[385] Athakho devadatto sapariso rājagahaṁ pavisitvā pañcahi
vatthūhi janaṁ saññāpesi mayaṁ āvuso samaṇaṁ gotamaṁ upasaṅkamitvā
pañca vatthūni yācimhā bhagavā bhante anekapariyāyena
appicchassa .pe. Viriyārambhassa vaṇṇavādī imāni bhante
pañca vatthūni anekapariyāyena appicchatāya .pe. Viriyārambhāya
saṁvattanti sādhu bhante bhikkhū yāvajīvaṁ āraññakā assu yo gāmantaṁ
osareyya vajjaṁ naṁ phuseyya .pe. Yāvajīvaṁ macchamaṁsaṁ na khādeyyuṁ
yo macchamaṁsaṁ khādeyya vajjaṁ naṁ phuseyyāti imāni pañca
vatthūni samaṇo gotamo nānujānāti te ca mayaṁ imehi pañcahi
Vatthūhi samādāya vattāmāti.

[386] Tattha ye te manussā assaddhā appasannā dubbuddhino
te evamāhaṁsu ime kho samaṇā sakyaputtiyā dhūtā 1 sallekhavuttino
samaṇo pana gotamo bāhulliko bāhullāya cetetīti. Ye
pana te manussā saddhā pasannā paṇḍitā buddhimanto te
ujjhāyanti khīyanti vipācenti kathaṁ hi nāma devadatto 2 saṅghabhedāya
parakkamissati cakkabhedāyāti. Assosuṁ kho bhikkhū tesaṁ manussānaṁ
ujjhāyantānaṁ khīyantānaṁ vipācentānaṁ. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma devadatto
saṅghabhedāya parakkamissati cakkabhedāyāti. Athakho te bhikkhū
bhagavato etamatthaṁ ārocesuṁ .pe. Saccaṁ kira tvaṁ devadatta
saṅghabhedāya parakkamasi cakkabhedāyāti. Saccaṁ bhagavāti. Alaṁ
devadatta mā te rucci saṅghabhedo garuko kho devadatta
saṅghabhedo yo kho devadatta samaggaṁ bhindati kappaṭṭhitikaṁ 3
kibbisaṁ pasavati kappaṁ nirayamhi paccati yo ca kho devadatta
bhinnaṁ saṅghaṁ samaggaṁ karoti brahmapuññaṁ pasavati kappaṁ saggamhi
modati alaṁ devadatta mā te rucci saṅghabhedo garuko kho
devadatta saṅghabhedoti.

[387] Athakho āyasmā ānando pubbaṇhasamayaṁ nivāsetvā
pattacīvaramādāya rājagahaṁ piṇḍāya pāvisi. Addasā kho devadatto
1 Ma. Yu. dhutā. 2 Ma. Yu. bhagavato. 3 Ma. Yu. kappaṭṭhikaṁ.
Āyasmantaṁ ānandaṁ rājagahe piṇḍāya carantaṁ disvāna yenāyasmā
ānando tenupasaṅkami upasaṅkamitvā āyasmantaṁ ānandaṁ
etadavoca ajjataggedānāhaṁ āvuso ānanda aññatreva bhagavatā
aññatreva bhikkhusaṅghā uposathaṁ karissāmi saṅghakammaṁ karissāmīti.
Athakho āyasmā ānando rājagahe piṇḍāya caritvā pacchābhattaṁ
piṇḍapātapaṭikkanto yena bhagavā tenupasaṅkami upasaṅkamitvā
bhagavantaṁ abhivādetvā ekamantaṁ nisīdi. Ekamantaṁ nisinno kho
āyasmā ānando bhagavantaṁ etadavoca idhāhaṁ bhante pubbaṇhasamayaṁ
nivāsetvā pattacīvaramādāya rājagahaṁ piṇḍāya pāvisiṁ addasā
kho maṁ bhante devadatto rājagahe piṇḍāya carantaṁ disvāna
yenāhaṁ tenupasaṅkami upasaṅkamitvā maṁ etadavoca ajjataggedānāhaṁ
āvuso ānanda aññatreva bhagavatā aññatreva bhikkhusaṅghā
uposathaṁ karissāmi saṅghakammaṁ karissāmīti ajja 1 bhante devadatto
saṅghaṁ bhindissatīti. Athakho bhagavā etamatthaṁ viditvā tāyaṁ
velāyaṁ imaṁ udānaṁ udānesi

[388] Sukaraṁ sādhunā sādhu sādhu pāpena dukkaraṁ.
Pāpaṁ pāpena sukaraṁ pāpamariyehi dukkaranti.
Dutiyabhāṇavāraṁ niṭṭhitaṁ.

[389] Athakho devadatto tadahuposathe uṭṭhāyāsanā salākaṁ
gāhesi mayaṁ āvuso samaṇaṁ gotamaṁ upasaṅkamitvā pañca vatthūni
1 Ma. ajjatagge.
Yācimhā bhagavā bhante anekapariyāyena appicchassa .pe.
Viriyārambhassa vaṇṇavādī imāni bhante pañca vatthūni anekapariyāyena
appicchatāya .pe. Viriyārambhāya saṁvattanti sādhu
bhante bhikkhū yāvajīvaṁ āraññakā assu yo gāmantaṁ osareyya
vajjaṁ naṁ phuseyya .pe. Yāvajīvaṁ macchamaṁsaṁ na khādeyyuṁ yo
macchamaṁsaṁ khādeyya vajjaṁ naṁ phuseyyāti imāni pañca vatthūni
samaṇo gotamo nānujānāti te ca mayaṁ imehi pañcahi vatthūhi
samādāya vattāma yassāyasmato imāni pañca vatthūni khamanti
so salākaṁ gaṇhātūti.

[390] Tena kho pana samayena vesālikā vajjiputtakā
pañcamattāni bhikkhusatāni navakā ceva honti appakataññuno ca.
Te ca ayaṁ dhammo ayaṁ vinayo idaṁ satthusāsananti salākaṁ
gaṇhiṁsu. Athakho devadatto saṅghaṁ bhinditvā pañcamattāni
bhikkhusatāni ādāya yena gayāsīsaṁ tena pakkāmi.

[391] Athakho sārīputtamoggallānā yena bhagavā tenupasaṅkamiṁsu
upasaṅkamitvā bhagavantaṁ abhivādetvā ekamantaṁ nisīdiṁsu.
Ekamantaṁ nisinno kho āyasmā sārīputto bhagavantaṁ etadavoca
devadatto bhante saṅghaṁ bhinditvā pañcamattāni bhikkhusatāni ādāya
yena gayāsīsaṁ tena pakkantoti. Nanu hi 1 nāma tumhākaṁ sārīputtā
1 Ma. Yu. na hi.
Tesu navakesu bhikkhūsu kāruññampi bhavissati gacchatha tumhe sārīputtā
purā te bhikkhū anayabyasanaṁ āpajjantīti. Evaṁ bhanteti kho
sārīputtamoggallānā bhagavato paṭissutvā uṭṭhāyāsanā bhagavantaṁ
abhivādetvā padakkhiṇaṁ katvā yena gayāsīsaṁ tenupasaṅkamiṁsu.

[392] Tena kho pana samayena aññataro bhikkhu bhagavato
avidūre ṭhito rodito hoti 1 . Athakho bhagavā taṁ bhikkhuṁ etadavoca
kissa tvaṁ bhikkhu rodasīti. Yepi te bhante bhagavato aggasāvakā
sārīputtamoggallānā tepi devadattassa santike gacchanti
devadattassa dhammaṁ rocentāti. Aṭṭhānametaṁ bhikkhu anavakāso yaṁ
sārīputtamoggallānā devadattassa dhammaṁ roceyyuṁ apica te
gatā bhikkhusaññattiyāti.

[393] Tena kho pana samayena devadatto mahatiyā parisāya
parivuto dhammaṁ desento nisinno hoti. Addasā kho devadatto
sārīputtamoggallāne dūrato va āgacchante disvāna bhikkhū
āmantesi passatha bhikkhave yāva svākkhāto mayā dhammo yepi
te samaṇassa gotamassa aggasāvakā sārīputtamoggallānā tepi
mama santike āgacchanti mama dhammaṁ rocentāti. Evaṁ vutte kokāliko
devadattaṁ etadavoca mā āvuso devadatta sārīputtamoggallānehi 2
1 Ma. Yu. bhagavato avidūre rodamāno ṭhito hotīti.
2 Ma. Yu. sārīputtamoggallāne.
Vissāsi pāpicchā sārīputtamoggallānā pāpikānaṁ icchānaṁ
vasaṁ gatāti. Alaṁ āvuso svāgataṁ tesaṁ yato me dhammaṁ
rocentīti. Athakho devadatto āyasmantaṁ sārīputtaṁ upaḍḍhāsanena
nimantesi ehāvuso sārīputta idha nisīdāhīti. Alaṁ
āvusoti kho āyasmā sārīputto aññataraṁ āsanaṁ gahetvā
ekamantaṁ nisīdi. Āyasmāpi kho mahāmoggallāno aññataraṁ
āsanaṁ gahetvā ekamantaṁ nisīdi. Athakho devadatto bahudeva
rattiṁ bhikkhū dhammiyā kathāya sandassetvā samādapetvā samuttejetvā
sampahaṁsetvā āyasmantaṁ sārīputtaṁ ajjhesi vigatathīnamiddho kho
āvuso sārīputte bhikkhusaṅgho paṭibhātu taṁ āvuso sārīputta
bhikkhūnaṁ dhammī kathā piṭṭhi me āgilāyati tamahaṁ āyamissāmīti.
Evamāvusoti kho āyasmā sārīputto devadattassa paccassosi.
Athakho devadatto catugguṇaṁ saṅghāṭiṁ paññāpetvā dakkhiṇena
passena seyyaṁ kappesi. Tassa kilantassa 1 muṭṭhassatissa asampajānassa
muhuttakeneva niddaṁ 2 okkami.

[394] Athakho āyasmā sārīputto ādesanāpāṭihāriyānusāsaniyā
bhikkhū dhammiyā kathāya ovadi anusāsi. Āyasmā mahāmoggallāno
iddhipāṭihāriyānusāsaniyā bhikkhū dhammiyā kathāya ovadi
anusāsi. Athakho tesaṁ bhikkhūnaṁ āyasmatā sārīputtena
ādesanāpāṭihāriyānusāsaniyā āyasmatā ca mahāmoggallānena
1 Ma. kilamantassa. 2 Ma. Yu. niddā.
Iddhipāṭihāriyānusāsaniyā ovadiyamānānaṁ anusāsiyamānānaṁ virajaṁ vītamalaṁ
dhammacakkhuṁ udapādi yaṅkiñci samudayadhammaṁ sabbantaṁ nirodhadhammanti.
Athakho āyasmā sārīputto bhikkhū āmantesi gacchāma mayaṁ āvuso
bhagavato santike yo tassa bhagavato dhammaṁ roceti 1 so
āgacchatūti. Athakho sārīputtamoggallānā tāni pañca bhikkhusatāni
ādāya yena veḷuvanaṁ tenupasaṅkamiṁsu. Atha kho kokāliko
devadattaṁ uṭṭhāpesi uṭṭhehi āvuso devadatta nītā te
bhikkhū sārīputtamoggallānehi nanu tvaṁ āvuso devadatta mayā
vutto mā āvuso devadatta sārīputtamoggallānehi vissāsi
pāpicchā sārīputtamoggallānā pāpikānaṁ icchānaṁ vasaṁ gatāti.
Athakho devadattassa tattheva uṇhaṁ lohitaṁ mukhato uggañchi.