[223] Siyā kho pana bhoto rañño mahāyaññaṁ yajamānassa
kocideva vattā rājā kho mahāvijito mahāyaññaṁ yajati no ca
kho ubhato sujāto mātito ca pitito ca saṁsuddhagahaṇiko yāva
sattamā pitāmahayugā akkhitto anupakkuṭṭho jātivādena atha ca
pana bhavaṁ rājā evarūpaṁ mahāyaññaṁ yajatīti. Evampi kho bhoto
rañño vattā dhammato natthi. Bhavaṁ kho pana rājā ubhato
sujāto mātito ca pitito ca saṁsuddhagahaṇiko yāva sattamā
Pitāmahayugā akkhitto anupakkuṭṭho jātivādena. Imināpetaṁ bhavaṁ
rājā jānātu yajataṁ bhavaṁ sajjataṁ bhavaṁ modataṁ bhavaṁ cittameva bhavaṁ
antaraṁ pasādetu.

[224] Siyā kho pana bhoto rañño mahāyaññaṁ yajamānassa
kocideva vattā rājā kho mahāvijito mahāyaññaṁ yajati no ca
kho abhirūpo dassanīyo pāsādiko paramāya vaṇṇapokkharatāya
samannāgato brahmavaṇṇi brahmavacchasi akkhuddāvakāso dassanāya
.pe. No ca kho aḍḍho mahaddhano mahābhogo pahūtajātarūparajato
pahūtavittūpakaraṇo pahūtadhanadhañño paripuṇṇakosakoṭṭhāgāro .pe.
No ca kho balavā caturaṅginiyā senāya samannāgato assavāya
ovādapaṭikārāya tapati maññe paccatthike yasasā no ca kho
saddho dāyako dānapati anāvaṭadvāro samaṇabrāhmaṇakapaṇaddhikavaṇibbakayācakānaṁ
opānabhūto puññāni karoti no ca kho bahussuto
tassa tassa sutajātassa no ca kho tassa tasseva kho pana bhāsitassa
atthaṁ jānāti ayaṁ imassa bhāsitassa attho ayaṁ imassa bhāsitassa
atthoti no ca kho paṇḍito viyatto medhāvī paṭibalo atītānāgatapaccuppanne
atthe cintetuṁ atha ca pana bhavaṁ rājā evarūpaṁ
mahāyaññaṁ yajatīti. Evaṁpi kho bhoto rañño vattā dhammato
natthi. Bhavaṁ kho pana rājā paṇḍito viyatto medhāvī paṭibalo
atītānāgatapaccuppanne atthe cintetuṁ imināpetaṁ bhavaṁ rājā
Jānātu yajataṁ bhavaṁ sajjataṁ bhavaṁ modataṁ bhavaṁ cittameva bhavaṁ
antaraṁ pasādetu.

[225] Siyā kho pana bhoto rañño mahāyaññaṁ yajamānassa
kocideva vattā rājā kho mahāvijito mahāyaññaṁ yajati no ca
khvassa purohito brāhmaṇo ubhato sujāto mātito ca pitito
ca saṁsuddhagahaṇiko yāva sattamā pitāmahayugā akkhitto anupakkuṭṭho
jātivādena atha ca pana bhavaṁ rājā evarūpaṁ mahāyaññaṁ yajatīti.
Evaṁpi kho bhoto rañño vattā dhammato natthi. Bhoto kho
pana rañño purohito brāhmaṇo ubhato sujāto mātito ca
pitito ca saṁsuddhagahaṇiko yāva sattamā pitāmahayugā akkhitto
anupakkuṭṭho jātivādena imināpetaṁ bhavaṁ rājā jānātu yajataṁ bhavaṁ
sajjataṁ bhavaṁ modataṁ bhavaṁ cittameva bhavaṁ antaraṁ pasādetu.

[226] Siyā kho pana bhoto rañño mahāyaññaṁ yajamānassa
kocideva vattā rājā kho mahāvijito mahāyaññaṁ yajati no ca
khvassa purohito brāhmaṇo ajjhāyako mantadharo tiṇṇaṁ vedānaṁ
pāragū sanighaṇḍuketubhānaṁ sākkharappabhedānaṁ itihāsapañcamānaṁ padako
veyyākaraṇo lokāyatamahāpurisalakkhaṇesu anavayo no ca khvassa
purohito brāhmaṇo sīlavā vuḍḍhasīlī vuḍḍhasīlena samannāgato
no ca khvassa purohito brāhmaṇo paṇḍito viyatto medhāvī
paṭhamo vā dutiyo vā pūjaṁ paggaṇhantānaṁ atha ca pana bhavaṁ
Rājā evarūpaṁ mahāyaññaṁ yajatīti. Evaṁpi bhoto rañño vattā
dhammato natthi. Bhoto kho pana rañño purohito brāhmaṇo
paṇḍito viyatto medhāvī paṭhamo vā dutiyo vā pūjaṁ paggaṇhantānaṁ
imināpetaṁ bhavaṁ rājā jānātu yajataṁ bhavaṁ sajjataṁ bhavaṁ modataṁ bhavaṁ
cittameva bhavaṁ antaraṁ pasādetūti. Imehi kho brāhmaṇa purohito
brāhmaṇo rañño mahāvijitassa mahāyaññaṁ yajamānassa soḷasahi
ākārehi cittaṁ sandassesi samādapesi samuttejesi sampahaṁsesi.

[227] Tasmiṁ kho pana brāhmaṇa yaññe neva gāvo haññiṁsu
na ajeḷakā haññiṁsu na kukkuṭasūkarā haññiṁsu na vividhā pāṇā
saṁghātaṁ āpajjiṁsu na rukkhā chindiṁsu 1 yūpatthāya na dabbā lāyiṁsu
parihiṁsatthāya. Yepissa ahesuṁ dāsāti vā pessāti vā kammakarāti
vā tepi na daṇḍatajjitā na bhayatajjitā na assumukhā rodamānā
parikammāni akaṁsu. Athakho ye icchiṁsu te akaṁsu ye na
icchiṁsu na te akaṁsu. Yaṁ icchiṁsu taṁ akaṁsu yaṁ na icchiṁsu
na taṁ akaṁsu. Sappitelanavanītadadhimadhuphāṇitena ceva so yañño
niṭṭhānamagamāsi.

[228] Athakho brāhmaṇa khattiyā anuyantā negamā ceva
jānapadā ca. Amaccā pārisajjā negamā ceva jānapadā ca.
Brāhmaṇamahāsālā negamā ceva jānapadā ca. Gahapatinecayikā
1 chijjiṁsūti vā pāṭho.
Negamā ceva jānapadā ca pahūtaṁ sāpateyyaṁ ādāya rājānaṁ
mahāvijitaṁ upasaṅkamitvā evamāhaṁsu idaṁ te deva pahūtaṁ sāpateyyaṁ
devaṁyeva uddissa ābhataṁ taṁ devo paṭiggaṇhātūti. Alaṁ bho
mamāpi idaṁ pahūtaṁ sāpateyyaṁ dhammikena balinā abhisaṁkhataṁ tañca
vo hotu ito ca bhiyyo harathāti. Te raññā paṭikkhittā
ekamantaṁ apakkamma evaṁ samacintesuṁ na kho etaṁ amhākaṁ paṭirūpaṁ
yaṁ mayaṁ imāni sāpateyyāni punadeva sakāni gharāni paṭiggaṇheyyāma
rājā kho mahāvijito mahāyaññaṁ yajati handassa mayaṁ anuyāgino
homāti.

[229] Athakho brāhmaṇa puratthimena yaññavātassa khattiyā
anuyantā negamā ceva jānapadā ca dānāni paṭṭhapesuṁ. Dakkhiṇena
yaññavātassa amaccā pārisajjā negamā ceva jānapadā ca dānāni
paṭṭhapesuṁ. Pacchimena yaññavātassa brāhmaṇamahāsālā negamā
ceva jānapadā ca dānāni paṭṭhapesuṁ. Uttarena yaññavātassa
gahapatinecayikā negamā ceva jānapadā ca dānāni paṭṭhapesuṁ.
Tesupi kho brāhmaṇa yaññesu neva gāvo haññiṁsu na ajeḷakā
haññiṁsu na kukkuṭasūkarā haññiṁsu na vividhā pāṇā saṁghātaṁ
āpajjiṁsu na rukkhā chindiṁsu yūpatthāya na dabbā lāyiṁsu parihiṁsatthāya.
Ye nesaṁ ahesuṁ dāsāti vā pessāti vā kammakarāti
vā tepi na daṇḍatajjitā na bhayatajjitā na assumukhā rodamānā
Parikammāni akaṁsu. Athakho ye icchiṁsu te akaṁsu ye na icchiṁsu
na te akaṁsu. Yaṁ icchiṁsu taṁ akaṁsu yaṁ na icchiṁsu taṁ na akaṁsu.
Sappitelanavanītadadhimadhuphāṇitena ceva so yañño niṭṭhānamagamāsi.
Iti cattāro ca anumatipakkhā rājā mahāvijito aṭṭhahi aṅgehi
samannāgato purohito brāhmaṇo catūhaṅgehi samannāgato tisso
vidhā ayaṁ vuccati brāhmaṇa tividhā yaññasampadā soḷasaparikkhārāti.

[230] Evaṁ vutte te brāhmaṇā unnādino uccāsaddā
mahāsaddā ahesuṁ aho yañño aho yaññasampadāti. Kūṭadanto
pana brāhmaṇo tuṇhībhūto va nisinno hoti. Athakho te
brāhmaṇā kūṭadantaṁ brāhmaṇaṁ etadovacuṁ kasmā pana bhavaṁ kūṭadanto
samaṇassa gotamassa subhāsitaṁ subhāsitato nābbhanumodatīti. Nāhaṁ
bho samaṇassa gotamassa subhāsitaṁ subhāsitato na abbhanumodāmi
muddhāpi tassa nippateyya 1 yo samaṇassa gotamassa subhāsitaṁ
subhāsitato na abbhānumodeyya apica me bho evaṁ hoti samaṇo
gotamo evamāha evaṁ me sutanti vā evaṁ arahati bhavitunti vā
apica samaṇo gotamo evaṁ tadā āsi itthaṁ tadā āsitveva
bhāsati tassa mayhaṁ bho evaṁ hoti addhā samaṇo gotamo tena
samayena rājā hoti mahāvijito yaññasāmī purohito tassa yaññassa
yājetāti abhijānāti pana bhavaṁ gotamo evarūpaṁ yaññaṁ yajitvā
1 Sī. vipateyya.
Vā yājetvā vā kāyassa bhedā paraṁ maraṇā sugatiṁ saggaṁ lokaṁ
uppajjitāti. Abhijānāmāhaṁ brāhmaṇa evarūpaṁ yaññaṁ yajitvā
ca yājetvā ca kāyassa bhedā paraṁ maraṇā sugatiṁ saggaṁ lokaṁ
upapajjitāti ahaṁ tena samayena brāhmaṇa purohito brāhmaṇo
ahosiṁ tassa yaññassa yājetāti.

[231] Atthi pana bho gotama añño yañño imāya tividhāya
yaññasampadāya soḷasaparikkhārāya appatthataro ca appasamārambhataro
ca mahapphalataro ca mahānisaṁsataro cāti. Atthi brāhmaṇa añño
yañño imāya tividhāya yaññasampadāya soḷasaparikkhārāya appatthataro
ca appasamārambhataro ca mahapphalataro ca mahānisaṁsataro cāti.
Katamo pana bho gotama so yañño imāya tividhāya yaññasampadāya
soḷasaparikkhārāya appatthataro ca appasamārambhataro ca mahapphalataro
ca mahānisaṁsataro cāti. Yāni kho tāni brāhmaṇa niccadānāni
anukūlayaññāni sīlavante pabbajite uddissa dīyanti ayaṁ kho
pana brāhmaṇa yañño imāya tividhāya yaññasampadāya soḷasaparikkhārāya
appatthataro ca appasamārambhataro ca mahapphalataro ca
mahānisaṁsataro cāti. Ko nu kho bho gotama hetu ko paccayo
yenataṁ 1 niccadānaṁ anukūlayaññaṁ imāya tividhāya yaññasampadāya
soḷasaparikkhārāya appatthatarañca appasamārambhatarañca mahapphalatarañca
1 yenetanti vā pāṭho.
Mahānisaṁsatarañcāti. Na kho brāhmaṇa evarūpaṁ yaññaṁ upasaṅkamanti
arahanto vā arahattamaggaṁ vā samāpannā taṁ kissa hetu
dissanti hettha brāhmaṇa daṇḍappahārāpi galaggahāpi tasmā
evarūpaṁ yaññaṁ na upasaṅkamanti arahanto vā arahattamaggaṁ vā
samāpannā yāni kho pana tāni brāhmaṇa niccadānāni anukūlayaññāni
sīlavante pabbajite uddissa dīyanti evarūpaṁ kho pana
brāhmaṇa yaññaṁ upasaṅkamanti arahanto vā arahattamaggaṁ vā
samāpannā taṁ kissa hetu na hettha brāhmaṇa dissanti
daṇḍappahārāpi galaggahāpi tasmā evarūpaṁ yaññaṁ upasaṅkamanti
arahanto vā arahattamaggaṁ vā samāpannā ayaṁ kho brāhmaṇa
hetu ayaṁ paccayo yenataṁ niccadānaṁ anukūlayaññaṁ imāya tividhāya
yaññasampadāya soḷasaparikkhārāya appatthatarañca appasamārambhatarañca
mahapphalatarañca mahānisaṁsatarañcāti.

[232] Atthi pana bho gotama añño yañño imāya ca
tividhāya yaññasampadāya soḷasaparikkhārāya iminā ca niccadānena
anukūlayaññena appatthataro ca appasamārambhataro ca mahapphalataro
ca mahānisaṁsataro cāti. Atthi kho brāhmaṇa añño yañño
imāya ca tividhāya yaññasampadāya .pe. Katamo pana so bho
gotama añño yañño imāya ca tividhāya yaññasampadāya .pe.
Yo kho brāhmaṇa cātuddisaṁ saṁghaṁ uddissa vihāraṁ karoti ayañca
Kho brāhmaṇa yañño imāya ca tividhāya yaññasampadāya soḷasaparikkhārāya
iminā ca niccadānena anukūlayaññena appatthataro ca
appasamārambhataro ca mahapphalataro ca mahānisaṁsataro cāti.