[107] Athakho bhagavā yena upaṭṭhānasālā tenupasaṅkami
upasaṅkamitvā paññatte āsane nisīdi. Nisajja kho bhagavā bhikkhū
āmantesi tasmātiha bhikkhave ye te 2 mayā dhammā abhiññā
desitā te vo sādhukaṁ uggahetvā āsevitabbā bhāvetabbā
bahulīkātabbā yathayidaṁ brahmacariyaṁ addhaniyaṁ assa ciraṭṭhitikaṁ
tadassa bahujanahitāya bahujanasukhāya lokānukampāya atthāya hitāya
sukhāya devamanussānaṁ. Katame ca te bhikkhave dhammā mayā abhiññā
desitā ye te 3 sādhukaṁ uggahetvā āsevitabbā bhāvetabbā
bahulīkātabbā yathayidaṁ brahmacariyaṁ addhaniyaṁ assa ciraṭṭhitikaṁ
tadassa bahujanahitāya bahujanasukhāya lokānukampāya atthāya hitāya
1 Yu. paṭissutvā. 2 Yu. vo. 3 Ma. Yu. vo.
Sukhāya devamanussānaṁ. Seyyathīdaṁ. Cattāro satipaṭṭhānā cattāro
sammappadhānā cattāro iddhipādā pañcindriyāni pañca
balāni satta bojjhaṅgā ariyo aṭṭhaṅgiko maggo. Ime
kho te 1 bhikkhave dhammā mayā abhiññā desitā ye 2 te sādhukaṁ
uggahetvā āsevitabbā bhāvetabbā bahulīkātabbā yathayidaṁ
brahmacariyaṁ addhaniyaṁ assa ciraṭṭhitikaṁ tadassa bahujanahitāya
bahujanasukhāya lokānukampāya atthāya hitāya sukhāya
devamanussānanti. Athakho bhagavā bhikkhū āmantesi handadāni bhikkhave
āmantayāmi vo vayadhammā saṅkhārā appamādena sampādetha
na ciraṁ tathāgatassa parinibbānaṁ bhavissati ito tiṇṇaṁ māsānaṁ
accayena tathāgato parinibbāyissatīti. Idamavoca bhagavā idaṁ
vatvāna 3 sugato athāparaṁ etadavoca satthā 4

[108] Daharāpi ca ye vuḍḍhā ye bālā ye ca paṇḍitā
aḍḍhā ceva daḷiddā ca sabbe maccuparāyanā.
Yathāpi kumbhakārassa kataṁ mattikabhājanaṁ
khuddakañca mahantañca yañca pakkaṁ yañca āmakaṁ
sabbaṁ bhedapariyantaṁ evaṁ maccānajīvitaṁ.
Athāparaṁ etadavoca satthā
1 Yu. ayaṁ pāṭho natthi. 2 Yu. te vo. Ma. ye vo. 3 Yu. vatvā. ito paraṁ
īdisameva. 4 ito paraṁ sīhalapotthake paripakko vayo mayhaṁ ... dukkhassantaṁ
karissatīti dissati.
Paripakko vayo mayhaṁ parittaṁ mama jīvitaṁ
pahāya vo gamissāmi kataṁ me saraṇamattano.
Appamattā satīmanto susīlā hotha bhikkhavo
susamāhitasaṅkappā sacittamanurakkhatha.
Yo imasmiṁ dhammavinaye appamatto viharissati 1
pahāya jātisaṁsāraṁ dukkhassantaṁ karissatīti.
Tatiyabhāṇavāraṁ. 2

[109] Athakho bhagavā pubbaṇhasamayaṁ nivāsetvā pattacīvaramādāya
vesāliṁ piṇḍāya pāvisi vesāliyaṁ piṇḍāya caritvā pacchābhattaṁ
piṇḍapātapaṭikkanto nāgāvalokitaṁ 3 vesāliṁ apaloketvā āyasmantaṁ
ānandaṁ āmantesi idaṁ pacchimakaṁ ānanda tathāgatassa
vesāliyā 4 dassanaṁ bhavissati āyāmānanda yena bhaṇḍagāmo 5
tenupasaṅkamissāmāti. Evaṁ bhanteti kho āyasmā ānando bhagavato
paccassosi. Athakho bhagavā mahatā bhikkhusaṅghena saddhiṁ yena
bhaṇḍagāmo tadavasari. Tatra sudaṁ bhagavā bhaṇḍagāme viharati.
Tatra kho bhagavā bhikkhū āmantesi catunnaṁ bhikkhave dhammānaṁ
ananubodhā appaṭivedhā evamidaṁ dīghamaddhānaṁ sandhāvitaṁ saṁsaritaṁ
mamañceva tumhākañca. Katamesaṁ catunnaṁ. Ariyassa bhikkhave
sīlassa ananubodhā appaṭivedhā evamidaṁ dīghamaddhānaṁ sandhāvitaṁ
1 Sī. Yu. vihessati. Ma. vihassati. 2 Yu. tatiyakabhāṇavāraṁ niṭṭhitaṁ. Ma. tatiyo
bhāṇavāro. 3 Ma. Yu. nāgāpalokitaṁ. 4 Yu. vesālidassanaṁ. 5 Ma. bhaṇḍagāmo.
ito paraṁ īdisameva.
Saṁsaritaṁ mamañceva tumhākañca. Ariyassa bhikkhave samādhissa
ananubodhā appaṭivedhā evamidaṁ dīghamaddhānaṁ sandhāvitaṁ saṁsaritaṁ
mamañceva tumhākañca. Ariyāya bhikkhave paññāya ananubodhā
appaṭivedhā evamidaṁ dīghamaddhānaṁ sandhāvitaṁ saṁsaritaṁ mamañceva
tumhākañca. Ariyāya bhikkhave vimuttiyā ananubodhā appaṭivedhā
evamidaṁ dīghamaddhānaṁ sandhāvitaṁ saṁsaritaṁ mamañceva tumhākañca.
Tayidaṁ bhikkhave ariyaṁ sīlaṁ anubuddhaṁ paṭividdhaṁ ariyo samādhi
anubuddho paṭividdho ariyā paññā anubuddhā paṭividdhā ariyā
vimutti anubuddhā paṭividdhā ucchinnā bhavataṇhā khīṇā bhavanetti
natthidāni punabbhavoti. Idamavoca bhagavā idaṁ vatvāna sugato
athāparaṁ etadavoca satthā

[110] Sīlaṁ samādhi paññā ca vimutti ca anuttarā
anubuddhā ime dhammā gotamena yasassinā
iti buddho abhiññāya dhammamakkhāti 1 bhikkhunaṁ
dukkhassantaṅkaro satthā cakkhumā parinibbuboti.

[111] Tatrapi sudaṁ bhagavā bhaṇḍagāme viharanto etadeva bahulaṁ
bhikkhūnaṁ dhammiṁ kathaṁ karoti iti sīlaṁ iti samādhi iti paññā
sīlaparibhāvito samādhi mahapphalo hoti mahānisaṁso samādhiparibhāvitā
paññā mahapphalā hoti mahānisaṁsā paññāparibhāvitaṁ cittaṁ sammadeva
āsavehi vimuccati seyyathīdaṁ kāmāsavā bhavāsavā [2]- avijjāsavāti.
1 Ma. Yu. dhammamakkhāsi. 2 Yu. diṭṭhāsavā.

[112] Athakho bhagavā bhaṇḍagāme yathābhirantaṁ viharitvā āyasmantaṁ
ānandaṁ āmantesi āyāmānanda yena hatthigāmo ambagāmo
jambugāmo yena bhoganagaraṁ tenupasaṅkamissāmāti. Evaṁ bhanteti
kho āyasmā ānando bhagavato paccassosi. Athakho bhagavā
mahatā bhikkhusaṅghena saddhiṁ yena bhoganagaraṁ tadavasari. Tatra
sudaṁ bhagavā bhoganagare viharati ānande cetiye. Tatra kho bhagavā
bhikkhū āmantesi cattārome bhikkhave mahāpadese desessāmi
taṁ suṇātha sādhukaṁ manasikarotha bhāsissāmīti. Evaṁ bhanteti
kho te bhikkhū bhagavato paccassosuṁ. Bhagavā etadavoca

[113] Idha bhikkhave bhikkhu evaṁ vadeyya sammukhā metaṁ
āvuso bhagavato sutaṁ sammukhā paṭiggahitaṁ ayaṁ dhammo ayaṁ
vinayo idaṁ satthu sāsananti tassa bhikkhave bhikkhuno bhāsitaṁ neva
abhinanditabbaṁ nappaṭikkositabbaṁ. Anabhinanditvā appaṭikkositvā
tāni padabyañjanāni sādhukaṁ uggahetvā sutte osāretabbāni 1 vinaye
sandassetabbāni. Tāni ce sutte osāriyamānāni 2 vinaye
sandassiyamānāni na ceva sutte osaranti 3 na ca 4 vinaye sandissanti.
Niṭṭhamettha gantabbaṁ addhā idaṁ na ceva tassa bhagavato vacanaṁ
imassa ca bhikkhuno duggahitanti iti hetaṁ bhikkhave chaḍḍeyyātha.
Tāni ce sutte osāriyamānāni vinaye sandassiyamānāni sutte
1 Yu. otāretabbāni. 2 Yu. otāriyamānāni. ito paraṁ īdisameva. 3 Sī. Yu.
otaranti. 4 Yu. na vinaye.
Ce 1 osaranti vinaye ce 2 sandissanti. Niṭṭhamettha gantabbaṁ addhā
idaṁ tassa bhagavato vacanaṁ imassa ca bhikkhuno sugahitanti idaṁ
bhikkhave paṭhamaṁ mahāpadesaṁ dhāreyyātha.

[114] Idha pana bhikkhave bhikkhu evaṁ vadeyya amukasmiṁ nāma
āvāse saṅgho viharati sathero sapāmokkho tassa me saṅghassa
sammukhā sutaṁ sammukhā paṭiggahitaṁ ayaṁ dhammo ayaṁ vinayo idaṁ
satthu sāsananti tassa bhikkhave bhikkhuno bhāsitaṁ neva abhinanditabbaṁ
nappaṭikkositabbaṁ. Anabhinanditvā appaṭikkositvā tāni
padabyañjanāni sādhukaṁ uggahetvā sutte osāretabbāni vinaye
sandassetabbāni. Tāni ce sutte osāriyamānāni vinaye
sandassiyamānāni na ceva sutte osaranti na ca vinaye sandissanti.
Niṭṭhamettha gantabbaṁ addhā idaṁ na ceva tassa bhagavato vacanaṁ tassa
ca bhikkhusaṅghassa duggahitanti iti hetaṁ bhikkhave chaḍḍeyyātha.
Tāni ce sutte osāriyamānāni vinaye sandassiyamānāni sutte
ce 3 osaranti vinaye ca sandissanti. Niṭṭhamettha gantabbaṁ addhā
idaṁ tassa bhagavato vacanaṁ tassa ca saṅghassa sugahitanti idaṁ
bhikkhave dutiyaṁ mahāpadesaṁ dhāreyyātha.

[115] Idha pana bhikkhave bhikkhu evaṁ vadeyya amukasmiṁ nāma
āvāse sambahulā therā bhikkhū viharanti bahussutā āgatāgamā
dhammadharā vinayadharā mātikādharā tesaṁ me therānaṁ sammukhā sutaṁ
1-2-3 Ma. Yu. ceva ... ca.
Sammukhā paṭiggahitaṁ ayaṁ dhammo ayaṁ vinayo idaṁ satthu sāsananti
tassa bhikkhave bhikkhuno bhāsitaṁ neva abhinanditabbaṁ .pe. Na
vinaye sandissanti. Niṭṭhamettha gantabbaṁ addhā idaṁ na ceva
tassa bhagavato vacanaṁ tesañca therānaṁ duggahitanti iti hetaṁ
bhikkhave chaḍḍeyyātha. Tāni ce sutte osāriyamānāni .pe.
Vinaye sandissanti. Niṭṭhamettha gantabbaṁ addhā idaṁ tassa
bhagavato vacanaṁ tesañca therānaṁ sugahitanti idaṁ bhikkhave tatiyaṁ
mahāpadesaṁ dhāreyyātha.

[116] Idha pana bhikkhave bhikkhu evaṁ vadeyya amukasmiṁ nāma
āvāse [1]- thero bhikkhu viharati bahussuto āgatāgamo dhammadharo
vinayadharo mātikādharo tassa me therassa sammukhā sutaṁ sammukhā
paṭiggahitaṁ ayaṁ dhammo ayaṁ vinayo idaṁ satthu sāsananti tassa
bhikkhave bhikkhuno bhāsitaṁ neva abhinanditabbaṁ nappaṭikkositabbaṁ.
Anabhinanditvā appaṭikkositvā tāni padabyañjanāni sādhukaṁ uggahetvā
sutte osāretabbāni vinaye sandassitabbāni 2 . Tāni ce sutte
osāriyamānāni vinaye sandassiyamānāni na ceva sutte osaranti
na ca 3 vinaye sandissanti. Niṭṭhamettha gantabbaṁ .pe. Addhā
idaṁ tassa bhagavato vacanaṁ tassa ca therassa sugahitanti idaṁ
bhikkhave catutthaṁ mahāpadesaṁ dhāreyyātha 4 . Ime kho bhikkhave
cattāro mahāpadese dhāreyyāthāti. Tatrapi sudaṁ bhagavā bhoganagare
1 Ma. Yu. eko. 2 Ma. Yu. sandassetabbāni. 3 Yu. na vinaye .... 4 Yu.
dhāreyyāthāti.
Viharati 1 ānande cetiye etadeva bahulaṁ bhikkhūnaṁ dhammiṁ kathaṁ
karoti iti sīlaṁ iti samādhi iti paññā sīlaparibhāvito
samādhi mahapphalo hoti mahānisaṁso samādhiparibhāvitā paññā
mahapphalā hoti mahānisaṁsā paññāparibhāvitaṁ cittaṁ sammadeva
āsavehi vimuccati seyyathīdaṁ kāmāsavā bhavāsavā avijjāsavāti.