[1857] Na vattabbaṁ atthi kiñci saññojanaṁ appahāya
parinibbānanti. Āmantā. Arahā sabbaṁ buddhavisayaṁ jānātīti.
Na hevaṁ vattabbe .pe. Tena hi atthi kiñci saññojanaṁ appahāya
parinibbānanti.
Parinibbānakathā.
--------
Kusalacittakathā

[1858] Arahā kusalacitto parinibbāyatīti. Āmantā.
Arahā puññābhisaṅkhāraṁ abhisaṅkharonto āneñjābhisaṅkhāraṁ abhisaṅkharonto
gatisaṁvattaniyaṁ kammaṁ karonto bhavasaṁvattaniyaṁ kammaṁ karonto
issariyasaṁvattaniyaṁ kammaṁ karonto adhipaccasaṁvattaniyaṁ kammaṁ karonto
mahābhogasaṁvattaniyaṁ kammaṁ karonto mahāparivārasaṁvattaniyaṁ kammaṁ
karonto devasobhagyasaṁvattaniyaṁ kammaṁ karonto manussasobhagyasaṁvattaniyaṁ
kammaṁ karonto parinibbāyatīti. Na hevaṁ vattabbe .pe.

[1859] Arahā kusalacitto parinibbāyatīti. Āmantā.
Arahā ācinanto apacinanto pajahanto upādiyanto visinento
ussinento vidhūpento .pe. Sandhūpento parinibbāyatīti. Na hevaṁ
Vattabbe .pe. Nanu arahā nevācināti na apacināti apacinitvā
ṭhitoti. Āmantā. Hañci arahā nevācināti na apacināti
apacinitvā ṭhito no vata re vattabbe arahā kusalacitto
parinibbāyatīti. Nanu arahā neva pajahati na upādiyati pajahitvā
ṭhito neva visineti na ussineti visinetvā ṭhito nanu arahā neva
vidhūpeti na sandhūpeti vidhūpetvā ṭhitoti. Āmantā. Hañci
arahā neva vidhūpeti na sandhūpeti vidhūpetvā ṭhito no vata re
vattabbe arahā kusalacitto parinibbāyatīti.

[1860] Na vattabbaṁ arahā kusalacitto parinibbāyatīti.
Āmantā. Nanu arahā upaṭṭhitassati sato sampajāno parinibbāyatīti.
Āmantā. Hañci arahā upaṭṭhitassati sato sampajāno parinibbāyati
tena vata re vattabbe arahā kusalacitto parinibbāyatīti.
Kusalacittakathā.
-----------
Āneñjakathā

[1861] Arahā āneñje ṭhito parinibbāyatīti. Āmantā.
Nanu arahā pakaticitte ṭhito parinibbāyatīti. Āmantā. Hañci
arahā pakaticitte ṭhito parinibbāyati no vata re vattabbe
arahā āneñje ṭhito parinibbāyatīti.

[1862] Arahā āneñje ṭhito parinibbāyatīti. Āmantā.
Arahā kiriyamaye citte ṭhito parinibbāyatīti. Na hevaṁ vattabbe
.pe. Nanu arahā vipākacitte ṭhito parinibbāyatīti. Āmantā.
Hañci arahā vipākacitte ṭhito parinibbāyati no vata re vattabbe
arahā āneñje ṭhito parinibbāyatīti.

[1863] Arahā āneñje ṭhito parinibbāyatīti. Āmantā.
Arahā kiriyābyākate citte ṭhito parinibbāyatīti. Na hevaṁ vattabbe
.pe. Nanu arahā vipākābyākate citte ṭhito parinibbāyatīti.
Āmantā. Hañci arahā vipākābyākate citte ṭhito parinibbāyatīti.
No vata re vattabbe arahā āneñje ṭhito parinibbāyatīti.

[1864] Arahā āneñje ṭhito parinibbāyatīti. Āmantā.
Nanu bhagavā catutthajjhānā vuṭṭhahitvā samanantarā parinibbutoti.
Āmantā. Hañci bhagavā catutthajjhānā vuṭṭhahitvā samanantarā parinibbuto
no vata re vattabbe arahā āneñje ṭhito parinibbāyatīti.
Āneñjakathā.
--------------
Dhammābhisamayakathā

[1865] Atthi gabbhaseyyāya dhammābhisamayoti. Āmantā.
Atthi gabbhaseyyāya dhammadesanā dhammassavanaṁ dhammasākacchā paripucchā
Sīlasamādānaṁ indriyesu guttadvāratā bhojane mattaññutā pubbarattāpararattaṁ
jāgariyānuyogoti. Na hevaṁ vattabbe .pe. Natthi
gabbhaseyyāya dhammadesanā .pe. Pubbarattāpararattaṁ jāgariyānuyogoti.
Āmantā. Hañci natthi gabbhaseyyāya dhammadesanā
dhammassavanaṁ .pe. Pubbarattāpararattaṁ jāgariyānuyogo no vata re
vattabbe atthi gabbhaseyyāya dhammābhisamayoti.

[1866] Atthi gabbhaseyyāya dhammābhisamayoti. Āmantā.
Nanu dve paccayā sammādiṭṭhiyā uppādāya parato ca ghoso
yoniso ca manasikāroti. Āmantā. Hañci dve paccayā
sammādiṭṭhiyā uppādāya parato ca ghoso yoniso ca manasikāro
no vata re vattabbe atthi gabbhaseyyāya dhammābhisamayoti.