[600] Uposathaṁpi na pucchantiyā ovādaṁpi na yācantiyā
pācittiyaṁ kattha paññattanti. Sāvatthiyā paññattaṁ. Kaṁ
ārabbhāti. Sambahulā bhikkhuniyo ārabbha. Kismiṁ vatthusminti.
Sambahulā bhikkhuniyo uposathaṁpi na pucchiṁsu ovādaṁpi na yāciṁsu
Tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
ekena samuṭṭhānena samuṭṭhāti (dhuranikkhepe).

[601] Pasākhe jātaṁ gaṇḍaṁ vā ruhitaṁ vā anapaloketvā
saṅghaṁ vā gaṇaṁ vā purisena saddhiṁ ekenekāya bhedāpentiyā
pācittiyaṁ kattha paññattanti. Sāvatthiyā paññattaṁ. Kaṁ
ārabbhāti. Aññataraṁ bhikkhuniṁ ārabbha. Kismiṁ vatthusminti.
Aññatarā bhikkhunī pasākhe jātaṁ gaṇḍaṁ purisena saddhiṁ ekenekā
bhedāpesi tasmiṁ vatthusmiṁ. Ekā paññatti. Channaṁ
āpattisamuṭṭhānānaṁ dvīhi samuṭṭhānehi samuṭṭhāti (kaṭhinake).
Ārāmavaggo chaṭṭho.

[602] Gabbhiniṁ vuṭṭhāpentiyā pācittiyaṁ kattha paññattanti.
Sāvatthiyā paññattaṁ. Kaṁ ārabbhāti. Sambahulā bhikkhuniyo
ārabbha. Kismiṁ vatthusminti. Sambahulā bhikkhuniyo gabbhiniṁ
vuṭṭhāpesuṁ tasmiṁ vatthusmiṁ. Ekā paññatti. Channaṁ
āpattisamuṭṭhānānaṁ tīhi samuṭṭhānehi samuṭṭhāti.

[603] Pāyantiṁ vuṭṭhāpentiyā pācittiyaṁ kattha paññattanti.
Sāvatthiyā paññattaṁ. Kaṁ ārabbhāti. Sambahulā bhikkhuniyo
ārabbha. Kismiṁ vatthusminti. Sambahulā bhikkhuniyo pāyantiṁ
vuṭṭhāpesuṁ tasmiṁ vatthusmiṁ. Ekā paññatti. Channaṁ
āpattisamuṭṭhānānaṁ tīhi samuṭṭhānehi samuṭṭhāti.

[604] Dve vassāni chasu dhammesu asikkhitasikkhaṁ sikkhamānaṁ
vuṭṭhāpentiyā pācittiyaṁ kattha paññattanti. Sāvatthiyā paññattaṁ.
Kaṁ ārabbhāti. Sambahulā bhikkhuniyo ārabbha. Kismiṁ
vatthusminti. Sambahulā bhikkhuniyo dve vassāni chasu dhammesu
asikkhitasikkhaṁ sikkhamānaṁ vuṭṭhāpesuṁ tasmiṁ vatthusmiṁ. Ekā
paññatti. Channaṁ āpattisamuṭṭhānānaṁ tīhi samuṭṭhānehi samuṭṭhāti.

[605] Dve vassāni chasu dhammesu sikkhitasikkhaṁ sikkhamānaṁ
saṅghena asammataṁ vuṭṭhāpentiyā pācittiyaṁ kattha paññattanti.
Sāvatthiyā paññattaṁ. Kaṁ ārabbhāti. Sambahulā bhikkhuniyo
ārabbha. Kismiṁ vatthusminti. Sambahulā bhikkhuniyo dve vassāni
chasu dhammesu sikkhitasikkhaṁ sikkhamānaṁ saṅghena asammataṁ vuṭṭhāpesuṁ
tasmiṁ vatthusmiṁ. Ekā paññatti. Channaṁ āpattisamuṭṭhānānaṁ
tīhi samuṭṭhānehi samuṭṭhāti.

[606] Ūnadvādasavassaṁ gihigataṁ vuṭṭhāpentiyā pācittiyaṁ kattha
paññattanti. Sāvatthiyā paññattaṁ. Kaṁ ārabbhāti.
Sambahulā bhikkhuniyo ārabbha. Kismiṁ vatthusminti. Sambahulā
bhikkhuniyo ūnadvādasavassaṁ gihigataṁ vuṭṭhāpesuṁ tasmiṁ vatthusmiṁ.
Ekā paññatti. Channaṁ āpattisamuṭṭhānānaṁ tīhi samuṭṭhānehi
samuṭṭhāti.

[607] Paripuṇṇadvādasavassaṁ gihigataṁ dve vassāni chasu dhammesu
Asikkhitasikkhaṁ vuṭṭhāpentiyā pācittiyaṁ kattha paññattanti.
Sāvatthiyā paññattaṁ. Kaṁ ārabbhāti. Sambahulā bhikkhuniyo
ārabbha. Kismiṁ vatthusminti. Sambahulā bhikkhuniyo paripuṇṇadvādasavassaṁ
gihigataṁ dve vassāni chasu dhammesu asikkhitasikkhaṁ
vuṭṭhāpesuṁ tasmiṁ vatthusmiṁ. Ekā paññatti. Channaṁ
āpattisamuṭṭhānānaṁ tīhi samuṭṭhānehi samuṭṭhāti.

[608] Paripuṇṇadvādasavassaṁ gihigataṁ dve vassāni chasu dhammesu
sikkhitasikkhaṁ saṅghena asammataṁ vuṭṭhāpentiyā pācittiyaṁ kattha
paññattanti. Sāvatthiyā paññattaṁ. Kaṁ ārabbhāti. Sambahulā
bhikkhuniyo ārabbha. Kismiṁ vatthusminti. Sambahulā bhikkhuniyo
paripuṇṇadvādasavassaṁ gihigataṁ dve vassāni chasu dhammesu sikkhitasikkhaṁ
saṅghena asammataṁ vuṭṭhāpesuṁ tasmiṁ vatthusmiṁ. Ekā paññatti.
Channaṁ āpattisamuṭṭhānānaṁ tīhi samuṭṭhānehi samuṭṭhāti.

[609] Sahavijīniṁ vuṭṭhāpetvā dve vassāni neva anuggaṇhantiyā
na anuggahāpentiyā pācittiyaṁ kattha paññattanti. Sāvatthiyā
paññattaṁ. Kaṁ ārabbhāti. Thullanandaṁ bhikkhuniṁ ārabbha. Kismiṁ
vatthusminti. Thullanandā bhikkhunī sahajīviniṁ vuṭṭhāpetvā dve
vassāni neva anuggahesi na anuggahāpesi tasmiṁ vatthusmiṁ.
Ekā paññatti. Channaṁ āpattisamuṭṭhānānaṁ ekena samuṭṭhānena
samuṭṭhāti (dhuranikkhepe).