[46] Bhavissati bhikkhave so samayo yaṁ imesaṁ manussānaṁ
dasavassāyukā puttā bhavissanti dasavassāyukesu bhikkhave manussesu
pañcavassikā kumārikā alaṁpateyyā 1 bhavissanti dasavassāyukesu
bhikkhave manussesu imāni rasāni antaradhāyissanti seyyathīdaṁ sappi
navanītaṁ telaṁ madhu phāṇitaṁ loṇaṁ dasavassāyukesu bhikkhave manussesu
kudrusako 2 aggabhojanaṁ 3 bhavissati seyyathāpi bhikkhave etarahi
sālimaṁsodano aggabhojanaṁ evameva kho bhikkhave dasavassāyukesu
manussesu kudrusako aggabhojanaṁ bhavissati dasavassāyukesu bhikkhave
manussesu dasa kusalakammapathā sabbena sabbaṁ antaradhāyissanti
dasa akusalakammapathā ativiya dippissanti 4 dasavassāyukesu bhikkhave
manussesu kusalantipi na bhavissati kuto pana kusalassa kārako
dasavassāyukesu bhikkhave manussesu ye te bhavissanti amatteyyā
apetteyyā asāmaññā abrahmaññā nakulejeṭṭhāpacāyino te
pūjā 5 ca bhavissanti pāsaṁsā ca seyyathāpi bhikkhave etarahi
matteyyā 6 petteyyā sāmaññā brahmaññā kulejeṭṭhāpacāyino
te 7 pūjā ca pāsaṁsā ca evameva kho bhikkhave dasavassāyukesu
manussesu ye te bhavissanti amatteyyā apetteyyā asāmaññā
abrahmaññā nakulejeṭṭhāpacāyino te pūjā ca bhavissanti
pāsaṁsā ca dasavassāyukesu bhikkhave manussesu na bhavissati
1 Yu. alamapateyyā. 2 Ma. kudrūsako. 3 Ma. Yu. aggaṁ bhojanānaṁ.
4 Ma. atibyādippissanti. 5 Ma. Yu. pujjā. 6 Yu. metteyyā. 7 Ma. ayaṁ
na dissati.
Mātāti vā mātucchāti vā pitāti vā pitucchāti vā 1
mātulānīti vā ācariyabhariyāti vā garūnaṁ dārāti vā sambhedaṁ
loko gamissati yathā ajeḷakā kukkuṭā sūkarā soṇā sigālā
dasavassāyukesu bhikkhave manussesu tesaṁ sattānaṁ aññamaññamhi
tibbo āghāto paccupaṭṭhito bhavissati tibbo byāpādo tibbo
manopadoso tibbaṁ vadhakacittaṁ mātupi puttamhi. Puttassapi
mātari. Pitupi puttamhi. Puttassapi pitari. Bhātupi 2 bhaginiyā.
Bhaginiyā bhātari tibbo āghāto paccupaṭṭhito bhavissati tibbo
byāpādo tibbo manopadoso tibbaṁ vadhakacittaṁ seyyathāpi
bhikkhave māgavikassa migaṁ disvā tibbo āghāto paccupaṭṭhito
hoti tibbo byāpādo tibbo manopadoso tibbaṁ vadhakacittaṁ
evameva kho bhikkhave dasavassāyukesu manussesu tesaṁ sattānaṁ
aññamaññamhi tibbo āghāto paccupaṭṭhito bhavissati tibbo
byāpādo tibbo manopadoso tibbaṁ vadhakacittaṁ mātupi
puttamhi. Puttassapi mātari. Pitupi puttamhi. Puttassapi
pitari. Bhātupi 2 bhaginiyā. Bhaginiyāpi bhātari tibbo āghāto
paccupaṭṭhito bhavissati tibbo byāpādo tibbo manopadoso
tibbaṁ vadhakacittaṁ.

[47] Dasavassāyukesu bhikkhave manussesu sattāhaṁ satthantarakappo
bhavissati te aññamaññaṁ 3 migasaññaṁ paṭilabhissanti tesaṁ
1 Ma. Yu. pitāti vā pitucchāti vāti na dissati. 2 Yu. bhātupi bhātari.
3 Ma. aññamaññasmi.
Tiṇhāni satthāni hatthesu pātubhavissanti te tiṇhena satthena
esa migoti 1 aññamaññaṁ jīvitā voropissanti. Athakho tesaṁ
bhikkhave sattānaṁ ekaccānaṁ evaṁ bhavissati mā ca mayaṁ kañci 2
mā ca amhe koci yannūna mayaṁ tiṇagahaṇaṁ vā vanagahaṇaṁ vā
rukkhagahaṇaṁ vā nadīviduggaṁ vā pabbatavisamaṁ vā pavisitvā
vanamūlaphalāhārā yāpeyyāmāti. Te tiṇagahaṇaṁ vā 3 vanagahaṇaṁ vā
rukkhagahaṇaṁ vā 3 nadīviduggaṁ vā 3 pabbatavisamaṁ vā 3 pavisitvā sattāhaṁ
vanamūlaphalāhārā yāpessanti 4 . Te tassa sattāhassa accayena
tiṇagahaṇā vanagahaṇā rukkhagahaṇā nadīviduggā pabbatavisamā
nikkhamitvā aññamaññaṁ āliṅgitvā sabhāsu gāyissanti samassāsissanti
diṭṭhā bho sattā jīvasi tvaṁ diṭṭhā bho sattā jīvasīti.
Athakho tesaṁ bhikkhave sattānaṁ evaṁ bhavissati mayaṁ kho akusalānaṁ
dhammānaṁ samādānahetu evarūpaṁ 5 āyataṁ ñātikkhayaṁ pattā yannūna mayaṁ
kusalaṁ kareyyāma kiṁ kusalaṁ kareyyāma yannūna mayaṁ pāṇātipātā
virameyyāma idaṁ kusalaṁ dhammaṁ samādāya vatteyyāmāti. Te
pāṇātipātā viramissanti idaṁ kusalaṁ dhammaṁ samādāya vattissanti
te kusalānaṁ dhammānaṁ samādānahetu āyunāpi vaḍḍhissanti vaṇṇenapi
vaḍḍhissanti tesaṁ āyunāpi vaḍḍhamānānaṁ vaṇṇenapi vaḍḍhamānānaṁ
dasavassāyukānaṁ manussānaṁ vīsativassāyukā puttā bhavissanti.
Athakho tesaṁ bhikkhave sattānaṁ evaṁ bhavissati mayaṁ kho kusalānaṁ
1 Yu. āmeṇḍitaṁ. 2 Ma. kiñci. 3 Yu. vāsaddo na dissati.
4 Yu. yāpeyyanti. 5 Yu. ayaṁ na dissati.
Dhammānaṁ samādānahetu āyunāpi vaḍḍhāma vaṇṇenapi vaḍḍhāma
yannūna mayaṁ bhiyyoso mattāya kusalaṁ kareyyāma kiṁ kusalaṁ
kareyyāma 1 yannūna mayaṁ adinnādānā virameyyāma kāmesu micchācārā
virameyyāma musāvādā virameyyāma pisuṇāya vācāya virameyyāma
pharusāya vācāya virameyyāma samphappalāpā virameyyāma abhijjhaṁ
pajaheyyāma byāpādaṁ pajaheyyāma micchādiṭṭhiṁ pajaheyyāma tayo dhamme
pajaheyyāma adhammarāgaṁ visamalobhaṁ micchādhammaṁ yannūna mayaṁ matteyyā
assāma petteyyā sāmaññā brahmaññā kule jeṭṭhāpacāyino
idaṁ kusalaṁ dhammaṁ samādāya vatteyyāmāti. Te matteyyā bhavissanti
petteyyā sāmaññā brahmaññā kule jeṭṭhāpacāyino idaṁ
kusalaṁ dhammaṁ samādāya vattissanti tesaṁ 2 kusalānaṁ dhammānaṁ samādānahetu
āyunāpi vaḍḍhissanti vaṇṇenapi vaḍḍhissanti tesaṁ āyunāpi
vaḍḍhamānānaṁ vaṇṇenapi vaḍḍhamānānaṁ vīsativassāyukānaṁ manussānaṁ
cattāḷīsavassāyukā puttā bhavissanti. Cattāḷīsavassāyukānaṁ
manussānaṁ asītivassāyukā puttā bhavissanti. Asītivassāyukānaṁ
manussānaṁ saṭṭhivassasatāyukā puttā bhavissanti. Saṭṭhivassasatāyukānaṁ
manussānaṁ vīsatitivassasatāyukā puttā bhavissanti.
Vīsatitivassasatāyukānaṁ manussānaṁ cattāḷīsachavassasatāyukā puttā
bhavissanti. Cattāḷīsachavassasatāyukānaṁ manussānaṁ dvevassasahassāyukā
puttā bhavissanti. Dvevassasahassāyukānaṁ manussānaṁ cattārivassasahassāyukā
1 Ma. Yu. ki kusalaṁ kareyyāmāti na dissati. 2 Ma. Yu. te.
Puttā bhavissanti. Cattārivassasahassāyukānaṁ
manussānaṁ aṭṭhavassasahassāyukā puttā bhavissanti. Aṭṭhavassasahassāyukānaṁ
manussānaṁ vīsativassasahassāyukā puttā bhavissanti.
Vīsativassasahassāyukānaṁ manussānaṁ cattāḷīsavassasahassāyukā puttā
bhavissanti. Cattāḷīsavassasahassāyukānaṁ manussānaṁ asītivassasahassāyukā
puttā bhavissanti.

[48] Asītivassasahassāyukesu bhikkhave manussesu pañcavassasatikā
kumārikā alaṁpateyyā bhavissanti. Asītivassasahassāyukesu bhikkhave
manussesu tayo ābādhā bhavissanti icchā anasanaṁ jarā.
Asītivassasahassāyukesu bhikkhave manussesu ayaṁ jambudīpo iddho ceva
bhavissati phīto ca kukkuṭasampātitā 1 gāmanigamarājadhāniyo.
Asītivassasahassāyukesu bhikkhave manussesu ayaṁ jambudīpo avīci maññe
phuṭo bhavissati manussehi seyyathāpi naḷavanaṁ vā sāravanaṁ vā 2 .
Asītivassasahassāyukesu bhikkhave manussesu ayaṁ bārāṇasī ketumatī
nāma rājadhānī bhavissati iddhā ceva phītā ca bahujanā ca ākiṇṇamanussā
ca subhikkhā ca. Asītivassasahassāyukesu bhikkhave manussesu
imasmiṁ jambudīpe caturāsītinagarasahassāni bhavissanti ketumatirājadhānīpamukhāni.
Asītivassasahassāyukesu bhikkhave manussesu ketumatīrājadhāniyā
saṅkho nāma rājā uppajjissati cakkavatti dhammiko dhammarājā
1 Ma. Yu. kukkuṭasampādikā. 2 Ma. Yu. saravanaṁ vā.
Cāturanto vijitāvī janapadaṭṭhāvariyappatto sattaratanasamannāgato.
Tassimāni satta ratanāni bhavissanti seyyathīdaṁ cakkaratanaṁ hatthiratanaṁ
assaratanaṁ maṇiratanaṁ itthīratanaṁ gahapatiratanaṁ pariṇāyakaratanameva
sattamaṁ. Parosahassaṁ kho panassa puttā bhavissanti sūrā vīraṅgarūpā
parasenappamaddanā. So imaṁ paṭhaviṁ sāgarapariyantaṁ adaṇḍena
asatthena dhammena abhivijiya ajjhāvasissati. Asītivassasahassāyukesu
bhikkhave manussesu metteyyo nāma bhagavā loke uppajjissati
arahaṁ sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṁ buddho bhagavā seyyathāpāhametarahi
loke uppanno arahaṁ sammāsambuddho vijjācaraṇasampanno
sugato lokavidū anuttaro purisadammasārathi satthā devamanussānaṁ
buddho bhagavā. So imaṁ lokaṁ sadevakaṁ samārakaṁ sabrahmakaṁ
sassamaṇabrāhmaṇiṁ pajaṁ sadevamanussaṁ sayaṁ abhiññā sacchikatvā
pavedessati seyyathāpāhametarahi imaṁ lokaṁ sadevakaṁ samārakaṁ
sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā
sacchikatvā pavedemi. So dhammaṁ desessati ādikalyāṇaṁ majjhekalyāṇaṁ
pariyosānakalyāṇaṁ sātthaṁ sabyañjanaṁ kevalaparipuṇṇaṁ
parisuddhaṁ brahmacariyaṁ pakāsessati seyyathāpāhametarahi dhammaṁ desemi
ādikalyāṇaṁ majjhekalyāṇaṁ pariyosānakalyāṇaṁ sātthaṁ sabyañjanaṁ
kevalaparipuṇṇaṁ parisuddhaṁ brahmacariyaṁ pakāsemi. So anekasahassaṁ
Bhikkhusaṅghaṁ pariharissati seyyathāpāhaṁ etarahi anekasataṁ bhikkhusaṅghaṁ
pariharāmi. Athakho bhikkhave saṅkho nāma rājā yo so 1 yūpo
raññā mahāpanādena kārāpito taṁ yūpaṁ ussāpetvā ajjhāvasitvā [2]-
vissajjitvā samaṇabrāhmaṇakapaṇaddhikavaṇibbakayācakānaṁ
dānaṁ datvā metteyyassa bhagavato arahato sammāsambuddhassa santike
kesamassuṁ ohāretvā kāsāyāni vatthāni acchādetvā agārasmā
anagāriyaṁ pabbajissati. So evaṁ pabbajito samāno eko
vūpakaṭṭho appamatto ātāpī pahitatto viharanto nacirasseva
yassatthāya kulaputtā sammadeva agārasmā anagāriyaṁ pabbajanti
tadanuttaraṁ brahmacariyapariyosānaṁ diṭṭhe va dhamme sayaṁ abhiññā
sacchikatvā upasampajja viharissati.

[49] Attadīpā bhikkhave viharatha attasaraṇā anaññasaraṇā
dhammadīpā dhammasaraṇā anaññasaraṇā. Kathañca bhikkhave bhikkhu
attadīpo viharati attasaraṇo anaññasaraṇo dhammadīpo dhammasaraṇo
anaññasaraṇo. Idha bhikkhave bhikkhu kāye kāyānupassī viharati
ātāpī sampajāno satimā vineyya loke abhijjhādomanassaṁ vedanāsu
vedanānupassī viharati ātāpī sampajāno satimā vineyya loke
abhijjhādomanassaṁ citte cittānupassī viharati ātāpī sampajāno
satimā vineyya loke abhijjhādomanassaṁ dhammesu dhammānupassī
viharati ātāpī sampajāno satimā vineyya loke abhijjhādomanassaṁ.
1 Yu. yenassa. 2 Ma. taṁ datvā. Yu. daditvā.
Evaṁ kho bhikkhave bhikkhu attadīpo viharati attasaraṇo anaññasaraṇo
dhammadīpo dhammasaraṇo anaññasaraṇo.

[50] Gocare bhikkhave caratha sake pettike visaye. Gocare
bhikkhave carantā sake pettike visaye āyunāpi vaḍḍhissatha vaṇṇenapi
vaḍḍhissatha sukhenapi vaḍḍhissatha bhogenapi vaḍḍhissatha balenapi
vaḍḍhissatha. Kiñca bhikkhave bhikkhuno āyusmiṁ. Idha bhikkhave
bhikkhu chandasamādhipadhānasaṅkhārasamannāgataṁ iddhipādaṁ bhāveti
viriyasamādhipadhāna ... Cittasamādhipadhāna ... Vīmaṁsāsamādhipadhānasaṅkhāra-
samannāgataṁ iddhipādaṁ bhāveti so imesaṁ catunnaṁ iddhipādānaṁ bhāvitattā
bahulīkatattā ākaṅkhamāno kappaṁ vā tiṭṭheyya kappāvasesaṁ vā.
Idaṁ kho bhikkhave bhikkhuno āyusmiṁ. Kiñca bhikkhave bhikkhuno
vaṇṇasmiṁ. Idha bhikkhave bhikkhu sīlavā hoti pātimokkhasaṁvarasaṁvuto
viharati ācāragocarasampanno anumattesu vajjesu bhayadassāvī
samādāya sikkhati sikkhāpadesu. Idaṁ kho bhikkhave bhikkhuno vaṇṇasmiṁ.
Kiñca bhikkhave bhikkhuno sukhasmiṁ. Idha bhikkhave bhikkhu vivicceva
kāmehi vivicca akusalehi dhammehi savitakkaṁ savicāraṁ vivekajaṁ pītisukhaṁ
paṭhamaṁ jhānaṁ upasampajja viharati vitakkavicārānaṁ vūpasamā .pe.
Dutiyaṁ jhānaṁ. Tatiyaṁ jhānaṁ. Catutthaṁ jhānaṁ upasampajja viharati.
Idaṁ kho bhikkhave bhikkhuno sukhasmiṁ. Kiñca bhikkhave bhikkhuno
bhogasmiṁ. Idha bhikkhave bhikkhu mettāsahagatena cetasā ekaṁ disaṁ
Pharitvā viharati tathā dutiyaṁ tathā tatiyaṁ tathā catutthaṁ iti
uddhamadho tiriyaṁ sabbadhi sabbattatāya sabbāvantaṁ lokaṁ mettāsahagatena
cetasā vipulena mahaggatena appamāṇena averena abyāpajjhena
pharitvā viharati. Karuṇāsahagatena cetasā. Muditāsahagatena
cetasā. Upekkhāsahagatena cetasā ekaṁ disaṁ pharitvā
viharati tathā dutiyaṁ tathā tatiyaṁ tathā catutthaṁ iti uddhamadho
tiriyaṁ sabbadhi sabbattatāya sabbāvantaṁ lokaṁ upekkhāsahagatena cetasā
vipulena mahaggatena appamāṇena averena abyāpajjhena pharitvā
viharati. Idaṁ kho bhikkhave bhikkhuno bhogasmiṁ. Kiñca bhikkhave
bhikkhuno balasmiṁ. Idha bhikkhave bhikkhu āsavānaṁ khayā anāsavañcetovimuttiṁ
paññāvimuttiṁ diṭṭhe va dhamme sayaṁ abhiññā sacchikatvā
upasampajja viharati. Idaṁ kho bhikkhave bhikkhuno balasmiṁ.
Nāhaṁ bhikkhave aññaṁ ekabalampi samanupassāmi evaṁ 1 duppasahaṁ
yathāyidaṁ bhikkhave mārabalaṁ kusalānaṁ bhikkhave dhammānaṁ samādānahetu
evamidaṁ puññaṁ pavaḍḍhatīti. Idamavoca bhagavā. Attamanā te
bhikkhū bhagavato bhāsitaṁ abhinandunti.
Cakkavattisuttaṁ niṭṭhitaṁ tatiyaṁ 2 .
-------------------
1 Ma. yaṁ evaṁ. 2 Yu. cakkavattisīhanādasuttantaṁ tatiyaṁ.
Aggaññasuttaṁ

[51] Evamme sutaṁ. Ekaṁ samayaṁ bhagavā sāvatthiyaṁ viharati
pubbārāme migāramātupāsāde. Tena kho pana samayena vāseṭṭhabhāradvājā
bhikkhūsu parivasanti bhikkhubhāvaṁ ākaṅkhamānā. Athakho
bhagavā sāyaṇhasamayaṁ paṭisallānā vuṭṭhito pāsādā orohitvā
pāsādapacchāyāyaṁ abbhokāse caṅkamati. Addasā kho vāseṭṭho
bhagavantaṁ sāyaṇhasamayaṁ paṭisallānā vuṭṭhitaṁ pāsādā orohitvā
pāsādapacchāyāyaṁ abbhokāse caṅkamantaṁ disvāna bhāradvājaṁ
āmantesi ayaṁ āvuso bhāradvāja bhagavā sāyaṇhasamayaṁ paṭisallānā
vuṭṭhito pāsādā orohitvā pāsādapacchāyāyaṁ abbhokāse
caṅkamati āyāmāvuso bhāradvāja yena bhagavā tenupasaṅkamissāma
appevanāma labheyyāma bhagavato sammukhā 1 dhammiṁ kathaṁ savanāyāti.
Evamāvusoti kho bhāradvājo vāseṭṭhassa paccassosi. Athakho
vāseṭṭhabhāradvājā yena bhagavā tenupasaṅkamiṁsu upasaṅkamitvā
bhagavantaṁ abhivādetvā bhagavantaṁ caṅkamantaṁ anucaṅkamiṁsu. Athakho
bhagavā vāseṭṭhaṁ āmantesi tumhe khvattha vāseṭṭhā 2 brāhmaṇajaccā
brāhmaṇakulīnā brāhmaṇakulā agārasmā anagāriyaṁ pabbajitā
kacci vo vāseṭṭhā 3 brāhmaṇā na akkosanti na paribhāsantīti.
Taggha no bhante brāhmaṇā akkosanti paribhāsanti attarūpāya
1 Ma. Yu. santikā. 2-3 Ma. Yu. vāseṭṭha.
Paribhāsāya paripuṇṇāya no aparipuṇṇāyāti. Yathākathaṁ pana vo
vāseṭṭhā brāhmaṇā akkosanti paribhāsanti attarūpāya paribhāsāya
paripuṇṇāya no aparipuṇṇāyāti. Brāhmaṇā bhante evamāhaṁsu
brāhmaṇo va seṭṭho vaṇṇo hīnā aññe vaṇṇā
brāhmaṇo va sukko vaṇṇo kaṇhā aññe vaṇṇā brāhmaṇā
va sujjhanti no abrāhmaṇā brāhmaṇā 1 brahmuno puttā orasā
mukhato jātā brahmajā brahmanimmitā brahmadāyādā te
tumhe seṭṭhaṁ vaṇṇaṁ hitvā hīnamatthavaṇṇaṁ ajjhupagatā yadidaṁ
muṇḍake samaṇake ibbhe kaṇhe bandhupādā pacceti 2 tayidaṁ na
sādhu tayidaṁ nappaṭirūpaṁ yaṁ tumhe seṭṭhaṁ vaṇṇaṁ hitvā hīnamatthavaṇṇaṁ
ajjhupagatā yadidaṁ muṇḍake samaṇake ibbhe kaṇhe
bandhupādā pacceti. Evaṁ kho no bhante brāhmaṇā
akkosanti paribhāsanti attarūpāya paribhāsāya paripuṇṇāya no
aparipuṇṇāyāti. Taggha vo vāseṭṭhā brāhmaṇā porāṇaṁ asarantā
evamāhaṁsu brāhmaṇo va seṭṭho vaṇṇo hīnā aññe vaṇṇā
brāhmaṇo va sukko vaṇṇo kaṇhā aññe vaṇṇā brāhmaṇā
va sujjhanti no abrāhmaṇā brāhmaṇā 1 brahmuno puttā orasā
mukhato jātā brahmajā brahmanimmitā brahmadāyādāti. Dissanti
kho pana vāseṭṭhā brāhmaṇānaṁ brāhmaṇiyo utuniyopi gabbhiniyopi
vijāyamānāpi pāyamānāpi te ca brāhmaṇā yonijā va samānā
1 Ma. Yu. brāhmaṇā va. evamupari. 2 Ma. Yu. bandhupādāpacce.
Evamāhaṁsu brāhmaṇo va seṭṭho vaṇṇo .pe. Brahmadāyādāti.
Te ca 1 brahmānañceva abbhācikkhanti musā ca
bhāsanti bahuñca apuññaṁ pasavanti.

[52] Cattārome vāseṭṭhā vaṇṇā khattiyā brāhmaṇā
vessā suddā. Khattiyopi kho vāseṭṭhā idhekacco pāṇātipātī
hoti adinnādāyī kāmesu micchācārī musāvādī pisuṇavāco 2
pharusavāco samphappalāpī abhijjhālu byāpannacitto micchādiṭṭhī.
Iti kho vāseṭṭhā yeme dhammā akusalā akusalasaṅkhātā sāvajjā
sāvajjasaṅkhātā asevitabbā asevitabbasaṅkhātā nālamariyā nālamariyasaṅkhātā
kaṇhā kaṇhavipākā viññugarahitā. Khattiyepi te
idhekacce sandissanti. Brāhmaṇopi kho vāseṭṭhā .pe. Vessopi
kho vāseṭṭhā .pe. Suddopi kho vāseṭṭhā idhekacco pāṇātipātī
hoti adinnādāyī .pe. Micchādiṭṭhī. Iti kho vāseṭṭhā
yeme dhammā akusalā akusalasaṅkhātā .pe. Kaṇhā kaṇhavipākā
viññugarahitā suddepi te idhekacce sandissanti.

[53] Khattiyopi kho vāseṭṭhā idhekacco pāṇātipātā paṭivirato
hoti adinnādānā paṭivirato kāmesu micchācārā paṭivirato
musāvādā paṭivirato pisuṇāya vācāya paṭivirato pharusāya vācāya
paṭivirato samphappalāpā paṭivirato anabhijjhālu abyāpannacitto
sammādiṭṭhī. Iti kho vāseṭṭhā yeme dhammā kusalā kusalasaṅkhātā
1 Ma. Yu. casaddo na dissati. 2 Yu. pisuṇāvāco pharusāvāco.
Anavajjā anavajjasaṅkhātā sevitabbā sevitabbasaṅkhātā alamariyā
alamariyasaṅkhātā sukkā sukkavipākā viññupasatthā. Khattiyepi te
idhekacce sandissanti. Brāhmaṇopi kho vāseṭṭhā. Vessopi
kho vāseṭṭhā. Suddopi kho vāseṭṭhā idhekacco pāṇātipātā
paṭivirato hoti .pe. Anabhijjhālu abyāpannacitto sammādiṭṭhī.
Iti kho vāseṭṭhā yeme dhammā kusalā kusalasaṅkhātā anavajjā
anavajjasaṅkhātā sevitabbā sevitabbasaṅkhātā alamariyā alamariyasaṅkhātā
sukkā sukkavipākā viññupasatthā. Suddepi te idhekacce
sandissanti. Imesu kho vāseṭṭhā catūsu vaṇṇesu evaṁ
ubhayabyokiṇṇesu 1 vattamānesu kaṇhasukkesu dhammesu viññuvigarahitesu
ceva viññupasatthesu ca yadettha brāhmaṇā evamāhaṁsu
brāhmaṇo va seṭṭho vaṇṇo hīnā aññe vaṇṇā brāhmaṇo
va sukko vaṇṇo kaṇhā aññe vaṇṇā brāhmaṇā va
sujjhanti no abrāhmaṇā brāhmaṇā brahmuno puttā orasā
mukhato jātā brahmajā brahmanimmitā brahmadāyādāti. Tantesaṁ
viññū nānujānanti. Taṁ kissa hetu. Imesaṁ hi vāseṭṭhā catunnaṁ
vaṇṇānaṁ yo hoti bhikkhu arahaṁ khīṇāsavo vusitavā katakaraṇīyo
ohitabhāro anuppattasadattho parikkhīṇakavasaññojano sammadaññāvimutto
so nesaṁ aggamakkhāyati dhammeneva no adhammena.
Dhammo hi vāseṭṭhā seṭṭho janetasmiṁ diṭṭhe ceva dhamme abhisamparāyañca.
1 Ma. Yu. ubhayaokiṇṇesu.
Tadamināpetaṁ vāseṭṭhā pariyāyena veditabbaṁ yathā
dhammo 1 seṭṭho janetasmiṁ diṭṭhe ceva dhamme abhisamparāyañca.

[54] Jānāti kho vāseṭṭhā rājā pasenadi kosalo samaṇo
gotamo anuttaro 2 sakyakulā pabbajitoti. Sakyā kho pana vāseṭṭhā
rañño pasenadissa kosalassa anantarā 3 anuyantā bhavanti. Karonti
kho vāseṭṭhā sakyā raññe pasenadimhi kosale nipaccakāraṁ abhivādanaṁ
paccuṭṭhānaṁ añjalikammaṁ sāmīcikammaṁ. Iti kho vāseṭṭhā
yaṁ karonti sakyā raññe pasenadimhi kosale nipaccakāraṁ abhivādanaṁ
paccuṭṭhānaṁ añjalikammaṁ sāmīcikammaṁ karoti taṁ rājā pasenadi
kosalo tathāgate nipaccakāraṁ abhivādanaṁ paccuṭṭhānaṁ añjalikammaṁ
sāmīcikammaṁ nanu sujāto samaṇo gotamo dujjātohamasmi balavā
samaṇo gotamo dubbalohamasmi pāsādiko samaṇo gotamo
dubbaṇṇohamasmi mahesakkho samaṇo gotamo appesakkhohamasmīti
athakho naṁ dhammaṁyeva sakkaronto dhammaṁ garukaronto dhammaṁ
mānento dhammaṁ pūjento dhammaṁ apacayamāno. Evaṁ rājā pasenadi
kosalo tathāgate nipaccakāraṁ karoti abhivādanaṁ paccuṭṭhānaṁ añjalikammaṁ
sāmīcikammaṁ. Iminā 4 kho evaṁ 5 vāseṭṭhā pariyāyena veditabbaṁ
yathā dhammo seṭṭho janetasmiṁ diṭṭhe ceva dhamme abhisamparāyañca.

[55] Tumhe khvattha vāseṭṭhā nānājaccā nānānāmā nānāgottā
nānākulā agārasmā anagāriyaṁ pabbajitā ke tumheti
1 Ma. dhammo va. 2 Ma. anantarā. 3 Ma. Yu. ayaṁ pāṭho na dissati.
4 Ma. imināpi. 5 Ma. Yu. etaṁ vāseṭṭha.
Puṭṭhā samānā samaṇā sakyaputtiyāmhāti paṭijānāthāti 1 . Yassa
kho panassa vāseṭṭhā tathāgate saddhā niviṭṭhā mūlajātā patiṭṭhitā
daḷhā asaṁhāriyā 2 samaṇena vā brāhmaṇena vā devena vā mārena
vā brahmunā vā kenaci vā lokasmiṁ tassetaṁ kallaṁ vācāya
bhagavatomhi putto oraso mukhato jāto dhammajo dhammanimmito
dhammadāyādoti. Taṁ kissa hetu. Tathāgatassa hetaṁ vāseṭṭhā
adhivacanaṁ dhammakāyo itipi brahmakāyo itipi dhammabhūto itipi
brahmabhūto itipi.