[263] Aparaṁpi no kassapa viññū samanuyuñjantaṁ samanuggāhantaṁ
samanubhāsantaṁ satthārā vā satthāraṁ saṁghena vā saṁghaṁ ye imesaṁ
Bhavataṁ dhammā kusalā kusalasaṁkhātā anavajjasaṁkhātā
sevitabbā sevitabbasaṁkhātā alamariyā alamariyasaṁkhātā sukkā
sukkasaṁkhātā ko ime dhamme anavasesaṁ bhonto samādāya vattati
samaṇo gotamo pare vā pana bhonto gaṇācariyāti. Ṭhānaṁ kho
panetaṁ kassapa vijjati yaṁ viññū samanuyuñjantā samanuggāhantā
samanubhāsantā evaṁ vadeyyuṁ ye imesaṁ bhavataṁ dhammā kusalā
kusalasaṁkhātā anavajjā anavajjasaṁkhātā sevitabbā sevitabbasaṁkhātā
alamariyā alamariyasaṁkhātā sukkā sukkasaṁkhātā samaṇo gotamo
ime dhamme anavasesaṁ samādāya vattati yaṁ vā pana bhonto pare
gaṇācariyāti. Itiha kassapa viññū samanuyuñjantā samanuggāhantā
samanubhāsantā amhe va tattha yebhuyyena pasaṁseyyuṁ.

[264] Aparaṁpi no kassapa viññū samanuyuñjantaṁ samanuggāhantaṁ
samanubhāsantaṁ satthārā vā satthāraṁ saṁghena vā saṁghaṁ ye imesaṁ
bhavataṁ dhammā kusalā kusalasaṁkhātā sāvajjā sāvajjasaṁkhātā
asevitabbā asevitabbasaṁkhātā nālamariyā nālamariyasaṁkhātā kaṇhā
kaṇhasaṁkhātā ko ime dhamme anavasesaṁ pahāya vattati gotamasāvakasaṁgho
vā pare vā pana bhonto gaṇācariyasāvakasaṁghāti.
Ṭhānaṁ kho panetaṁ kassapa vijjati yaṁ viññū samanuyuñjantā
samanuggāhantā samanubhāsantā evaṁ vadeyyuṁ ye imesaṁ bhavataṁ
dhammā akusalā akusalasaṁkhātā sāvajjā sāvajjasaṁkhātā asevitabbā
Asevitabbasaṁkhātā nālamariyā nālamariyasaṁkhātā kaṇhā kaṇhasaṁkhātā
gotamasāvakasaṁgho ime dhamme anavasesaṁ pahāya vattati yaṁ vā
pana bhonto pare gaṇācariyasāvakasaṁghāti. Itiha kassapa viññū
samanuyuñjantā samanuggāhantā samanubhāsantā amhe va tattha
yebhuyyena pasaṁseyyuṁ.

[265] Aparaṁpi no kassapa viññū samanuyuñjantaṁ samanuggāhantaṁ
samanubhāsantaṁ satthārā vā satthāraṁ saṁghena vā saṁghaṁ ye imesaṁ
bhavataṁ dhammā kusalā kusalasaṁkhātā anavajjā anavajjasaṁkhātā
sevitabbā sevitabbasaṁkhātā alamariyā alamariyasaṁkhātā sukkā
sukkasaṁkhātā ko ime dhamme anavasesaṁ samādāya vattati gotamasāvakasaṁgho
vā pare vā pana bhonto gaṇācariyasāvakasaṁghāti.
Ṭhānaṁ kho panetaṁ kassapa vijjati yaṁ viññū samanuyuñjantā
samanuggāhantā samanubhāsantā evaṁ vadeyyuṁ ye imesaṁ bhavataṁ dhammā
kusalā kusalasaṁkhātā anavajjā anavajjasaṁkhātā sevitabbā sevitabbasaṁkhātā
alamariyā alamariyasaṁkhātā sukkā sukkasaṁkhātā gotamasāvakasaṁgho
ime dhamme anavasesaṁ samādāya vattati yaṁ vā pana
bhonto pare gaṇācariyasāvakasaṁghāti. Itiha kassapa viññū
samanuyuñjantā samanuggāhantā samanubhāsantā amhe va tattha
yebhuyyena pasaṁseyyuṁ. Atthi kassapa maggo atthi paṭipadā
yathāpaṭipanno sāmaññeva ñassati sāmaṁ dakkhati samaṇo gotamo
Kālavādī bhūtavādī atthavādī dhammavādī vinayavādīti. Katamo ca
kassapa maggo katamā ca paṭipadā yathāpaṭipanno sāmaññeva
ñassati sāmaṁ dakkhati samaṇo gotamo kālavādī bhūtavādī atthavādī
dhammavādī vinayavādīti. Ayameva ariyo aṭṭhaṅgiko maggo seyyathīdaṁ
sammādiṭṭhi sammāsaṅkappo sammāvācā sammākammanto sammāājīvo
sammāvāyāmo sammāsati sammāsamādhi. Ayaṁ kho kassapa
maggo ayaṁ paṭipadā yathāpaṭipanno sāmaññeva ñassati sāmaṁ
dakkhati samaṇo gotamo kālavādī bhūtavādī atthavādī dhammavādī
vinayavādīti.

[266] Evaṁ vutte acelo kassapo bhagavantaṁ etadavoca imepi
kho āvuso gotama tapopakkamā etesaṁ samaṇabrāhmaṇānaṁ sāmaññasaṁkhātā
ca brahmaññasaṁkhātā ca acelako ca hoti muttācāro
hatthāvalekhano na ehibhadantiko na tiṭṭhabhadantiko nābhihataṁ na
uddissa kataṁ na nimantanaṁ sādiyati so na kumbhimukhā paṭiggaṇhāti
na kalopimukhā paṭiggaṇhāti na eḷakamantaraṁ na daṇḍakamantaraṁ na
musalamantaraṁ na dvinnaṁ bhuñjamānānaṁ na gabbhiniyā na pāyamānāya
na purisantaragatāya na saṁkittīsu na yattha sā upaṭṭhito hoti na
yattha makkhikā saṇḍasaṇḍacārinī na macchaṁ na maṁsaṁ na suraṁ na
merayaṁ na thusodakaṁ pivati. So ekāgāriko vā hoti ekālopiko
dvāgāriko vā hoti dvālopiko sattāgāriko vā hoti sattālopiko
Ekissāpi dattiyā yāpeti dvīhipi dattīhi yāpeti sattahipi
dattīhi yāpeti ekāhikaṁpi āhāraṁ āhāreti dvīhikaṁpi āhāraṁ
āhāreti sattāhikaṁpi āhāraṁ āhāreti. Iti evarūpaṁ addhamāsikaṁpi
pariyāyabhattabhojanānuyogamanuyutto viharati imepi kho āvuso gotama
tapopakkamā etesaṁ samaṇabrāhmaṇānaṁ sāmaññasaṁkhātā ca brahmaññasaṁkhātā
ca sākabhakkho vā hoti sāmākabhakkho vā hoti nivārabhakkho
vā hoti daddulabhakkho vā hoti niyāsabhakkho vā hoti
hatabhakkho vā hoti kaṇṇabhakkho vā hoti ācāmabhakkho vā
hoti piññākabhakkho vā hoti tiṇabhakkho vā hoti gomayabhakkho
vā hoti vanamūlaphalāhāro yāpeti pavattaphalabhojī. Ime kho
āvuso gotama tapopakkamā etesaṁ samaṇabrāhmaṇānaṁ sāmaññasaṁkhātā
ca brahmaññasaṁkhātā ca sāṇānipi dhāreti masāṇānipi
dhāreti chavadussānipi dhāreti paṁsukūlānipi dhāreti tiriṭānipi dhāreti
ajinānipi dhāreti ajinakkhipaṁpi dhāreti kusacīraṁpi dhāreti vākacīraṁpi
dhāreti phalakacīraṁpi dhāreti kesakambalaṁpi dhāreti vālakambalaṁpi dhāreti
ulūkapakkhaṁpi dhāreti kesamassulocakopi hoti kesamassulocanānuyogamanuyutto
ubbhaṭṭhakopi hoti āsanapaṭikkhitto ukkuṭikopi hoti
ukkuṭikappadhānamanuyutto kaṇṭakapassayikopi hoti kaṇṭakapassaye
seyyaṁ kappeti phalakaseyyaṁpi kappeti taṇḍilaseyyaṁpi kappeti
ekapassayikopi hoti rajojalladharo abbhokāsiko hoti yathāsanthatiko
Vekaṭikopi hoti vikaṭabhojanānuyogamanuyutto āpānakopi
hoti āpānakamanuyutto sāyaṁ tatiyakaṁpi udakorohanānuyogamanuyutto
viharatīti.

[267] Acelako cepi kassapa hoti muttācāro hatthāvalekhano
.pe. Iti evarūpaṁ addhamāsikaṁpi pariyāyabhattabhojanānuyogamanuyutto
viharati. Tassa vāyaṁ sīlasampadā cittasampadā paññāsampadā
abhāvitā hoti asacchikatā. Athakho so ārakā ca sāmaññā
ārakā ca brahmaññā. Yato kho kassapa bhikkhu averaṁ abyāpajjhaṁ
mettacittaṁ bhāveti āsavānañca khayā anāsavañcetovimuttiṁ paññāvimuttiṁ
diṭṭhe va dhamme sayaṁ abhiññā sacchikatvā upasampajja
viharati. Ayaṁ vuccati kassapa bhikkhu samaṇo itipi brāhmaṇo
itipi. Sākabhakkho cepi kassapa hoti sāmākabhakkho .pe.
Vanamūlaphalāhāro yāpeti pavattaphalabhojī. Tassa vāyaṁ sīlasampadā
cittasampadā paññāsampadā abhāvitā hoti asacchikatā. Athakho
so ārakā ca sāmaññā ārakā ca brahmaññā. Yato kho
kassapa bhikkhu averaṁ abyāpajjhaṁ mettacittaṁ bhāveti āsavānañca
khayā anāsavañcetovimuttiṁ paññāvimuttiṁ diṭṭhe va dhamme sayaṁ
abhiññā sacchikatvā upasampajja viharati. Ayaṁ vuccati kassapa
bhikkhu samaṇo itipi brāhmaṇo itipi. Sāṇāni cepi kassapa
dhāreti masāṇānipi dhāreti .pe. Sāyaṁ tatiyakaṁpi udakorohanānuyogamanuyutto
Viharati. Tassa vāyaṁ sīlasampadā cittasampadā
paññāsampadā abhāvitā hoti asacchikatā. Athakho so
ārakā ca sāmaññā ārakā ca brahmaññā. Yato kho kassapa
bhakkhu averaṁ abyāpajjhaṁ mettacittaṁ bhāveti āsavānañca khayā
anāsavañcetovimuttiṁ paññāvimuttiṁ diṭṭhe va dhamme sayaṁ abhiññā
sacchikatvā upasampajja viharati. Ayaṁ vuccati kassapa bhikkhu
samaṇo itipi brāhmaṇo itipīti.

[268] Evaṁ vutte acelo kassapo bhagavantaṁ etadavoca
dukkaraṁ bho gotama sāmaññaṁ dukkaraṁ brahmaññanti. Pakati kho
esā kassapa lokasmiṁ dukkaraṁ sāmaññaṁ dukkaraṁ brahmaññanti.
Acelako cepi kassapa hoti muttācāro hatthāvalekhano .pe.
Iti evarūpaṁ addhamāsikaṁpi pariyāyabhattabhojanānuyogamanuyutto viharati.
Imāya ca kassapa mattāya iminā ca tapopakkamena sāmaññaṁ vā
abhavissa brahmaññaṁ vā dukkaraṁ sudukkaraṁ netaṁ abhavissa kallaṁ
vacanāya dukkaraṁ sāmaññaṁ dukkaraṁ brahmaññanti sakkā ca panetaṁ
abhavissa kātuṁ gahapatinā vā gahapatiputtena vā antamaso
kumbhadāsiyāpi handāhaṁ acelako homi muttācāro hatthāvalekhano
.pe. Iti evarūpaṁ addhamāsikaṁpi pariyāyabhattabhojanānuyogamanuyutto
viharāmīti. Yasmā ca kho kassapa aññatreva imāya ca mattāya
aññatra iminā ca tapopakkamena sāmaññaṁ vā hoti brahmaññaṁ
Vā dukkaraṁ sudukkaraṁ tasmā etaṁ kallaṁ vacanāya dukkaraṁ sāmaññaṁ
dukkaraṁ brahmaññanti. Yato kho kassapa bhikkhu averaṁ abyāpajjhaṁ
mettacittaṁ bhāveti āsavānañca khayā anāsavañcetovimuttiṁ paññāvimuttiṁ
diṭṭhe va dhamme sayaṁ abhiññā sacchikatvā upasampajja
viharati. Ayaṁ vuccati kassapa bhikkhu samaṇo itipi brāhmaṇo
itipi. Sākabhakkho cepi kassapa hoti sāmākabhakkho .pe.
Vanamūlaphalāhāro yāpeti pavattaphalabhojī. Imāya ca kassapa mattāya
iminā ca tapopakkamena sāmaññaṁ vā abhavissa brahmaññaṁ vā
dukkaraṁ sudukkaraṁ netaṁ abhavissa kallaṁ vacanāya dukkaraṁ sāmaññaṁ
dukkaraṁ brahmaññanti. Sakkā ca panetaṁ abhavissa kātuṁ gahapatinā
vā gahapatiputtena vā antamaso kumbhadāsiyāpi handāhaṁ sākabhakkho
homi sāmākabhakkho vā .pe. Vanamūlaphalāhāro yāpemi pavattaphalabhojīti.
Yasmā ca kho kassapa aññatreva imāya mattāya
aññatra iminā ca tapopakkamena sāmaññaṁ vā hoti brahmaññaṁ
vā dukkaraṁ sudukkaraṁ tasmā etaṁ kallaṁ vacanāya dukkaraṁ sāmaññaṁ
dukkaraṁ brahmaññanti. Yato kho kassapa bhikkhu averaṁ abyāpajjhaṁ
mettacittaṁ bhāveti āsavānañca khayā anāsavañcetovimuttiṁ paññāvimuttiṁ
diṭṭhe va dhamme sayaṁ abhiññā sacchikatvā upasampajja
viharati. Ayaṁ vuccati kassapa bhikkhu samaṇo itipi brāhmaṇo
itipi. Sāṇāni cepi kassapa dhāreti masāṇānipi dhāreti .pe.
Sāyaṁ tatiyakaṁpi udakorohanānuyogamanuyutto viharati. Imāya ca
kassapa mattāya iminā ca tapopakkamena sāmaññaṁ vā abhavissa
brahmaññaṁ vā dukkaraṁ sudukkaraṁ netaṁ abhavissa kallaṁ vacanāya
dukkaraṁ sāmaññaṁ dukkaraṁ brahmaññanti. Sakkā ca panetaṁ
abhavissa kātuṁ gahapatinā vā gahapatiputtena vā antamaso kumbhadāsiyāpi
handāhaṁ sāṇānipi dhāremi masāṇānipi dhāremi .pe.
Sāyaṁ tatiyakaṁpi udakorohanānuyogamanuyutto viharāmīti. Yasmā ca
kho kassapa aññatreva imāya ca mattāya aññatra iminā ca
tapopakkamena sāmaññaṁ vā hoti brahmaññaṁ vā dukkaraṁ sudukkaraṁ
tasmā etaṁ kallaṁ vacanāya dukkaraṁ sāmaññaṁ dukkaraṁ brahmaññanti.
Yato kho kassapa bhikkhu averaṁ abyāpajjhaṁ mettacittaṁ bhāveti
āsavānañca khayā anāsavañcetovimuttiṁ paññāvimuttiṁ diṭṭhe va
dhamme sayaṁ abhiññā sacchikatvā upasampajja viharati. Ayaṁ vuccati
kassapa bhikkhu samaṇo itipi brāhmaṇo itipīti.

[269] Evaṁ vutte acelo kassapo bhagavantaṁ etadavoca
dujjāno bho gotama samaṇo dujjāno brāhmaṇoti. Pakati kho
esā kassapa lokasmiṁ dujjāno samaṇo dujjāno brāhmaṇoti.
Acelako cepi kassapa hoti muttācāro hatthāvalekhano .pe.
Iti evarūpaṁ addhamāsikaṁpi pariyāyabhattabhojanānuyogamanuyutto viharati
imāya ca kassapa mattāya iminā ca tapopakkamena samaṇo vā
Abhavissa brāhmaṇo vā dujjāno sudujjāno netaṁ abhavissa kallaṁ
vacanāya dujjāno samaṇo dujjāno brāhmaṇoti. Sakkā ca
panetaṁ abhavissa ñātuṁ gahapatinā vā gahapatiputtena vā antamaso
kumbhadāsiyāpi ayaṁpi acelo muttācāro hatthāvalekhano .pe. Iti
evarūpaṁ addhamāsikaṁpi pariyāyabhattabhojanānuyogamanuyutto viharatīti.
Yasmā ca kho kassapa aññatreva imāya ca mattāya aññatra
iminā ca tapopakkamena samaṇo vā hoti brāhmaṇo vā dujjāno
sudujjāno tasmā etaṁ kallaṁ vacanāya dujjāno samaṇo dujjāno
brāhmaṇoti. Yato kho kassapa bhikkhu averaṁ abyāpajjhaṁ mettacittaṁ
bhāveti āsavānañca khayā anāsavañcetovimuttiṁ paññāvimuttiṁ diṭṭhe
va dhamme sayaṁ abhiññā sacchikatvā upasampajja viharati. Ayaṁ
vuccati kassapa bhikkhu samaṇo itipi brāhmaṇo itipi. Sākabhakkho
cepi kassapa hoti sāmākabhakkho .pe. Vanamūlaphalāhāro yāpeti
pavattaphalabhojī. Imāya ca kassapa mattāya iminā ca tapopakkamena
samaṇo vā abhavissa brāhmaṇo vā dujjāno sudujjāno netaṁ
abhavissa kallaṁ vacanāya dujjāno samaṇo dujjāno brāhmaṇoti.
Sakkā ca paneso abhavissa ñātuṁ gahapatinā vā gahapatiputtena
vā antamaso kumbhadāsiyāpi ayaṁ sākabhakkho vā hoti sāmākabhakkho
.pe. Vanamūlaphalāhāro yāpeti pavattaphalabhojīti. Yasmā ca
kho kassapa aññatreva imāya ca mattāya aññatra iminā ca
Tapopakkamena samaṇo vā hoti brāhmaṇo vā dujjāno sudujjāno
tasmā etaṁ kallaṁ vacanāya dujjāno samaṇo dujjāno brāhmaṇoti.
Yato ca kho kassapa bhikkhu averaṁ abyāpajjhaṁ mettacittaṁ bhāveti
āsavānañca khayā anāsavañcetovimuttiṁ paññāvimuttiṁ diṭṭhe va dhamme
sayaṁ abhiññā sacchikatvā upasampajja viharati. Ayaṁ vuccati
kassapa bhikkhu samaṇo itipi brāhmaṇo itipi. Sāṇāni
cepi kassapa dhāreti masāṇānipi dhāreti .pe. Sāyaṁ tatiyakaṁpi
udakorohanānuyogamanuyutto viharati. Imāya ca kassapa mattāya
iminā ca tapopakkamena samaṇo vā abhavissa brāhmaṇo vā
dujjāno sudujjāno netaṁ abhavissa kallaṁ vacanāya dujjāno samaṇo
dujjāno brāhmaṇoti. Sakkā ca paneso abhavissa ñātuṁ
gahapatinā vā gahapatiputtena vā antamaso kumbhadāsiyāpi ayaṁ
sāṇānipi dhāreti masāṇānipi dhāreti .pe. Sāyaṁ tatiyakaṁpi
udakorohanānuyogamanuyutto viharatīti. Yasmā ca kho kassapa
aññatreva imāya ca mattāya aññatra iminā ca tapopakkamena
samaṇo vā hoti brāhmaṇo vā dujjāno sudujjāno tasmā
etaṁ kallaṁ vacanāya dujjāno samaṇo dujjāno brāhmaṇoti
yato ca kho kassapa bhikkhu averaṁ abyāpajjhaṁ mettacittaṁ bhāveti
āsavānañca khayā anāsavañcetovimuttiṁ paññāvimuttiṁ diṭṭhe va
dhamme sayaṁ abhiññā sacchikatvā upasampajja viharati. Ayaṁ vuccati
Kassapa bhikkhu samaṇo itipi brāhmaṇo itipīti.

[270] Evaṁ vutte acelo kassapo bhagavantaṁ etadavoca katamā
pana sā bho gotama sīlasampadā katamā cittasampadā katamā
paññāsampadāti. Idha kassapa tathāgato loke uppajjati arahaṁ
sammāsambuddho .pe. Vitthāretabbo. Kathañca kassapa bhikkhu
sīlasampanno hoti idha kassapa bhikkhu pāṇātipātaṁ pahāya pāṇātipātā
paṭivirato hoti nihitadaṇḍo nihitasattho lajjī dayāpanno
sabbapāṇabhūtahitānukampī viharati idaṁpissa hoti sīlasampadāya .pe.
So iminā ariyena sīlakkhandhena samannāgato ajjhattaṁ anavajjasukhaṁ
paṭisaṁvedeti evaṁ kassapa bhikkhu sīlasampanno hoti ayaṁ kho sā
kassapa sīlasampadā .pe. Paṭhamaṁ jhānaṁ upasampajja viharati idaṁpissa
hoti cittasampadāya ayaṁ kho kassapa cittasampadā .pe. Ñāṇadassanāya
cittaṁ abhinīharati abhininnāmeti idaṁpissa hoti paññāsampadāya
.pe. Nāparaṁ itthattāyāti pajānāti idaṁpissa hoti
paññāsampadā ayaṁ kho kassapa ñāṇasampadā. Imāya ca kassapa
sīlasampadāya cittasampadāya paññāsampadāya aññā sīlasampadā
cittasampadā paññāsampadā uttaritarā vā paṇītatarā vā natthi.

[271] Santi kassapa eke samaṇabrāhmaṇā sīlavādā te
anekapariyāyena sīlavaṇṇaṁ bhāsanti. Yāvatā kassapa ariyaṁ paramaṁ
sīlaṁ nāhaṁ tattha attano samasamaṁ samanupassāmi kuto bhiyyo athakho
Ahameva tattha bhiyyo yadidaṁ adhisīlaṁ. Santi kassapa eke
samaṇabrāhmaṇā tapojigucchavādā te anekapariyāyena tapojigucchāya
vaṇṇaṁ bhāsanti. Yāvatā kassapa ariyā paramā tapojigucchā
nāhaṁ tattha attano samasamaṁ samanupassāmi kuto bhiyyo athakho
ahameva tattha bhiyyo yadidaṁ adhijegucchaṁ. Santi kassapa eke
samaṇabrāhmaṇā paññāvādā te anekapariyāyena paññāya vaṇṇaṁ
bhāsanti. Yāvatā kassapa ariyā paramā paññā nāhaṁ tattha
attano samasamaṁ samanupassāmi kuto bhiyyo athakho ahameva tattha
bhiyyo yadidaṁ adhipaññaṁ. Santi kassapa eke samaṇabrāhmaṇā
vimuttivādā te anekapariyāyena vimuttiyā vaṇṇaṁ bhāsanti.
Yāvatā kassapa ariyā paramā vimutti nāhaṁ tattha attano samasamaṁ
samanupassāmi kuto bhiyyo athakho ahameva tattha bhiyyo yadidaṁ
adhivimutti.

[272] Ṭhānaṁ kho panetaṁ kassapa vijjati yaṁ aññatitthiyā
paribbājakā evaṁ vadeyyuṁ sīhanādaṁ kho samaṇo gotamo nadati
tañca kho suññāgāre nadati no ca parisāsūti. Te mā
hevantissu vacanīyā. Sīhanādañca samaṇo gotamo nadati parisāsu
ca nadati no ca suññāgāre nadatīti evamassu kassapa vacanīyā.
Ṭhānaṁ kho panetaṁ kassapa vijjati yaṁ aññatitthiyā paribbājakā
evaṁ vadeyyuṁ sīhanādaṁ samaṇo gotamo nadati parisāsu ca nadati
No ca kho visārado nadatīti. Te mā hevantissu vacanīyā.
Sīhanādañca samaṇo gotamo nadati parisāsu ca nadati visārado ca
nadatīti evamassu kassapa vacanīyā. Ṭhānaṁ kho panetaṁ kassapa
vijjati yaṁ aññatitthiyā paribbājakā evaṁ vadeyyuṁ sīhanādañca
samaṇo gotamo nadati parisāsu ca nadati visārado ca nadati no
ca kho naṁ pañhaṁ pucchanti pañhañca naṁ pucchanti no ca kho nesaṁ
pañhaṁ puṭṭho byākaroti pañhañca nesaṁ puṭṭho byākaroti no
ca pañhassa byākaraṇena cittaṁ ārādheti pañhassa ca byākaraṇena
cittaṁ ārādheti no ca kho sotabbaṁ maññanti sotabbañcassa
maññanti no ca kho sutvā pasīdanti sutvā cassa pasīdanti no
ca kho pasannā pasannākāraṁ karonti pasannā ca pasannākāraṁ
karonti no ca kho tathattāya paṭipajjanti tathattāya ca paṭipajjanti
no ca kho paṭipannā ārādhentīti. Te mā hevantissu vacanīyā.
Sīhanādañca samaṇo gotamo nadati parisāsu ca nadati visārado ca
nadati pañhañca naṁ pucchanti pañhañca nesaṁ puṭṭho byākaroti
pañhassa ca veyyākaraṇena cittaṁ ārādheti sotabbañcassa maññanti
sutvā cassa pasīdanti pasannā ca pasannākāraṁ karonti tathattāya
paṭipajjanti paṭipannā ca ārādhentīti evamassu kassapa vacanīyā.
Ekamidāhaṁ kassapa samayaṁ rājagahe viharāmi gijjhakūṭe pabbate.
Tatra maṁ aññataro te sabrahmacārī nigrodho nāma paribbājako
Adhijegucche pañhaṁ pucchi tassāhaṁ adhijegucche pañhaṁ puṭṭho byākāsiṁ
byākate ca pana me attamano ahosi paraṁ viya mattāyāti.