[325] Tena kho pana samayena rājagahaṁ dubbhikkhaṁ hoti.
Manussā na sakkonti saṅghabhattaṁ kātuṁ icchanti uddesabhattaṁ
nimantanaṁ salākabhattaṁ pakkhikaṁ uposathikaṁ pāṭipadikaṁ kātuṁ. Bhagavato
etamatthaṁ ārocesuṁ. Anujānāmi bhikkhave saṅghabhattaṁ uddesabhattaṁ
nimantanaṁ salākabhattaṁ pakkhikaṁ uposathikaṁ pāṭipadikanti.

[326] Tena kho pana samayena chabbaggiyā bhikkhū attano
varabhattāni 1 gahetvā lāmakāni bhattāni bhikkhūnaṁ denti. Bhagavato
etamatthaṁ ārocesuṁ. Anujānāmi bhikkhave pañcahaṅgehi samannāgataṁ
bhikkhuṁ bhattuddesakaṁ sammannituṁ yo na chandāgatiṁ gaccheyya na
dosāgatiṁ gaccheyya na mohāgatiṁ gaccheyya na bhayāgatiṁ gaccheyya
uddiṭṭhānuddiṭṭhañca jāneyya.

[327] Evañca pana bhikkhave sammannitabbo. Paṭhamaṁ bhikkhu
yācitabbo. Yācitvā byattena bhikkhunā paṭibalena saṅgho
ñāpetabbo suṇātu me bhante saṅgho yadi saṅghassa pattakallaṁ
saṅgho itthannāmaṁ bhikkhuṁ bhattuddesakaṁ sammanneyya. Esā
ñatti. Suṇātu me bhante saṅgho saṅgho itthannāmaṁ bhikkhuṁ
bhattuddesakaṁ sammannati. Yassāyasmato khamati itthannāmassa bhikkhuno
bhattuddesakassa sammati so tuṇhassa yassa nakkhamati so
bhāseyya. Sammato saṅghena itthannāmo bhikkhu bhattuddesako
1 Yu. madhurabhattāni.
Khamati saṅghassa tasmā tuṇhī. Evametaṁ dhārayāmīti.

[328] Athakho bhattuddesakānaṁ bhikkhūnaṁ etadahosi kathaṁ nu
kho bhattaṁ uddisitabbanti. Bhagavato etamatthaṁ ārocesuṁ.
Anujānāmi bhikkhave salākāya vā paṭikāya 1 vā upanibandhitvā
omuñcitvā bhattaṁ 2 uddisitunti.

[329] Tena kho pana samayena saṅghassa senāsanapaññāpako
na hoti .pe. Bhaṇḍāgāriko na hoti .pe. Cīvarapaṭiggāhako
na hoti .pe. Cīvarabhājako na hoti .pe. Yāgubhājako na
hoti .pe. Phalabhājako na hoti .pe. Khajjakabhājako na
hoti. Khajjakaṁ abhājiyamānaṁ nassati. Bhagavato etamatthaṁ
ārocesuṁ. Anujānāmi bhikkhave pañcahaṅgehi samannāgataṁ bhikkhuṁ
khajjakabhājakaṁ sammannituṁ yo na chandāgatiṁ gaccheyya na dosāgatiṁ
gaccheyya na mohāgatiṁ gaccheyya na bhayāgatiṁ gaccheyya
bhājitābhājitañca jāneyya.

[330] Evañca pana bhikkhave sammannitabbo. Paṭhamaṁ bhikkhu
yācitabbo. Yācitvā byattena bhikkhunā paṭibalena saṅgho
ñāpetabbo suṇātu me bhante saṅgho yadi saṅghassa pattakallaṁ
saṅgho itthannāmaṁ bhikkhuṁ khajjakabhājakaṁ sammanneyya. Esā ñatti.
Suṇātu me bhante saṅgho saṅgho itthannāmaṁ bhikkhuṁ khajjakabhājakaṁ
1 Ma. Yu. paṭṭikāya. 2 Ma. Yu. ayaṁ pāṭho natthi.
Sammannati. Yassāyasmato khamati itthannāmassa bhikkhuno
khajjakabhājakassa sammati so tuṇhassa yassa nakkhamati so bhāseyya.
Sammato saṅghena itthannāmo bhikkhu khajjakabhājako khamati saṅghassa
tasmā tuṇhī. Evametaṁ dhārayāmīti.

[331] Tena kho pana samayena saṅghassa bhaṇḍāgāre appamattako
parikkhāro ussanno 1 hoti. Bhagavato etamatthaṁ ārocesuṁ.
Anujānāmi bhikkhave pañcahaṅgehi samannāgataṁ bhikkhuṁ appamattakavissajjakaṁ
sammannituṁ yo na chandāgatiṁ gaccheyya na dosāgatiṁ
gaccheyya na mohāgatiṁ gaccheyya na bhayāgatiṁ gaccheyya
vissajjitāvissajjitañca jāneyya.

[332] Evañca pana bhikkhave sammannitabbo. Paṭhamaṁ bhikkhu
yācitabbo. Yācitvā byattena bhikkhunā paṭibalena saṅgho
ñāpetabbo suṇātu me bhante saṅgho yadi saṅghassa pattakallaṁ
saṅgho itthannāmaṁ bhikkhuṁ appamattakavissajjakaṁ sammanneyya.
Esā ñatti. Suṇātu me bhante saṅgho saṅgho itthannāmaṁ
bhikkhuṁ appamattakavissajjakaṁ sammannati. Yassāyasmato khamati
itthannāmassa bhikkhuno appamattakavissajjakassa sammati so
tuṇhassa yassa nakkhamati so bhāseyya. Sammato saṅghena
itthannāmo bhikkhu appamattakavissajjako khamati saṅghassa tasmā
1 Ma. Yu. uppanno.
Tuṇhī. Evametaṁ dhārayāmīti.

[333] Tena appamattakavissajjakena bhikkhunā ekā 1 sūci
dātabbā. Satthakaṁ dātabbaṁ. Upāhanā dātabbā. Kāyabandhanaṁ
dātabbaṁ. Aṁsavaddhako dātabbo. Parissāvanaṁ dātabbaṁ.
Dhammakarako dātabbo. Kusi dātabbā. Aḍḍhakusi dātabbā.
Maṇḍalaṁ dātabbaṁ. Aḍḍhamaṇḍalaṁ dātabbaṁ. Anuvāto dātabbo.
Paribhaṇḍaṁ dātabbaṁ. Sace hoti saṅghassa sappi vā telaṁ vā madhu vā
phāṇitaṁ vā sakiṁ paṭisāyituṁ dātabbaṁ. Sace punapi attho hoti
punapi dātabbaṁ. Sace punapi attho hoti punapi dātabbanti 2 .

[334] Tena kho pana samayena saṅghassa sāṭiyagāhāpako na
hoti .pe. Pattagāhāpako na hoti .pe. Ārāmikapesako
na hoti .pe. Sāmaṇerapesako na hoti. Sāmaṇerā apesiyamānā
kammaṁ na karonti. Bhagavato etamatthaṁ ārocesuṁ. Anujānāmi
bhikkhave pañcahaṅgehi samannāgataṁ bhikkhuṁ sāmaṇerapesakaṁ sammannituṁ
yo na chandāgatiṁ gaccheyya na dosāgatiṁ gaccheyya na mohāgatiṁ
gaccheyya na bhayāgatiṁ gaccheyya pesitāpesitañca jāneyya.