[305] Idha pana bhikkhave bhikkhu navakammaṁ gahetvā pariyosite
pakkamati tassevetaṁ.

[306] Idha pana bhikkhave bhikkhu navakammaṁ gahetvā pariyosite
vibbhamati kālaṁ karoti sāmaṇero paṭijānāti sikkhaṁ paccakkhātako
paṭijānāti antimavatthuṁ ajjhāpannako paṭijānāti. Saṅgho sāmī.

[307] Idha pana bhikkhave bhikkhu navakammaṁ gahetvā pariyosite
ummattako paṭijānāti khittacitto paṭijānāti vedanaṭṭo paṭijānāti
āpattiyā adassane ukkhittako paṭijānāti āpattiyā appaṭikamme
ukkhittako paṭijānāti pāpikāya diṭṭhiyā appaṭinissagge ukkhittako
paṭijānāti tassevetaṁ.

[308] Idha pana bhikkhave bhikkhu navakammaṁ gahetvā pariyosite
paṇḍako paṭijānāti theyyasaṁvāsako paṭijānāti titthiyapakkantako
paṭijānāti tiracchānagato paṭijānāti mātughātako paṭijānāti
pitughātako paṭijānāti arahantaghātako paṭijānāti bhikkhunīdūsako
paṭijānāti saṅghabhedako paṭijānāti lohituppādako paṭijānāti
ubhatobyañjanako paṭijānāti. Saṅgho sāmīti.

[309] Tena kho pana samayena bhikkhū aññatarassa upāsakassa
vihāraparibhogaṁ senāsanaṁ aññatra paribhuñjanti. Athakho so
upāsako ujjhāyati khīyati vipāceti kathaṁ hi nāma bhaddantā
Aññatra paribhogaṁ aññatra paribhuñjissantīti. Bhagavato etamatthaṁ
ārocesuṁ. Na bhikkhave aññatra paribhogo aññatra
paribhuñjitabbo yo paribhuñjeyya āpatti dukkaṭassāti.

[310] Tena kho pana samayena bhikkhū uposathaggaṁpi sannisajjaṁpi
pariharituṁ 1 kukkuccāyantā chamāyaṁ nisīdanti. Gattānipi cīvarānipi
paṁsukitāni honti. Bhagavato etamatthaṁ ārocesuṁ. Anujānāmi
bhikkhave tāvakālikaṁ haritunti.

[311] Tena kho pana samayena saṅghassa mahāvihāro udriyati 2 .
Bhikkhū kukkuccāyantā senāsanaṁ nābhiharanti 3 . Bhagavato etamatthaṁ
ārocesuṁ. Anujānāmi bhikkhave guttatthāya haritunti.

[312] Tena kho pana samayena saṅghassa senāsanaparikkhāriko
mahaggho kambalo uppanno hoti. Bhagavato etamatthaṁ ārocesuṁ.
Anujānāmi bhikkhave phātikammatthāya parivattetunti.

[313] Tena kho pana samayena saṅghassa senāsanaparikkhārikaṁ
mahagghaṁ dussaṁ uppannaṁ hoti. Bhagavato etamatthaṁ ārocesuṁ.
Anujānāmi bhikkhave phātikammatthāya parivattetunti.

[314] Tena kho samayena saṅghassa acchacammaṁ uppannaṁ
hoti. Bhagavato etamatthaṁ ārocesuṁ. Anujānāmi bhikkhave
pādapuñchaniṁ kātunti.