[133] So evaṁ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte iddhividhāya
cittaṁ abhinīharati abhininnāmeti so anekavihitaṁ iddhividhaṁ paccanubhoti
ekopi hutvā bahudhā hoti bahudhāpi hutvā eko hoti āvibhāvaṁ
tirobhāvaṁ tirokuḍḍaṁ tiropākāraṁ tiropabbataṁ asajjamāno gacchati
seyyathāpi ākāse paṭhaviyāpi ummujjanimmujjaṁ karoti seyyathāpi
udake udakepi abhijjamāne gacchati seyyathāpi paṭhaviyaṁ ākāsepi
pallaṅkena kamati seyyathāpi pakkhīsakuṇo imepi candimasuriye
evaṁmahiddhike evaṁmahānubhāve pāṇinā parimasati parimajjati yāva
brahmalokāpi kāyena vasaṁ vatteti seyyathāpi mahārāja dakkho
kumbhakāro vā kumbhakārantevāsī vā suparikammakatāya mattikāya
yaṁ yadeva bhājanavikatiṁ ākaṅkheyya tantadeva kareyya abhinipphādeyya
seyyathā vā pana mahārāja dakkho dantakāro vā dantakārantevāsī
vā suparikammakatasmiṁ dantasmiṁ yaṁ yadeva dantavikatiṁ ākaṅkheyya tantadeva
kareyya abhinipphādeyya seyyathā vā pana mahārāja dakkho suvaṇṇakāro
vā suvaṇṇakārantevāsī vā suparikammakatasmiṁ suvaṇṇasmiṁ
yaṁ yadeva suvaṇṇavikatiṁ ākaṅkheyya tantadeva kareyya abhinipphādeyya
evameva kho mahārāja bhikkhu evaṁ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
Iddhividhāya cittaṁ abhinīharati abhininnāmeti. So anekavihitaṁ iddhividhaṁ
paccanubhoti ekopi hutvā bahudhā hoti bahudhāpi hutvā eko hoti
āvibhāvaṁ tirobhāvaṁ tirokuḍḍaṁ tiropākāraṁ tiropabbataṁ asajjamāno
gacchati seyyathāpi ākāse paṭhaviyāpi ummujjanimmujjaṁ karoti
seyyathāpi udake udakepi abhijjamāne gacchati seyyathāpi paṭhaviyaṁ
ākāsepi pallaṅkena kamati seyyathāpi pakkhīsakuṇo imepi candimasuriye
evaṁmahiddhike evaṁmahānubhāve pāṇinā parimasati parimajjati yāva
brahmalokāpi kāyena vasaṁ vatteti. Idaṁpi kho mahārāja sandiṭṭhikaṁ
sāmaññaphalaṁ purimehi sandiṭṭhikehi sāmaññaphalehi abhikkantatarañca
paṇītatarañca.

[134] So evaṁ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte dibbāya
sotadhātuyā cittaṁ abhinīharati abhininnāmeti. So dibbāya sotadhātuyā
visuddhāya atikkantamānusikāya ubho sadde suṇāti dibbe ca mānuse ca
ye dūre santike ca seyyathāpi mahārāja puriso addhānamaggapaṭipanno
so suṇeyya bherisaddaṁpi mudiṅgasaddaṁpi saṁkhasaddaṁpi paṇavasaddaṁpi
deṇḍimasaddaṁpi tassa evamassa bherisaddo itipi mudiṅgasaddo itipi
saṁkhasaddo itipi paṇavasaddo itipi deṇḍimasaddo itipi evameva kho
mahārāja bhikkhu evaṁ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte dibbāya
Sotadhātuyā cittaṁ abhinīharati abhininnāmeti so dibbāya sotadhātuyā
visuddhāya atikkantamānusikāya ubho sadde suṇāti dibbe ca mānuse
ca ye dūre santike ca. Idaṁpi kho mahārāja sandiṭṭhikaṁ sāmaññaphalaṁ
purimehi sandiṭṭhikehi sāmaññaphalehi abhikkantatarañca paṇītatarañca.

[135] So evaṁ samāhite citte parisuddhe pariyodāte
anaṅgaṇe vigatūpakkilese mudubhūte kammaniye ṭhite āneñjappatte
cetopariyañāṇāya cittaṁ abhinīharati abhininnāmeti. So parasattānaṁ
parapuggalānaṁ cetasā ceto paricca pajānāti sarāgaṁ vā cittaṁ
sarāgaṁ cittanti pajānāti vītarāgaṁ vā cittaṁ vītarāgaṁ cittanti
pajānāti sadosaṁ vā cittaṁ sadosaṁ cittanti pajānāti vītadosaṁ
vā cittaṁ vītadosaṁ cittanti pajānāti samohaṁ vā cittaṁ samohaṁ
cittanti pajānāti vītamohaṁ vā cittaṁ vītamohaṁ cittanti pajānāti
saṁkhittaṁ vā cittaṁ saṁkhittaṁ cittanti pajānāti vikkhittaṁ vā cittaṁ
vikkhittaṁ cittanti pajānāti mahaggataṁ vā cittaṁ mahaggataṁ cittanti
pajānāti amahaggataṁ vā cittaṁ amahaggataṁ cittanti pajānāti sauttaraṁ
vā cittaṁ sauttaraṁ cittanti pajānāti anuttaraṁ vā cittaṁ anuttaraṁ
cittanti pajānāti samāhitaṁ vā cittaṁ samāhitaṁ cittanti pajānāti
asamāhitaṁ vā cittaṁ asamāhitaṁ cittanti pajānāti vimuttaṁ vā cittaṁ
vimuttaṁ cittanti pajānāti avimuttaṁ vā cittaṁ avimuttaṁ cittanti
pajānāti. Seyyathāpi mahārāja itthī vā puriso vā daharo
Vā yuvā maṇḍanakajātiko ādāse vā parisuddhe pariyodāte acche
vā udakapatte sakaṁ mukhanimittaṁ paccavekkhamāno sakaṇikaṁ vā sakaṇikanti
jāneyya akaṇikaṁ vā akaṇikanti jāneyya evameva kho mahārāja bhikkhu
evaṁ samāhite citte parisuddhe pariyodāte anaṅgaṇe vigatūpakkilese
mudubhūte kammaniye ṭhite āneñjappatte cetopariyañāṇāya cittaṁ
abhinīharati abhininnāmeti so parasattānaṁ parapuggalānaṁ cetasā ceto
paricca pajānāti sarāgaṁ vā cittaṁ sarāgaṁ cittanti pajānāti vītarāgaṁ
vā cittaṁ vītarāgaṁ cittanti pajānāti sadosaṁ vā cittaṁ sadosaṁ
cittanti pajānāti vītadosaṁ vā cittaṁ vītadosaṁ cittanti pajānāti
samohaṁ vā cittaṁ samohaṁ cittanti pajānāti vītamohaṁ vā cittaṁ
vītamohaṁ cittanti pajānāti saṁkhittaṁ vā cittaṁ saṁkhittaṁ cittanti
pajānāti vikkhittaṁ vā cittaṁ vikkhittaṁ cittanti pajānāti mahaggataṁ
vā cittaṁ mahaggataṁ cittanti pajānāti amahaggataṁ vā cittaṁ amahaggataṁ
cittanti pajānāti sauttaraṁ vā cittaṁ sauttaraṁ cittanti pajānāti
anuttaraṁ vā cittaṁ anuttaraṁ cittanti pajānāti samāhitaṁ vā cittaṁ
samāhitaṁ cittanti pajānāti asamāhitaṁ vā cittaṁ asamāhitaṁ cittanti
pajānāti vimuttaṁ vā cittaṁ vimuttaṁ cittanti pajānāti avimuttaṁ vā
cittaṁ avimuttaṁ cittanti pajānāti. Idaṁpi kho mahārāja sandiṭṭhikaṁ
sāmaññaphalaṁ purimehi sandiṭṭhikehi sāmaññaphalehi abhikkantatarañca
paṇītatarañca.

[136] So evaṁ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte
pubbenivāsānussatiñāṇāya cittaṁ abhinīharati abhininnāmeti. So anekavihitaṁ
pubbenivāsaṁ anussarati seyyathīdaṁ ekaṁpi jātiṁ dvepi jātiyo
tissopi jātiyo catassopi jātiyo pañcapi jātiyo dasapi jātiyo
vīsampi jātiyo tiṁsampi jātiyo cattāḷīsaṁpi jātiyo paññāsaṁpi
jātiyo sataṁpi jātiyo sahassaṁpi jātiyo satasahassampi jātiyo 1
anekepi saṁvaṭṭakappe anekepi vivaṭṭakappe anekepi saṁvaṭṭavivaṭṭakappe
amutrāsiṁ evaṁnāmo evaṁgotto evaṁvaṇṇo evamāhāro evaṁsukhadukkha-
paṭisaṁvedī evamāyupariyanto so tato cuto amutra udapādiṁ tatrāpāsiṁ
evaṁnāmo evaṁgotto evaṁvaṇṇo evamāhāro evaṁsukhadukkhapaṭisaṁvedī
evamāyupariyanto so tato cuto idhūpapannoti. Iti sākāraṁ
sauddesaṁ anekavihitaṁ pubbenivāsaṁ anussarati. Seyyathāpi mahārāja
puriso sakamhā gāmā aññaṁ gāmaṁ gaccheyya tamhāpi gāmā aññaṁpi
gāmaṁ gaccheyya so tamhā gāmā sakaṁyeva gāmaṁ paccāgaccheyya
tassa evamassa ahaṁ kho sakamhā gāmā amuṁ gāmaṁ agañchiṁ tatrāhaṁ
evaṁ aṭṭhāsiṁ evaṁ nisīdiṁ evaṁ abhāsiṁ evaṁ tuṇhī ahosiṁ tamhāpi
gāmā amuṁ gāmaṁ agañchiṁ tatrāpāhaṁ evaṁ aṭṭhāsiṁ 2 evaṁ nisīdiṁ
1 Sī. jātisatampi jātisahassampi jātisatasahassampi. 2 Sī. āgacchiṁ
tatrāpāsiṁ evaṁ aṭṭhāsiṁ.
Evaṁ abhāsiṁ evaṁ tuṇhī ahosiṁ somhi tamhā gāmā sakaṁyeva gāmaṁ
paccāgatoti evameva kho mahārāja bhikkhu evaṁ samāhite citte
parisuddhe pariyodāte anaṅgaṇe vigatūpakkilese mudubhūte kammaniye
ṭhite āneñjappatte pubbenivāsānussatiñāṇāya cittaṁ abhinīharati
abhininnāmeti so anekavihitaṁ pubbenivāsaṁ anussarati seyyathīdaṁ ekaṁpi
jātiṁ dvepi jātiyo tissopi jātiyo catassopi jātiyo pañcapi
jātiyo dasapi jātiyo vīsaṁpi jātiyo tiṁsaṁpi jātiyo cattāḷīsaṁpi
jātiyo paññāsaṁpi jātiyo sataṁpi jātiyo sahassaṁpi jātiyo satasahassaṁpi
jātiyo anekepi saṁvaṭṭakappe anekepi vivaṭṭakappe anekepi
saṁvaṭṭavivaṭṭakappe amutrāsiṁ evaṁnāmo evaṁgotto evaṁvaṇṇo
evamāhāro evaṁsukhadukkhapaṭisaṁvedī evamāyupariyanto so tato cuto
amutra udapādiṁ tatrāpāsiṁ evaṁnāmo evaṁgotto evaṁvaṇṇo
evamāhāro evaṁsukhadukkhapaṭisaṁvedī evamāyupariyanto so tato cuto
idhūpapannoti iti sākāraṁ sauddesaṁ anekavihitaṁ pubbenivāsaṁ anussarati.
Idaṁpi kho mahārāja sandiṭṭhikaṁ sāmaññaphalaṁ purimehi sandiṭṭhikehi
sāmaññaphalehi abhikkantatarañca paṇītatarañca.

[137] So evaṁ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte sattānaṁ
cutūpapātañāṇāya cittaṁ abhinīharati abhininnāmeti. So dibbena
cakkhunā visuddhena atikkantamānusakena satte passati cavamāne
Upapajjamāne hīne paṇīte suvaṇṇe dubbaṇṇe sugate duggate
yathākammūpage satte pajānāti ime vata bhonto sattā kāyaduccaritena
samannāgatā vacīduccaritena samannāgatā manoduccaritena samannāgatā
ariyānaṁ upavādakā micchādiṭṭhikā micchādiṭṭhikammasamādānā te
kāyassa bhedā paraṁ maraṇā apāyaṁ duggatiṁ vinipātaṁ nirayaṁ upapannā
ime vā pana bhonto sattā kāyasucaritena samannāgatā vacīsucaritena
samannāgatā manosucaritena samannāgatā ariyānaṁ anupavādakā sammādiṭṭhikā
sammādiṭṭhikammasamādānā te kāyassa bhedā parammaraṇā
sugatiṁ saggaṁ lokaṁ upapannāti iti dibbena cakkhunā visuddhena
atikkantamānusakena satte passati cavamāne upapajjamāne hīne
paṇīte suvaṇṇe dubbaṇṇe sugate duggate yathākammūpage satte
pajānāti. Seyyathāpi mahārāja majjhe siṅghāṭake pāsādo
tatra cakkhumā puriso ṭhito passeyya manusse gehaṁ pavisantepi
nikkhamantepi rathiyāya vithiṁ sañcarantepi majjhe siṅghāṭake nisinnepi
tassa evamassa ete manussā gehaṁ pavisanti ete nikkhamanti
ete rathiyāya vithiṁ sañcaranti ete majjhe siṅghāṭake nisinnāti
evameva kho mahārāja bhikkhu evaṁ samāhite citte parisuddhe
pariyodāte anaṅgaṇe vigatūpakkilese mudubhūte kammaniye ṭhite
āneñjappatte sattānaṁ cutūpapātañāṇāya cittaṁ abhinīharati abhininnāmeti
so dibbena cakkhunā visuddhena atikkantamānusakena satte
Passati cavamāne upapajjamāne hīne paṇīte suvaṇṇe dubbaṇṇe
sugate duggate yathākammūpage satte pajānāti ime vata bhonto
sattā kāyaduccaritena samannāgatā vacīduccaritena samannāgatā
manoduccaritena samannāgatā ariyānaṁ upavādakā micchādiṭṭhikā
micchādiṭṭhikammasamādānā te kāyassa bhedā paraṁ maraṇā apāyaṁ
duggatiṁ vinipātaṁ nirayaṁ upapannā ime vā pana bhonto sattā
kāyasucaritena samannāgatā vacīsucaritena samannāgatā manosucaritena
samannāgatā ariyānaṁ anupavādakā sammādiṭṭhikā sammādiṭṭhikammasamādānā
te kāyassa bhedā paraṁ maraṇā sugatiṁ saggaṁ lokaṁ
upapannāti iti dibbena cakkhunā visuddhena atikkantamānusakena
satte passati cavamāne upapajjamāne hīne paṇīte suvaṇṇe
dubbaṇṇe sugate duggate yathākammūpage satte pajānāti. Idaṁpi
kho mahārāja sandiṭṭhikaṁ sāmaññaphalaṁ purimehi sandiṭṭhikehi sāmaññaphalehi
abhikkantatarañca paṇītatarañca.

[138] So evaṁ samāhite citte parisuddhe pariyodāte anaṅgaṇe
vigatūpakkilese mudubhūte kammaniye ṭhite āneñjappatte āsavānaṁ
khayañāṇāya cittaṁ abhinīharati abhininnāmeti. So idaṁ dukkhanti
yathābhūtaṁ pajānāti ayaṁ dukkhasamudayoti yathābhūtaṁ pajānāti ayaṁ
dukkhanirodhoti yathābhūtaṁ pajānāti ayaṁ dukkhanirodhagāminī paṭipadāti
yathābhūtaṁ pajānāti ime āsavāti yathābhūtaṁ pajānāti ayaṁ āsavasamudayoti
Yathābhūtaṁ pajānāti ayaṁ āsavanirodhoti yathābhūtaṁ pajānāti
ayaṁ āsavanirodhagāminī paṭipadāti yathābhūtaṁ pajānāti. Tassa evaṁ
jānato evaṁ passato kāmāsavāpi cittaṁ vimuccati bhavāsavāpi
cittaṁ vimuccati avijjāsavāpi cittaṁ vimuccati. Vimuttasmiṁ vimuttamiti
ñāṇaṁ hoti. Khīṇā jāti vusitaṁ brahmacariyaṁ kataṁ karaṇīyaṁ nāparaṁ
itthattāyāti pajānāti. Seyyathāpi mahārāja pabbatasaṁkhepe udakarahado
accho vippasanno anāvilo tattha cakkhumā puriso tīre ṭhito
passeyya sippikasambukaṁpi sakkharakaṭhalaṁpi macchagumbaṁpi carantaṁpi tiṭṭhantaṁpi
tassa evamassa ayaṁ kho udakarahado accho vippasanno anāvilo
tatthime sippikasambukāpi sakkharakaṭhalaṁpi 1 macchagumbāpi carantipi
tiṭṭhantipīti evameva kho mahārāja bhikkhu evaṁ samāhite citte
parisuddhe pariyodāte anaṅgaṇe vigatūpakkilese mudubhūte kammaniye
ṭhite āneñjappatte āsavānaṁ khayañāṇāya cittaṁ abhinīharati
abhininnāti so idaṁ dukkhanti yathābhūtaṁ pajānāti ayaṁ dukkhasamudayoti
yathābhūtaṁ pajānāti ayaṁ dukkhanirodhoti yathābhūtaṁ pajānāti ayaṁ
dukkhanirodhagāminī paṭipadāti yathābhūtaṁ pajānāti ime āsavāti
yathābhūtaṁ pajānāti ayaṁ āsavasamudayoti yathābhūtaṁ pajānāti ayaṁ
āsavanirodhoti yathābhūtaṁ pajānāti ayaṁ āsavanirodhagāminī paṭipadāti
yathābhūtaṁ pajānāti. Tassa evaṁ jānato evaṁ passato kāmāsavāpi
1 Sī. sakkharakaṭhalāpi.
Cittaṁ vimuccati bhavāsavāpi cittaṁ vimuccati avijjāsavāpi cittaṁ
vimuccati. Vimuttasmiṁ vimuttamiti ñāṇaṁ hoti. Khīṇā jāti
vusitaṁ brahmacariyaṁ kataṁ karaṇīyaṁ nāparaṁ itthattāyāti pajānāti.
Idaṁpi kho mahārāja sandiṭṭhikaṁ sāmaññaphalaṁ purimehi sandiṭṭhikehi
sāmaññaphalehi abhikkantatarañca paṇītatarañca. Imasmā ca pana 1
mahārāja sandiṭṭhikā sāmaññaphalā aññaṁ sandiṭṭhikaṁ sāmaññaphalaṁ
uttaritaraṁ vā paṇītataraṁ vā natthīti.

[139] Evaṁ vutte rājā māgadho ajātasattu vedehiputto
bhagavantaṁ etadavoca abhikkantaṁ bhante abhikkantaṁ bhante seyyathāpi
bhante nikkujjitaṁ vā ukkujjeyya paṭicchannaṁ vā vivareyya mūḷhassa
vā maggaṁ ācikkheyya andhakāre vā telapajjotaṁ dhāreyya cakkhumanto
rūpāni dakkhantīti evameva bhagavatā anekapariyāyena dhammo pakāsito
esāhaṁ bhante bhagavantaṁ saraṇaṁ gacchāmi dhammañca bhikkhusaṁghañca
upāsakaṁ maṁ bhagavā dhāretu ajjatagge pāṇupetaṁ saraṇaṅgataṁ accayo
maṁ bhante accagamā yathābālaṁ yathāmūḷhaṁ yathāakusalaṁ yohaṁ bhante 2
pitaraṁ dhammikaṁ dhammarājānaṁ issariyassa kāraṇā jīvitā voropesiṁ
tassa me bhante bhagavā accayaṁ accayato paṭiggaṇhātu āyatiṁ
saṁvarāyāti. Taggha tvaṁ mahārāja accayo accagamā yathābālaṁ
1 sīhalapotthake idaṁ nipātadvayaṁ taṁ dissati. 2 Sī. bhanteti
pāṭho na dissati.
Yathāmūḷhaṁ yathāakusalaṁ yo 1 tvaṁ pitaraṁ dhammikaṁ dhammarājānaṁ issariyassa
kāraṇā jīvitā voropesi yato ca kho tvaṁ mahārāja accayaṁ
accayato disvā yathādhammaṁ paṭikarosi tante mayaṁ paṭiggaṇhāma
vuḍḍhi hesā mahārāja ariyassa vinaye yo accayaṁ accayato disvā
yathādhammaṁ paṭikaroti āyatiṁ saṁvaraṁ āpajjatīti.

[140] Evaṁ vutte rājā māgadho ajātasattu vedehiputto
bhagavantaṁ etadavoca handa cadāni mayaṁ bhante gacchāma bahukiccā
mayaṁ bahukaraṇīyāti. Yassadāni tvaṁ mahārāja kālaṁ maññasīti.
Athakho rājā māgadho ajātasattu vedehiputto bhagavato bhāsitaṁ
abhinanditvā anumoditvā uṭṭhāyāsanā bhagavantaṁ abhivādetvā
padakkhiṇaṁ katvā pakkāmi. Athakho bhagavā acirapakkantassa rañño
māgadhassa ajātasattussa vedehiputtassa bhikkhū āmantesi khatāyaṁ
bhikkhave rājā upahatāyaṁ bhikkhave rājā sacāyaṁ bhikkhave rājā
pitaraṁ dhammikaṁ dhammarājānaṁ jīvitā na voropessatha imasmiṁyevassa
āsane vīrajaṁ vītamalaṁ dhammacakkhuṁ uppajjissathāti. Idamavoca
bhagavā. Attamanā te bhikkhū bhagavato bhāsitaṁ abhinandunti.
Sāmaññaphalasuttaṁ niṭṭhitaṁ dutiyaṁ.
------------
1 Sī. yaṁ.
Sīlakkhandhavagge ambaṭṭhasuttaṁ tatiyaṁ

[141] Evamme sutaṁ. Ekaṁ samayaṁ bhagavā kosalesu cārikañcaramāno
mahatā bhikkhusaṁghena saddhiṁ pañcamattehi bhikkhusatehi yena icchānaṅgalannāma 1
kosalānaṁ brāhmaṇagāmo tadavasari. Tatra sudaṁ bhagavā
icchānaṅgale viharati icchānaṅgalavanasaṇḍe.

[142] Tena kho pana samayena brāhmaṇo pokkharasāti ukkaṭṭhaṁ
ajjhāvasati sattussadaṁ satiṇakaṭṭhodakaṁ sadhaññaṁ rājabhoggaṁ raññā
pasenadikosalena dinnaṁ rājadāyaṁ brahmadeyyaṁ. Assosi kho
brāhmaṇo pokkharasāti samaṇo khalu bho gotamo sakyaputto
sakyakulā pabbajito kosalesu cārikañcaramāno mahatā bhikkhusaṁghena
saddhiṁ pañcamattehi bhikkhusatehi icchānaṅgalaṁ anuppatto icchānaṅgale
viharati icchānaṅgalavanasaṇḍe taṁ kho pana bhavantaṁ gotamaṁ evaṁkalyāṇo
kittisaddo abbhuggato itipi so bhagavā arahaṁ sammāsambuddho
vijjācaraṇasampanno sugato lokavidū anuttaro purisadammasārathi
satthā devamanussānaṁ buddho bhagavāti so imaṁ lokaṁ sadevakaṁ
samārakaṁ sabrahmakaṁ sassamaṇabrāhmaṇiṁ pajaṁ sadevamanussaṁ sayaṁ abhiññā
sacchikatvā pavedeti so dhammaṁ deseti ādikalyāṇaṁ majjhekalyāṇaṁ
pariyosānakalyāṇaṁ sātthaṁ sabyañjanaṁ kevalaparipuṇṇaṁ parisuddhaṁ brahmacariyaṁ
1 Sī. icchānaṅkalaṁ nāma.
Pakāseti sādhu kho pana tathārūpānaṁ arahataṁ dassanaṁ hotīti.