[645] Athakho vesālikā vajjiputtakā bhikkhū taṁ sāmaṇakaṁ
parikkhāraṁ ādāya yenāyasmā revato tenupasaṅkamiṁsu upasaṅkamitvā
āyasmantaṁ revataṁ etadavocuṁ paṭiggaṇhātu bhante thero
1 Ma. cetasā. 2 Ma. Yu. sādhūti saddo ekoyeva dissati. 3 Ma. pubbepi cāhaṁ.
4 Yu. appeva.
Sāmaṇakaṁ parikkhāraṁ pattampi cīvarampi nisīdanampi sūcigharampi
kāyabandhanampi parissāvanampi dhamakarakampīti. Alaṁ āvuso paripuṇṇaṁ
me ticīvaranti na icchi paṭiggahetuṁ. Tena kho pana samayena
uttaro nāma bhikkhu vīsativasso āyasmato revatassa upaṭṭhāko
hoti. Athakho vesālikā vajjiputtakā bhikkhū yenāyasmā
uttaro tenupasaṅkamiṁsu upasaṅkamitvā āyasmantaṁ uttaraṁ
etadavocuṁ paṭiggaṇhātu āyasmā uttaro sāmaṇakaṁ parikkhāraṁ
pattampi cīvarampi nisīdanampi sūcigharampi kāyabandhanampi parissāvanampi
dhamakarakampīti. Alaṁ āvuso paripuṇṇaṁ me ticīvaranti na
icchi paṭiggahetuṁ. Manussā kho āvuso uttara bhagavato sāmaṇakaṁ
parikkhāraṁ upanāmenti sace bhagavā paṭiggaṇhāti teneva te 1
attamanā honti no ce bhagavā paṭiggaṇhāti āyasmato
ca 2 ānandassa upanāmenti paṭiggaṇhātu bhante thero sāmaṇakaṁ
parikkhāraṁ yathā bhagavatā paṭiggahito evameva so 3 bhavissatīti
paṭiggaṇhātāyasmā uttaro sāmaṇakaṁ parikkhāraṁ yathā therena
paṭiggahito evameva so bhavissatīti. Athakho āyasmā uttaro
vesālikehi vajjiputtakehi bhikkhūhi nippīḷiyamāno ekaṁ cīvaraṁ aggahesi
vadeyyātha āvuso yena atthoti 4 . Ettakaṁ āyasmā uttaro
1 Ma. tesaddo natthi. 2 Ma. Yu. casaddo natthi. 3 Yu. evameso.
4 Yu. vadeyyāthāvuso yenatthoti.
Theraṁ vadetu ettakaṁ 1 bhante thero saṅghamajjhe vadetu puratthimesu
janapadesu buddhā bhagavanto uppajjanti dhammavādino pācīnakā
bhikkhū adhammavādino pāṭheyyakā bhikkhūti. Evamāvusoti kho
āyasmā uttaro vesālikānaṁ vajjiputtakānaṁ bhikkhūnaṁ paṭissutvā
yenāyasmā revato tenupasaṅkami upasaṅkamitvā āyasmantaṁ
revataṁ etadavoca ettakaṁ bhante thero saṅghamajjhe vadetu
puratthimesu janapadesu buddhā bhagavanto uppajjanti dhammavādino
pācīnakā bhikkhū adhammavādino pāṭheyyakā bhikkhūti. Adhamme
maṁ tvaṁ bhikkhu niyojesīti thero āyasmantaṁ uttaraṁ paṇāmesi.
Athakho vesālikā vajjiputtakā bhikkhū āyasmantaṁ uttaraṁ etadavocuṁ
kiṁ āvuso uttara thero āhāti. Pāpikaṁ no āvuso kataṁ
adhamme maṁ tvaṁ bhikkhu niyojesīti thero maṁ paṇāmesīti. Nanu
tvaṁ āvuso uttara 2 vuḍḍho vīsativassosīti. Āmāvuso apica 3
mayaṁ garunissayaṁ gaṇhāmāti.

[646] Athakho saṅgho taṁ adhikaraṇaṁ vinicchinitukāmo sannipati.
Athakho āyasmā revato saṅghaṁ ñāpesi suṇātu me āvuso
saṅgho sace mayaṁ imaṁ adhikaraṇaṁ idha vūpasamessāma 4 siyāpi
mūlādāyakā 5 bhikkhū punakkammāya ukkoṭeyyuṁ. Yadi saṅghassa
pattakallaṁ yatthevimaṁ adhikaraṇaṁ samuppannaṁ saṅgho tatthevimaṁ
1 Ma. ettakañca. 2 Ma. Yu. uttarāti natthi. 3 Yu. api nu ca.
4 Yu. vūpasameyyāma. 5 mūladāyakātipi pāṭho.
Adhikaraṇaṁ vūpasameyyāti. Athakho therā bhikkhū vesāliṁ agamaṁsu taṁ
adhikaraṇaṁ vinicchinitukāmā. Tena kho pana samayena sabbakāmī
nāma paṭhabyā saṅghatthero vīsavassasatiko upasampadāya āyasmato
ānandassa saddhivihāriko vesāliyaṁ paṭivasati. Athakho āyasmā
revato āyasmantaṁ sambhūtaṁ sāṇavāsiṁ etadavoca ahaṁ āvuso
yasmiṁ vihāre sabbakāmī thero viharati taṁ vihāraṁ upagacchāmi
so tvaṁ kālasseva āyasmantaṁ sabbakāmiṁ upasaṅkamitvā imāni
dasa vatthūni puccheyyāsīti. Evaṁ bhanteti kho āyasmā sambhūto
sāṇavāsī āyasmato revatassa paccassosi. Athakho āyasmā
revato yasmiṁ vihāre sabbakāmī thero viharati taṁ vihāraṁ upagañchi.
Gabbhe āyasmato sabbakāmissa senāsanaṁ paññattaṁ hoti.
Gabbhapamukhe āyasmato revatassa. Athakho āyasmā revato
ayaṁ thero mahallako na nipajjatīti na seyyaṁ kappeti. Āyasmā
sabbakāmī ayaṁ bhikkhu āgantuko kilanto na nipajjatīti na
seyyaṁ kappesi.

[647] Athakho āyasmā sabbakāmī rattiyā paccūsasamayaṁ paccuṭṭhāya 1
āyasmantaṁ revataṁ etadavoca katamena tvaṁ bhummi vihārena
etarahi bahulaṁ viharasīti. Mettāvihārena kho ahaṁ bhante etarahi
bahulaṁ viharāmīti. Kullakavihārena kira tvaṁ bhummi etarahi bahulaṁ
1 Yu. ayaṁ pāṭho natthi.
Viharasi kullakavihāro heso 1 bhummi yadidaṁ mettāti. Pubbepi
me bhante gihibhūtassa āciṇṇā mettā tenāhaṁ etarahipi
mettāvihārena bahulaṁ viharāmi apica mayā cirappattaṁ arahattaṁ
thero pana bhante katamena vihārena etarahi bahulaṁ viharatīti.
Suññatāvihārena kho ahaṁ bhummi etarahi bahulaṁ viharāmīti.
Mahāpurisavihārena kira bhante thero etarahi bahulaṁ viharati mahāpurisavihāro
eso bhante yadidaṁ suññatāti. Pubbepi me bhummi
gihibhūtassa āciṇṇā suññatā tenāhaṁ etarahipi suññatāvihārena
bahulaṁ viharāmi apica mayā cirappattaṁ arahattanti.

[648] Ayañcarahi therānaṁ bhikkhūnaṁ antarā kathā vippakatā.
Athāyasmā sambhūto sāṇavāsī 2 anuppatto hoti. Athakho
āyasmā sambhūto sāṇavāsī yenāyasmā sabbakāmī tenupasaṅkami
upasaṅkamitvā āyasmantaṁ sabbakāmiṁ abhivādetvā ekamantaṁ nisīdi.
Ekamantaṁ nisinno kho āyasmā sambhūto sāṇavāsī āyasmantaṁ
sabbakāmiṁ etadavoca ime bhante vesālikā vajjiputtakā bhikkhū
vesāliyaṁ dasa vatthūni dīpenti kappati siṅgiloṇakappo kappati
dvaṅgulakappo kappati gāmantarakappo kappati āvāsakappo
kappati anumatikappo kappati āciṇṇakappo kappati
1 Ma. Yu. eso. 2 Ma. Yu. ito paraṁ tasminti pāṭho dissati.
Amathitakappo kappati jalogiṁ pātuṁ kappati adasakaṁ nisīdanaṁ kappati
jātarūparajatanti therena bhante upajjhāyassa mūle bahu dhammo
ca vinayo ca pariyatto therassa bhante dhammañca vinayañca
paccavekkhantassa kathaṁ hoti ke nu kho dhammavādino pācīnakā
vā bhikkhū pāṭheyyakā vāti. Tayāpi kho āvuso upajjhāyassa
mūle bahu dhammo ca vinayo ca pariyatto tuyhaṁ pana āvuso
dhammañca vinayañca paccavekkhantassa kathaṁ hoti ke nu kho
dhammavādino pācīnakā vā bhikkhū pāṭheyyakā vāti. Mayhaṁ
kho bhante dhammañca vinayañca paccavekkhantassa evaṁ hoti
adhammavādino pācīnakā bhikkhū dhammavādino pāṭheyyakā bhikkhūti
apicāhaṁ na tāva diṭṭhiṁ āvikaromi appevanāma maṁ imasmiṁ
adhikaraṇe sammanneyyāti. Mayhaṁpi kho āvuso dhammañca vinayañca
paccavekkhantassa evaṁ hoti adhammavādino pācīnakā bhikkhū
dhammavādino pāṭheyyakā bhikkhūti apicāhaṁ na tāva diṭṭhiṁ
āvikaromi appevanāma maṁ imasmiṁ adhikaraṇe sammanneyyāti.

[649] Athakho saṅgho taṁ adhikaraṇaṁ vinicchinitukāmo sannipati.
Tasmiṁ kho pana adhikaraṇe vinicchiyamāne anantāni 1 ceva bhassāni
jāyanti na cekassa bhāsitassa attho viññāyati. Athakho
āyasmā revato saṅghaṁ ñāpesi suṇātu me bhante saṅgho
1 Ma. Yu. anaggāni.
Amhākaṁ imasmiṁ adhikaraṇe vinicchiyamāne anantāni ceva bhassāni
jāyanti na cekassa bhāsitassa attho viññāyati. Yadi
saṅghassa pattakallaṁ saṅgho imaṁ adhikaraṇaṁ ubbāhikāya vūpasameyya.
Saṅgho cattāro pācīnake bhikkhū cattāro pāṭheyyake bhikkhū
uccini pācīnakānaṁ bhikkhūnaṁ āyasmantañca sabbakāmiṁ āyasmantañca
sāḷhaṁ āyasmantañca ujjasobhitaṁ āyasmantañca vāsabhagāmikaṁ
pāṭheyyakānaṁ bhikkhūnaṁ āyasmantañca revataṁ āyasmantañca sambhūtaṁ
sāṇavāsiṁ āyasmantañca yasaṁ kākaṇḍakaputtaṁ āyasmantañca
sumananti 1 . Athakho āyasmā revato saṅghaṁ ñāpesi suṇātu me bhante
saṅgho amhākaṁ imasmiṁ adhikaraṇe vinicchiyamāne anantāni ceva
bhassāni jāyanti na cekassa bhāsitassa attho viññāyati. Yadi
saṅghassa pattakallaṁ saṅgho cattāro pācīnake bhikkhū cattāro
pāṭheyyake bhikkhū sammanneyya ubbāhikāya imaṁ adhikaraṇaṁ vūpasametuṁ.
Esā ñatti. Suṇātu me bhante saṅgho amhākaṁ imasmiṁ
adhikaraṇe vinicchiyamāne anantāni ceva bhassāni jāyanti na
cekassa bhāsitassa attho viññāyati. Saṅgho cattāro pācīnake
bhikkhū cattāro pāṭheyyake bhikkhū sammannati ubbāhikāya imaṁ
adhikaraṇaṁ vūpasametuṁ. Yassāyasmato khamati catunnaṁ pācīnakānaṁ [2]-
catunnaṁ pāṭheyyakānaṁ bhikkhūnaṁ sammati ubbāhikāya imaṁ adhikaraṇaṁ
1 Yu. itisaddo natthi. 2 Ma. Yu. bhikkhūnaṁ.
Vūpasametuṁ so tuṇhassa yassa nakkhamati so bhāseyya.
Sammatā saṅghena cattāro pācīnakā bhikkhū cattāro pāṭheyyakā
bhikkhū ubbāhikāya imaṁ adhikaraṇaṁ vūpasametuṁ. Khamati saṅghassa
tasmā tuṇhī. Evametaṁ dhārayāmīti.

[650] Tena kho pana samayena ajito nāma bhikkhu dasavasso
saṅghassa pātimokkhuddesako hoti. Athakho saṅgho āyasmantaṁpi
ajitaṁ sammannati therānaṁ bhikkhūnaṁ āsanapaññāpakaṁ. Athakho therānaṁ
bhikkhūnaṁ etadahosi kattha nu kho mayaṁ imaṁ adhikaraṇaṁ vūpasameyyāmāti.
Athakho therānaṁ bhikkhūnaṁ etadahosi ayaṁ kho
vālikārāmo ramaṇīyo appasaddo appanigghoso yannūna mayaṁ
vālikārāme imaṁ adhikaraṇaṁ vūpasameyyāmāti. Athakho therā bhikkhū
vālikārāmaṁ agamaṁsu taṁ adhikaraṇaṁ vinicchinitukāmā.

[651] Athakho āyasmā revato saṅghaṁ ñāpesi suṇātu me
bhante saṅgho yadi saṅghassa pattakallaṁ ahaṁ āyasmantaṁ sabbakāmiṁ
vinayaṁ puccheyyanti. Āyasmā sabbakāmī saṅghaṁ ñāpesi suṇātu
me āvuso saṅgho yadi saṅghassa pattakallaṁ ahaṁ revatena
vinayaṁ puṭṭho vissajjeyyanti.

[652] Athakho āyasmā revato āyasmantaṁ sabbakāmiṁ etadavoca
kappati bhante siṅgiloṇakappoti. Ko so āvuso siṅgiloṇakappoti.
Kappati bhante siṅginā loṇaṁ pariharituṁ yattha aloṇikaṁ 1
1 Ma. Yu. aloṇakaṁ.
Bhavissati tattha paribhuñjissāmīti. Nāvuso kappatīti. Kattha
paṭikkhittanti. Sāvatthiyā suttavibhaṅgeti. Kiṁ āpajjatīti.
Sannidhikārakabhojane pācittiyanti. Suṇātu me bhante saṅgho
idaṁ paṭhamaṁ vatthuṁ 1 saṅghena vinicchitaṁ. Itipīdaṁ vatthuṁ uddhammaṁ
ubbinayaṁ apagatasatthusāsanaṁ. Idaṁ paṭhamaṁ salākaṁ nikkhipāmi.

[653] Kappati bhante dvaṅgulakappoti. Ko so āvuso
dvaṅgulakappoti. Kappati bhante dvaṅgulāya chāyāya vītivattāya
vikāle bhojanaṁ bhuñjitunti. Nāvuso kappatīti. Kattha paṭikkhittanti.
Rājagahe suttavibhaṅgeti. Kiṁ āpajjatīti. Vikālabhojane
pācittiyanti. Suṇātu me bhante saṅgho idaṁ dutiyaṁ vatthuṁ
saṅghena vinicchitaṁ. Itipīdaṁ vatthuṁ uddhammaṁ ubbinayaṁ apagatasatthusāsanaṁ.
Idaṁ dutiyaṁ salākaṁ nikkhipāmi.

[654] Kappati bhante gāmantarakappoti. Ko so āvuso
gāmantarakappoti. Kappati bhante idāni gāmantaraṁ gamissāmīti
bhuttāvinā pavāritena anatirittaṁ bhojanaṁ bhuñjitunti. Nāvuso
kappatīti. Kattha paṭikkhittanti. Sāvatthiyā suttavibhaṅgeti.
Kiṁ āpajjatīti. Anatirittabhojane pācittiyanti. Suṇātu me
bhante saṅgho idaṁ tatiyaṁ vatthuṁ saṅghena vinicchitaṁ. Itipīdaṁ
vatthuṁ uddhammaṁ ubbinayaṁ apagatasatthusāsanaṁ. Idaṁ tatiyaṁ salākaṁ
nikkhipāmi.
1 Ma. vatthu.