[253] Puna caparaṁ mahāli bhikkhu āsavānaṁ khayā anāsavaṁ
cetovimuttiṁ paññāvimuttiṁ diṭṭhe va dhamme sayaṁ abhiññā sacchikatvā
upasampajja viharati ayaṁpi kho mahāli dhammo uttaritaro ca
paṇītataro ca yassa sacchikiriyāhetu bhikkhū mayi brahmacariyaṁ caranti
ime kho te mahāli dhammā uttaritarā ca paṇītatarā ca yesaṁ
sacchikiriyāhetu bhikkhū mayi brahmacariyaṁ carantīti.
[254] Atthi nu kho bhante maggo atthi paṭipadā etesaṁ
dhammānaṁ sacchikiriyāyāti. Atthi kho mahāli maggo atthi paṭipadā
etesaṁ dhammānaṁ sacchikiriyāyāti. Katamo pana bhante maggo
katamā paṭipadā etesaṁ dhammānaṁ sacchikiriyāyāti. Ayameva ariyo
aṭṭhaṅgiko maggo seyyathīdaṁ sammādiṭṭhi sammāsaṅkappo sammāvācā
sammākammanto sammāājīvo sammāvāyāmo sammāsati sammāsamādhi
ayaṁ kho mahāli maggo ayaṁ paṭipadā etesaṁ dhammānaṁ
sacchikiriyāya.
[255] Ekamidāhaṁ mahāli samayaṁ kosambiyaṁ viharāmi ghositārāme.
Athakho dve pabbajitā maṇḍiyo ca paribbājako jāliyo
ca dārupattikantevāsī yenāhaṁ tenupasaṅkamiṁsu upasaṅkamitvā mayā
saddhiṁ sammodiṁsu sammodanīyaṁ kathaṁ sārāṇīyaṁ vītisāretvā ekamantaṁ
aṭṭhaṁsu. Ekamantaṁ ṭhitā kho te dve pabbajitā maṁ etadavocuṁ
kinnu kho āvuso gotama taṁ jīvaṁ taṁ sarīraṁ udāhu aññaṁ
jīvaṁ aññaṁ sarīranti. Tenahāvuso suṇātha sādhukaṁ manasikarotha
bhāsissāmi. Idhāvuso tathāgato loke uppajjati arahaṁ sammāsambuddho
.pe. (yathā sāmaññaphale evaṁ vitthāretabbaṁ) .pe.
Evaṁ kho āvuso bhikkhu sīlasampanno hoti .pe. Paṭhamaṁ jhānaṁ
upasampajja viharati. Yo nu kho āvuso bhikkhu evaṁ jānāti
evaṁ passati kallannu kho tassetaṁ vacanāya taṁ jīvaṁ taṁ sarīranti
vā aññaṁ jīvaṁ aññaṁ sarīranti vāti. Yo so āvuso bhikkhu
evaṁ jānāti evaṁ passati na kallaṁ tassetaṁ vacanāya taṁ jīvaṁ taṁ
sarīranti vā aññaṁ jīvaṁ aññaṁ sarīranti vā. Ahaṁ kho panetaṁ
āvuso evaṁ jānāmi evaṁ passāmi atha ca panāhaṁ na vadāmi taṁ
jīvaṁ taṁ sarīranti vā aññaṁ jīvaṁ aññaṁ sarīranti vāti. Dutiyaṁ
jhānaṁ. Tatiyaṁ jhānaṁ. Catutthaṁ jhānaṁ upasampajja viharati.
Yo nu kho āvuso bhikkhu evaṁ jānāti evaṁ passati kallannu kho
tassetaṁ vacanāya taṁ jīvaṁ taṁ sarīranti vā aññaṁ jīvaṁ aññaṁ
sarīranti vāti. Yo so āvuso bhikkhu evaṁ jānāti evaṁ
Passati na kallaṁ tassetaṁ vacanāya taṁ jīvaṁ taṁ sarīranti vā aññaṁ
jīvaṁ aññaṁ sarīranti vāti. Ahaṁ kho panetaṁ āvuso evaṁ
jānāmi evaṁ passāmi atha ca panāhaṁ na vadāmi taṁ jīvaṁ taṁ sarīranti
vā aññaṁ jīvaṁ aññaṁ sarīranti vāti. Ñāṇadassanāya cittaṁ
abhinīharati abhininnāmeti. Yo nu kho āvuso bhikkhu .pe. Nāparaṁ
itthattāyāti pajānāti. Yo nu kho āvuso bhikkhu evaṁ jānāti
evaṁ passati kallaṁ nu kho tassetaṁ vacanāya taṁ jīvaṁ taṁ sarīranti vā
aññaṁ jīvaṁ aññaṁ sarīranti vāti. Yo so āvuso bhikkhu evaṁ
jānāti evaṁ passati na kallaṁ tassetaṁ vacanāya taṁ jīvaṁ taṁ
sarīranti vā aññaṁ jīvaṁ aññaṁ sarīranti vāti. Ahaṁ kho panetaṁ
āvuso evaṁ jānāmi evaṁ passāmi atha ca panāhaṁ na vadāmi
taṁ jīvaṁ taṁ sarīranti vā aññaṁ jīvaṁ aññaṁ sarīranti vāti.
Idamavoca bhagavā. Attamano oṭṭhaddho licchavi bhagavato bhāsitaṁ
abhinandīti.
Mahālisuttaṁ chaṭṭhaṁ niṭṭhitaṁ.
--------------
Jāliyasuttaṁ sattamaṁ
[256] Evamme sutaṁ. Ekaṁ samayaṁ bhagavā kosambiyaṁ viharati
ghositārāme. Athakho dve pabbajitā maṇḍiyo ca paribbājako
jāliyo ca dārupattikantevāsī yena bhagavā tenupasaṅkamiṁsu upasaṅkamitvā
bhagavatā saddhiṁ sammodiṁsu sammodanīyaṁ kathaṁ sārāṇīyaṁ vītisāretvā
ekamantaṁ aṭṭhaṁsu. Ekamantaṁ ṭhitā kho te dve pabbajitā
bhagavantaṁ etadavocuṁ kinnu kho āvuso bho gotama taṁ jīvaṁ taṁ
sarīraṁ udāhu aññaṁ jīvaṁ aññaṁ sarīranti. Tenahāvuso suṇātha
sādhukaṁ manasikarotha bhāsissāmīti. Evamāvusoti kho te dve
pabbajitā bhagavato paccassosuṁ. Bhagavā etadavoca idha āvuso
tathāgato loke uppajjati arahaṁ sammāsambuddho .pe. (yathā
sāmaññaphale evaṁ vitthāretabbaṁ) .pe. Evaṁ kho āvuso bhikkhu
sīlasampanno hoti. Paṭhamaṁ jhānaṁ upasampajja viharati.
[257] Yo nu kho āvuso bhikkhu evaṁ jānāti evaṁ passati
kallannu kho tassetaṁ vacanāya taṁ jīvaṁ taṁ sarīranti vā aññaṁ jīvaṁ
aññaṁ sarīranti vāti. Yo so āvuso bhikkhu evaṁ jānāti
evaṁ passati na kallaṁ tassetaṁ vacanāya .pe. Ahaṁ kho panetaṁ
āvuso evaṁ jānāmi evaṁ passāmi atha ca panāhaṁ na vadāmi
taṁ jīvaṁ taṁ sarīranti vā aññaṁ jīvaṁ aññaṁ sarīranti vāti. Dutiyaṁ
Jhānaṁ. Tatiyaṁ jhānaṁ. Catutthaṁ jhānaṁ upasampajja viharati.
[258] Yo nu kho āvuso bhikkhu evaṁ jānāti evaṁ passati
kallaṁ nu kho tassetaṁ vacanāya taṁ jīvaṁ taṁ sarīranti vā aññaṁ jīvaṁ
aññaṁ sarīranti vāti. Yo so āvuso bhikkhu evaṁ jānāti evaṁ
passati na kallaṁ tassetaṁ vacanāya taṁ jīvaṁ taṁ sarīranti vā aññaṁ
jīvaṁ aññaṁ sarīranti vā. Ahaṁ kho panetaṁ āvuso evaṁ jānāmi
evaṁ passāmi atha ca panāhaṁ na vadāmi taṁ jīvaṁ taṁ sarīranti
vā aññaṁ jīvaṁ aññaṁ sarīranti vāti. Ñāṇadassanāya cittaṁ
abhinīharati abhininnāmeti. Yo nu kho āvuso bhikkhu .pe.
Nāparaṁ itthattāyāti pajānāti.
[259] Yo nu kho āvuso bhikkhu evaṁ jānāti evaṁ passati
kallaṁ nu kho tassetaṁ vacanāya taṁ jīvaṁ taṁ sarīranti vā aññaṁ jīvaṁ
aññaṁ sarīranti vāti. Yo so āvuso bhikkhu evaṁ jānāti evaṁ
passati na kallaṁ tassetaṁ vacanāya taṁ jīvaṁ taṁ sarīranti vā aññaṁ
jīvaṁ aññaṁ sarīranti vāti. Ahaṁ kho panetaṁ āvuso evaṁ jānāmi
evaṁ passāmi atha ca panāhaṁ na vadāmi taṁ jīvaṁ taṁ sarīranti vā
aññaṁ jīvaṁ aññaṁ sarīranti vāti. Idamavoca bhagavā. Attamanā
te dve pabbajitā bhagavato bhāsitaṁ abhinandunti.
Jāliyasuttaṁ sattamaṁ niṭṭhitaṁ.
---------------
Mahāsīhanādasuttaṁ aṭṭhamaṁ
[260] Evamme sutaṁ. Ekaṁ samayaṁ bhagavā ujuññāyaṁ viharati
kaṇṇakathale migadāye. Athakho acelo kassapo yena bhagavā
tenupasaṅkami upasaṅkamitvā bhagavatā saddhiṁ sammodi sammodanīyaṁ kathaṁ
sārāṇīyaṁ vītisāretvā ekamantaṁ aṭṭhāsi. Ekamantaṁ ṭhito kho
acelo kassapo bhagavantaṁ etadavoca sutametaṁ bho gotama samaṇo
gotamo sabbantapaṁ garahati sabbantapassiṁ lūkhājīviṁ ekaṁsena upakkosati
upavadatīti ye te bho gotama evamāhaṁsu samaṇo gotamo
sabbantapaṁ garahati sabbantapassiṁ lūkhājīviṁ ekaṁsena upakkosati
upavadatīti kacci te bhoto gotamassa vuttavādino na ca bhavantaṁ
gotamaṁ abhūtena abbhācikkhanti dhammassa ca anudhammaṁ byākaronti
na ca koci sahadhammiko vādānuvādo gārayhaṁ ṭhānaṁ āgacchati
anabbhakkhātukāmā hi mayaṁ bhavantaṁ gotamanti. Ye te kassapa
evamāhaṁsu samaṇo gotamo sabbantapaṁ garahati sabbantapassiṁ lūkhājīviṁ
ekaṁsena upakkosati upavadatīti na me te vuttavādino abbhācikkhanti
na ca maṁ te asatā abhūtena. Idhāhaṁ kassapa ekaccaṁ tapassiṁ
lūkhājīviṁ passāmi dibbena cakkhunā visuddhena atikkantamānusakena
kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannaṁ idha
panāhaṁ kassapa ekaccaṁ tapassiṁ lūkhājīviṁ passāmi dibbena cakkhunā
Visuddhena atikkantamānusakena kāyassa bhedā paraṁ maraṇā sugatiṁ
saggaṁ lokaṁ upapannaṁ. Idha panāhaṁ kassapa ekaccaṁ tapassiṁ
appadukkhavihāriṁ passāmi dibbena cakkhunā visuddhena atikkantamānusakena
kāyassa bhedā paraṁ maraṇā apāyaṁ duggatiṁ vinipātaṁ
nirayaṁ upapannaṁ. Idha panāhaṁ kassapa ekaccaṁ tapassiṁ appadukkhavihāriṁ
passāmi dibbena cakkhunā visuddhena atikkantamānusakena
kāyassa bhedā paraṁ maraṇā sugatiṁ saggaṁ lokaṁ upapannaṁ. Sohaṁ
kassapa imesaṁ tapassīnaṁ evaṁ āgatiñca gatiñca cutiñca upapattiñca
yathābhūtaṁ pajānāmi sohaṁ kiṁ sabbantapaṁ garahissāmi sabbantapassiṁ
lūkhājīviṁ ekaṁsena upakkosissāmi upavadissāmi.
[261] Santi kassapa eke samaṇabrāhmaṇā paṇḍitā nipuṇā
kataparappavādā vālavedhirūpā te bhindantā maññe caranti paññāgatena
diṭṭhigatāni. Tehipime saddhiṁ ekaccesu ṭhānesu samenti
ethaccesu ṭhānesu na samenti. Yante ekaccaṁ 1 vadenti sādhūti
mayaṁpi taṁ ekaccaṁ vadema sādhūti. Yante ekaccaṁ vadenti na
sādhūti mayaṁpi taṁ ekaccaṁ vadema na sādhūti. Yante ekaccaṁ
vadenti sādhūti mayaṁ taṁ ekaccaṁ vadema na sādhūti. Yante ekaccaṁ
vadenti na sādhūti mayaṁ taṁ ekaccaṁ vadema sādhūti. Yaṁ mayaṁ
ekaccaṁ vadema sādhūti parepi taṁ ekaccaṁ vadenti sādhūti. Yaṁ
1 Sī. yantekacce.
Mayaṁ ekaccaṁ vadema na sādhūti parepi taṁ ekaccaṁ vadenti na
sādhūti. Yaṁ mayaṁ ekaccaṁ vadema sādhūti parepi taṁ ekaccaṁ
vadenti na sādhūti. Yaṁ mayaṁ ekaccaṁ vadema na sādhūti parepi
taṁ ekaccaṁ vadenti sādhūti. Tyāhaṁ upasaṅkamitvā evaṁ vadāmi
yesu no āvuso ṭhānesu na samenti tiṭṭhantu tāni ṭhānāni yesu
ṭhānesu samenti tattha viññū samanuyuñjantaṁ samanuggāhantaṁ samanubhāsantaṁ
satthārā vā satthāraṁ saṁghena vā saṁghaṁ ye imesaṁ bhavataṁ
dhammā akusalā akusalasaṁkhātā sāvajjā sāvajjasaṁkhātā asevitabbā
asevitabbasaṁkhātā nālamariyā nālamariyasaṁkhātā kaṇhā kaṇhasaṁkhātā
ko ime dhamme anavasesaṁ pahāya vattati samaṇo gotamo pare
vā pana bhonto gaṇācariyāti.
[262] Ṭhānaṁ kho panetaṁ kassapa vijjati yaṁ viññū samanuyuñjantā
samanuggāhantā samanubhāsantā evaṁ vadeyyuṁ ye imesaṁ bhavataṁ
dhammā akusalā akusalasaṁkhātā sāvajjā sāvajjasaṁkhātā asevitabbā
asevitabbasaṁkhātā nālamariyā nālamariyasaṁkhātā kaṇhā kaṇhasaṁkhātā
samaṇo gotamo ime dhamme anavasesaṁ pahāya vattati yaṁ vā pana
bhonto pare gaṇācariyāti. Itiha kassapa viññū samanuyuñjantā
samanuggāhantā samanubhāsantā amhe va tattha yebhuyyena pasaṁseyyuṁ.