[1020] Viparītadiṭṭhiṁ gaṇhanti asaddhammehi purakkhatā
abbhācikkhanti sambuddhaṁ duppaññā mohapārutā
ayaṁ sā diṭṭhivipattisammatā.

[1021] Ājīvahetu ājīvakāraṇā pāpiccho icchāpakato asantaṁ
abhūtaṁ uttarimanussadhammaṁ ullapati ājīvahetu ājīvakāraṇā
sañcarittaṁ samāpajjati ājīvahetu ājīvakāraṇā yo te vihāre
vasati so bhikkhu arahāti bhaṇati ājīvahetu ājīvakāraṇā
bhikkhu paṇītabhojanāni attano atthāya viññāpetvā bhuñjati
ājīvahetu ājīvakāraṇā bhikkhunī paṇītabhojanāni attano atthāya
viññāpetvā bhuñjati ājīvahetu ājīvakāraṇā bhikkhu sūpaṁ vā
odanaṁ vā agilāno attano atthāya viññāpetvā bhuñjati.
Ayaṁ sā ājīvavipattisammatā.

[1022] Ekādasa yāvatatiyakā te suṇohi yathākathaṁ.
Ukkhittānuvattikā aṭṭha yāvatatiyakā
ariṭṭho caṇḍakālī ca ime te yāvatatiyakā.

[1023] Kati chedanakāni kati bhedanakāni kati uddālanakāni
kati anaññapācittiyāni kati bhikkhusammatiyo kati sāmīciyo
kati paramāni
kati jānanti paññattā buddhenādiccabandhunā.
Cha chedanakāni ekaṁ bhedanakaṁ ekaṁ uddālanakaṁ cattāri
anaññapācittiyāni catasso bhikkhusammatiyo satta sāmīciyo
cuddasa paramāni
soḷasa jānanti paññattā buddhenādiccabandhunā.

[1024] Vīsaṁ dve satāni bhikkhūnaṁ sikkhāpadāni uddesaṁ
āgacchanti uposathesu tīṇi satāni cattāri bhikkhunīnaṁ sikkhāpadāni
uddesaṁ āgacchanti uposathesu.
Chacattāḷīsa bhikkhūnaṁ bhikkhunīhi asādhāraṇā
sataṁ tiṁsā ca bhikkhunīnaṁ bhikkhūhi asādhāraṇā
sataṁ sattati cha ceva ubhinnaṁ asādhāraṇā
sataṁ sattati cattāri ubhinnaṁ samasikkhātā.

[1025] Vīsaṁ dve satāni bhikkhūnaṁ sikkhāpadāni
uddesaṁ āgacchanti uposathesu te suṇohi yathākathaṁ.
Pārājikāni cattāri saṅghādisesāni bhavanti terasa
aniyatāni dve honti
nissaggiyāni tiṁseva dvenavuti ca khuddakā
Cattāro pāṭidesanīyā pañcasattati sekhiyā
vīsaṁ dve satāni cime honti bhikkhūnaṁ sikkhāpadāni uddesaṁ
āgacchanti uposathesu.

[1026] Tīṇi satāni cattāri bhikkhunīnaṁ sikkhāpadāni
uddesaṁ āgacchanti uposathesu te suṇohi yathākathaṁ.
Pārājikāni aṭṭha saṅghādisesāni bhavanti sattarasa
nissaggiyāni tiṁseva sataṁ saṭṭhī ca cha ceva
khuddakāni pavuccanti aṭṭha pāṭidesanīyā
pañcasattati sekhiyā tīṇi satāni cattāri cime honti
bhikkhunīnaṁ sikkhāpadāni uddesaṁ āgacchanti uposathesu.

[1027] Chacattāḷīsa bhikkhūnaṁ bhikkhunīhi asādhāraṇā
te suṇohi yathākathaṁ.
Cha saṅghādisesā dvīhi aniyatehi
aṭṭha nissaggiyā dvādasa tehi
te honti vīsati dvevīsati khuddakā
cattāro pāṭidesanīyā
chacattāḷīsa cime honti bhikkhūnaṁ bhikkhūhi asādhāraṇā.

[1028] Sataṁ tiṁsā bhikkhunīnaṁ bhikkhūhi asādhāraṇā
te suṇohi yathākathaṁ.
Pārājikāni cattāri saṅghamhā dasa nissare
Nissaggiyāni dvādasa channavuti ca khuddakā
aṭṭha pāṭidesanīyā
sataṁ tiṁsā cime honti bhikkhunīnaṁ bhikkhūhi asādhāraṇā.

[1029] Sataṁ sattati cha ceva ubhinnaṁ asādhāraṇā
te suṇohi yathākathaṁ.
Pārājikāni cattāri saṅghādisesāni bhavanti soḷasa
aniyatāni dve hoti nissaggiyā catuvīsati
sataṁ aṭṭhārasa ceva khuddakāni pavuccanti
dvādasa pāṭidesanīyā
sataṁ sattati cha cevime honti ubhinnaṁ asādhāraṇā.