[303] Oḷārikassapi kho ahaṁ poṭṭhapāda attapaṭilābhassa
Pahānāya dhammaṁ desemi yathāpaṭipannānaṁ vo saṁkilesikā dhammā
pahīyissanti vodāniyā dhammā abhivaḍḍhissanti paññāpāripūriṁ
vepullattañca diṭṭhe va dhamme sayaṁ abhiññā sacchikatvā upasampajja
viharissathāti. Siyā kho pana te poṭṭhapāda evamassa saṁkilesikā
dhammā pahīyissanti vodāniyā dhammā abhivaḍḍhissanti paññāpāripūriṁ
vepullattañca diṭṭhe va dhamme sayaṁ abhiññā sacchikatvā upasampajja
viharissati dukkho ca vihāroti. Na kho panetaṁ poṭṭhapāda evaṁ
daṭṭhabbaṁ saṁkilesikā ceva dhammā pahīyissanti vodāniyā ca dhammā
abhivaḍḍhissanti paññāpāripūriṁ vepullattañca diṭṭhe va dhamme sayaṁ
abhiññā sacchikatvā upasampajja viharissati pāmojjañceva bhavissati
pīti ca passaddhi ca sati ca sampajaññañca sukho ca vihāro.

[304] Manomayassapi kho ahaṁ poṭṭhapāda attapaṭilābhassa
pahānāya dhammaṁ desemi yathāpaṭipannānaṁ vo saṁkilesikā dhammā
pahīyissanti vodāniyā dhammā abhivaḍḍhissanti paññāpāripūriṁ
vepullattañca diṭṭhe va dhamme sayaṁ abhiññā sacchikatvā upasampajja
viharissathāti. Siyā kho pana te poṭṭhapāda evamassa saṁkilesikā
dhammā pahīyissanti vodāniyā dhammā abhivaḍḍhissanti paññāpāripūriṁ
vepullattañca diṭṭhe va dhamme sayaṁ abhiññā sacchikatvā upasampajja
viharissati dukkho ca vihāroti. Na kho panetaṁ poṭṭhapāda evaṁ
daṭṭhabbaṁ saṁkilesikā ceva dhammā pahīyissanti vodāniyā ca dhammā
Abhivaḍḍhissanti (peyyālo) pāmojjañceva bhavissati pīti ca
passaddhi ca sati ca sampajaññañca sukho ca vihāro.

[305] Arūpassapi kho ahaṁ poṭṭhapāda attapaṭilābhassa pahānāya
dhammaṁ desemi yathāpaṭipannānaṁ vo saṁkilesikā dhammā pahīyissanti
vodāniyā dhammā abhivaḍḍhissanti paññāpāripūriṁ vepullattañca
diṭṭhe va dhamme sayaṁ abhiññā sacchikatvā upasampajja viharissathāti.
(peyyālo) pāmujjañceva bhavissati pīti ca passaddhi ca sati ca
sampajaññañca sukho ca vihāro.

[306] Pare ce poṭṭhapāda amhe evaṁ puccheyyuṁ katamo pana
so āvuso 1 oḷāriko attapaṭilābho yassa tumhe pahānāya
dhammaṁ desetha yathāpaṭipannānaṁ vo saṁkilesikā dhammā pahīyissanti
vodāniyā dhammā abhivaḍḍhissanti paññāpāripūriṁ vepullattañca
diṭṭhe va dhamme sayaṁ abhiññā sacchikatvā upasampajja viharissathāti.
Tesaṁ mayaṁ evaṁ puṭṭhā evaṁ byākareyyāma ayaṁ vā so āvuso
oḷāriko attapaṭilābho yassa mayaṁ pahānāya dhammaṁ desema yathāpaṭipannānaṁ
vo saṁkilesikā dhammā pahīyissanti vodāniyā dhammā
abhivaḍḍhissanti paññāpāripūriṁ vepullattañca diṭṭhe va dhamme
sayaṁ abhiññā sacchikatvā upasampajja viharissathāti.

[307] Pare ce poṭṭhapāda amhe evaṁ puccheyyuṁ katamo pana so
1 Sī. katamā panāvuso.
Āvuso manomayo attapaṭilābho. (soyeva peyyālo) katamo pana
so arūpo attapaṭilābho yassa tumhe pahānāya dhammaṁ desetha yathāpaṭipannānaṁ
vo saṁkilesikā dhammā pahīyissanti vodāniyā dhammā
abhivaḍḍhissanti .pe. Upasampajja viharissathāti. Taṁ kiṁ maññasi
poṭṭhapāda nanu evaṁ sante sappāṭihirikataṁ bhāsitaṁ sampajjatīti.
Addhā kho bhante evaṁ sante sappāṭihirikataṁ bhāsitaṁ sampajjatīti.

[308] Seyyathāpi kho poṭṭhapāda puriso nisseṇiṁ kareyya
pāsādassa ārohanāya tasseva pāsādassa heṭṭhā tamenaṁ evaṁ
vadeyyuṁ ambho purisa yassa tvaṁ pāsādassa ārohanāya nisseṇiṁ
karosi jānāsi taṁ pāsādaṁ puratthimāya vā disāya dakkhiṇāya vā
disāya pacchimāya vā disāya uttarāya vā disāya ucco vā
nīco vā majjho vāti. So ce evaṁ vadeyya ayaṁ vā so
āvuso pāsādo yassāhaṁ ārohanāya nisseṇiṁ karomi tasseva
pāsādassa heṭṭhāti. Taṁ kiṁ maññasi poṭṭhapāda nanu evaṁ
sante tassa purisassa sappāṭihirikataṁ bhāsitaṁ sampajjatīti. Addhā
kho bhante evaṁ sante tassa purisassa sappāṭihirikataṁ bhāsitaṁ
sampajjatīti. Evameva kho poṭṭhapāda pare ce amhe evaṁ
puccheyyuṁ katamo pana so āvuso oḷāriko attapaṭilābho .pe.
Katamo pana so āvuso manomayo attapaṭilābho. Katamo pana
so āvuso arūpo attapaṭilābho yassa tumhe pahānāya dhammaṁ
Desetha yathāpaṭipannānaṁ vo saṁkilesikā dhammā pahīyissanti vodāniyā
dhammā abhivaḍḍhissanti paññāpāripūriṁ vepullattañca diṭṭhe va dhamme
sayaṁ abhiññā sacchikatvā upasampajja viharissathāti. Tesaṁ mayaṁ
evaṁ puṭṭhā evaṁ byākareyyāma ayaṁ vā so āvuso arūpo
attapaṭilābho yassa mayaṁ pahānāya .pe. Taṁ kiṁ maññasi
poṭṭhapāda nanu evaṁ sante sappāṭihirikataṁ bhāsitaṁ sampajjatīti.
Addhā kho bhante evaṁ sante sappāṭihirikataṁ bhāsitaṁ sampajjatīti.

[309] Evaṁ vutte citto hatthisāriputto bhagavantaṁ etadavoca
yasmiṁ bhante samaye oḷāriko attapaṭilābho hoti moghassa tasmiṁ
samaye manomayo attapaṭilābho hoti mogho arūpo attapaṭilābho
hoti oḷārikopassa attapaṭilābho tasmiṁ samaye sacco hoti
yasmiṁ bhante samaye manomayo attapaṭilābho hoti moghassa tasmiṁ
samaye oḷāriko attapaṭilābho hoti mogho arūpo attapaṭilābho
hoti manomayo attapaṭilābho tasmiṁ samaye sacco hoti yasmiṁ
bhante samaye arūpo attapaṭilābho hoti moghassa tasmiṁ samaye
oḷāriko attapaṭilābho hoti mogho manomayo attapaṭilābho hoti
arūpo attapaṭilābho tasmiṁ samaye sacco hotīti. Yasmiṁ citta
samaye oḷāriko attapaṭilābho hoti neva tasmiṁ samaye manomayo
attapaṭilābhoti saṁkhyaṁ 1 gacchati na ca arūpo attapaṭilābhoti saṁkhyaṁ
1 Sī. saṅkhaṁ.
Gacchati oḷāriko attapaṭilābhotveva tasmiṁ samaye saṁkhyaṁ gacchati.
Yasmiṁ citta samaye manomayo attapaṭilābho hoti neva tasmiṁ
samaye oḷāriko attapaṭilābhoti saṁkhyaṁ gacchati na ca arūpo
attapaṭilābhoti saṁkhyaṁ gacchati manomayo attapaṭilābhotveva tasmiṁ
samaye saṁkhyaṁ gacchati. Yasmiṁ citta samaye arūpo attapaṭilābho hoti
neva tasmiṁ samaye oḷāriko attapaṭilābhoti saṁkhyaṁ gacchati na ca
manomayo attapaṭilābhoti saṁkhyaṁ gacchati arūpo attapaṭilābhotveva
tasmiṁ samaye saṁkhyaṁ gacchati.

[310] Sace taṁ citta evaṁ puccheyyuṁ ahosi tvaṁ atītamaddhānaṁ
na tvaṁ na ahosi bhavissasi tvaṁ anāgatamaddhānaṁ na tvaṁ na bhavissasi
atthi tvaṁ etarahi na tvaṁ natthīti. Evaṁ puṭṭho tvaṁ citta
kinti byākareyyāsīti. Sace maṁ bhante evaṁ puccheyyuṁ ahosi
tvaṁ atītamaddhānaṁ na tvaṁ na ahosi bhavissasi tvaṁ anāgatamaddhānaṁ
na tvaṁ na bhavissasi atthi tvaṁ etarahi na tvaṁ natthīti. Evaṁ
puṭṭho ahaṁ bhante evaṁ byākareyyaṁ ahosāhaṁ atītamaddhānaṁ nāhaṁ
na ahosiṁ bhavissāmahaṁ anāgatamaddhānaṁ nāhaṁ na bhavissāmi atthāhaṁ
etarahi nāhaṁ natthīti. Evaṁ puṭṭho ahaṁ bhante evaṁ byākareyyanti.

[311] Sace pana taṁ citta evaṁ puccheyyuṁ yo te ahosi atīto
attapaṭilābho soyeva te attapaṭilābho sacco mogho anāgato
mogho paccuppanno yo te bhavissati anāgato attapaṭilābho
Soyeva te attapaṭilābho sacco mogho atīto mogho paccuppanno
yo te etarahi paccuppanno attapaṭilābho soyeva te attapaṭilābho
sacco mogho atīto mogho anāgatoti. Evaṁ puṭṭho tvaṁ citta
kinti byākareyyāsīti. Sace pana maṁ bhante evaṁ puccheyyuṁ yo
te ahosi atīto attapaṭilābho soyeva te attapaṭilābho sacco
mogho anāgato mogho paccuppanno yo te bhavissati anāgato
attapaṭilābho soyeva te attapaṭilābho sacco mogho atīto
mogho paccuppanno yo te etarahi paccuppanno attapaṭilābho
soyeva te attapaṭilābho sacco mogho atīto mogho anāgatoti.
Evaṁ puṭṭho ahaṁ bhante evaṁ byākareyyaṁ yo ca me ahosi atīto
attapaṭilābho soyeva me attapaṭilābho tasmiṁ samaye sacco ahosi
mogho anāgato mogho paccuppanno yo ca me bhavissati anāgato
attapaṭilābho soyeva me attapaṭilābho tasmiṁ samaye sacco bhavissati
mogho atīto mogho paccuppanno yo ca me etarahi paccuppanno
attapaṭilābho soyeva me attapaṭilābho sacco mogho atīto mogho
anāgatoti. Evaṁ puṭṭho ahaṁ bhante evaṁ byākareyyanti.

[312] Evameva kho citta yasmiṁ samaye oḷāriko attapaṭilābho
hoti neva tasmiṁ samaye manomayo attapaṭilābhoti saṁkhyaṁ gacchati na
arūpo attapaṭilābhoti saṁkhyaṁ gacchati oḷāriko attapaṭilābhotveva
tasmiṁ samaye saṁkhyaṁ gacchati. Yasmiṁ citta samaye manomayo
Attapaṭilābho hoti .pe. Yasmiṁ citta samaye arūpo attapaṭilābho
hoti neva tasmiṁ samaye oḷāriko attapaṭilābhoti saṁkhyaṁ gacchati na
manomayo attapaṭilābhoti saṁkhyaṁ gacchati arūpo attapaṭilābhotveva
tasmiṁ samaye saṁkhyaṁ gacchati. Seyyathāpi citta gavā khīraṁ khīramhā
dadhi dadhimhā navanītaṁ navanītamhā sappi sappimhā sappimaṇḍo.
Yasmiṁ samaye khīraṁ hoti neva tasmiṁ samaye dadhīti saṁkhyaṁ gacchati na
ca navanītanti saṁkhyaṁ gacchati na ca sappīti saṁkhyaṁ gacchati na ca
sappimaṇḍoti saṁkhyaṁ gacchati khīraṁtveva tasmiṁ samaye saṁkhyaṁ gacchati.
Yasmiṁ samaye dadhi hoti. Navanītaṁ hoti. Sappi hoti.
Sappimaṇḍo hoti neva tasmiṁ samaye khīranti saṁkhyaṁ gacchati na
dadhīti saṁkhyaṁ gacchati na navanītanti saṁkhyaṁ gacchati na sappīti saṁkhyaṁ
gacchati sappimaṇḍotveva tasmiṁ samaye saṁkhyaṁ gacchati. Evameva
kho citta yasmiṁ samaye oḷāriko attapaṭilābho hoti neva
tasmiṁ samaye manomayo attapaṭilābhoti saṁkhyaṁ gacchati na arūpo
attapaṭilābhoti saṁkhyaṁ gacchati oḷāriko attapaṭilābhotveva tasmiṁ
samaye saṁkhyaṁ gacchati. Yasmiṁ samaye citta manomayo attapaṭilābho
hoti .pe. Arūpo attapaṭilābho hoti neva tasmiṁ samaye oḷāriko
attapaṭilābhoti saṁkhyaṁ gacchati na ca manomayo attapaṭilābhoti
saṁkhyaṁ gacchati arūpo attapaṭilābhotveva tasmiṁ samaye saṁkhyaṁ
gacchati. Imā kho citta lokasamaññā lokaniruttiyo lokavohārā
Lokapaññattiyo yāhi tathāgato voharati aparāmasantoti.