[125] Tena kho pana samayena bhikkhū dhotapādakaṁ akkamituṁ
kukkuccāyanti. Bhagavato etamatthaṁ ārocesuṁ. Anujānāmi
bhikkhave dhotapādakaṁ akkamitunti.
Dutiyabhāṇavāraṁ 1 .

[126] Athakho bhagavā bhaggesu yathābhirantaṁ viharitvā yena
sāvatthī tena cārikaṁ pakkāmi anupubbena cārikañcaramāno
yena sāvatthī tadavasari. Tatra sudaṁ bhagavā sāvatthiyaṁ viharati
jetavane anāthapiṇḍikassa ārāme. Athakho visākhā migāramātā
ghaṭakañca katakañca sammajjaniñca ādāya yena bhagavā tenupasaṅkami
upasaṅkamitvā bhagavantaṁ abhivādetvā ekamantaṁ nisīdi.
Ekamantaṁ nisinnā kho visākhā migāramātā bhagavantaṁ etadavoca
paṭiggaṇhātu me bhante bhagavā ghaṭakañca katakañca sammajjaniñca
1 Ma. dutiyabhāṇavāro niṭaṭhito.
Yaṁ mama assa dīgharattaṁ hitāya sukhāyāti. Paṭiggahesi bhagavā
ghaṭakañca sammajjaniñca. Na bhagavā katakaṁ paṭiggahesi. Athakho
bhagavā visākhaṁ migāramātaraṁ dhammiyā kathāya sandassesi samādapesi
samuttejesi sampahaṁsesi. Athakho visākhā migāramātā bhagavatā
dhammiyā kathāya sandassitā samādapitā samuttejitā sampahaṁsitā
uṭṭhāyāsanā bhagavantaṁ abhivādetvā padakkhiṇaṁ katvā pakkāmi.

[127] Athakho bhagavā etasmiṁ nidāne etasmiṁ pakaraṇe
dhammiṁ kathaṁ katvā bhikkhū āmantesi anujānāmi bhikkhave ghaṭakañca
sammajjaniñca na bhikkhave katakaṁ paribhuñjitabbaṁ yo paribhuñjeyya
āpatti dukkaṭassa anujānāmi bhikkhave tisso pādaghaṁsaniyo
sakkharaṁ kaṭhalaṁ samuddapheṇakanti.

[128] Athakho visākhā migāramātā vidhūpanañca tālavaṇṭañca
ādāya yena bhagavā tenupasaṅkami upasaṅkamitvā bhagavantaṁ
abhivādetvā ekamantaṁ nisīdi. Ekamantaṁ nisinnā kho visākhā
migāramātā bhagavantaṁ etadavoca paṭiggaṇhātu me bhante
bhagavā vidhūpanañca tālavaṇṭañca yaṁ mama assa dīgharattaṁ hitāya
sukhāyāti. Paṭiggahesi bhagavā vidhūpanañca tālavaṇṭañca. Athakho
bhagavā visākhaṁ migāramātaraṁ dhammiyā kathāya sandassesi .pe.
Padakkhiṇaṁ katvā pakkāmi.

[129] Athakho bhagavā etasmiṁ nidāne etasmiṁ pakaraṇe
Dhammiṁ kathaṁ katvā bhikkhū āmantesi anujānāmi bhikkhave vidhūpanañca
tālavaṇṭañcāti.

[130] Tena kho pana samayena saṅghassa makasavījanī uppannā
hoti. Bhagavato etamatthaṁ ārocesuṁ. Anujānāmi bhikkhave
makasavījaninti. Cāmarivījanī 1 uppannā hoti. Bhagavato etamatthaṁ
ārocesuṁ. Na bhikkhave cāmarivījanī 1 dhāretabbā yo dhāreyya
āpatti dukkaṭassa anujānāmi bhikkhave tisso vījaniyo vākamayaṁ
usiramayaṁ morapiñchamayanti.

[131] Tena kho pana samayena saṅghassa chattaṁ uppannaṁ hoti.
Bhagavato etamatthaṁ ārocesuṁ. Anujānāmi bhikkhave chattanti.

[132] Tena kho pana samayena chabbaggiyā bhikkhū chattapaggahitā 2
āhiṇḍanti. Tena kho pana samayena aññataro upāsako
sambahulehi ājīvakasāvakehi saddhiṁ uyyānaṁ agamāsi. Addasaṁsu kho 3
te ājīvakasāvakā chabbaggiye bhikkhū dūrato va chattapaggahite
āgacchante disvāna taṁ upāsakaṁ etadavocuṁ ete kho ayyā 4
tumhākaṁ bhaddantā chattapaggahitā āgacchanti seyyathāpi gaṇakamahāmattāti.
Na ayyā 5 ete bhikkhū paribbājakāti. Bhikkhū
na bhikkhūti abbhutaṁ akaṁsu. Athakho so upāsako upagato 6
sañjānitvā ujjhāyati khīyati vipāceti kathaṁ hi nāma bhaddantā
1 Yu. camaravījanī. 2 Yu. chattaṁ paggahetvā. 3 Ma. Yu. addasāsuṁ kho.
4 Ma. Yu. ayyo. 5 Ma. nāyyā. Yu. nāyayo. 6 Ma. Yu. gupagate
Chattapaggahitā āhiṇḍissantīti. Assosuṁ kho bhikkhū tassa
upāsakassa ujjhāyantassa khīyantassa vipācentassa. Athakho
te bhikkhū bhagavato etamatthaṁ ārocesuṁ. Saccaṁ kira bhikkhave
.pe. Saccaṁ bhagavāti .pe. Vigarahitvā dhammiṁ kathaṁ katvā
bhikkhū āmantesi na bhikkhave chattaṁ dhāretabbaṁ yo dhāreyya
āpatti dukkaṭassāti.

[133] Tena kho pana samayena aññataro bhikkhu gilāno
hoti. Tassa vinā chattaṁ phāsu na hoti 1 . Bhagavato etamatthaṁ
ārocesuṁ. Anujānāmi bhikkhave gilānassa chattanti 2 .

[134] Tena kho pana samayena bhikkhū gilānasseva bhagavatā
chattaṁ anuññātaṁ no agilānassāti ārāme ārāmūpacāre
chattaṁ dhāretuṁ kukkuccāyanti. Bhagavato etamatthaṁ ārocesuṁ
.pe. Anujānāmi bhikkhave agilānenapi 3 bhikkhunā 4 ārāme
ārāmūpacāre chattaṁ dhāretunti.