[180] Tatrassu me idaṁ sārīputta jegucchismiṁ hoti. So kho
ahaṁ sārīputta satova abhikkamāmi sato paṭikkamāmi. Yāva
udakabindumhipi me dayā paccupaṭṭhitā hoti māhaṁ khuddake pāṇe
visamagate saṅghātaṁ āpādesinti. Idaṁsu me sārīputta jegucchismiṁ hoti.

[181] Tatrassu me idaṁ sārīputta pavivittasmiṁ hoti. So kho
ahaṁ sārīputta aññataraṁ araññāyatanaṁ ajjhogāhetvā viharāmi.
Yadā passāmi gopālakaṁ vā pasupālakaṁ vā tiṇahārakaṁ vā
kaṭṭhahārakaṁ vā vanakammikaṁ vā vanena vanaṁ gahanena gahanaṁ ninnena ninnaṁ
thalena thalaṁ papatāmi 1 taṁ kissa hetu mā maṁ te addasaṁsu
ahañca mā te addasanti. Seyyathāpi sārīputta āraññako
migo manusse disvā vanena vanaṁ gahanena gahanaṁ ninnena ninnaṁ
thalena thalaṁ papatati evameva kho ahaṁ sārīputta yadā passāmi
gopālakaṁ vā pasupālakaṁ vā tiṇahārakaṁ vā kaṭṭhahārakaṁ vā vanakammikaṁ
vā vanena vanaṁ gahanena gahanaṁ ninnena ninnaṁ thalena thalaṁ papatāmi
taṁ kissa hetu mā maṁ te addasaṁsu ahañca mā te addasanti.
Idaṁsu me sārīputta pavivittasmiṁ hoti.

[182] So kho ahaṁ sārīputta ye te gotthā paṭṭhitagāvo
apagatagopālā tattha catukuṇḍiko 2 upasaṅkamitvā yāni tāni
1 Ma. saṁpatāmi. 2 Sī. Yu. catukuṇḍigo.
Vacchakānaṁ taruṇakānaṁ dhenupakānaṁ gomayāni tāni sudaṁ āhāremi.
Yāvakīvañca me sārīputta sakaṁ muttakarīsaṁ apariyādinnaṁ hoti
sakaṁyeva sudaṁ muttakarīsaṁ āhāremi. Idaṁsu me sārīputta
mahāvikaṭabhojanasmiṁ hoti.

[183] So kho ahaṁ sārīputta aññataraṁ bhiṁsanakaṁ vanasaṇḍaṁ
ajjhogāhetvā viharāmi. Tatrassudaṁ sārīputta bhiṁsanakassa
vanasaṇḍassa bhiṁsanakatasmiṁ hoti. Yokoci avītarāgo taṁ vanasaṇḍaṁ
pavisati yebhuyyena lomāni haṁsanti. So kho ahaṁ sārīputta yā tā
rattiyo sītā hemantikā antaraṭṭhakā himapātasamayā 1 tathārūpāsu
rattīsu rattiṁ abbhokāse viharāmi divā vanasaṇḍe gimhānaṁ pacchime
māse disvā abbhokāse viharāmi rattiṁ vanasaṇḍe. Apissu maṁ
sārīputta ayaṁ anacchariyā gāthā paṭibhāsi pubbe assutapubbā
so tatto so sino eko eko bhiṁsanake vane
naggo na caggimāsino esanāpasuto munīti.

[184] So kho ahaṁ sārīputta susāne seyyaṁ kappemi chavaṭṭhikāni
upadhāya. Apissu maṁ sārīputta gomaṇḍalā upasaṅkamitvā
oṭṭhubhentipi 2 omuttentipi paṁsukenapi okiranti kaṇṇasotesupi
salākaṁ pavesenti. Na kho panāhaṁ sārīputta abhijānāmi tesu pāpakaṁ
cittaṁ uppādetā. Idaṁsu me sārīputta upekkhāvihārasmiṁ hoti.
1 Sī. Yu. antaraṭṭhake himapātasamaye. 2 Sī. Yu. oṭṭhubhantipi.

[185] Santi kho pana sārīputta eke samaṇabrāhmaṇā
evaṁvādino evaṁdiṭṭhino āhārena suddhīti. Te evamāhaṁsu
kolehi yāpemāti. Te kolampi khādanti kolacuṇṇampi khādanti
kolodakampi pivanti anekavihitampi kolavikatiṁ paribhuñjanti.
Abhijānāmi kho panāhaṁ sārīputta ekaṁyeva kolaṁ āhāraṁ āharitā.
Siyā kho pana te sārīputta evamassa mahā nūna tena samayena
kolo ahosīti. Na kho panetaṁ sārīputta evaṁ daṭṭhabbaṁ.
Tadāpi etaparamoyeva kolo ahosi seyyathāpi etarahi. Tassa
mayhaṁ sārīputta ekaṁyeva kolaṁ āhāraṁ āhārayato adhimattakasīmānaṁ
patto kāyo hoti. Seyyathāpi nāma āsītikapabbāni vā
kālāpabbāni vā evamevassu me aṅgapaccaṅgāni bhavanti
tāyevappāhāratāya. Seyyathāpi nāma oṭṭhapadaṁ evamevassu me ānisadaṁ
hoti tāyevappāhāratāya. Seyyathāpi nāma vaṭṭanāvaḷī evamevassu
me piṭṭhikaṇṭako unnatāvanato hoti tāyevappāhāratāya. Seyyathāpi
nāma jarasālāya gopāṇasiyo oluggaviluggā bhavanti evamevassu
me phāsuḷiyo oluggaviluggā bhavanti tāyevappāhāratāya.
Seyyathāpi nāma gambhīre udapāne udakatārakā gambhīragatā okkhāyikā
dissanti evamevassu me akkhikūpesu akkhitārakā gambhīragatā
okkhāyikā dissanti tāyevappāhāratāya. Seyyathāpi nāma
tittikālābu āmakacchinno vātātapena saṁphusito hoti sammilāto
Evamevassu me sīsacchavi saṁphusitā hoti sammilātā
tāyevappāhāratāya. So kho ahaṁ sārīputta udaracchaviṁ
parimasissāmīti piṭṭhikaṇṭakaṁyeva pariggaṇhāmi piṭṭhikaṇṭakaṁ
parimasissāmīti udaracchaviṁyeva pariggaṇhāmi yāvassu me sārīputta
udaracchavi piṭṭhikaṇṭakaṁ allīnā hoti tāyevappāhāratāya. So kho
ahaṁ sārīputta vaccaṁ vā muttaṁ vā karissāmīti tatutheva avakujjo
papatāmi tāyevappāhāratāya. So kho ahaṁ sārīputta tameva
kāyaṁ assāsento pāṇinā gattāni anomajjāmi. Tassa mayhaṁ
sārīputta pāṇinā gattāni anomajjato pūtimūlāni lomāni kāyasmā
papatanti tāyevappāhāratāya.

[186] Santi kho pana sārīputta eke samaṇabrāhmaṇā
evaṁvādino evaṁdiṭṭhino āhārena suddhīti. Te evamāhaṁsu
muggehi yāpema .pe. Tilehi yāpema .pe. Taṇḍulehi
yāpemāti. Te taṇḍulampi khādanti taṇḍulacuṇṇampi khādanti
taṇḍulodakampi pivanti anekavihitampi taṇḍulavikatiṁ paribhuñjanti.
Abhijānāmi kho panāhaṁ sārīputta ekaṁyeva taṇḍulaṁ āhāraṁ āharitā.
Siyā kho pana te sārīputta evamassa mahā nūna tena samayena
taṇḍulo ahosīti. Na kho panetaṁ sārīputta evaṁ daṭṭhabbaṁ.
Tadāpi etaparamoyeva taṇḍulo ahosi seyyathāpi etarahi. Tassa
mayhaṁ sārīputta ekaṁyeva taṇḍulaṁ āhāraṁ āhārayato
Adhimattakasīmānaṁ patto kāyo hoti. Seyyathāpi nāma āsītikapabbāni
vā kāḷapabbāni vā evamevassu me aṅgapaccaṅgāni bhavanti
tāyevappāhāratāya. Seyyathāpi nāma oṭṭhapadaṁ .pe. Hoti
tāyevappāhāratāya. Seyyathāpi nāma vaṭṭanāvaḷī .pe.
Tāyevappāhāratāya. Seyyathāpi nāma jarasālāya .pe. Seyyathāpi
nāma gambhīre .pe. Seyyathāpi nāma tittikālābu .pe.
So kho ahaṁ sārīputta udaracchaviṁ .pe. So kho ahaṁ sārīputta vaccaṁ
vā .pe. So kho ahaṁ sārīputta tameva kāyaṁ .pe. Kāyasmā
papatanti tāyevappāhāratāya. Tāyapi kho ahaṁ sārīputta ariyāya
tāya paṭipadāya tāya dukkarakārikāya nājjhagamiṁ uttari manussadhammā
alamariyañāṇadassanavisesaṁ taṁ kissa hetu imissāyeva ariyāya
paññāya anadhigamā yāyaṁ ariyā paññā adhigatā ariyā niyyānikā
niyyāti takkarassa sammā dukkhakkhayāya.

[187] Santi kho pana sārīputta eke samaṇabrāhmaṇā evaṁvādino
evaṁdiṭṭhino saṁsārena suddhīti. Na kho paneso sārīputta saṁsāro
sulabharūpo yo mayā asaṁsaritapubbo iminā dīghena addhunā aññatra
suddhāvāsehi devehi suddhāvāse cāhaṁ sārīputta deve saṁsareyyaṁ
nayimaṁ lokaṁ puna āgaccheyyaṁ.

[188] Santi kho pana sārīputta eke samaṇabrāhmaṇā
evaṁvādino evaṁdiṭṭhino upapattiyā suddhīti. Na kho panesā
Sārīputta upapatti sulabharūpā yā mayā anuppannapubbā iminā
dīghena addhunā aññatra suddhāvāsehi devehi suddhāvāse cāhaṁ
sārīputta deve upapajjeyyaṁ nayimaṁ lokaṁ puna āgaccheyyaṁ.

[189] Santi kho pana sārīputta eke samaṇabrāhmaṇā
evaṁvādino evaṁdiṭṭhino āvāsena suddhīti. Na kho paneso
sārīputta āvāso sulabharūpo yo mayā anāvuṭṭhapubbo iminā
dīghena addhunā aññatra suddhāvāsehi devehi suddhāvāse cāhaṁ
sārīputta deve āvaseyyaṁ nayimaṁ lokaṁ puna āgaccheyyaṁ.