[153] Evaṁ vutte te māṇavakā unnādino uccāsaddā
mahāsaddā ahesuṁ dujjāto kira bho ambaṭṭho māṇavo akulaputto
kira bho ambaṭṭho māṇavo dāsiputto kira bho ambaṭṭho
māṇavo sakyānaṁ ayyaputtā kira bho ambaṭṭhassa māṇavassa
Sakyā bhavanti dhammavādīyeva 1 kira mayaṁ samaṇaṁ gotamaṁ apasādetabbaṁ
amaññimhāti. Athakho bhagavato etadahosi atibāḷhaṁ kho ime
māṇavakā ambaṭṭhaṁ māṇavaṁ dāsiputtavādena nimmādenti yannūnāhaṁ
parimoceyyanti. Athakho bhagavā te māṇavake etadavoca mā
kho tumhe māṇavakā ambaṭṭhaṁ māṇavakaṁ atibāḷhaṁ dāsiputtavādena
nimmādetha uḷāro ca so kaṇho isi ahosi so dakkhiṇaṁ
janapadaṁ gantvā brahmamante adhiyitvā rājānaṁ ukkākaṁ upasaṅkamitvā
maddarūpiṁ 2 dhītaraṁ yāci. Tassa rājā ukkāko nevare mayhaṁ
dāsiputto samāno maddarūpiṁ dhītaraṁ yācatīti kupito anattamano khurappaṁ
sannayhi. So taṁ khurappaṁ neva asakkhi muñcituṁ no patisaṁharituṁ.

[154] Athakho māṇavakā amaccā pārisajjā kaṇhaṁ isiṁ
upasaṅkamitvā etadavocuṁ sotthi bhadante hotu rañño sotthi
bhadante hotu raññoti. Sotthi bhavissati rañño apica rājā
yadi adho khurappaṁ muñcissati yāvatā rañño vijitaṁ ettāvatā paṭhavī
udiyissatīti. Sotthi bhadante hotu rañño sotthi janapadassāti.
Sotthi bhavissati rañño sotthi janapadassa apica rājā yadi uddhaṁ
khurappaṁ muñcissati yāvatā rañño vijitaṁ ettāvatā satta vassāni
devo na vassissatīti. Sotthi bhadante hotu rañño sotthi
janapadassa devo pavassatūti. Sotthi bhavissati rañño sotthi
1 Sī. dhammavādiññeva. 2 Sī. khuddarūpiṁ.
Janapadassa devo pavassissati apica rājā jeṭṭhakumāre khurappaṁ
patiṭṭhāpetu sotthikumāro pallomo bhavissatīti. Athakho māṇavakā
rājā ukkāko jeṭṭhakumāre khurappaṁ patiṭṭhāpesi sotthikumāro
pallomo bhavissatīti. Athakho māṇavakā rājā ukkāko jeṭṭhakumāre
khurappaṁ patiṭṭhāpesi. Sotthikumāro pallomo samabhavi. Tassa
rājā ukkāko bhīto brahmadaṇḍena tajjito maddarūpiṁ dhītaraṁ adāsi.
Mā kho tumhe māṇavakā ambaṭṭhaṁ māṇavaṁ atibāḷhaṁ dāsiputtavādena
nimmādetha uḷāro so kaṇho isi ahosīti.

[155] Athakho bhagavā ambaṭṭhaṁ māṇavaṁ āmantesi taṁ kiṁ
maññasi ambaṭṭha idha khattiyakumāro brāhmaṇakaññāya saddhiṁ
saṁvāsaṁ kappeyya tesaṁ saṁvāsamanvāya putto jāyetha yo so
khattiyakumārena brāhmaṇakaññāya putto uppanno apinu so
labhetha brāhmaṇesu āsanaṁ vā udakaṁ vāti. Labhetha bho gotama.
Apinu naṁ brāhmaṇā bhojeyyuṁ sadde vā thālipāke vā yaññe
vā pāhune vāti. Bhojeyyuṁ bho gotama. Apinu naṁ brāhmaṇā
mante vāceyyuṁ vā no vāti. Vāceyyuṁ bho gotama. Apinussa
itthīsu āvaṭaṁ vā assa anāvaṭaṁ vāti. Anāvaṭaṁ hissa bho
gotama. Apinu khattiyābhisekena abhisiñceyyunti. No hidaṁ bho
gotama. Taṁ kissa hetu. Mātito hi bho gotama anupapannoti.

[156] Taṁ kimmaññasi ambaṭṭha idha brāhmaṇakumāro khattiyakaññāya
Saddhiṁ saṁvāsaṁ kappeyya tesaṁ saṁvāsamanvāya putto jāyetha
yo so brāhmaṇakumārena khattiyakaññāya putto uppanno apinu
so labhetha brāhmaṇesu āsanaṁ vā udakaṁ vāti. Labhetha bho
gotama. Apinu naṁ brāhmaṇā bhojeyyuṁ sadde vā thālipāke
vā yaññe vā pāhune vāti. Bhojeyyuṁ bho gotama. Apinu naṁ
brāhmaṇā mante vāceyyuṁ vā no vāti. Vāceyyuṁ bho gotama.
Apinussa itthīsu āvaṭaṁ vā assa anāvaṭaṁ vāti. Anāvaṭaṁ hissa
bho gotama. Apinu naṁ khattiyābhisekena abhisiñceyyunti. No hidaṁ
bho gotama. Taṁ kissa hetu. Pitito hi bho gotama anupapannoti.

[157] Iti kho ambaṭṭha itthiyā vā itthiṁ karitvā purisena
vā purisaṁ karitvā khattiyā va seṭṭhā hīnā brāhmaṇā. Taṁ
kiṁ maññasi ambaṭṭha idha brāhmaṇā brāhmaṇaṁ kismiñcideva
pakaraṇe khuramuṇḍaṁ karitvā bhassapuṭena vadhitvā raṭṭhā vā nagarā
vā pabbājeyyuṁ apinu so labhetha brāhmaṇesu āsanaṁ vā udakaṁ
vāti. No hidaṁ bho gotama. Apinu naṁ brāhmaṇā bhojeyyuṁ
sadde vā thālipāke vā yaññe vā pāhune vāti. No hidaṁ
bho gotama. Apinu naṁ brāhmaṇā mante vāceyyuṁ vā no
vāti. No hidaṁ bho gotama. Apinussa itthīsu āvaṭaṁ vā
assa anāvaṭaṁ vāti. Āvaṭaṁ hissa bho gotama.

[158] Taṁ kiṁ maññasi ambaṭṭha idha khattiyā khattiyaṁ kismiñcideva
Pakaraṇe khuramuṇḍaṁ karitvā bhassapuṭena vadhitvā raṭṭhā vā nagarā
vā pabbājeyyuṁ apinu so labhetha brāhmaṇesu āsanaṁ vā udakaṁ
vāti. Labhetha bho gotama. Apinu naṁ brāhmaṇā bhojeyyuṁ
sadde vā thālipāke vā yaññe vā pāhune vāti. Bhojeyyuṁ
bho gotama. Apinu naṁ brāhmaṇā mante vāceyyuṁ vā no
vāti. Vāceyyuṁ bho gotama. Apinussa itthīsu āvaṭaṁ vā
assa anāvaṭaṁ vāti. Anāvaṭañhissa bho gotama. Ettāvatā
kho ambaṭṭha khattiyo paramanihīnatappatto hoti yadidaṁ khattiyā
khuramuṇḍaṁ karitvā bhassapuṭena vadhitvā raṭṭhā vā nagarā vā
pabbājenti. Iti kho ambaṭṭha yadāpi khattiyo paramanihīnatappatto
hoti tadāpi khattiyā va seṭṭhā hīnā brāhmaṇā. Brahmunā
cesā ambaṭṭha sanaṅkumārena gāthā bhāsitā

[159] Khattiyo seṭṭho janetasmiṁ ye gottapaṭisārino
vijjācaraṇasampanno so seṭṭho devamānuseti.

[160] Sā kho panesā ambaṭṭha brahmunā sanaṅkumārena gāthā
sugītā na duggītā subhāsitā na dubbhāsitā atthasañhitā no
anatthasañhitā anumatā mayā ahaṁpi ambaṭṭha evaṁ vadāmi

[161] Khattiyo seṭṭho janetasmiṁ ye gottapaṭisārino
vijjācaraṇasampanno so seṭṭho devamānuseti.
Bhāṇavāraṁ paṭhamaṁ.

[162] Katamaṁ pana taṁ bho gotama caraṇaṁ katamā sā vijjāti.
Na kho ambaṭṭha anuttarāya vijjācaraṇasampadāya jātivādo vā
vuccati gottavādo vā vuccati mānavādo vā vuccati arahasi vā
maṁ tvaṁ na vā maṁ tvaṁ arahasīti yattha kho ambaṭṭha āvāho vā
hoti vivāho vā hoti āvāhavivāho vā hoti etthetaṁ vuccati
jātivādo vā itipi gottavādo vā itipi mānavādo vā
itipi arahasi vā maṁ tvaṁ na vā maṁ tvaṁ arahasīti ye hi keci
ambaṭṭha jātivādavinibaddhā vā gottavādavinibaddhā vā mānavādavinibaddhā
vā āvāhavivāhavinibaddhā vā ārakā te anuttarāya
vijjācaraṇasampadāya pahāya kho ambaṭṭha jātivādavinibaddhañca
gottavādavinibaddhañca mānavādavinibaddhañca āvāhavivāhavinibaddhañca
anuttarāya vijjācaraṇasampadāya sacchikiriyā hotīti.