[243] Oṭṭhaddhopi licchavi mahatiyā licchaviparisāya saddhiṁ yena
bhagavā tenupasaṅkami upasaṅkamitvā bhagavantaṁ abhivādetvā ekamantaṁ
nisīdi. Ekamantaṁ nisinno kho oṭṭhaddhopi licchavi bhagavantaṁ
etadavoca purimāni bhante divasāni purimatarāni sunakkhatto licchaviputto
yenāhaṁ tenupasaṅkami upasaṅkamitvā maṁ etadavoca yadagge ahaṁ
mahāli bhagavantaṁ upanissāya viharāmi na ciraṁ tīṇi vassāni dibbāni hi
kho rūpāni passāmi piyarūpāni kāmūpasañhitāni rajaniyāni no ca
kho dibbāni saddāni suṇāmi piyarūpāni kāmūpasañhitāni rajaniyāni
santāneva nu kho bhante sunakkhatto licchaviputto dibbāni saddāni
Nāssosi piyarūpāni kāmūpasañhitāni rajaniyāni tāni udāhu asantānīti.
Santāneva kho mahāli sunakkhatto licchaviputto dibbāni
saddāni nāssosi piyarūpāni kāmūpasañhitāni rajaniyāni no asantānīti.
Ko nu kho bhante hetu ko paccayo yena sunakkhatto
licchaviputto santāneva dibbāni saddāni na assosi piyarūpāni
kāmūpasañhitāni rajaniyāni no asantānīti.

[244] Idha mahāli bhikkhuno puratthimāya disāya ekaṁsabhāvito
samādhi hoti dibbānaṁ rūpānaṁ dassanāya piyarūpānaṁ kāmūpasañhitānaṁ
rajaniyānaṁ no ca kho dibbānaṁ saddānaṁ savanāya piyarūpānaṁ
kāmūpasañhitānaṁ rajaniyānaṁ so puratthimāya disāya ekaṁsabhāvite
samādhimhi dibbānaṁ rūpānaṁ dassanāya piyarūpānaṁ kāmūpasañhitānaṁ
rajaniyānaṁ no ca kho dibbānaṁ saddānaṁ savanāya piyarūpānaṁ
kāmūpasañhitānaṁ rajaniyānaṁ puratthimāya disāya dibbāni rūpāni
passati piyarūpāni kāmūpasañhitāni rajaniyāni no ca kho dibbāni
saddāni suṇāti piyarūpāni kāmūpasañhitāni rajaniyāni taṁ kissa
hetu evaṁ hetaṁ mahāli hoti bhikkhuno puratthimāya disāya ekaṁsabhāvite
samādhimhi dibbānaṁ rūpānaṁ dassanāya piyarūpānaṁ kāmūpasañhitānaṁ
rajaniyānaṁ no ca kho dibbānaṁ saddānaṁ savanāya piyarūpānaṁ
kāmūpasañhitānaṁ rajaniyānaṁ.

[245] Puna caparaṁ mahāli bhikkhuno dakkhiṇāya disāya .pe.
Pacchimāya disāya .pe. Uttarāya disāya .pe. Uddhamadho
tiriyaṁ ekaṁsabhāvito samādhi hoti dibbānaṁ rūpānaṁ dassanāya piyarūpānaṁ
kāmūpasañhitānaṁ rajaniyānaṁ no ca kho dibbānaṁ saddānaṁ
savanāya piyarūpānaṁ kāmūpasañhitānaṁ rajaniyānaṁ so uddhamadho
tiriyaṁ ekaṁsabhāvite samādhimhi dibbānaṁ rūpānaṁ dassanāya piyarūpānaṁ
kāmūpasañhitānaṁ rajaniyānaṁ no ca kho dibbānaṁ saddānaṁ savanāya
piyarūpānaṁ kāmūpasañhitānaṁ rajaniyānaṁ uddhamadho tiriyaṁ dibbāni
rūpāni passati piyarūpāni kāmūpasañhitāni rajaniyāni no ca kho
dibbāni saddāni suṇāti piyarūpāni kāmūpasañhitāni rajaniyāni
taṁ kissa hetu evaṁ hetaṁ mahāli hoti bhikkhuno uddhamadho
tiriyaṁ ekaṁsabhāvite samādhimhi dibbānaṁ rūpānaṁ dassanāya piyarūpānaṁ
kāmūpasañhitānaṁ rajaniyānaṁ no ca kho dibbānaṁ saddānaṁ savanāya
piyarūpānaṁ kāmūpasañhitānaṁ rajaniyānaṁ.

[246] Idha mahāli bhikkhuno puratthimāya disāya ekaṁsabhāvito
samādhi hoti dibbānaṁ saddānaṁ savanāya piyarūpānaṁ kāmūpasañhitānaṁ
rajaniyānaṁ no ca kho dibbānaṁ rūpānaṁ dassanāya piyarūpānaṁ
kāmūpasañhitānaṁ rajaniyānaṁ so puratthimāya disāya ekaṁsabhāvite
samādhimhi dibbānaṁ saddānaṁ savanāya piyarūpānaṁ kāmūpasañhitānaṁ
rajaniyānaṁ no ca kho dibbānaṁ rūpānaṁ dassanāya piyarūpānaṁ
kāmūpasañhitānaṁ rajaniyānaṁ puratthimāya disāya dibbāni saddāni
Suṇāti piyarūpāni kāmūpasañhitāni rajaniyāni no ca kho dibbāni
rūpāni passati piyarūpāni kāmūpasañhitāni rajaniyāni taṁ kissa
hetu evaṁ hetaṁ mahāli hoti bhikkhuno puratthimāya disāya ekaṁsabhāvite
samādhimhi dibbānaṁ saddānaṁ savanāya piyarūpānaṁ kāmūpasañhitānaṁ
rajaniyānaṁ no ca kho dibbānaṁ rūpānaṁ dassanāya piyarūpānaṁ kāmūpasañhitānaṁ
rajaniyānaṁ.

[247] Puna caparaṁ mahāli bhikkhuno dakkhiṇāya disāya .pe.
Pacchimāya disāya .pe. Uttarāya disāya .pe. Uddhamadho
tiriyaṁ ekaṁsabhāvito samādhi hoti dibbānaṁ saddānaṁ savanāya piyarūpānaṁ
kāmūpasañhitānaṁ rajaniyānaṁ no ca kho dibbānaṁ rūpānaṁ dassanāya
piyarūpānaṁ kāmūpasañhitānaṁ rajaniyānaṁ so uddhamadho tiriyaṁ ekaṁsabhāvite
samādhimhi dibbānaṁ saddānaṁ savanāya piyarūpānaṁ kāmūpasañhitānaṁ
rajaniyānaṁ no ca kho dibbānaṁ rūpānaṁ dassanāya piyarūpānaṁ
kāmūpasañhitānaṁ rajaniyānaṁ uddhamadho tiriyaṁ dibbāni saddāni
suṇāti piyarūpāni kāmūpasañhitāni rajaniyāni no ca kho dibbāni
rūpāni passati piyarūpāni kāmūpasañhitāni rajaniyāni taṁ kissa
hetu evaṁ hetaṁ mahāli hoti bhikkhuno uddhamadho tiriyaṁ ekaṁsabhāvite
samādhimhi dibbānaṁ saddānaṁ savanāya piyarūpānaṁ kāmūpasañhitānaṁ
rajaniyānaṁ no ca kho dibbānaṁ rūpānaṁ dassanāya piyarūpānaṁ kāmūpasañhitānaṁ
rajaniyānaṁ.

[248] Idha mahāli bhikkhuno puratthimāya disāya ubhayaṁsabhāvito
samādhi hoti dibbānañca rūpānaṁ dassanāya piyarūpānaṁ kāmūpasañhitānaṁ
rajaniyānaṁ dibbānañca saddānaṁ savanāya piyarūpānaṁ kāmūpasañhitānaṁ
rajaniyānaṁ so puratthimāya disāya ubhayaṁsabhāvite samādhimhi dibbānañca
rūpānaṁ dassanāya .pe. Dibbānañca saddānaṁ savanāya .pe.
Puratthimāya disāya dibbāni ca rūpāni passati piyarūpāni kāmūpasañhitāni
rajaniyāni dibbāni ca saddāni suṇāti piyarūpāni kāmūpasañhitāni
rajaniyāni taṁ kissa hetu evaṁ hetaṁ mahāli hoti
bhikkhuno puratthimāya disāya ubhayaṁsabhāvite samādhimhi dibbānañca
rūpānaṁ dassanāya .pe. Dibbānañca saddānaṁ savanāya piyarūpānaṁ
kāmūpasañhitānaṁ rajaniyānaṁ.

[249] Puna caparaṁ mahāli bhikkhuno dakkhiṇāya disāya .pe.
Pacchimāya disāya .pe. Uttarāya disāya .pe. Uddhamadho
tiriyaṁ ubhayaṁsabhāvito samādhi hoti dibbānañca rūpānaṁ dassanāya
piyarūpānaṁ kāmūpasañhitānaṁ rajaniyānaṁ dibbānañca saddānaṁ savanāya
piyarūpānaṁ kāmūpasañhitānaṁ rajaniyānaṁ so uddhamadho tiriyaṁ ubhayaṁsabhāvite
samādhimhi dibbānañca rūpānaṁ dassanāya piyarūpānaṁ kāmūpasañhitānaṁ
rajaniyānaṁ dibbānañca saddānaṁ savanāya piyarūpānaṁ kāmūpasañhitānaṁ
rajaniyānaṁ uddhamadho tiriyaṁ dibbāni rūpāni passati
piyarūpāni kāmūpasañhitāni rajaniyāni dibbāni ca saddāni suṇāti
Piyarūpāni kāmūpasañhitāni rajaniyāni taṁ kissa hetu evaṁ hetaṁ
mahāli hoti bhikkhuno uddhamadho tiriyaṁ ubhayaṁsabhāvite samādhimhi
dibbānañca rūpānaṁ dassanāya piyarūpānaṁ kāmūpasañhitānaṁ rajaniyānaṁ
dibbānañca saddānaṁ savanāya piyarūpānaṁ kāmūpasañhitānaṁ rajaniyānaṁ
ayaṁ kho mahāli hetu ayaṁ paccayo yena santāneva sunakkhatto
licchaviputto dibbāni saddāni na assosi piyarūpāni kāmūpasañhitāni
rajaniyāni no asantānīti.

[250] Etāsaṁ nūna bhante samādhibhāvanānaṁ sacchikiriyāhetu bhikkhū
bhagavati brahmacariyaṁ carantīti. Na kho mahāli etāsaṁ samādhibhāvanānaṁ
sacchikiriyāhetu bhikkhū mayi brahmacariyaṁ caranti atthi kho mahāli
aññe dhammā uttaritarā ca paṇītatarā ca yesaṁ sacchikiriyāhetu
bhikkhū mayi brahmacariyaṁ carantīti. Katame pana bhante dhammā
uttaritarā ca paṇītatarā ca yesaṁ sacchikiriyāhetu bhikkhū bhagavati
brahmacariyaṁ carantīti. Idha mahāli bhikkhu tiṇṇaṁ saññojanānaṁ
parikkhayā sotāpanno hoti avinipātadhammo niyato sambodhiparāyano
ayaṁ kho mahāli dhammo uttaritaro ca paṇītataro ca
yassa sacchikiriyāhetu bhikkhū mayi brahmacariyaṁ caranti.

[251] Puna caparaṁ mahāli bhikkhu tiṇṇaṁ saññojanānaṁ parikkhayā
rāgadosamohānaṁ tanuttā sakadāgāmī hoti sakideva imaṁ lokaṁ
āgantvā dukkhassantaṁ karoti ayaṁ kho mahāli dhammo uttaritaro ca
Paṇītataro ca yassa sacchikiriyāhetu bhikkhū mayi brahmacariyaṁ caranti.

[252] Puna caparaṁ mahāli bhikkhu pañcannaṁ orambhāgiyānaṁ
saññojanānaṁ parikkhayā opapātiko hoti tattha parinibbāyī anāvattidhammo
tasmā lokā ayaṁ kho mahāli dhammo uttaritaro ca
paṇītataro ca yassa sacchikiriyāhetu bhikkhū mayi brahmacariyaṁ caranti.