[267] Ñāyena ca me parato sambodhi ce bhavissati
aññātā viharissāmi sveva anto bhavissatīti
imaṁ kho ahaṁ bhante catutthaṁ atthavasaṁ sampassamāno evarūpaṁ
vedapaṭilābhaṁ somanassapaṭilābhaṁ pavedemi.

[268] Cutāhaṁ mānusā kāyā āyuṁ hitvāna mānusaṁ
puna devo bhavissāmi devalokasmimuttamoti
imaṁ kho ahaṁ bhante pañcamaṁ atthavasaṁ sampassamāno evarūpaṁ
vedapaṭilābhaṁ somanassapaṭilābhaṁ pavedemi.
1 Ma. Yu. punarāyu ca .... 2 Yu. gabbhamissāmi.

[269] Te paṇītatarā devā akaniṭṭhā yasassino
antime vattamānamhi so nivāso bhavissatīti
imaṁ kho ahaṁ bhante chaṭṭhaṁ atthavasaṁ sampassamāno evarūpaṁ
vedapaṭilābhaṁ somanassapaṭilābhaṁ pavedemi. Ime kho ahaṁ bhante
cha atthavase sampassamāno evarūpaṁ vedapaṭilābhaṁ somanassapaṭilābhaṁ
pavedemi.

[270] Apariyositasaṅkappo vicikicchākathaṁkathī
vicaraṁ 1 dīghamaddhānaṁ anvesanto tathāgataṁ.
Yassa 2 maññāmi samaṇe pavivittavihārino
sambuddhā iti maññamāno gacchāmi te 3 upāsituṁ.
Kathaṁ ārādhanā hoti kathaṁ hoti virādhanā
iti puṭṭhā na sambhonti 4 magge paṭipadāsu ca.
Tyassa 5 yadā maṁ jānanti sakko devānamāgato
tyassa 6 mameva pucchanti kiṁ katvā pāpuṇī idaṁ.
Tesaṁ yathāsutaṁ dhammaṁ desayāmi jane sutaṁ 7
tena attamanā honti diṭṭho no vāsavoti ca.
Yadā ca sambuddhamaddakkhiṁ vicikicchāvitāraṇaṁ
somhi vītabhayo ajja sambuddhaṁ payirupāsayiṁ 8
taṇhāsallassa hantāraṁ buddhaṁ appaṭipuggalaṁ
1 Ma. vicariṁ. Yu. vicarī. 2 Ma. Yu. yassu. 3 Sī. no. 4 Ma. na sampāyanti.
5-6 Ma. tyassu tyāssu. 7 Ma. janesuta. 8 Ma. Yu. payirupāsiya.
Ahaṁ vande mahāvīraṁ buddhamādiccabandhunaṁ.
Yaṁ karomase 1 brahmuno samaṁ devehi mārisa
tadajja tuyhaṁ dassāmi handa sāmaṁ karoma te.
Tvameva sivaṁ 2 sambuddho tuvaṁ satthā anuttaro
sadevakasmiṁ lokasmiṁ natthi te paṭipuggaloti.

[271] Athakho sakko devānamindo pañcasikhaṁ gandhabbaputtaṁ
āmantesi bahūpakāro kho mesi tvaṁ tāta pañcasikha yaṁ
tvaṁ bhagavantaṁ paṭhamaṁ pasādesi tayā tāta paṭhamaṁ pasāditaṁ
pacchā mayaṁ taṁ bhagavantaṁ dassanāya upasaṅkamimhā arahantaṁ
sammāsambuddhaṁ pettike [3]- ṭhāne ṭhapayissāmi gandhabbarājā
bhavissasi bhaddañca te suriyavacchasaṁ dammi sā hi te abhipatthitāti.
Athakho sakko devānamindo pāṇinā paṭhaviṁ parāmasitvā tikkhattuṁ
udānaṁ udānesi
namo tassa bhagavato arahato sammāsambuddhassa.
Namo tassa bhagavato arahato sammāsambuddhassa.
Namo tassa bhagavato arahato sammāsambuddhassāti.

[272] Imasmiñca pana veyyākaraṇasmiṁ bhaññamāne sakkassa
devānamindassa virajaṁ vītamalaṁ dhammacakkhuṁ udapādi yaṅkiñci
samudayadhammaṁ sabbantaṁ nirodhadhammanti aññesañca asītiyā
devatāsahassānaṁ. Iti ye sakkena devānamindena ajjhiṭṭhapañhā
1 Ma. karomasi. 2 Ma. asi. 3 Ma. vā.
Puṭṭhā te bhagavatā byākatā. Tasmā imassa veyyākaraṇassa
sakkapañhotveva adhivacananti.
Sakkapañhasuttaṁ niṭṭhitaṁ aṭṭhamaṁ.
----------------
Mahāsatipaṭṭhānasuttaṁ

[273] Evamme sutaṁ. Ekaṁ samayaṁ bhagavā kurūsu viharati
kammāsadammaṁ 1 nāma kurūnaṁ nigamo. Tatra kho bhagavā bhikkhū āmantesi
bhikkhavoti. Bhadanteti 1 te bhikkhū bhagavato paccassosuṁ. Bhagavā
etadavoca ekāyano ayaṁ bhikkhave maggo sattānaṁ visuddhiyā
sokaparidevānaṁ samatikkamāya dukkhadomanassānaṁ atthaṅgamāya ñāyassa
adhigamāya nibbānassa sacchikiriyāya yadidaṁ cattāro satipaṭṭhānā.
Katame cattāro. Idha bhikkhave bhikkhu kāye kāyānupassī viharati
ātāpī sampajāno satimā vineyya loke abhijjhādomanassaṁ
vedanāsu vedanānupassī viharati ātāpī sampajāno satimā vineyya
loke abhijjhādomanassaṁ citte cittānupassī viharati ātāpī
sampajāno satimā vineyya loke abhijjhādomanassaṁ dhammesu
dhammānupassī viharati ātāpī sampajāno satimā vineyya loke
abhijjhādomanassaṁ.
Uddesavārakathā niṭṭhitā.

[274] Kathañca [3]- bhikkhave bhikkhu kāye kāyānupassī viharati.
Idha bhikkhave bhikkhu araññagato vā rukkhamūlagato vā suññāgāragato
vā nisīdati pallaṅkaṁ ābhujitvā ujuṁ kāyaṁ paṇidhāya parimukhaṁ satiṁ
upaṭṭhapetvā. So sato va assasati sato 4 passasati dīghaṁ
1 Ma. Yu. kammāsadhammaṁ nāma. 2 Ma. bhaddanteti. 3 Ma. pana. 4 Ma. satova.
Vā assasanto dīghaṁ assasāmīti pajānāti dīghaṁ vā passasanto
dīghaṁ passasāmīti pajānāti rassaṁ vā assasanto rassaṁ assasāmīti
pajānāti rassaṁ vā passasanto rassaṁ passasāmīti pajānāti
sabbakāyapaṭisaṁvedī assasissāmīti sikkhati sabbakāyapaṭisaṁvedī
passasissāmīti sikkhati passambhayaṁ kāyasaṅkhāraṁ assasissāmīti
sikkhati passambhayaṁ kāyasaṅkhāraṁ passasissāmīti sikkhati.
Seyyathāpi bhikkhave dakkho bhamakāro vā bhamakārantevāsī vā dīghaṁ
vā añchanto 1 dīghaṁ añchāmīti pajānāti rassaṁ vā añchanto
rassaṁ añchāmīti pajānāti evameva kho bhikkhave bhikkhu dīghaṁ vā
assasanto dīghaṁ assasāmīti pajānāti dīghaṁ vā passasanto dīghaṁ
passasāmīti pajānāti rassaṁ vā assasanto rassaṁ assasāmīti
pajānāti rassaṁ vā passasanto rassaṁ passasāmīti pajānāti
sabbakāyapaṭisaṁvedī assasissāmīti sikkhati sabbakāyapaṭisaṁvedī
passasissāmīti sikkhati passambhayaṁ kāyasaṅkhāraṁ assasissāmīti sikkhati
passambhayaṁ kāyasaṅkhāraṁ passasissāmīti sikkhati. Iti ajjhattaṁ
vā kāye kāyānupassī viharati bahiddhā vā kāye kāyānupassī
viharati ajjhattabahiddhā vā kāye kāyānupassī viharati
samudayadhammānupassī vā kāyasmiṁ viharati vayadhammānupassī vā kāyasmiṁ
viharati samudayavayadhammānupassī vā kāyasmiṁ viharati. Atthi kāyoti
1 añjantotipi acchantotipi pāṭho.
Vā panassa sati paccupaṭṭhitā hoti yāvadeva ñāṇamattāya
paṭissatimattāya. Anissito ca viharati na ca kiñci loke
upādiyati. Evampi [1]- bhikkhave bhikkhu kāye kāyānupassī viharati.
Ānāpānapabbaṁ niṭṭhitaṁ.

[275] Puna caparaṁ bhikkhave bhikkhu gacchanto vā gacchāmīti
pajānāti ṭhito vā ṭhitomhīti pajānāti nisinno vā
nisinnomhīti pajānāti sayāno vā sayānomhīti pajānāti.
Yathā yathā vā panassa kāyo paṇihito hoti tathā tathā
nampajānāti 2 . Iti ajjhattaṁ vā kāye kāyānupassī viharati
bahiddhā vā kāye kāyānupassī viharati ajjhattabahiddhā vā
kāye kāyānupassī viharati samudayadhammānupassī vā kāyasmiṁ viharati
vayadhammānupassī vā kāyasmiṁ viharati samudayavayadhammānupassī vā
kāyasmiṁ viharati. Atthi kāyoti vā panassa sati paccupaṭṭhitā
hoti yāvadeva ñāṇamattāya paṭissatimattāya. Anissito ca
viharati na ca kiñci loke upādiyati. Evampi bhikkhave bhikkhu
kāye kāyānupassī viharati.
Iriyāpathapabbaṁ niṭṭhitaṁ.

[276] Puna caparaṁ bhikkhave bhikkhu abhikkante paṭikkante
sampajānakārī hoti ālokite vilokite sampajānakārī hoti
sammiñjite pasārite sampajānakārī hoti saṅghāṭipattacīvaradhāraṇe
1 Ma. kho. sabbattha īdisameva. 2 Ma. naṁ pajānāti.
Sampajānakārī hoti asite pīte khāyite sāyite sampajānakārī
hoti uccārapassāvakamme sampajānakārī hoti gate ṭhite
nisinne sutte jāgarite bhāsite tuṇhībhāve sampajānakārī hoti.
Iti ajjhattaṁ vā kāye kāyānupassī viharati bahiddhā vā kāye
kāyānupassī viharati ajjhattabahiddhā vā kāye kāyānupassī
viharati samudayadhammānupassī vā kāyasmiṁ viharati vayadhammānupassī
vā kāyasmiṁ viharati samudayavayadhammānupassī vā kāyasmiṁ viharati.
Atthi kāyoti vā panassa sati paccupaṭṭhitā hoti yāvadeva
ñāṇamattāya paṭissatimattāya. Anissito ca viharati na ca kiñci loke
upādiyati. Evampi bhikkhave bhikkhu kāye kāyānupassī viharati.
Sampajaññapabbaṁ niṭṭhitaṁ.