[173] Evaṁ vutte brāhmaṇo pokkharasāti ambaṭṭhaṁ māṇavaṁ
etadavoca aho vata re amhākaṁ paṇḍitaka aho vata re amhākaṁ
bahussutaka aho vata re amhākaṁ tevijjaka evarūpena kira bho
puriso atthacarakena kāyassa bhedā paraṁ maraṇā apāyaṁ duggatiṁ
vinipātaṁ nirayaṁ upapajjeyya yadeva kho tvaṁ ambaṭṭha taṁ bhavantaṁ
gotamaṁ evaṁ āsajja āsajja avacāsi athakho bhavaṁ gotamo amhehi
Evaṁ upaneyyaṁ upaneyyaṁ avaca aho vata re amhākaṁ paṇḍitaka
ahosi vata re amhākaṁ bahussutaka aho vata re amhākaṁ tevijjaka
evarūpena kira bho puriso atthacarakena kāyassa bhedā paraṁ maraṇā
apāyaṁ duggatiṁ vinipātaṁ nirayaṁ upapajjeyyāti. Kupito anattamano
ambaṭṭhaṁ māṇavaṁ padasāyeva pavattesi icchati ca tāvadeva bhagavantaṁ
dassanāya upasaṅkamituṁ. Athakho te brāhmaṇā brāhmaṇaṁ
pokkharasātiṁ etadavocuṁ ativikālo kho bho ajja samaṇaṁ gotamaṁ
dassanāya upasaṅkamituṁ svedāni bhavaṁ pokkharasāti samaṇaṁ gotamaṁ
dassanāya upasaṅkamissatīti.

[174] Athakho brāhmaṇo pokkharasāti sake nivesane paṇītaṁ
khādanīyaṁ bhojanīyaṁ paṭiyādāpetvā yāne āropetvā ukkāsu
dhāriyamānāsu ukkaṭṭhāya niyyāsi yena icchānaṅgalavanasaṇḍo tena
pāyāsi yāvatikā yānassa bhūmi yānena gantvā yānā paccorohitvā
pattiko va yena bhagavā tenupasaṅkami upasaṅkamitvā bhagavatā saddhiṁ
sammodi sammodanīyaṁ kathaṁ sārāṇīyaṁ vītisāretvā ekamantaṁ nisīdi.
Ekamantaṁ nisinno kho brāhmaṇo pokkharasāti bhagavantaṁ etadavoca
āgamā nu khvidha bho gotama amhākaṁ antevāsī ambaṭṭho
māṇavoti. Āgamā kho tedha brāhmaṇa antevāsī ambaṭṭho
māṇavoti. Ahu pana te bho gotama ambaṭṭhena māṇavena saddhiṁ
kocideva kathāsallāpoti. Ahu kho me brāhmaṇa ambaṭṭhena
Māṇavena saddhiṁ kocideva kathāsallāpoti. Yathākathaṁ pana te bho
gotama ahu ambaṭṭhena māṇavena saddhiṁ kocideva kathāsallāpoti.
Athakho bhagavā yāvatako ahosi ambaṭṭhena māṇavena saddhiṁ kathāsallāpo
taṁ sabbaṁ brāhmaṇassa pokkharasātissa ārocesi.

[175] Evaṁ vutte brāhmaṇo pokkharasāti bhagavantametadavoca
bālo bho gotama ambaṭṭho māṇavo khamatu bhavaṁ gotamo ambaṭṭhassa
māṇavassāti. Sukhī hotu brāhmaṇa ambaṭṭho māṇavoti. Athakho
brāhmaṇo pokkharasāti bhagavato kāye dvattiṁsamahāpurisalakkhaṇāni
sammannesi. Addasā kho brāhmaṇo pokkharasāti bhagavato kāye
dvattiṁsamahāpurisalakkhaṇāni yebhuyyena ṭhapetvā dve dvīsu mahāpurisalakkhaṇesu
kaṅkhati vicikicchati nādhimuccati na sampasīdati kosohite
ca vatthaguyhe pahūtajivhatāya ca. Athakho bhagavato etadahosi
passati kho me ayaṁ brāhmaṇo pokkharasāti dvattiṁsamahāpurisalakkhaṇāni
yebhuyyena ṭhapetvā dve dvīsu mahāpurisalakkhaṇesu kaṅkhati
vicikicchati nādhimuccati na sampasīdati kosohite ca vatthaguyhe
pahūtajivhatāya cāti. Athakho bhagavā tathārūpaṁ iddhābhisaṁkhāraṁ
abhisaṁkhāresi yathā addasa brāhmaṇo pokkharasāti bhagavato kosohitaṁ
vatthaguyhaṁ. Athakho bhagavā jivhaṁ ninnāmetvā ubhopi kaṇṇasotāni
anumasi paṭimasi ubhopi nāsikasotāni anumasi paṭimasi kevalampi
nalāṭamaṇḍalaṁ jivhāya chādesi. Athakho brāhmaṇassa pokkharasātissa
Etadahosi samannāgato kho samaṇo gotamo dvattiṁsamahāpurisalakkhaṇehi
paripuṇṇehi no aparipuṇṇehīti. Bhagavantaṁ etadavoca
adhivāsetu bhavaṁ gotamo ajjatanāya bhattaṁ saddhiṁ bhikkhusaṁghenāti.
Adhivāsesi bhagavā tuṇhībhāvena. Athakho brāhmaṇo pokkharasāti
bhagavato adhivāsanaṁ viditvā bhagavato kālaṁ ārocesi kālo bho
gotama niṭṭhitaṁ bhattanti.

[176] Athakho bhagavā pubbaṇhasamayaṁ nivāsetvā pattacīvaramādāya
saddhiṁ bhikkhusaṁghena yena brāhmaṇassa pokkharasātissa nivesanaṁ
tenupasaṅkami upasaṅkamitvā paññatte āsane nisīdi. Athakho
brāhmaṇo pokkharasāti bhagavantaṁ paṇītena khādanīyena bhojanīyena
sahatthā santappesi sampavāresi māṇavakā ca bhikkhusaṁghaṁ. Athakho
brāhmaṇo pokkharasāti bhagavantaṁ bhuttāviṁ onītapattapāṇiṁ aññataraṁ
nīcaṁ āsanaṁ gahetvā ekamantaṁ nisīdi. Ekamantaṁ nisinnassa kho
brāhmaṇassa pokkharasātissa bhagavā anupubbīkathaṁ kathesi seyyathīdaṁ
dānakathaṁ sīlakathaṁ saggakathaṁ kāmānaṁ ādīnavaṁ okāraṁ saṁkilesaṁ nekkhamme
ānisaṁsaṁ pakāsesi. Yadā bhagavā aññāsi brāhmaṇaṁ pokkharasātiṁ
kallacittaṁ muducittaṁ vinīvaraṇacattaṁ udaggacittaṁ pasannacittaṁ athassa
yā buddhānaṁ sāmukkaṁsikā dhammadesanā taṁ pakāsesi dukkhaṁ samudayaṁ
nirodhaṁ maggaṁ. Seyyathāpi nāma suddhaṁ vatthaṁ apagatakāḷakaṁ sammadeva
rajanaṁ paṭiggaṇheyya evameva kho brāhmaṇassa pokkharasātissa
Tasmiṁyeva āsane virajaṁ vītamalaṁ dhammacakkhuṁ udapādi yaṁ kiñci
samudayadhammaṁ sabbantaṁ nirodhadhammanti.

[177] Athakho brāhmaṇo pokkharasāti diṭṭhadhammo pattadhammo
viditadhammo pariyogāḷhadhammo tiṇṇavicikiccho vigatakathaṁkatho vesārajjappatto
aparappaccayo satthu sāsane bhagavantaṁ etadavoca
abhikkantaṁ bho gotama abhikkantaṁ bho gotama seyyathāpi bho
gotama nikkujjitaṁ vā ukkujjeyya paṭicchannaṁ vā vivareyya mūḷhassa
vā maggaṁ ācikkheyya andhakāre vā telapajjotaṁ dhāreyya cakkhumanto
rūpāni dakkhantīti evameva kho bhotā gotamena anekapariyāyena
dhammo pakāsito esāhaṁ bho gotama saputto sabhariyo sapariso
sāmacco bhavantaṁ gotamaṁ saraṇaṁ gacchāmi dhammañca bhikkhusaṁghañca
upāsakaṁ maṁ bhavaṁ gotamo dhāretu ajjatagge pāṇupetaṁ saraṇaṅgataṁ
yathā ca bhavaṁ gotamo ukkaṭṭhāyaṁ aññāni upāsakakulāni upasaṅkamati
evameva kho bhavaṁ gotamo pokkharasātikulaṁ upasaṅkamatu tattha ye
te māṇavakā vā māṇavikā vā bhavantaṁ gotamaṁ abhivādessanti
vā paccuṭṭhissanti vā āsanaṁ vā udakaṁ vā dassanti cittaṁ vā
pasādessanti tesaṁ taṁ bhavissati dīgharattaṁ hitāya sukhāyāti. Kalyāṇaṁ
vuccati brāhmaṇāti.
Ambaṭṭhasuttaṁ tatiyaṁ niṭṭhitaṁ.
-------------
Soṇadaṇḍasuttaṁ catutthaṁ

[178] Evamme sutaṁ. Ekaṁ samayaṁ bhagavā aṅgesu cārikañcaramāno
mahatā bhikkhusaṁghena saddhiṁ pañcamattehi bhikkhusatehi yena
campā tadavasari. Tatra sudaṁ bhagavā campāyaṁ viharati gaggarāya
pokkharaṇiyā tīre.

[179] Tena kho pana samayena soṇadaṇḍo brāhmaṇo campaṁ
ajjhāvasati sattussadaṁ satiṇakaṭṭhodakaṁ sadhaññaṁ rājabhoggaṁ raññā
māgadhena seniyena bimbisārena dinnaṁ rājadāyaṁ brahmadeyyaṁ.
Assosuṁ kho campeyyakā brāhmaṇagahapatikā samaṇo khalu bho
gotamo sakyaputto sakyakulā pabbajito aṅgesu cārikañcaramāno
mahatā bhikkhusaṁghena saddhiṁ pañcamattehi bhikkhusatehi campaṁ anuppatto
campāyaṁ viharati gaggarāya pokkharaṇiyā tīre taṁ kho pana bhavantaṁ
gotamaṁ evaṁkalyāṇo kittisaddo abbhuggato itipi so bhagavā
arahaṁ sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṁ buddho bhagavāti so imaṁ lokaṁ
sadevakaṁ samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ
sayaṁ abhiññā sacchikatvā pavedeti so dhammaṁ deseti ādikalyāṇaṁ
majjhekalyāṇaṁ pariyosānakalyāṇaṁ sātthaṁ sabyañjanaṁ kevalaparipuṇṇaṁ
parisuddhaṁ brahmacariyaṁ pakāseti sādhu kho pana tathārūpānaṁ arahataṁ
Dassanaṁ hotīti. Athakho campeyyakā brāhmaṇagahapatikā campāya
nikkhamitvā saṁghāsaṁghīgaṇībhūtā yena gaggarā pokkharaṇī tenupasaṅkamanti.

[180] Tena kho pana samayena soṇadaṇḍo brāhmaṇo uparipāsāde
divāseyyaṁ upagato hoti. Addasā kho soṇadaṇḍo
brāhmaṇo campeyyake brāhmaṇagahapatike campāya nikkhamitvā
saṁghāsaṁghīgaṇībhūte yena gaggarā pokkharaṇī tenupasaṅkamante disvā
khattaṁ āmantesi kiṁ nu kho bho khatte campeyyakā brāhmaṇagahapatikā
campāya nikkhamitvā saṁghāsaṁghīgaṇībhūtā yena gaggarā
pokkharaṇī tenupasaṅkamantīti. Atthi kho bho samaṇo gotamo
sakyaputto sakyakulā pabbajito aṅgesu cārikañcaramāno mahatā
bhikkhusaṁghena saddhiṁ pañcamattehi bhikkhusatehi campaṁ anuppatto campāyaṁ
viharati gaggarāya pokkharaṇiyā tīre taṁ kho pana bhavantaṁ gotamaṁ
evaṁkalyāṇo kittisaddo abbhuggato itipi so bhagavā arahaṁ
sammāsambuddho vijjācaraṇasampanno sugato lokavidū anuttaro
purisadammasārathi satthā devamanussānaṁ buddho bhagavāti tamete bhavantaṁ
gotamaṁ dassanāya upasaṅkamantīti. Tenahi bho khatte yena campeyyakā
brāhmaṇagahapatikā tenupasaṅkami upasaṅkamitvā campeyyake brāhmaṇagahapatike
evaṁ vadesi soṇadaṇḍo bho brāhmaṇo evamāha
āgamentu kira bhavanto soṇadaṇḍopi brāhmaṇo samaṇaṁ gotamaṁ
dassanāya upasaṅkamissatīti. Evaṁ bhoti kho so khatto soṇadaṇḍassa
Brāhmaṇassa paṭissutvā yena campeyyakā brāhmaṇagahapatikā
tenupasaṅkami upasaṅkamitvā campeyyake brāhmaṇagahapatike
etadavoca soṇadaṇḍo bho brāhmaṇo evamāha āgamentu kira
bhavanto soṇadaṇḍopi brāhmaṇo samaṇaṁ gotamaṁ dassanāya
upasaṅkamissatīti.

[181] Tena kho pana samayena nānāverajjakānaṁ brāhmaṇānaṁ
pañcamattāni brāhmaṇasatāni campāyaṁ paṭivasanti kenacideva
karaṇīyena. Assosuṁ kho te brāhmaṇā soṇadaṇḍo brāhmaṇo
samaṇaṁ gotamaṁ dassanāya upasaṅkamissatīti. Athakho te brāhmaṇā
yena soṇadaṇḍo brāhmaṇo tenupasaṅkamiṁsu upasaṅkamitvā soṇadaṇḍaṁ
brāhmaṇaṁ etadavocuṁ saccaṁ kira bhavaṁ soṇadaṇḍo samaṇaṁ
gotamaṁ dassanāya upasaṅkamissatīti. Evaṁ kho me bho hoti ahampi
samaṇaṁ gotamaṁ dassanāya upasaṅkamissāmīti. Mā bhavaṁ soṇadaṇḍo
samaṇaṁ gotamaṁ dassanāya upasaṅkami na arahati bhavaṁ soṇadaṇḍo
samaṇaṁ gotamaṁ dassanāya upasaṅkamituṁ sace bhavaṁ soṇadaṇḍo samaṇaṁ
gotamaṁ dassanāya upasaṅkamissati bhoto soṇadaṇḍassa yaso hāyissati
samaṇassa gotamassa yaso abhivaḍḍhissati yampi bhoto soṇadaṇḍassa
yaso hāyissati samaṇassa gotamassa yaso abhivaḍḍhissati iminā
caṅgena na arahati bhavaṁ soṇadaṇḍo samaṇaṁ gotamaṁ dassanāya
upasaṅkamituṁ samaṇo tveva gotamo arahati bhavantaṁ soṇadaṇḍaṁ
Dassanāya upasaṅkamituṁ bhavaṁ hi soṇadaṇḍo ubhato sujāto mātito
ca pitito ca saṁsuddhagahaṇiko yāva sattamā pitāmahayugā akkhitto
anupakkuṭṭho jātivādena yampi bhavaṁ soṇadaṇḍo ubhato sujāto
mātito ca pitito ca saṁsuddhagahaṇiko yāva sattamā pitāmahayugā
akkhitto anupakkuṭṭho jātivādena iminā caṅgena na arahati bhavaṁ
soṇadaṇḍo samaṇaṁ gotamaṁ dassanāya upasaṅkamituṁ samaṇo tveva
gotamo arahati bhavantaṁ soṇadaṇḍaṁ dassanāya upasaṅkamituṁ bhavaṁ
hi soṇadaṇḍo aḍḍho mahaddhano mahābhogo .pe. Bhavaṁ
hi soṇadaṇḍo ajjhāyako mantadharo tiṇṇaṁ vedānaṁ pāragū
sanighaṇḍuketubhānaṁ sākkharappabhedānaṁ itihāsapañcamānaṁ padako veyyākaraṇo
lokāyatamahāpurisalakkhaṇesu anavayo bhavaṁ hi soṇadaṇḍo
abhirūpo dassanīyo pāsādiko paramāya vaṇṇapokkharatāya samannāgato
brahmavaṇṇi brahmavacchasi 1 akkhuddāvakāso dassanāya bhavañhi
soṇadaṇḍo sīlavā vuḍḍhasīlī 2 vuḍḍhasīlena samannāgato bhavaṁ
hi soṇadaṇḍo kalyāṇavāco kalyāṇavākkaraṇo poriyā vācāya
samannāgato vissaṭṭhāya anelagalāya atthassa viññāpaniyā bhavaṁ
hi soṇadaṇḍo bahūnaṁ ācariyapācariyo tīṇi māṇavakasatāni mante
vāceti bahukā kho pana nānādisā nānājanapadā māṇavakā
āgacchanti bhoto soṇadaṇḍassa santike mantatthikā mante
1 Sī. brahmavaṇṇī brahmavaḍḍhī. 2 Sī. vuddhasīlī.
Adhiyitukāmā bhavañhi soṇadaṇḍo jiṇṇo vuḍḍho mahallako
addhagato vayoanuppatto samaṇo gotamo taruṇo ceva taruṇapabbajito
ca bhavañhi soṇadaṇḍo rañño māgadhassa seniyassa
bimbisārassa sakkato garukato mānito pūjito apacito bhavañhi
soṇadaṇḍo brāhmaṇassa pokkharasātissa sakkato garukato mānito
pūjito apacito bhavañhi soṇadaṇḍo campaṁ ajjhāvasati sattussadaṁ
satiṇakaṭṭhodakaṁ sadhaññaṁ rājabhoggaṁ raññā māgadhena seniyena
bimbisārena dinnaṁ rājadāyaṁ brahmadeyyaṁ yampi bhavaṁ soṇadaṇḍo
campaṁ ajjhāvasati sattussadaṁ satiṇakaṭṭhodakaṁ sadhaññaṁ rājabhoggaṁ
raññā māgadhena seniyena bimbisārena dinnaṁ rājadāyaṁ brahmadeyyaṁ
iminā caṅgena na arahati bhavaṁ soṇadaṇḍo samaṇaṁ gotamaṁ dassanāya
upasaṅkamituṁ samaṇo tveva gotamo arahati bhavantaṁ soṇadaṇḍaṁ
dassanāya upasaṅkamitunti.

[182] Evaṁ vutte soṇadaṇḍo brāhmaṇo te brāhmaṇe
etadavoca tenahi bho mamapi suṇātha yathā mayameva arahāma taṁ
bhavantaṁ gotamaṁ dassanāya upasaṅkamituṁ na tveva arahati so bhavaṁ
gotamo amhākaṁ dassanāya upasaṅkamituṁ samaṇo khalu bho gotamo
ubhato sujāto mātito ca pitito ca saṁsuddhagahaṇiko yāva sattamā
pitāmahayugā akkhitto anupakkuṭṭho jātivādena yaṁpi bho samaṇo
gotamo ubhato sujāto mātito ca pitito ca saṁsuddhagahaṇiko yāva
Sattamā pitāmahayugā akkhitto anupakkuṭṭho jātivādena iminā
caṅgena na aharati so bhavaṁ gotamo amhākaṁ dassanāya upasaṅkamituṁ
athakho mayameva arahāma taṁ bhavantaṁ gotamaṁ dassanāya upasaṅkamituṁ
samaṇo khalu bho gotamo mahantaṁ ñātisaṁghaṁ ohāya pabbajito
.pe. Samaṇo khalu bho gotamo pahūtaṁ hiraññaṁ suvaṇṇaṁ ohāya
pabbajito bhūmigatañca vehāsaṭṭhañca samaṇo khalu bho gotamo daharo
va samāno susū kāḷakeso bhadrena yobbanena samannāgato paṭhamena
vayasā agārasmā anagāriyaṁ pabbajito samaṇo khalu bho gotamo
akāmakānaṁ mātāpitūnaṁ assumukhānaṁ rudantānaṁ kesamassuṁ ohāretvā
kāsāyāni vatthāni acchādetvā agārasmā anagāriyaṁ pabbajito
samaṇo khalu bho gotamo abhirūpo dassanīyo pāsādiko paramāya
vaṇṇapokkharatāya samannāgato brahmavaṇṇi brahmavacchasi akkhuddāvakāso
dassanāya samaṇo khalu bho gotamo sīlavā ariyasīlī kusalasīlī
kusalasīlena samannāgato samaṇo khalu bho gotamo kalyāṇavāco
kalyāṇavākkaraṇo poriyā vācāya samannāgato vissaṭṭhāya
anelagalāya atthassa viññāpaniyā samaṇo khalu bho gotamo
bahūnaṁ ācariyapācariyo samaṇo khalu bho gotamo khīṇakāmarāgo
vigatacāpallo samaṇo khalu bho gotamo kammavādī kiriyavādī
apāpapurekkhāro brahmaññāya pajāya samaṇo khalu bho gotamo
uccākulā pabbajito abhinnakhattiyakulā samaṇo khalu bho gotamo
Aḍḍhā 1 kulā pabbajito mahaddhanā mahābhogā samaṇaṁ khalu bho
gotamaṁ tiroraṭṭhā tirojanapadā saṁpucchituṁ āgacchanti samaṇaṁ khalu
bho gotamaṁ anekāni devatāsahassāni pāṇehi saraṇaṅgatāni samaṇaṁ
khalu bho gotamaṁ evaṁkalyāṇo kittisaddo abbhuggato itipi so
bhagavā arahaṁ sammāsambuddho vijjācaraṇasampanno sugato lokavidū
anuttaro purisadammasārathi satthā devamanussānaṁ buddho bhagavāti
samaṇo khalu bho gotamo dvattiṁsamahāpurisalakkhaṇehi samannāgato
samaṇo khalu bho gotamo ehisāgatavādī sakhilo 2 sammodako abbhākuṭiko
uttānamukho pubbabhāsī samaṇo khalu bho gotamo catunnaṁ
parisānaṁ sakkato garukato mānito pūjito apacito samaṇaṁ khalu bho
gotamaṁ bahū devā ca manussā ca abhippasannā samaṇo khalu bho
gotamo yasmiṁ gāme vā nigame vā paṭivasati na tasmiṁ gāme vā
nigame vā amanussā manusse viheṭhenti samaṇo khalu bho gotamo
saṁghīgaṇīgaṇācariyo puthutitthakarānaṁ aggamakkhāyati yathā kho pana bho
etesaṁ samaṇabrāhmaṇānaṁ yathā vā tathā vā yaso samudāgacchati
na hevaṁ samaṇassa gotamassa yaso samudāgato athakho anuttarāya
vijjācaraṇasampadāya samaṇassa gotamassa yaso samudāgato samaṇaṁ
khalu bho gotamaṁ rājā māgadho seniyo bimbisāro saputto sabhariyo
1 addhātipi addhakulātipi aḍḍhakulātipi pāṭho. 2 Sī. ehisāhatavādī
sukhilo.
Sapariso sāmacco pāṇehi saraṇaṅgato samaṇaṁ khalu bho gotamaṁ
rājā pasenadikosalo saputto sabhariyo sapariso sāmacco pāṇehi
saraṇaṅgato samaṇaṁ khalu bho gotamaṁ brāhmaṇo pokkharasāti saputto
sabhariyo sapariso sāmacco pāṇehi saraṇaṅgato samaṇo khalu bho
gotamo rañño māgadhassa seniyassa bimbisārassa sakkato garukato
mānito pūjito apacito samaṇo khalu bho gotamo rañño pasenadikosalassa
sakkato garukato mānito pūjito apacito samaṇo khalu
bho gotamo brāhmaṇassa pokkharasātissa sakkato garukato mānito
pūjito apacito samaṇo khalu bho gotamo campaṁ anuppatto campāyaṁ
viharati gaggarāya pokkharaṇiyā tīre ye kho pana bho keci samaṇā
vā brāhmaṇā vā amhākaṁ gāmakkhettaṁ āgacchanti atithino te
honti atithino panamhehi sakkātabbā garukātabbā mānetabbā
pūjetabbā apacetabbā yampi bho samaṇo gotamo campaṁ anuppatto
campāyaṁ viharati gaggarāya pokkharaṇiyā tīre atithismākaṁ samaṇo
gotamo atithi kho panamhehi sakkātabbo garukātabbo mānetabbo
pūjetabbo apacitabbo iminā caṅgena na arahati so bhavaṁ gotamo
amhākaṁ dassanāya upasaṅkamituṁ athakho mayameva arahāma taṁ bhavantaṁ
gotamaṁ dassanāya upasaṅkamituṁ ettake kho ahaṁ bhoto gotamassa
vaṇṇe pariyāpuṇāmi no ca kho so bhavaṁ gotamo ettakavaṇṇo
aparimāṇavaṇṇo hi so bhavaṁ gotamoti.