ khamanti te upārambhānisaṁsā ceva dhammaṁ pariyāpuṇanti
itivādappamokkhānisaṁsā ca yassatthāya 1 dhammaṁ pariyāpuṇanti tañcassa
atthaṁ nānubhonti tesaṁ te dhammā duggahitā dīgharattaṁ ahitāya
dukkhāya saṁvattanti taṁ kissa hetu duggahitattā bhikkhave dhammānaṁ.

[279] Idha pana bhikkhave ekacce kulaputtā dhammaṁ pariyāpuṇanti
suttaṁ geyyaṁ veyyākaraṇaṁ gāthaṁ udānaṁ itivuttakaṁ jātakaṁ abbhūtadhammaṁ
vedallaṁ te taṁ dhammaṁ pariyāpuṇitvā tesaṁ dhammānaṁ paññāya
atthaṁ upaparikkhanti tesaṁ te dhammā paññāya atthaṁ upaparikkhataṁ
1 Ma. yassa catthāya.
Nijjhānaṁ khamanti te na ceva upārambhānisaṁsā dhammaṁ pariyāpuṇanti
na itivādappamokkhānisaṁsā ca yassatthāya dhammaṁ pariyāpuṇanti
tañcassa atthaṁ anubhonti tesaṁ te dhammā sugahitā dīgharattaṁ
hitāya sukhāya saṁvattanti taṁ kissa hetu sugahitattā bhikkhave
dhammānaṁ. Seyyathāpi bhikkhave puriso alagaddatthiko alagaddagavesī
alagaddapariyesanaṁ caramāno so passeyya mahantaṁ alagaddaṁ tamenaṁ
ajapadena daṇḍena suniggahitaṁ niggaṇheyya ajapadena daṇḍena
suniggahitaṁ niggahetvā gīvāyaṁ sugahitaṁ gaṇheyya kiñcāpi so
bhikkhave alagaddo tassa purisassa hatthaṁ vā bāhaṁ vā aññataraṁ
vā aṅgapaccaṅgaṁ bhogehi palivedheyya atha kho so neva tatonidānaṁ
maraṇaṁ vā niggaccheyya maraṇamattaṁ vā dukkhaṁ taṁ kissa hetu
sugahitattā bhikkhave alagaddassa evameva kho bhikkhave idhekacce
kulaputtā dhammaṁ pariyāpuṇanti suttaṁ geyyaṁ veyyākaraṇaṁ gāthaṁ
udānaṁ itivuttakaṁ jātakaṁ abbhūtadhammaṁ vedallaṁ te taṁ dhammaṁ
pariyāpuṇitvā tesaṁ dhammānaṁ paññāya atthaṁ upaparikkhanti tesaṁ
te dhammā paññāya atthaṁ upaparikkhataṁ nijjhānaṁ khamanti te na
ceva upārambhānisaṁsā dhammaṁ pariyāpuṇanti na itivādappamokkhānisaṁsā
ca yassatthāya dhammaṁ pariyāpuṇanti tañcassa atthaṁ anubhonti
tesaṁ te dhammā sugahitā dīgharattaṁ hitāya sukhāya saṁvattanti taṁ
kissa hetu sugahitattā bhikkhave dhammānaṁ. Tasmātiha bhikkhave
Yassa me bhāsitassa atthaṁ ājāneyyātha tathā naṁ dhāreyyātha
yassa ca pana me bhāsitassa atthaṁ na ājāneyyātha ahaṁ vo
tattheva paṭipucchitabbo ye vā panassu viyattā bhikkhū kullūpamaṁ
vo bhikkhave dhammaṁ desissāmi nittharaṇatthāya no gahaṇatthāya taṁ
suṇātha sādhukaṁ manasikarotha bhāsissāmīti. Evaṁ bhanteti kho te
bhikkhū bhagavato paccassosuṁ.