[353] Athakho lohicco brāhmaṇo rosikaṁ nhāpitaṁ āmantesi
ehi tvaṁ samma rosike yena samaṇo gotamo tenupasaṅkama
upasaṅkamitvā mama vacanena samaṇaṁ gotamaṁ appābādhaṁ appātaṅkaṁ
lahuṭṭhānaṁ balaṁ phāsuvihāraṁ puccha lohicco bho gotama brāhmaṇo
bhavantaṁ gotamaṁ appābādhaṁ appātaṅkaṁ lahuṭṭhānaṁ balaṁ phāsuvihāraṁ
pucchatīti evañca vadehi adhivāsetu kira bhavaṁ gotamo lohiccassa
brāhmaṇassa svātanāya bhattaṁ saddhiṁ bhikkhusaṁghenāti. Evaṁ bhanteti
kho rosiko nhāpiko lohiccassa brāhmaṇassa paṭissutvā yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho rosiko nhāpiko bhagavantaṁ etadavoca
lohicco bhante brāhmaṇo bhagavantaṁ appābādhaṁ appātaṅkaṁ
lahuṭṭhānaṁ balaṁ phāsuvihāraṁ pucchati evañca vadeti adhivāsetu kira
bhante bhagavā lohiccassa brāhmaṇassa svātanāya bhattaṁ saddhiṁ
bhikkhusaṁghenāti. Adhivāsesi bhagavā tuṇhībhāvena.

[354] Athakho rosiko nhāpito bhagavato adhivāsanaṁ viditvā
uṭṭhāyāsanā bhagavantaṁ abhivādetvā padakkhiṇaṁ katvā yena lohicco
brāhmaṇo tenupasaṅkami upasaṅkamitvā lohiccaṁ brāhmaṇaṁ etadavoca
avocumhā kho mayaṁ bhoto vacanena taṁ bhagavantaṁ lohicco bhante
Brāhmaṇo bhagavantaṁ appābādhaṁ appātaṅkaṁ lahuṭṭhānaṁ balaṁ phāsuvihāraṁ
pucchati evañca vadeti adhivāsetu kira bhante bhagavā lohiccassa
brāhmaṇassa svātanāya bhattaṁ saddhiṁ bhikkhusaṁghenāti adhivuṭṭhañca
pana tena bhagavatāti. Athakho lohicco brāhmaṇo tassā rattiyā
accayena sake nivesane paṇītaṁ khādanīyaṁ bhojanīyaṁ paṭiyādetvā
rosikaṁ nhāpitaṁ āmantesi ehi tvaṁ samma rosike yena samaṇo
gotamo tenupasaṅkama upasaṅkamitvā samaṇassa gotamassa kālaṁ
ārocehi kālo bho gotama niṭṭhitaṁ bhattanti. Evaṁ bhoti
kho rosiko nhāpito lohiccassa brāhmaṇassa paṭissutvā yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
aṭṭhāsi. Ekamantaṁ ṭhito kho rosiko nhāpito bhagavato kālaṁ
ārocesi kālo bhante niṭṭhitaṁ bhattanti.

[355] Athakho bhagavā pubbaṇhasamayaṁ nivāsetvā pattacīvaramādāya
saddhiṁ bhikkhusaṁghena yena sālavatikā tenupasaṅkami. Tena kho pana
samayena rosiko nhāpito bhagavantaṁ piṭṭhito piṭṭhito anubandho
hoti. Athakho rosiko nhāpito bhagavantaṁ etadavoca lohiccassa bhante
brāhmaṇassa evarūpaṁ pāpakaṁ diṭṭhigataṁ uppannaṁ hoti idha samaṇo
vā brāhmaṇo vā kusalaṁ dhammaṁ adhigaccheyya kusalaṁ dhammaṁ adhigantvā
na parassa āroceyya kiñhi paro parassa karissati seyyathāpi
nāma purāṇaṁ bandhanaṁ chinditvā aññaṁ navaṁ bandhanaṁ kareyya evaṁ
Sampadamidaṁ pāpakaṁ lobhadhammaṁ vadāmi kiñhi paro parassa karissatīti
sādhu bhante bhagavā lohiccaṁ brāhmaṇaṁ etasmā pāpakā diṭṭhigatā
vivecetūti. Appevanāma siyā rosike appevanāma siyā rosiketi.
Athakho bhagavā yena lohiccassa brāhmaṇassa nivesanaṁ tenupasaṅkami
upasaṅkamitvā paññatte āsane nisīdi. Athakho lohicco
brāhmaṇo buddhappamukhaṁ bhikkhusaṁghaṁ paṇītena khādanīyena bhojanīyena
sahatthā santappesi sampavāresi.

[356] Athakho lohicco brāhmaṇo bhagavantaṁ bhuttāviṁ onītapattapāṇiṁ
aññataraṁ nīcaṁ āsanaṁ gahetvā ekamantaṁ nisīdi.
Ekamantaṁ nisinnaṁ kho lohiccaṁ brāhmaṇaṁ bhagavā etadavoca saccaṁ
kira lohicca te evarūpaṁ pāpakaṁ diṭṭhigataṁ uppannaṁ idha samaṇo
vā brāhmaṇo vā kusalaṁ dhammaṁ adhigaccheyya kusalaṁ dhammaṁ adhigantvā
na parassa āroceyya kiñhi paro parassa karissati seyyathāpi
nāma purāṇaṁ bandhanaṁ chinditvā aññaṁ navaṁ bandhanaṁ kareyya evaṁ
sampadamidaṁ pāpakaṁ lobhadhammaṁ vadāmi kiñhi paro parassa karissatīti.
Evaṁ bho gotama. Taṁ kiṁ maññasi lohicca nanu tvaṁ sālavatikaṁ
ajjhāvasasīti. Evaṁ bho gotama. Yo nu kho lohicca evaṁ
vadeyya lohicco brāhmaṇo sālavatikaṁ ajjhāvasati yā sālavatikāya
samudayaṁ sañjāti lohicco va taṁ brāhmaṇo ekako paribhuñjeyya
na aññesaṁ dadeyyāti evaṁvādī so ye taṁ upajīvanti tesaṁ
Antarāyakaro vā hoti no vāti. Antarāyakaro bho gotama.
Antarāyakaro samāno hitānukampī vā tesaṁ hoti ahitānukampī vāti.
Ahitānukampī bho gotama. Ahitānukampissa mettaṁ vā tesu cittaṁ
paccupaṭṭhitaṁ hoti sapattikaṁ vāti. Sapattikaṁ bho gotama. Sapattike
citte paccupaṭṭhite micchādiṭṭhi vā hoti sammādiṭṭhi vāti.
Micchādiṭṭhi bho gotama. Micchādiṭṭhissa kho ahaṁ lohicca dvinnaṁ
gatīnaṁ aññataraṁ gatiṁ vadāmi nirayaṁ vā tiracchānayoniṁ vā.

[357] Taṁ kiṁ maññasi lohicca nanu rājā pasenadikosalo
kāsikosalaṁ ajjhāvasatīti. Evaṁ bho gotama. Yo nu kho
lohicca evaṁ vadeyya rājā pasenadikosalo kāsikosalaṁ ajjhāvasati
yā kāsikosale samudayaṁ sañjāti rājā va taṁ pasenadikosalo
ekako paribhuñjeyya na aññesaṁ dadeyyāti evaṁvādī so ye
rājānaṁ pasenadikosalaṁ upajīvanti tumhe ceva aññe ca tesaṁ
antarāyakaro vā hoti no vāti. Antarāyakaro bho gotama.
Antarāyakaro samāno hitānukampī vā tesaṁ hoti ahitānukampī vāti.
Ahitānukampī bho gotama. Ahitānukampissa mettaṁ vā tesu cittaṁ
paccupaṭṭhitaṁ hoti sapattikaṁ vāti. Sapattikaṁ bho gotama. Sapattike
citte paccupaṭṭhite micchādiṭṭhi vā hoti sammādiṭṭhi vāti.
Micchādiṭṭhi bho gotama. Micchādiṭṭhissa kho ahaṁ lohicca dvinnaṁ
gatīnaṁ aññataraṁ gatiṁ vadāmi nirayaṁ vā tiracchānayoniṁ vā.

[358] Iti kira lohicca yo evaṁ vadeyya lohicco brāhmaṇo
sālavatikaṁ ajjhāvasati yā sālavatikāya samudayaṁ sañjāti lohicco
va taṁ brāhmaṇo ekako paribhuñjeyya na aññesaṁ dadeyyāti
evaṁvādī so ye taṁ upajīvanti tesaṁ antarāyakaro hoti antarāyakaro
samāno ahitānukampī hoti ahitānukampissa sapattikaṁ cittaṁ paccupaṭṭhitaṁ
hoti sapattike citte paccupaṭṭhite micchādiṭṭhi hoti.
Evameva kho lohicca yo evaṁ vadeyya idha samaṇo vā brāhmaṇo
vā kusalaṁ dhammaṁ adhigaccheyya kusalaṁ dhammaṁ adhigantvā na parassa
āroceyya kiñhi paro parassa karissatīti. Seyyathāpi nāma
purāṇaṁ bandhanaṁ .pe. Karissatīti. Evaṁvādī so ye te
kulaputtā tathāgatappaveditaṁ dhammavinayaṁ āgamma evarūpaṁ uḷāraṁ visesaṁ
adhigacchanti sotāpattiphalaṁpi sacchikaronti sakadāgāmiphalaṁpi sacchikaronti
anāgāmiphalaṁpi sacchikaronti arahattaṁpi sacchikaronti ye cime dibbā
gabbhā paripācenti dibbānaṁ bhavānaṁ abhinibbattiyā tesaṁ antarāyakaro
hoti antarāyakaro samāno ahitānukampī hoti ahitānukampissa
sapattikaṁ cittaṁ paccupaṭṭhitaṁ hoti sapattike citte paccupaṭṭhite
micchādiṭṭhi hoti. Micchādiṭṭhissa kho ahaṁ lohicca dvinnaṁ gatīnaṁ
aññataraṁ gatiṁ vadāmi nirayaṁ vā tiracchānayoniṁ vā.

[359] Iti kira lohicca yo evaṁ vadeyya rājā pasenadikosalo
kāsikosalaṁ ajjhāvasati yā kāsikosale samudayaṁ sañjāti rājā va
Taṁ pasenadikosalo ekako paribhuñjeyya na aññesaṁ dadeyyāti
evaṁvādī so ye rājānaṁ pasenadikosalaṁ upajīvanti tumhe ceva
aññe ca tesaṁ antarāyakaro hoti antarāyakaro samāno ahitānukampī
hoti ahitānukampissa sapattikaṁ cittaṁ paccupaṭṭhitaṁ hoti sapattike
citte paccupaṭṭhite micchādiṭṭhi hoti. Evameva kho lohicca
yo evaṁ vadeyya idha samaṇo vā brāhmaṇo vā kusalaṁ
dhammaṁ adhigaccheyya kusalaṁ dhammaṁ adhigantvā na parassa āroceyya
kiñhi paro parassa karissatīti. Seyyathāpi nāma purāṇaṁ bandhanaṁ
chinditvā aññaṁ navaṁ bandhanaṁ kareyya evaṁ sampadamidaṁ pāpakammaṁ
lobhadhammaṁ vadāmi kiñhi paro parassa karissatīti. Evaṁvādī so
ye te kulaputtā tathāgatappaveditaṁ dhammavinayaṁ āgamma evarūpaṁ
uḷāraṁ visesaṁ adhigacchanti sotāpattiphalaṁpi sacchikaronti sakadāgāmiphalaṁpi
sacchikaronti anāgāmiphalaṁpi sacchikaronti arahattaṁpi sacchikaronti ye
cime dibbā gabbhā paripācenti dibbānaṁ bhavānaṁ abhinibbattiyā
tesaṁ antarāyakaro hoti antarāyakaro samāno ahitānukampī hoti
ahitānukampissa sapattikaṁ cittaṁ paccupaṭṭhitaṁ hoti sapattike citte
paccupaṭṭhite micchādiṭṭhi hoti. Micchādiṭṭhissa kho ahaṁ lohicca
dvinnaṁ gatīnaṁ aññataraṁ gatiṁ vadāmi nirayaṁ vā tiracchānayoniṁ vā.

[360] Tayo khome lohicca satthāro ye loke codanārahā yo
ca panevarūpe satthāro codeti sā codanā bhūtā tacchā dhammikā
Anavajjā katame tayo idha lohicca ekacco satthā yassatthāya
agārasmā anagāriyaṁ pabbajito hoti svāssa sāmaññattho
ananuppatto hoti. So taṁ sāmaññatthaṁ ananupāpuṇitvā sāvakānaṁ
dhammaṁ deseti idaṁ vo hitāya idaṁ vo sukhāyāti. Tassa sāvakā na
sussanti na sotaṁ odahanti na aññācittaṁ upaṭṭhapenti vokkamma
ca satthu sāsanā vattanti. So evamassa codetabbo āyasmā
kho yassatthāya agārasmā anagāriyaṁ pabbajito so te sāmaññattho
ananuppatto taṁ tvaṁ sāmaññatthaṁ ananupāpuṇitvā sāvakānaṁ dhammaṁ
desesi idaṁ vo hitāya idaṁ vo sukhāyāti. Tassa te sāvakā na
sussanti na sotaṁ odahanti na aññācittaṁ upaṭṭhapenti vokkamma
ca satthu sāsanā vattanti seyyathāpi nāma osakkantiyā vā
usakkeyya parammukhiṁ vā āliṅgeyya evaṁ sampadamidaṁ pāpakaṁ lobhadhammaṁ
vadāmi kiñhi paro parassa karissatīti. Ayaṁ kho lohicca paṭhamo
satthā yo loke codanāraho yo ca panevarūpaṁ satthāraṁ codeti
sā codanā bhūtā tacchā dhammikā anavajjā.

[361] Puna caparaṁ lohicca idhekacco satthā yassatthāya
agārasmā anagāriyaṁ pabbajito hoti svāssa sāmaññattho
ananuppatto hoti. So taṁ sāmaññatthaṁ ananupāpuṇitvā sāvakānaṁ
dhammaṁ deseti idaṁ vo hitāya idaṁ vo sukhāyāti. Tassa te sāvakā
sussanti sotaṁ odahanti aññācittaṁ upaṭṭhapenti na ca vokkamma
Satthu sāsanā vattanti. So evamassa codetabbo āyasmā
kho yassatthāya agārasmā anagāriyaṁ pabbajito hoti so te
sāmaññattho ananuppatto taṁ tvaṁ sāmaññatthaṁ ananupāpuṇitvā
sāvakānaṁ dhammaṁ desesi idaṁ vo hitāya idaṁ vo sukhāyāti.
Tassa te sāvakā sussanti sotaṁ odahanti aññācittaṁ upaṭṭhapenti
na ca vokkamma satthu sāsanā vattanti seyyathāpi nāma sakaṁ
khettaṁ ohāya parakkhettaṁ niddāyitabbaṁ maññeyya evaṁ sampadamidaṁ
pāpakaṁ lobhadhammaṁ vadāmi kiñhi paro parassa karissatīti. Ayaṁ
kho lohicca dutiyo satthā yo loke codanāraho yo ca panevarūpaṁ
satthāraṁ codeti sā codanā bhūtā tacchā dhammikā anavajjā.

[362] Puna caparaṁ lohicca idhekacco satthā yassatthāya
agārasmā anagāriyaṁ pabbajito hoti svāssa sāmaññattho
anuppatto hoti. So taṁ sāmaññatthaṁ anupāpuṇitvā sāvakānaṁ
dhammaṁ deseti idaṁ vo hitāya idaṁ vo sukhāyāti. Tassa sāvakā
na sussanti na sotaṁ odahanti na aññācittaṁ upaṭṭhapenti
vokkamma ca satthu sāsanā vattanti. So evamassa codetabbo
āyasmā kho yassatthāya agārasmā anagāriyaṁ pabbajito so
te sāmaññattho anuppatto taṁ tvaṁ sāmaññatthaṁ anupāpuṇitvā
sāvakānaṁ dhammaṁ desesi idaṁ vo hitāya idaṁ vo sukhāyāti.
Tassa te sāvakā na sussanti na sotaṁ odahanti na aññācittaṁ
Upaṭṭhapenti vokkamma ca satthu sāsanā vattanti seyyathāpi
nāma purāṇaṁ bandhanaṁ chinditvā aññaṁ navaṁ bandhanaṁ kareyya evaṁ
sampadamidaṁ pāpakaṁ lobhadhammaṁ vadāmi kiñhi paro parassa karissatīti.
Ayaṁ kho lohicca tatiyo satthā yo loke codanāraho yo ca panevarūpaṁ
satthāraṁ codeti sā codanā bhūtā tacchā dhammikā anavajjā.
Ime kho lohicca tayo satthāro ye loke codanārahā yo ca panevarūpe
satthāro codeti sā codanā bhūtā tacchā dhammikā anavajjāti.