[655] Kappati bhante āvāsakappoti. Ko so āvuso
āvāsakappoti. Kappati bhante sambahulā āvāsā samānasīmā
nānūposathaṁ 1 kātunti. Nāvuso kappatīti. Kattha paṭikkhittanti.
Rājagahe uposathasaṁyutteti. Kiṁ āpajjatīti. Vinayātisāre
dukkaṭanti. Suṇātu me bhante saṅgho idaṁ catutthaṁ vatthuṁ
saṅghena vinicchitaṁ. Itipīdaṁ vatthuṁ uddhammaṁ ubbinayaṁ apagatasatthusāsanaṁ.
Idaṁ catutthaṁ salākaṁ nikkhipāmi.

[656] Kappati bhante anumatikappoti. Ko so āvuso
anumatikappoti. Kappeti bhante vaggena saṅghena kammaṁ kātuṁ
āgate bhikkhū anumānessāmāti 2 . Nāvuso kappatīti. Kattha
paṭikkhittanti. Campeyyake vinayavatthusminti. Kiṁ āpajjatīti.
Vinayātisāre dukkaṭanti. Suṇātu me bhante saṅgho idaṁ pañcamaṁ
vatthuṁ saṅghena vinicchitaṁ. Itipīdaṁ vatthuṁ uddhammaṁ ubbinayaṁ apagatasatthusāsanaṁ.
Idaṁ pañcamaṁ salākaṁ nikkhipāmi.

[657] Kappati bhante āciṇṇakappoti. Ko so āvuso
āciṇṇakappoti. Kappati bhante idaṁ me upajjhāyena
ajjhāciṇṇaṁ idaṁ me ācariyena ajjhāciṇṇanti ajjhācaritunti.
Āciṇṇakappo kho āvuso ekacco kappati ekacco na
kappatīti. Suṇātu me bhante saṅgho idaṁ chaṭṭhaṁ vatthuṁ saṅghena
1 Ma. nānuposathaṁ. 2 Ma. anumatiṁ ānessāma.
Vinicchitaṁ. Itipīdaṁ vatthuṁ uddhammaṁ ubbinayaṁ apagatasatthusāsanaṁ.
Idaṁ chaṭṭhaṁ salākaṁ nikkhipāmi.

[658] Kappati bhante amathitakappoti. Ko so āvuso
amathitakappoti. Kappati bhante yaṁ taṁ khīraṁ khīrabhāvaṁ vijahitaṁ
asampattaṁ dadhibhāvaṁ bhuttāvinā pavāritena anatirittaṁ pātunti.
Nāvuso kappatīti. Kattha paṭikkhittanti. Sāvatthiyā suttavibhaṅgeti.
Kiṁ āpajjatīti. Anatirittabhojane pācittiyanti. Suṇātu me
bhante saṅgho idaṁ sattamaṁ vatthuṁ saṅghena vinicchitaṁ. Itipīdaṁ
vatthuṁ uddhammaṁ ubbinayaṁ apagatasatthusāsanaṁ. Idaṁ sattamaṁ salākaṁ
nikkhipāmi.

[659] Kappati bhante jalogiṁ pātunti. Kā sā āvuso
jalogīti. Kappati bhante yā sā surā asutā 1 asampattā
majjabhāvaṁ sā pātunti. Nāvuso kappatīti. Kattha paṭikkhittanti.
Kosambiyā suttavibhaṅgeti. Kiṁ āpajjatīti. Surāmerayapāne
pācittiyanti. Suṇātu me bhante saṅgho idaṁ aṭṭhamaṁ vatthuṁ
saṅghena vinicchitaṁ. Itipīdaṁ vatthuṁ uddhammaṁ ubbinayaṁ apagatasatthusāsanaṁ.
Idaṁ aṭṭhamaṁ salākaṁ nikkhipāmi.

[660] Kappati bhante adasakaṁ nisīdananti. Nāvuso kappatīti.
Kattha paṭikkhittanti. Sāvatthiyā suttavibhaṅgeti. Kiṁ āpajjatīti.
Chedanake pācittiyanti. Suṇātu me bhante saṅgho idaṁ navamaṁ
1 Ma. āsutā.
Vatthuṁ saṅghena vinicchitaṁ. Itipidaṁ vatthuṁ uddhammaṁ ubbinayaṁ
apagatasatthusāsanaṁ. Idaṁ navamaṁ salākaṁ nikkhipāmi.

[661] Kappati bhante jātarūparajatanti. Nāvuso kappatīti.
Kattha paṭikkhittanti. Rājagahe suttavibhaṅgeti. Kiṁ āpajjatīti.
Jātarūparajatappaṭiggahaṇe pācittiyanti. Suṇātu me bhante saṅgho
idaṁ dasamaṁ vatthuṁ saṅghena vinicchitaṁ. Itipīdaṁ vatthuṁ uddhammaṁ
ubbinayaṁ apagatasatthusāsanaṁ. Idaṁ dasamaṁ salākaṁ nikkhipāmi.

[662] Suṇātu me bhante saṅgho imāni dasa vatthūni saṅghena
vinicchitāni. Itipīmāni dasa vatthūni uddhammāni ubbinayāni
apagatasatthusāsanānīti.

[663] Nīhatametaṁ āvuso adhikaraṇaṁ santaṁ vūpasantaṁ suvūpasantaṁ
apica maṁ tvaṁ āvuso saṅghamajjhepi imāni dasa vatthūni puccheyyāsi
tesaṁ bhikkhūnaṁ saññattiyāti. Athakho āyasmā revato āyasmantaṁ
sabbakāmiṁ saṅghamajjhepi imāni dasa vatthūni pucchi. Puṭṭho
puṭṭho āyasmā sabbakāmī vissajjesi.
Imāya kho pana vinayasaṅgītiyā satta bhikkhusatāni anūnāni
anadhikāni ahesuṁ. Tasmāyaṁ vinayasaṅgīti sattasatikāti vuccatīti.
Sattasatikakkhandhakaṁ niṭṭhitaṁ dvādasamaṁ.
Imamhi khandhake vatthū pañcavīsati.
------------
Tassuddānaṁ

[664] Dasa vatthūni pūretvā kammaṁ dūtena pāvisi
cattāro puna rūpañca kosambi ca pāṭheyyako
maggo soreyyaṁ saṅkassaṁ kaṇṇakujjaṁ udumbaraṁ
sahajāti 1 ca majjhesi assosi kaṁ nu kho mayaṁ
pattanāvāya ujjavi 2 dūratopi 3 udāmassa
dāruṇaṁ 4 saṅgho ca vesāli 5 mettā saṅgho ubbāhikāti.
Cullavaggo samatto.
-----------
1 Yu. sahaṁjāti. 2 Yu. sā ujji. 3 Ma. rahosi upanāmayaṁ. Yu. dūrahopi.
4 Ma. garu.. Yu. dārukaṁ. 5 Ma. vesāliṁ.