[1867] Atthi gabbhaseyyāya dhammābhisamayoti. Āmantā.
Suttassa pamattassa muṭṭhassatissa asampajānassa dhammābhisamayoti.
Na hevaṁ vattabbe .pe.
Dhammābhisamayakathā.
--------------
Tissopikathā

[1868] Atthi gabbhaseyyāya arahattappattīti. Āmantā.
Suttassa pamattassa muṭṭhassatissa asampajānassa arahattappattīti.
Na hevaṁ vattabbe .pe. Atthi supinagatassa dhammābhisamayoti.
Āmantā. Suttassa pamattassa muṭṭhassatissa asampajānassa dhammābhisamayoti.
Na hevaṁ vattabbe .pe. Atthi supinagatassa arahattappattīti.
Āmantā. Suttassa pamattassa muṭṭhassatissa asampajānassa
arahattappattīti. Na hevaṁ vattabbe .pe.
Tissopikathā.
-----------
Abyākatakathā

[1869] Sabbaṁ supinagatassa cittaṁ abyākatanti. Āmantā.
Supinantena pāṇaṁ haneyyāti. Āmantā. Hañci supinantena pāṇaṁ
haneyya no vata re vattabbe sabbaṁ supinagatassa cittaṁ abyākatanti.

[1870] Supinantena adinnaṁ ādiyeyya .pe. Musā bhaṇeyya
pisuṇaṁ bhaṇeyya pharusaṁ bhaṇeyya samphaṁ palapeyya sandhiṁ chindeyya
nillopaṁ hareyya ekāgārikaṁ kareyya paripanke tiṭṭheyya paradāraṁ
gaccheyya gāmaghātakaṁ kareyya nigamaghātakaṁ kareyya supinantena methunaṁ
dhammaṁ paṭiseveyya supinagatassa asuci mucceyya supinantena dānaṁ
dadeyya cīvaraṁ dadeyya piṇḍapātaṁ dadeyya senāsanaṁ dadeyya
gilānapaccayabhesajjaparikkhāraṁ dadeyya khādanīyaṁ dadeyya bhojanīyaṁ dadeyya
pānīyaṁ dadeyya cetiyaṁ vandeyya cetiye mālaṁ āropeyya gandhaṁ
Āropeyya vilepanaṁ āropeyya .pe. Cetiyaṁ abhidakkhiṇaṁ kareyyāti.
Āmantā. Hañci supinantena cetiyaṁ abhidakkhiṇaṁ kareyya no vata
re vattabbe sabbaṁ supinagatassa cittaṁ abyākatanti.

[1871] Na vattabbaṁ sabbaṁ supinagatassa cittaṁ abyākatanti.
Āmantā. Nanu supinagatassa cittaṁ abbohāriyaṁ vuttaṁ bhagavatāti.
Āmantā. Hañci supinagatassa cittaṁ abbohāriyaṁ vuttaṁ bhagavatā
tena vata re vattabbe sabbaṁ supinagatassa cittaṁ abyākatanti.
Abyākatakathā.
------------
Āsevanapaccayatākathā

[1872] Natthi kāci āsevanapaccayatāti. Āmantā. Nanu
vuttaṁ bhagavatā pāṇātipāto bhikkhave āsevito bhāvito bahulīkato
nirayasaṁvattaniko tiracchānayonisaṁvattaniko pittivisayasaṁvattaniko yo
sabbalahuso pāṇātipātassa vipāko manussabhūtassa appāyukasaṁvattaniko
hotīti 1 attheva suttantoti. Āmantā. Tena hi
atthi kāci āsevanapaccayatāti.

[1873] Natthi kāci āsevanapaccayatāti. Āmantā. Nanu
vuttaṁ bhagavatā adinnādānaṁ bhikkhave āsevitaṁ bhāvitaṁ bahulīkataṁ nirayasaṁvattanikaṁ
1 aṁ. aṭṭhaka. 104.
Tiracchānayonisaṁvattanikaṁ pittivisayasaṁvattanikaṁ yo sabbalahuso
adinnādānassa vipāko manussabhūtassa bhogabyasanasaṁvattaniko hoti
.pe. Yo sabbalahuso kāmesumicchācārassa vipāko manussabhūtassa
sapattaverasaṁvattaniko hoti .pe. Yo sabbalahuso musāvādassa vipāko
manussabhūtassa abbhūtabbhakkhānasaṁvattaniko hoti .pe. Yo sabbalahuso
pisuṇāya vācāya vipāko manussabhūtassa mittehi bhedanasaṁvattaniko
hoti .pe. Yo sabbalahuso pharusāya vācāya vipāko manussabhūtassa
amanāpasaddasaṁvattaniko hoti .pe. Yo sabbalahuso samphappalāpassa
vipāko manussabhūtassa anādeyyavācasaṁvattaniko hoti .pe. Surāmerayapānaṁ
bhikkhave āsevitaṁ .pe. Yo sabbalahuso surāmerayapānassa
vipāko manussabhūtassa ummattakasaṁvattaniko hotīti 1 attheva
suttantoti. Āmantā. Tena hi atthi kāci āsevanapaccayatāti.

[1874] Natthi kāci āsevanapaccayatāti. Āmantā. Nanu vuttaṁ
bhagavatā micchādiṭṭhi bhikkhave āsevitā bhāvitā bahulīkatā nirayasaṁvattanikā
tiracchānayonisaṁvattanikā pittivisayasaṁvattanikāti attheva
suttantoti. Āmantā. Tena hi atthi kāci āsevanapaccayatāti.

[1875] Natthi kāci āsevanapaccayatāti. Āmantā. Nanu vuttaṁ
bhagavatā micchāsaṅkappo .pe. Micchāsamādhi bhikkhave āsevito
bhāvito bahulīkato .pe. Pittivisayasaṁvattanikoti attheva suttantoti.
1 aṁ. aṭṭhaka. 104.
Āmantā. Tena hi atthi kāci āsevanapaccayatāti.

[1876] Natthi kāci āsevanapaccayatāti. Āmantā. Nanu
vuttaṁ bhagavatā sammādiṭṭhi bhikkhave āsevitā bhāvitā bahulīkatā
amatogadhā hoti amataparāyanā amatapariyosānāti attheva suttantoti.
Āmantā. Tena hi atthi kāci āsevanapaccayatāti.