[1030] Sataṁ sattati cattāri ubhinnaṁ samasikkhātā
te suṇohi yathākathaṁ.
Pārājikāni cattāri saṅghādisesāni bhavanti satta
nissaggiyāni aṭṭhārasa samasattati khuddakā
pañcasattati sekhiyā
sataṁ sattati cattāri cime honti ubhinnaṁ samasikkhātā.

[1031] Aṭṭheva pārājikā ye dūrāsadā tālavatthusamūpamā
paṇḍupalāso puthusīlā sīsacchinnova so naro
tālova matthakacchinno avirūḷhi bhavanti te.

[1032] Tevīsaṁ saṅghādisesā dve aniyatā
Dvecattāḷīsa nissaggiyā
aṭṭhāsītisataṁ pācittiyā dvādasa pāṭidesanīyā
pañcasattati sekhiyā tīhi samathehi sammanti
sammukhā va 1 paṭiññāya tiṇavatthārakena ca.

[1033] Dve uposathā dve pavāraṇā
cattāri kammāni jinena desitā
pañceva uddesā caturo bhavanti anaññathā
āpattikkhandhā ca bhavanti satta.

[1034] Adhikaraṇāni cattāri sattahi samathehi sammanti
dvīhi catūhi tīhi kiccaṁ ekena sammati.

[1035] Pārājikanti yaṁ vuttaṁ taṁ suṇohi yathākathaṁ.
Cutoparaddho bhaṭṭho ca saddhammehi 2 niraṅkato
saṁvāsopi ca 3 tahiṁ natthi tenetaṁ iti vuccati.

[1036] Saṅghādisesoti yaṁ vuttaṁ taṁ suṇohi yathākathaṁ.
Saṅgho va deti parivāsaṁ mūlāya paṭikassati
mānattaṁ deti abbheti tenetaṁ iti vuccati.

[1037] Aniyatoti yaṁ vuttaṁ taṁ suṇohi yathākathaṁ.
Aniyato na niyato anekaṁsikataṁ padaṁ
tiṇṇamaññataraṁ ṭhānaṁ aniyatoti pavuccati.

[1038] Thullaccayanti yaṁ vuttaṁ taṁ suṇohi yathākathaṁ.
1 Ma. ca. 2 Po. Ma. saddhammā hi. 3 Po. Ma. casaddo natthi. Yu. pisaddo natthi.
Ekassa mūle yo deseti yo ca taṁ paṭiggaṇhati
accayo tena samo natthi tenetaṁ iti vuccati.

[1039] Nissaggiyanti yaṁ vuttaṁ taṁ suṇohi yathākathaṁ.
Saṅghamajjhe gaṇamajjhe ekakasseva ekato
nissajjitvā yaṁ deseti 1 tenetaṁ iti vuccati.