[35] Tena kho pana samayena pattamūlaṁ ghaṁsiyati. Bhagavato
etamatthaṁ ārocesuṁ. Anujānāmi bhikkhave pattamaṇḍalanti.

[36] Tena kho pana samayena chabbaggiyā bhikkhū uccāvacāni
pattamaṇḍalāni dhārenti sovaṇṇamayaṁ rūpiyamayaṁ. Manussā ujjhāyanti
khīyanti vipācenti .pe. Seyyathāpi gihī kāmabhoginoti .pe.
Bhagavato etamatthaṁ ārocesuṁ .pe. Na bhikkhave uccāvacāni
pattamaṇḍalāni dhāretabbāni yo dhāreyya āpatti dukkaṭassa
anujānāmi bhikkhave dve pattamaṇḍalāni tipumayaṁ sīsamayanti.
Bahalāni pattamaṇḍalāni 1 na acchupiyanti. Bhagavato etamatthaṁ
ārocesuṁ. Anujānāmi bhikkhave likhitunti. Valī 2 honti .pe.
Anujānāmi bhikkhave makaradantakaṁ chinditunti.

[37] Tena kho pana samayena chabbaggiyā bhikkhū citrāni
pattamaṇḍalāni dhārenti rūpakākiṇṇāni bhittikammakatāni 3 tāni
rathikāyapi dassentā āhiṇḍanti. Manussā ujjhāyanti khīyanti
vipācenti .pe. Seyyathāpi gihī kāmabhoginoti. Bhagavato
1 Ma. Yu. maṇḍalāni. 2 Yu. valiṁ. 3 Yu. rūpakokiṇṇāni bhatikammakatāni.
Etamatthaṁ ārocesuṁ. Na bhikkhave citrāni pattamaṇḍalāni
dhāretabbāni rūpakākiṇṇāni bhittikammakatāni yo dhāreyya
āpatti dukkaṭassa anujānāmi bhikkhave pakatimaṇḍalanti.

[38] Tena kho pana samayena bhikkhū sodakaṁ 1 pattaṁ paṭisāmenti.
Patto dussati. Bhagavato etamatthaṁ ārocesuṁ .pe. Na bhikkhave
sodako 1 patto paṭisāmetabbo yo paṭisāmeyya āpatti
dukkaṭassa anujānāmi bhikkhave otāpetvā pattaṁ paṭisāmetunti.

[39] Tena kho pana samayena bhikkhū saudakaṁ pattaṁ otāpenti.
Patto duggandho hoti. Bhagavato etamatthaṁ ārocesuṁ .pe.
Na bhikkhave saudako patto otāpetabbo yo otāpeyya
āpatti dukkaṭassa anujānāmi bhikkhave nirudakaṁ 2 katvā
otāpetvā pattaṁ paṭisāmetunti.

[40] Tena kho pana samayena bhikkhū uṇhe pattaṁ nidahanti.
Pattassa vaṇṇo dussati. Bhagavato etamatthaṁ ārocesuṁ. Na
bhikkhave uṇhe patto nidahitabbo yo nidaheyya āpatti
dukkaṭassa anujānāmi bhikkhave muhuttaṁ uṇhe otāpetvā
pattaṁ paṭisāmetunti.

[41] Tena kho pana samayena sambahulā pattā ajjhokāse
anādhārā nikkhittā honti. Vātamaṇḍalikāya āvaṭṭitvā 3 pattā
1 Yu. saudako. 2 Ma. Yu. vodakaṁ. 3 Ma. āvaṭṭetvā.
Bhijjiṁsu. Bhagavato etamatthaṁ ārocesuṁ .pe. Anujānāmi bhikkhave
pattādhārakanti.

[42] Tena kho pana samayena bhikkhū miḍhante pattaṁ nikkhipanti.
Parivaṭṭitvā patto bhijjati. Bhagavato etamatthaṁ ārocesuṁ
.pe. Na bhikkhave miḍhante patto nikkhipitabbo yo nikkhipeyya
āpatti dukkaṭassāti.

[43] Tena kho pana samayena bhikkhū paribhaṇḍante pattaṁ
nikkhipanti. Parivaṭṭitvā 1 patto bhijjati. Bhagavato etamatthaṁ
ārocesuṁ .pe. Na bhikkhave paribhaṇḍante patto nikkhipitabbo
yo nikkhipeyya āpatti dukkaṭassāti.

[44] Tena kho pana samayena bhikkhū chamāyaṁ 2 pattaṁ nikkujjanti.
Oṭṭho ghaṁsiyati. Bhagavato etamatthaṁ ārocesuṁ .pe. Anujānāmi
bhikkhave tiṇasanthārakanti. Tiṇasanthārako upacikāhi khajjati.
Bhagavato etamatthaṁ ārocesuṁ .pe. Anujānāmi bhikkhave coḷakanti.
Coḷakaṁ upacikāhi khajjati. Bhagavato etamatthaṁ ārocesuṁ .pe.
Anujānāmi bhikkhave pattamāḷakanti. Pattamāḷakā paripatitvā
patto bhijjati. Bhagavato etamatthaṁ ārocesuṁ .pe. Anujānāmi
bhikkhave pattakuṇḍolikanti. Pattakuṇḍolikāya patto ugghaṁsiyati 3 .
Bhagavato etamatthaṁ ārocesuṁ .pe. Anujānāmi bhikkhave
1 Ma. Yu. paripatitvā. 2 Ma. Yu. chamāya. 3 Ma. Yu. ghaṁsiyati.
Pattatthavikanti. Aṁsavaddhako na hoti. Bhagavato etamatthaṁ
ārocesuṁ .pe. Anujānāmi bhikkhave aṁsavaddhakaṁ bandhanasuttakanti.