[295] Tena kho pana samayena āḷavikā 1 bhikkhū evarūpāni
navakammāni denti piṇḍanikkhepanamattenapi navakammaṁ denti
kuḍḍalepanamattenapi navakammaṁ denti dvāraṭṭhapanamattenapi navakammaṁ
denti aggaḷavaṭṭikaraṇamattenapi navakammaṁ denti ālokasandhikaraṇamattenapi
navakammaṁ denti setavaṇṇakaraṇamattenapi navakammaṁ denti
kāḷavaṇṇakaraṇamattenapi navakammaṁ denti gerukaparikammakaraṇamattenapi
navakammaṁ denti chādanamattenapi navakammaṁ denti bandhanamattenapi
navakammaṁ denti bhaṇḍikādhānamattenapi 2 navakammaṁ denti
khaṇḍaphullapaṭisaṅkharaṇamattenapi navakammaṁ denti paribhaṇḍakaraṇamattenapi navakammaṁ
denti vīsativassikampi navakammaṁ denti tiṁsavassikampi navakammaṁ
denti yāvajīvikampi navakammaṁ denti dhūmakālikampi pariyositaṁ vihāraṁ
navakammaṁ denti. Ye te bhikkhū appicchā .pe. Te ujjhāyanti
khīyanti vipācenti kathaṁ hi nāma āḷavikā bhikkhū evarūpāni
navakammaṁ dassanti piṇḍanikkhepanamattenapi navakammaṁ dassanti
kuḍḍalepanamattenapi navakammaṁ dassanti dvāraṭṭhapanamattenapi navakammaṁ
1 Ma. Yu. āḷavakā. 2 Yu. gaṇḍikādhānamattenapi. Ma. bhaṇḍikāṭhapanamattenapi.
Dassanti aggaḷavaṭṭikaraṇamattenapi navakammaṁ dassanti ālokasandhikaraṇamattenapi
navakammaṁ dassanti setavaṇṇakaraṇamattenapi navakammaṁ
dassanti kāḷavaṇṇakaraṇamattenapi navakammaṁ dassanti gerukaparikammakaraṇamattenapi
navakammaṁ dassanti chādanamattenapi navakammaṁ
dassanti bandhanamattenapi navakammaṁ dassanti bhaṇḍikādhānamattenapi
navakammaṁ dassanti khaṇḍaphullapaṭisaṅkharaṇamattenapi navakammaṁ dassanti
paribhaṇḍakaraṇamattenapi navakammaṁ dassanti vīsativassikampi navakammaṁ
dassanti tiṁsavassikampi navakammaṁ dassanti yāvajīvikampi navakammaṁ
dassanti dhūmakālikampi pariyositaṁ vihāraṁ navakammaṁ dassantīti.
Athakho te bhikkhū bhagavato etamatthaṁ ārocesuṁ .pe. Saccaṁ
kira bhikkhave .pe. Saccaṁ bhagavāti .pe. Vigarahitvā dhammiṁ
kathaṁ katvā bhikkhū āmantesi na bhikkhave piṇḍanikkhepanamattena
navakammaṁ dātabbaṁ na kuḍḍalepanamattena navakammaṁ dātabbaṁ na
dvāraṭṭhapanamattena navakammaṁ dātabbaṁ na aggaḷavaṭṭikaraṇamattena
navakammaṁ dātabbaṁ na ālokasandhikaraṇamattena navakammaṁ dātabbaṁ
na setavaṇṇakaraṇamattena navakammaṁ dātabbaṁ na kāḷavaṇṇakaraṇamattena
navakammaṁ dātabbaṁ na gerukaparikammakaraṇamattena navakammaṁ
dātabbaṁ na chādanamattena navakammaṁ dātabbaṁ na bandhanamattena
navakammaṁ dātabbaṁ na bhaṇḍikādhānamattena navakammaṁ dātabbaṁ
na khaṇḍaphullapaṭisaṅkharaṇamattena navakammaṁ dātabbaṁ na paribhaṇḍakaraṇamattena
Navakammaṁ dātabbaṁ na vīsativassikaṁ navakammaṁ dātabbaṁ
na tiṁsavassikaṁ navakammaṁ dātabbaṁ na yāvajīvikaṁ navakammaṁ dātabbaṁ
na dhūmakālikaṁ pariyositaṁ vihāraṁ navakammaṁ dātabbaṁ yo dadeyya
āpatti dukkaṭassa anujānāmi bhikkhave akataṁ vā vihāraṁ
vippakataṁ vā navakammaṁ dātuṁ khuddake vihāre kammaṁ oloketvā
chappañcavassikaṁ navakammaṁ dātuṁ aḍḍhayoge kammaṁ oloketvā
sattaṭṭhavassikaṁ navakammaṁ dātuṁ mahallake vihāre pāsāde vā
kammaṁ oloketvā dasadvādasavassikaṁ navakammaṁ dātunti.

[296] Tena kho pana samayena bhikkhū sabbaṁ vihāraṁ 1 navakammaṁ
denti. Bhagavato etamatthaṁ ārocesuṁ. Na bhikkhave sabbe
vihāre navakammaṁ dātabbaṁ 2 yo dadeyya āpatti dukkaṭassāti.

[297] Tena kho pana samayena bhikkhū ekassa dve navakamme 3
denti. Bhagavato etamatthaṁ ārocesuṁ. Na bhikkhave ekassa
dve dātabbā yo dadeyya āpatti dukkaṭassāti.

[298] Tena kho pana samayena bhikkhū navakammaṁ gahetvā aññaṁ
vāsenti. Bhagavato etamatthaṁ ārocesuṁ. Na bhikkhave navakammaṁ
gahetvā añño vāsetabbo yo vāseyya āpatti dukkaṭassāti.

[299] Tena kho pana samayena bhikkhū navakammaṁ gahetvā
1 Ma. sabbe vihāre. 2 Yu. na bhikkhave sabbo vihāro navakammaṁ dātabbo.
3 Ma. Yu. ayaṁ pāṭho na dissati.
Saṅghikaṁ paṭibāhanti. Bhagavato etamatthaṁ ārocesuṁ. Na bhikkhave
navakammaṁ gahetvā saṅghikaṁ paṭibāhitabbaṁ yo paṭibāheyya āpatti
dukkaṭassa anujānāmi bhikkhave ekaṁ varaseyyaṁ gahetunti.

[300] Tena kho pana samayena bhikkhū nissīme ṭhitassa navakammaṁ
denti. Bhagavato etamatthaṁ ārocesuṁ. Na bhikkhave nissīme
ṭhitassa navakammaṁ dātabbaṁ yo dadeyya āpatti dukkaṭassāti.

[301] Tena kho pana samayena bhikkhū navakammaṁ gahetvā
sabbakālaṁ paṭibāhanti. Bhagavato etamatthaṁ ārocesuṁ. Na bhikkhave
navakammaṁ gahetvā sabbakālaṁ paṭibāhitabbaṁ yo paṭibāheyya
āpatti dukkaṭassa anujānāmi bhikkhave vassānaṁ temāsaṁ paṭibāhituṁ
utukālaṁ na paṭibāhitunti.

[302] Tena kho pana samayena bhikkhū navakammaṁ gahetvā
pakkamantipi vibbhamantipi kālaṁpi karonti sāmaṇerāpi paṭijānanti
sikkhaṁ paccakkhātakāpi paṭijānanti antimavatthuṁ ajjhāpannakāpi
paṭijānanti ummattakāpi paṭijānanti khittacittāpi paṭijānanti
vedanaṭṭāpi paṭijānanti āpattiyā adassane ukkhittakāpi paṭijānanti
āpattiyā appaṭikamme ukkhittakāpi paṭijānanti pāpikāya diṭṭhiyā
appaṭinissagge ukkhittakāpi paṭijānanti paṇḍakāpi paṭijānanti
theyyasaṁvāsakāpi paṭijānanti titthiyapakkantakāpi paṭijānanti
tiracchānagatāpi paṭijānanti mātughātakāpi paṭijānanti pitughātakāpi
Paṭijānanti arahantaghātakāpi paṭijānanti bhikkhunīdūsakāpi paṭijānanti
saṅghabhedakāpi paṭijānanti lohituppādakāpi paṭijānanti
ubhatobyañjanakāpi paṭijānanti. Bhagavato etamatthaṁ ārocesuṁ.

[303] Idha pana bhikkhave bhikkhu navakammaṁ gahetvā pakkamati.
Mā saṅghassa hāyīti aññassa dātabbaṁ. Idha pana bhikkhave
bhikkhu navakammaṁ gahetvā vibbhamati kālaṁ karoti sāmaṇero paṭijānāti
sikkhaṁ paccakkhātako paṭijānāti antimavatthuṁ ajjhāpannako paṭijānāti
ummattako paṭijānāti khittacitto paṭijānāti vedanaṭṭo
paṭijānāti āpattiyā adassane ukkhittako paṭijānāti āpattiyā
appaṭikamme ukkhittako paṭijānāti pāpikāya diṭṭhiyā appaṭinissagge
ukkhittako paṭijānāti paṇḍako paṭijānāti theyyasaṁvāsako
paṭijānāti titthiyapakkantako paṭijānāti tiracchānagato paṭijānāti
mātughātako paṭijānāti pitughātako paṭijānāti arahantaghātako
paṭijānāti bhikkhunīdūsako paṭijānāti saṅghabhedako paṭijānāti
lohituppādako paṭijānāti ubhatobyañjanako paṭijānāti. Mā
saṅghassa hāyīti aññassa dātabbaṁ.

[304] Idha pana bhikkhave bhikkhu navakammaṁ gahetvā vippakate
pakkamati. Mā saṅghassa hāyīti aññassa dātabbaṁ. Idha pana
bhikkhave bhikkhu navakammaṁ gahetvā vippakate vibbhamati. Kālaṁ
karoti .pe. Ubhatobyañjanako paṭijānāti. Mā saṅghassa
Hāyīti aññassa dātabbaṁ.