[105] Tena kho pana samayena manussā gandhampi mālampi
ādāya ārāmaṁ āgacchanti. Bhikkhū kukkuccāyantā na
paṭiggaṇhanti. Bhagavato etamatthaṁ ārocesuṁ. Anujānāmi bhikkhave
gandhaṁ gahetvā kavāṭe pañcaṅgulikaṁ dātuṁ pupphaṁ gahetvā
vihāre ekamantaṁ nikkhipitunti.

[106] Tena kho pana samayena saṅghassa namatakaṁ uppannaṁ
hoti. Bhagavato etamatthaṁ ārocesuṁ. Anujānāmi bhikkhave
namatakanti. Athakho bhikkhūnaṁ etadahosi namatakaṁ adhiṭṭhātabbaṁ nu kho
udāhu vikappetabbanti .pe. Na bhikkhave namatakaṁ adhiṭṭhātabbaṁ
na vikappetabbanti.

[107] Tena kho pana samayena chabbaggiyā bhikkhū āsittakupadhāne
bhuñjanti. Manussā ujjhāyanti khīyanti vipācenti .pe.
Seyyathāpi gihī kāmabhoginoti. Bhagavato etamatthaṁ ārocesuṁ.
Na bhikkhave āsittakupadhāne bhuñjitabbaṁ yo bhuñjeyya āpatti
dukkaṭassāti.

[108] Tena kho pana samayena aññataro bhikkhu gilāno
hoti. So bhuñjamāno na sakkoti hatthena pattaṁ sandhāretuṁ.
Bhagavato etamatthaṁ ārocesuṁ. Anujānāmi bhikkhave maḷorikanti.

[109] Tena kho pana samayena chabbaggiyā bhikkhū ekabhājanepi
Bhuñjanti. Ekathālakepi pivanti. Ekamañcepi tuvaṭṭenti.
Ekattharaṇepi tuvaṭṭenti. Ekapāvuraṇepi tuvaṭṭenti. Ekattharaṇapāvuraṇepi
tuvaṭṭenti 1 . Manussā ujjhāyanti khīyanti vipācenti .pe.
Seyyathāpi gihī kāmabhoginoti .pe. Bhagavato etamatthaṁ
ārocesuṁ .pe. Na bhikkhave ekabhājane bhuñjitabbaṁ na
ekathālake pātabbaṁ na ekamañce tuvaṭṭitabbaṁ na ekattharaṇe
tuvaṭṭitabbaṁ na ekapāvuraṇe tuvaṭṭitabbaṁ na ekattharaṇapāvuraṇe
tuvaṭṭitabbaṁ 2 yo tuvaṭṭeyya āpatti dukkaṭassāti.

[110] Tena kho pana samayena vaḍḍho licchavi mettiyabhummajakānaṁ
bhikkhūnaṁ sahāyo hoti. Athakho vaḍḍho licchavi 3 yena mettiyabhummajakā
bhikkhū tenupasaṅkami upasaṅkamitvā mettiyabhummajake
bhikkhū etadavoca vandāmi ayyāti. Evaṁ vutte mettiyabhummajakā
bhikkhū nālapiṁsu. Dutiyampi kho vaḍḍho licchavi 3 mettiyabhummajake
bhikkhū etadavoca vandāmi ayyāti. Dutiyampi kho mettiyabhummajakā
bhikkhū nālapiṁsu. Tatiyampi kho vaḍḍho licchavi mettiyabhummajake
bhikkhū etadavoca vandāmi ayyāti. Tatiyampi kho
1 Ma. Yu. ekattharaṇāpi tuvaṭṭenti. ekapāvuraṇāpi tuvaṭṭenti.
ekattharaṇapāvuraṇāpi tuvaṭṭenti. 2 Ma. Yu. na ekattharaṇā tuvaṭṭitabbaṁ.
na ekapāvuraṇā tuvaṭṭitabbaṁ. na ekattharaṇapāvuraṇā tuvaṭṭitabbaṁ.
3 Ma. licchavī. evamupari.
Mettiyabhummajakā bhikkhū nālapiṁsu. Kyāhaṁ ayyānaṁ aparajjhāmi
kissa maṁ ayyā nālapantīti. Tathā hi pana tvaṁ āvuso vaḍḍha
amhe dabbena mallaputtena viheṭhiyamāne ajjhupekkhasīti. Kyāhaṁ
ayyā karomīti. Sace kho tvaṁ āvuso vaḍḍha iccheyyāsi
ajjeva bhagavā āyasmantaṁ dabbaṁ mallaputtaṁ nāsāpeyyāti. Kyāhaṁ
ayyā karomi kiṁ mayā sakkā kātunti. Ehi tvaṁ āvuso
vaḍḍha yena bhagavā tenupasaṅkami upasaṅkamitvā bhagavantaṁ
evaṁ vadehi idaṁ bhante nacchannaṁ nappaṭirūpaṁ yāyaṁ bhante
disā abhayā anītikā anupaddavā sāyaṁ disā sabhayā saītikā
saupaddavā yato nīvātaṁ tato pavātaṁ udakaṁ maññe ādittaṁ
ayyena me dabbena mallaputtena pajāpati dūsitāti. Evaṁ
ayyāti kho vaḍḍho licchavi mettiyabhummajakānaṁ bhikkhūnaṁ paṭissutvā
yena bhagavā tenupasaṅkami upasaṅkamitvā bhagavantaṁ abhivādetvā
ekamantaṁ nisīdi. Ekamantaṁ nisinno kho vaḍḍho licchavi bhagavantaṁ
etadavoca idaṁ bhante nacchannaṁ nappaṭirūpaṁ yāyaṁ bhante disā
abhayā anītikā anupaddavā sāyaṁ disā sabhayā saītikā saupaddavā
yato nīvātaṁ tato pavātaṁ udakaṁ maññe ādittaṁ ayyena
me dabbena mallaputtena pajāpati dūsitāti.

[111] Athakho bhagavā etasmiṁ nidāne etasmiṁ pakaraṇe
bhikkhusaṅghaṁ sannipātāpetvā āyasmantaṁ dabbaṁ mallaputtaṁ paṭipucchi
Sarasi tvaṁ dabba evarūpaṁ kattā yathāyaṁ vaḍḍho āhāti.
Yathā maṁ bhante bhagavā jānātīti. Dutiyampi kho bhagavā .pe.
Tatiyampi kho bhagavā āyasmantaṁ dabbaṁ mallaputtaṁ etadavoca
sarasi tvaṁ dabba evarūpaṁ kattā yathāyaṁ vaḍḍho āhāti.
Yathā maṁ bhante bhagavā jānātīti. Na kho dabba dabbā evaṁ
nibbeṭhenti sace tayā kataṁ katanti vadehi sace akataṁ
akatanti vadehīti. Yatohaṁ 1 bhante jāto nābhijānāmi supinantenapi
methunaṁ dhammaṁ paṭisevitā pageva jāgaroti.

[112] Athakho bhagavā bhikkhū āmantesi tenahi bhikkhave
saṅgho vaḍḍhassa licchavissa pattaṁ nikkujjatu asambhogaṁ saṅghena
karotu.

[113] Aṭṭhahi bhikkhave aṅgehi samannāgatassa upāsakassa
patto nikkujjitabbo bhikkhūnaṁ alābhāya parisakkati bhikkhūnaṁ
anatthāya parisakkati bhikkhūnaṁ anāvāsāya 2 parisakkati bhikkhū
akkosati paribhāsati bhikkhū bhikkhūhi bhedeti buddhassa avaṇṇaṁ
bhāsati dhammassa avaṇṇaṁ bhāsati saṅghassa avaṇṇaṁ bhāsati
anujānāmi bhikkhave imehi aṭṭhahaṅgehi samannāgatassa upāsakassa
pattaṁ nikkujjituṁ.

[114] Evañca pana bhikkhave nikkujjitabbo. Byattena
1 Ma. yato ahaṁ. 2 Ma. Yu. avāsāya.
Bhikkhunā paṭibalena saṅgho ñāpetabbo suṇātu me bhante
saṅgho vaḍḍho licchavi āyasmantaṁ dabbaṁ mallaputtaṁ amūlikāya
sīlavipattiyā anuddhaṁseti yadi saṅghassa pattakallaṁ saṅgho
vaḍḍhassa licchavissa pattaṁ nikkujjeyya asambhogaṁ saṅghena kareyya.
Esā ñatti. Suṇātu me bhante saṅgho vaḍḍho licchavi
āyasmantaṁ dabbaṁ mallaputtaṁ amūlikāya sīlavipattiyā anuddhaṁseti.
Saṅgho vaḍḍhassa licchavissa pattaṁ nikkujjati asambhogaṁ saṅghena
karoti. Yassāyasmato khamati vaḍḍhassa licchavissa pattassa
nikkujjanā asambhogaṁ saṅghena karaṇaṁ so tuṇhassa yassa
nakkhamati so bhāseyya. Nikkujjito saṅghena vaḍḍhassa licchavissa
patto asambhogo saṅghena khamati saṅghassa tasmā tuṇhī.
Evametaṁ dhārayāmīti 1 .