[285] Tena kho pana samayena bahū bhikkhū āyasmato upālissa
santike ṭhitakā va uddesaṁ paṭimānentā kilamanti. Bhagavato
etamatthaṁ ārocesuṁ. Anujānāmi bhikkhave samānāsanikehi saha
nisīditunti.

[286] Athakho bhikkhūnaṁ etadahosi kittāvatā nu kho
samānāsaniko hotīti. Bhagavato etamatthaṁ ārocesuṁ. Anujānāmi
bhikkhave tivassantarena saha nisīditunti.

[287] Tena kho pana samayena sambahulā bhikkhū 6 samānāsanikā
ekamañce 7 nisīditvā mañcaṁ bhindiṁsu. Ekapīṭhe 8 nisīditvā pīṭhaṁ
bhindiṁsu. Bhagavato etamatthaṁ ārocesuṁ. Anujānāmi bhikkhave
1 Yu. vasaddo na dissati. 2 Ma. Yu. tattha. 3 Ma. kilamati. 4 Ma. Yu. uttare.
5 Ma. Yu. nīcatare. 6 Yu. bhikkhūti na dissati. 7 Ma. Yu. mañce. 8 Ma. Yu. pīṭhe.
Tivaggassa mañcaṁ tivaggassa pīṭhanti. Tivaggopi mañce nisīditvā
mañcaṁ bhindi. Pīṭhe nisīditvā piṭhaṁ bhindi. Te bhikkhū bhagavato
etamatthaṁ ārocesuṁ. Anujānāmi bhikkhave duvaggassa mañcaṁ
duvaggassa pīṭhanti.

[288] Tena kho pana samayena bhikkhū asamānāsanikehi saha
dīghāsane nisīdituṁ kukkuccāyanti. Bhagavato etamatthaṁ ārocesuṁ.
Anujānāmi bhikkhave ṭhapetvā paṇḍakaṁ mātugāmaṁ ubhatobyañjanaṁ
asamānāsanikehi saha dīghāsane nisīditunti.

[289] Athakho bhikkhūnaṁ etadahosi kittakaṁ pacchimaṁ 1 nu kho
dīghāsanaṁ hotīti .pe. Anujānāmi bhikkhave yaṁ tiṇṇannaṁ 2
pahoti ettakaṁ pacchimaṁ 3 dīghāsananti.

[290] Tena kho pana samayena visākhā migāramātā saṅghassa
atthāya sālindaṁ pāsādaṁ kārāpetukāmā hoti hatthinakhakaṁ.
Athakho bhikkhūnaṁ etadahosi kinnu kho bhagavatā pāsādaparibhogo
anuññāto kiṁ ananuññātoti. Bhagavato etamatthaṁ ārocesuṁ.
Anujānāmi bhikkhave sabbaṁ pāsādaparibhoganti.

[291] Tena kho pana samayena rañño pasenadissa kosalassa
ayyikā 4 kālakatā hoti. Tassā kālakiriyāya saṅghassa bahuṁ
akappiyabhaṇḍaṁ uppannaṁ hoti seyyathīdaṁ āsandi pallaṅko
1 Yu. kittakapacchimaṁ. 2 Ma. Yu. tiṇṇaṁ. 3 Yu. ettakapacchimaṁ. 4 Yu. ayyakā.
Goṇako cittakā paṭikā paṭalikā tūlikā vikaṭikā uddhalomī
ekantalomī kaṭissaṁ koseyyaṁ kuttakaṁ hatthattharaṁ assattharaṁ rathattharaṁ
ajinappaveṇi kadalimigapavarapaccattharaṇaṁ sauttaracchadaṁ ubhatolohitakupadhānaṁ.
Bhagavato etamatthaṁ ārocesuṁ. Anujānāmi bhikkhave
āsandiyā pāde chinditvā paribhuñjituṁ pallaṅkassa vāḷe bhinditvā
paribhuñjituṁ tūlikaṁ vijaṭetvā bimbohanaṁ kātuṁ avasesaṁ bhummattharaṇaṁ
kātunti.

[292] Tena kho pana samayena sāvatthiyā avidūre aññatarasmiṁ
gāmakāvāse āvāsikā bhikkhū upaddutā honti āgantukagamikānaṁ
bhikkhūnaṁ senāsanaṁ paññāpentā. Athakho tesaṁ bhikkhūnaṁ etadahosi
etarahi kho mayaṁ āvuso upaddutā āgantukagamikānaṁ bhikkhūnaṁ
senāsanaṁ paññāpentā handa mayaṁ āvuso sabbaṁ saṅghikaṁ senāsanaṁ
ekassa dema tassa santakaṁ paribhuñjissāmāti. Te sabbaṁ 1
saṅghikaṁ senāsanaṁ ekassa adaṁsu. Āgantukā 2 te āvāsike 3
bhikkhū etadavocuṁ amhākaṁ āvuso senāsanaṁ paññāpethāti.
Natthāvuso saṅghikaṁ senāsanaṁ sabbaṁ amhehi ekassa dinnanti. Kiṁ
pana tumhe āvuso saṅghikaṁ senāsanaṁ vissajjethāti. Evamāvusoti.
Ye te bhikkhū appicchā .pe. Te ujjhāyanti khīyanti vipācenti
kathaṁ hi nāma bhikkhū saṅghikaṁ senāsanaṁ vissajjessantīti. Bhagavato
1 Yu. sabbaṁpi. 2 Ma. Yu. āgantukā bhikkhū. 3 Ma. Yu. ayaṁ pāṭho na dissati.
Etamatthaṁ ārocesuṁ. Saccaṁ kira bhikkhave bhikkhū saṅghikaṁ senāsanaṁ
vissajjentīti. Saccaṁ bhagavāti. Vigarahi buddho bhagavā kathaṁ
hi nāma te bhikkhave moghapurisā saṅghikaṁ senāsanaṁ vissajjessanti
netaṁ bhikkhave appasannānaṁ vā pasādāya .pe. Vigarahitvā
dhammiṁ kathaṁ katvā bhikkhū āmantesi pañcimāni bhikkhave avissajjiyāni
na vissajjetabbāni saṅghena vā gaṇena vā puggalena vā
vissajjitānipi avissajjitāni honti yo vissajjeyya āpatti
thullaccayassa. Katamāni pañca. Ārāmo ārāmavatthu idaṁ paṭhamaṁ
avissajjiyaṁ na vissajjetabbaṁ saṅghena vā gaṇena vā puggalena
vā vissajjitampi avissajjitaṁ hoti yo vissajjeyya āpatti
thullaccayassa vihāro vihāravatthu idaṁ dutiyaṁ avissajjiyaṁ na
vissajjetabbaṁ saṅghena vā gaṇena vā puggalena vā vissajjitampi
avissajjitaṁ hoti yo vissajjeyya āpatti thullaccayassa
mañco pīṭhaṁ bhisī 1 bimbohanaṁ idaṁ tatiyaṁ avissajjiyaṁ na vissajjetabbaṁ
saṅghena vā gaṇena vā puggalena vā vissajjitampi avissajjitaṁ
hoti yo vissajjeyya āpatti thullaccayassa lohakumbhī
lohabhāṇakaṁ lohavārako lohakaṭāhaṁ vāsī pharasu kuṭhārī kuddālo
nikhādanaṁ idaṁ catutthaṁ avissajjiyaṁ na vissajjetabbaṁ saṅghena vā
gaṇena vā puggalena vā vissajjitampi avissajjitaṁ hoti
yo vissajjeyya āpatti thullaccayassa vallī veḷu muñjaṁ
1 Ma. bhisi.
Pabbajaṁ 1 tiṇaṁ mattikā dārubhaṇḍaṁ mattikābhaṇḍaṁ idaṁ pañcamaṁ
avissajjiyaṁ na vissajjetabbaṁ saṅghena vā gaṇena vā puggalena vā
vissajjitampi avissajjitaṁ hoti yo vissajjeyya āpatti
thullaccayassa imāni kho bhikkhave pañca avissajjiyāni na vissajjetabbāni
saṅghena vā gaṇena vā puggalena vā vissajjitānipi
avissajjitāni honti yo vissajjeyya āpatti thullaccayassāti.

[293] Athakho bhagavā sāvatthiyaṁ yathābhirantaṁ viharitvā yena
kiṭāgiri tena cārikaṁ pakkāmi mahatā bhikkhusaṅghena saddhiṁ
pañcamattehi bhikkhusatehi sārīputtamoggallānehi ca. Assosuṁ
kho assajipunabbasukā bhikkhū bhagavā kira kiṭāgiriṁ āgacchati
mahatā bhikkhusaṅghena saddhiṁ pañcamattehi bhikkhusatehi sārīputtamoggallānehi
ca handa mayaṁ āvuso sabbaṁ saṅghikaṁ senāsanaṁ bhājema
pāpicchā sārīputtamoggallānā pāpikānaṁ icchānaṁ vasaṁ gatā
na mayaṁ tesaṁ senāsanaṁ paññāpessāmāti. Te sabbaṁ saṅghikaṁ
senāsanaṁ bhājesuṁ. Athakho bhagavā anupubbena cārikañcaramāno
yena kiṭāgiri tadavasari. Athakho bhagavā sambahule bhikkhū
āmantesi gacchatha tumhe bhikkhave assajipunabbasuke bhikkhū
upasaṅkamitvā evaṁ vadetha bhagavā āvuso āgacchati mahatā
bhikkhusaṅghena saddhiṁ pañcamattehi bhikkhusatehi sārīputtamoggallānehi
1 Yu. muñjapabbajaṁ.
Ca bhagavato ca āvuso senāsanaṁ paññāpetha bhikkhusaṅghassa ca
sārīputtamoggallānānañcāti. Evambhanteti kho te bhikkhū
bhagavato paṭissutvā yena assajipunabbasukā bhikkhū tenupasaṅkamiṁsu
upasaṅkamitvā assajipunabbasuke bhikkhū etadavocuṁ bhagavā āvuso
āgacchati mahatā bhikkhusaṅghena saddhiṁ pañcamattehi bhikkhusatehi
sārīputtamoggallānehi ca bhagavato ca āvuso senāsanaṁ paññāpetha
bhikkhusaṅghassa ca sārīputtamoggallānānañcāti. Natthāvuso saṅghikaṁ
senāsanaṁ sabbaṁ amhehi bhājitaṁ svāgataṁ āvuso bhagavato
yasmiṁ vihāre bhagavā icchissati tasmiṁ vihāre vasissati pāpicchā
sārīputtamoggallānā pāpikānaṁ icchānaṁ vasaṁ gatā na mayaṁ tesaṁ
senāsanaṁ paññāpessāmāti. Kimpana tumhe āvuso saṅghikaṁ
senāsanaṁ bhājitthāti. Evamāvusoti. Ye te bhikkhū appicchā
.pe. Te ujjhāyanti khīyanti vipācenti kathaṁ hi nāma
assajipunabbasukā bhikkhū saṅghikaṁ senāsanaṁ bhājessantīti. Athakho
te bhikkhū bhagavato etamatthaṁ ārocesuṁ .pe. Saccaṁ kira
bhikkhave assajipunabbasukā bhikkhū saṅghikaṁ senāsanaṁ bhājentīti.
Saccaṁ bhagavāti. Kathaṁ hi nāma te bhikkhave moghapurisā saṅghikaṁ
senāsanaṁ bhājessanti netaṁ bhikkhave appasannānaṁ vā pasādāya
.pe. Vigarahitvā dhammiṁ kathaṁ katvā bhikkhū āmantesi pañcimāni
bhikkhave avebhaṅgiyāni na vibhajitabbāni saṅghena vā gaṇena vā
Puggalena vā vibhattānipi avibhattāni honti yo vibhajeyya
āpatti thullaccayassa. Katamāni pañca. Ārāmo ārāmavatthu
idaṁ paṭhamaṁ avebhaṅgiyaṁ na vibhajitabbaṁ saṅghena vā gaṇena vā
puggalena vā vibhattampi avibhattaṁ hoti yo vibhajeyya
āpatti thullaccayassa vihāro vihāravatthu idaṁ dutiyaṁ avebhaṅgiyaṁ
na vibhajitabbaṁ saṅghena vā gaṇena vā puggalena vā vibhattampi
avibhattaṁ hoti yo vibhajeyya āpatti thullaccayassa mañco
pīṭhaṁ bhisī bimbohanaṁ idaṁ tatiyaṁ avebhaṅgiyaṁ na vibhajitabbaṁ saṅghena
vā gaṇena vā puggalena vā vibhattampi avibhattaṁ hoti yo
vibhajeyya āpatti thullaccayassa lohakumbhī lohabhāṇakaṁ lohavārako
lohakaṭāhaṁ vāsī pharasu kuṭhārī kuddālo nikhādanaṁ idaṁ catutthaṁ
avebhaṅgiyaṁ na vibhajitabbaṁ saṅghena vā gaṇena vā puggalena
vā vibhattampi avibhattaṁ hoti yo vibhajeyya āpatti
thullaccayassa vallī veḷu muñjaṁ pabbajaṁ tiṇaṁ mattikā dārubhaṇḍaṁ
mattikābhaṇḍaṁ idaṁ pañcamaṁ avebhaṅgiyaṁ na vibhajitabbaṁ saṅghena
vā gaṇena vā puggalena vā vibhattampi avibhattaṁ hoti
yo vibhajeyya āpatti thullaccayassa imāni kho bhikkhave
pañca avebhaṅgiyāni na vibhajitabbāni saṅghena vā gaṇena vā
puggalena vā vibhattānipi avibhattāni honti yo vibhajeyya
āpatti thullaccayassāti.

[294] Athakho bhagavā kiṭāgirismiṁ yathābhirantaṁ viharitvā yena
āḷavī tena cārikaṁ pakkāmi anupubbena cārikañcaramāno
yena āḷavī tadavasari. Tatra sudaṁ bhagavā āḷaviyaṁ viharati
aggāḷave cetiye.