[273] Ko hi bhante bhagavato dhammaṁ sutvā na attamano assa
paraṁ viya mattāya ahaṁpi bhante bhagavato dhammaṁ sutvā attamano
paraṁ viya mattāya abhikkantaṁ bhante abhikkantaṁ bhante seyyathāpi
bhante nikkujjitaṁ vā ukkujjeyya paṭicchannaṁ vā vivareyya mūḷhassa
vā maggaṁ ācikkheyya andhakāre vā telapajjotaṁ dhāreyya cakkhumanto
rūpāni dakkhantīti evameva bhagavatā anekapariyāyena dhammo desito
esāhaṁ bhante bhagavantaṁ saraṇaṁ gacchāmi dhammañca bhikkhusaṁghañca
labheyyāhaṁ bhante bhagavato santike pabbajjaṁ labheyyaṁ upasampadanti.

[274] Yo kho kassapa aññatitthiyapubbo imasmiṁ dhammavinaye
ākaṅkhati pabbajjaṁ ākaṅkhati upasampadaṁ so cattāro māse
parivasati catunnaṁ māsānaṁ accayena āraddhacittā bhikkhū pabbājenti
upasampādenti bhikkhubhāvāya apica mettha puggalavemattatā viditāti.
Sace bhante aññatitthiyapubbo imasmiṁ dhammavinaye ākaṅkhati pabbajjaṁ
ākaṅkhati upasampadaṁ cattāro māse parivasati catunnaṁ māsānaṁ accayena
āraddhacittā bhikkhū pabbājenti upasampādenti bhikkhubhāvāya ahaṁ
cattāri vassāni parivasissāmi catunnaṁ vassānaṁ accayena āraddhacittā
bhikkhū pabbājenti upasampādenti bhikkhubhāvāyāti. Alattha kho
acelo kassapo bhagavato santike pabbajjaṁ alattha upasampadaṁ.
Acirūpasampanno kho panāyasmā kassapo eko vūpakaṭṭho appamatto
ātāpī pahitatto viharanto nacirasseva yassatthāya kulaputtā sammadeva
agārasmā anagāriyaṁ pabbajanti tadanuttaraṁ brahmacariyapariyosānaṁ
diṭṭhe va dhamme sayaṁ abhiññā sacchikatvā upasampajja viharati
khīṇā jāti vusitaṁ brahmacariyaṁ kataṁ karaṇīyaṁ nāparaṁ itthattāyāti
abbhaññāsi. Aññataro kho panāyasmā kassapo arahataṁ ahosīti.
Mahāsīhanādasuttaṁ aṭṭhamaṁ niṭṭhitaṁ.
---------------
Poṭṭhapādasuttaṁ navamaṁ

[275] Evamme sutaṁ. Ekaṁ samayaṁ bhagavā sāvatthiyaṁ viharati
jetavane anāthapiṇḍikassārāme. Tena kho pana samayena poṭṭhapādo
paribbājako samayappavādake tiṇḍukācire ekasārike mallikārāme
paṭivasati mahatiyā paribbājakaparisāya saddhiṁ tiṁsamattehi paribbājakasatehi.
Athakho bhagavā pubbaṇhasamayaṁ nivāsetvā pattacīvaramādāya
sāvatthiyaṁ piṇḍāya pāvisi. Athakho bhagavato etadahosi atippago
kho tāva sāvatthiyaṁ piṇḍāya carituṁ yannūnāhaṁ yena samayappavādako
tiṇḍukāciro ekasāliko mallikārāmo yena poṭṭhapādo paribbājako
tenupasaṅkameyyanti. Athakho bhagavā yena samayappavādako tiṇḍukāciro
ekasāliko mallikārāmo tenupasaṅkami.

[276] Tena kho pana samayena poṭṭhapādo paribbājako mahatiyā
paribbājakaparisāya saddhiṁ nisinno hoti unnādiniyā uccāsaddamahāsaddāya
anekavihitaṁ tiracchānakathaṁ kathentiyā. Seyyathīdaṁ. Rājakathaṁ
corakathaṁ mahāmattakathaṁ senākathaṁ bhayakathaṁ yuddhakathaṁ annakathaṁ pānakathaṁ
vatthakathaṁ sayanakathaṁ mālākathaṁ gandhakathaṁ ñātikathaṁ yānakathaṁ gāmakathaṁ
nigamakathaṁ nagarakathaṁ janapadakathaṁ itthīkathaṁ purisakathaṁ surākathaṁ visikhākathaṁ
kumbhaṭṭhānakathaṁ pubbapetakathaṁ nānattakathaṁ lokakkhāyikaṁ samuddakkhāyikaṁ
itibhavābhavakathaṁ iti vā. Addasā kho poṭṭhapādo paribbājako
Bhagavantaṁ dūrato va āgacchantaṁ disvāna sakaparisaṁ saṇṭhapesi
appasaddā bhonto hontu mā bhonto saddamakattha ayaṁ samaṇo
gotamo āgacchati appasaddakāmo kho panāyasmā so appasaddassa
vaṇṇavādī appevanāma appasaddaṁ parisaṁ viditvā upasaṅkamitabbaṁ
maññeyyāti. Evaṁ vutte te paribbājakā tuṇhī ahesuṁ.

[277] Athakho bhagavā yena poṭṭhapādo paribbājako tenupasaṅkami.
Athakho poṭṭhapādo paribbājako bhagavantaṁ etadavoca etu kho bhante
bhagavā svāgataṁ bhante bhagavato cirassaṁ kho bhante bhagavā imaṁ
pariyāyamakāsi yadidaṁ idhāgamanāya nisīdatu bhante bhagavā idamāsanaṁ
paññattanti. Nisīdi bhagavā paññatte āsane. Poṭṭhapādopi
kho paribbājako aññataraṁ nīcaṁ āsanaṁ gahetvā ekamantaṁ nisīdi.
Ekamantaṁ nisinnaṁ kho poṭṭhapādaṁ paribbājakaṁ bhagavā etadavoca
kāya nottha poṭṭhapāda etarahi kathāya sannisinnā kā ca pana
vo antarākathā vippakatāti.

[278] Evaṁ vutte poṭṭhapādo paribbājako bhagavantaṁ etadavoca
tiṭṭhatesā bhante kathā yāya mayaṁ etarahi kathāya sannisinnā
nesā bhante kathā bhagavato dullabhā bhavissati pacchāpi savanāya
purimāni bhante divasāni purimatarāni nānātitthiyānaṁ samaṇabrāhmaṇānaṁ
kotuhalasālāya sannisinnānaṁ sannipatitānaṁ abhisaññānirodhe kathā
udapādi kathaṁ nu kho bho abhisaññānirodho hotīti tatrekacce
Evamāhaṁsu ahetu appaccayā purisassa saññā uppajjatipi nirujjhatipi
yasmiṁ samaye uppajjati saññī tasmiṁ samaye hoti yasmiṁ samaye
nirujjhati asaññī tasmiṁ samaye hotīti ittheke abhisaññānirodhaṁ
paññapenti tamañño evamāha na kho pana metaṁ bho evaṁ bhavissati
saññā hi bho purisassa attā so ca kho upetipi apetipi
yasmiṁ samaye upeti saññī tasmiṁ samaye hoti yasmiṁ samaye apeti
asaññī tasmiṁ samaye hotīti ittheke abhisaññānirodhaṁ paññapenti
tamañño evamāha na kho pana metaṁ bho evaṁ bhavissati santi hi
bho samaṇabrāhmaṇā mahiddhikā mahānubhāvā te imassa purisassa
saññaṁ upakaḍḍhantipi apakaḍḍhantipi yasmiṁ samaye upakaḍḍhanti
saññī tasmiṁ samaye hoti yasmiṁ samaye apakaḍḍhanti asaññī
tasmiṁ samaye hotīti ittheke abhisaññānirodhaṁ paññapenti tamañño
evamāha na kho pana metaṁ bho evaṁ bhavissati santi hi bho devā
mahiddhikā mahānubhāvā te imassa purisassa saññaṁ upakkaḍḍhantipi
apakkaḍḍhantipi yasmiṁ samaye upakkaḍḍhanti saññī tasmiṁ samaye
hoti yasmiṁ samaye apakkaḍḍhanti asaññī tasmiṁ samaye hotīti
ittheke abhisaññānirodhaṁ paññapenti tassa mayhaṁ bhante bhagavantaṁyeva
ārabbha sati udapādi aho nūna bhagavā aho nūna sugato yo
imesaṁ dhammānaṁ sukusaloti bhagavā bhante kusalo bhagavā pakataññū
abhisaññānirodhassa kathannu kho bhante abhisaññānirodho hotīti.

[279] Tatra poṭṭhapāda ye te samaṇabrāhmaṇā evamāhaṁsu
ahetu appaccayā purisassa saññā uppajjatipi nirujjhatipīti ādito
va nesaṁ aparaddhaṁ. Taṁ kissa hetu. Sahetu hi poṭṭhapāda sappaccayā
purisassa saññā uppajjatipi nirujjhatipi sikkhā ekā saññā
uppajjatipi sikkhā ekā saññā nirujjhatipi kā ca sikkhāti
bhagavā avoca. Idha poṭṭhapāda tathāgato loke uppajjati arahaṁ
sammāsambuddho .pe. (yathā sāmaññaphale evaṁ vitthāretabbaṁ).
Evaṁ kho poṭṭhapāda bhikkhu sīlasampanno hoti .pe. Tassime
pañca nīvaraṇe pahīne attani samanupassato pāmojjaṁ jāyati
pamuditassa pīti jāyati pītimanassa kāyo passambhati passaddhakāyo
sukhaṁ vedayati sukhino cittaṁ samādhiyati. So vivicceva kāmehi
vivicca akusalehi dhammehi savitakkaṁ savicāraṁ vivekajaṁ pītisukhaṁ paṭhamaṁ
jhānaṁ upasampajja viharati tassa yā purimā kāmasaññā sā nirujjhati
vivekajapītisukhasukhumasaccasaññā tasmiṁ samaye hoti vivekajapītisukhasukhumasaccasaññīyeva
tasmiṁ hoti evaṁpi sikkhā ekā saññā uppajjati
sikkhā ekā saññā nirujjhati ayaṁpi sikkhāti bhagavā avoca.

[280] Puna caparaṁ poṭṭhapāda bhikkhu vitakkavicārānaṁ vūpasamā
ajjhattaṁ sampasādanaṁ cetaso ekodibhāvaṁ avitakkaṁ avicāraṁ samādhijaṁ
pītisukhaṁ dutiyaṁ jhānaṁ upasampajja viharati tassa yā purimā
vivekajapītisukhasukhumasaccasaññā sā nirujjhati samādhijapītisukhasukhumasaccasaññā
Tasmiṁ samaye hoti samādhijapītisukhasukhumasaccasaññīyeva tasmiṁ samaye
hoti evaṁpi sikkhā ekā saññā uppajjati sikkhā ekā saññā
nirujjhati ayaṁpi sikkhāti bhagavā avoca.

[281] Puna caparaṁ poṭṭhapāda bhikkhu pītiyā ca virāgā upekkhako
ca viharati sato ca sampajāno sukhañca kāyena paṭisaṁvedeti yaṁ taṁ
ariyā ācikkhanti upekkhako satimā sukhavihārīti tatiyaṁ jhānaṁ
upasampajja viharati tassa yā purimā samādhijapītisukhasukhumasaccasaññā
sā nirujjhati upekkhāsukhasukhumasaccasaññā tasmiṁ samaye hoti
upekkhāsukhasukhumasaccasaññīyeva tasmiṁ samaye hoti evaṁpi sikkhā
ekā saññā uppajjati sikkhā ekā saññā nirujjhati ayaṁpi
sikkhāti bhagavā avoca.

[282] Puna caparaṁ poṭṭhapāda bhikkhu sukhassa ca pahānā dukkhassa
ca pahānā pubbe va somanassadomanassānaṁ atthaṅgamā adukkhamasukhaṁ
upekkhāsatipārisuddhiṁ catutthaṁ jhānaṁ upasampajja viharati tassa yā
purimā upekkhāsukhasukhumasaccasaññā sā nirujjhati adukkhamasukhasukhumasaccasaññā
tasmiṁ samaye hoti adukkhamasukhasukhumasaccasaññīyeva tasmiṁ
samaye hoti evaṁpi sikkhā ekā saññā uppajjati sikkhā ekā
saññā nirujjhati ayaṁpi sikkhāti bhagavā avoca.