[1837] Na vattabbaṁ puthujjano tedhātukehi dhammehi avivittoti.
Āmantā. Puthujjanassa rūpadhātuarūpadhātūpagaṁ kammaṁ pariññātanti.
Na hevaṁ vattabbe .pe. Tena hi puthujjano tedhātukehi dhammehi
avivittoti.
Avivittakathā.
----------
Saññojanakathā

[1838] Atthi kiñci saññojanaṁ appahāya arahattappattīti.
Āmantā. Atthi kiñci sakkāyadiṭṭhiṁ appahāya .pe. Vicikicchaṁ
appahāya .pe. Sīlabbataparāmāsaṁ appahāya rāgaṁ appahāya dosaṁ
appahāya mohaṁ appahāya .pe. Anottappaṁ appahāya arahattappattīti.
Na hevaṁ vattabbe .pe.

[1839] Atthi kiñci saññojanaṁ appahāya arahattappatīti.
Āmantā. Arahā sarāgo sadoso samoho samāno samakkho
sapaḷāso saupāyāso sakilesoti. Na hevaṁ vattabbe .pe.
Nanu arahā nīrāgo niddoso nimmoho nimmāno nimmakkho nippaḷāso
nirupāyāso nikkilesoti. Āmantā. Hañci arahā nīrāgo
.pe. Nikkileso no vata re vattabbe atthi kiñci saññojanaṁ
appahāya arahattappattīti.

[1840] Na vattabbaṁ atthi kiñci saññojanaṁ appahāya arahattappattīti.
Āmantā. Arahā sabbaṁ buddhavisayaṁ jānātīti.
Na hevaṁ vattabbe .pe. Tena hi atthi kiñci saññojanaṁ appahāya
arahattappattīti.
Saññojanakathā.
-----------
Iddhikathā

[1841] Atthi adhippāyaiddhi buddhānaṁ vā sāvakānaṁ vāti.
Āmantā. Niccapaṇṇā rukkhā hontūti atthi adhippāyaiddhi
buddhānaṁ vā sāvakānaṁ vāti. Na hevaṁ vattabbe .pe. Niccapupphā
rukkhā hontu .pe. Niccaphalikā rukkhā hontu niccaṁ
juṇhaṁ hotu niccaṁ khemaṁ hotu niccaṁ subhikkhaṁ hotu niccaṁ suvuṭṭhikaṁ
hotūti atthi adhippāyaiddhi buddhānaṁ vā sāvakānaṁ vāti. Na hevaṁ
vattabbe .pe. Atthi adhippāyaiddhi buddhānaṁ vā sāvakānaṁ vāti.
Āmantā. Uppanno phasso mā nirujjhīti atthi adhippāyaiddhi
buddhānaṁ vā sāvakānaṁ vāti. Na hevaṁ vattabbe .pe. Uppannā
vedanā .pe. Saññā .pe. Cetanā .pe. Cittaṁ saddhā viriyaṁ
sati samādhi .pe. Paññā mā nirujjhīti atthi adhippāyaiddhi
buddhānaṁ vā sāvakānaṁ vāti. Na hevaṁ vattabbe .pe.

[1842] Atthi adhippāyaiddhi buddhānaṁ vā sāvakānaṁ vāti.
Āmantā. Rūpaṁ niccaṁ hotūti atthi adhippāyaiddhi vedanā saññā
saṅkhārā .pe. Viññāṇaṁ niccaṁ hotūti atthi adhippāyaiddhi buddhānaṁ
vā sāvakānaṁ vāti. Na hevaṁ vattabbe .pe.

[1843] Atthi adhippāyaiddhi buddhānaṁ vā sāvakānaṁ vāti.
Āmantā. Jātidhammā sattā mā jāyiṁsūti atthi .pe. Jarādhammā
sattā mā jiriṁsūti .pe. Byādhidhammā sattā mā byādhiyiṁsūti
.pe. Maraṇadhammā sattā mā miyyiṁsūti atthi adhippāyaiddhi
buddhānaṁ vā sāvakānaṁ vāti. Na hevaṁ vattabbe .pe.

[1844] Na vattabbaṁ atthi adhippāyaiddhi buddhānaṁ vā sāvakānaṁ
vāti. Āmantā. Nanu āyasmā pilindavaccho rañño māgadhassa
seniyassa bimbisārassa pāsādaṁ suvaṇṇantve adhimucci suvaṇṇo
ca pana āsīti. Āmantā. Hañci āyasmā pilindavaccho rañño
māgadhassa seniyassa bimbisārassa pāsādaṁ suvaṇṇantve adhimucci
suvaṇṇo ca pana āsi tena vata re vattabbe atthi adhippāyaiddhi
buddhānaṁ vā sāvakānaṁ vāti.
Iddhikathā.
------
Buddhakathā

[1845] Atthi buddhānaṁ buddhehi hīnātirekatāti. Āmantā.
Satipaṭṭhānatoti. Na hevaṁ vattabbe .pe. Sammappadhānato .pe.
Iddhipādato indriyato balato bojjhaṅgato vasībhāvato .pe.
Sabbaññutañāṇadassanatoti. Na hevaṁ vattabbe .pe.
Buddhakathā.
---------
Sabbadisākathā

[1846] Sabbā disā buddhā tiṭṭhantīti. Āmantā. Puratthimāya
disāya buddho tiṭṭhatīti. Na hevaṁ vattabbe .pe. Puratthimāya
disāya buddho tiṭṭhatīti. Āmantā. Kinnāmo so bhagavā kiṁjacco
kiṁgotto kinnāmā tassa bhagavato mātāpitaro kinnāmaṁ tassa
bhagavato sāvakayugaṁ konāmo tassa bhagavato upaṭṭhāko kīdisaṁ
cīvaraṁ dhāreti kīdisaṁ pattaṁ dhāreti katarasmiṁ gāme vā nigame
vā nagare vā raṭṭhe vā janapade vāti. Na hevaṁ vattabbe
.pe. Dakkhiṇāya disāya .pe. Pacchimāya disāya .pe. Uttarāya
disāya .pe. Heṭṭhimāya disāya buddho tiṭṭhatīti. Na hevaṁ vattabbe
.pe. Heṭṭhimāya disāya buddho tiṭṭhatīti. Āmantā. Kinnāmo
So bhagavā .pe. Janapade vāti. Na hevaṁ vattabbe .pe.
Uparimāya disāya buddho tiṭṭhatīti. Na hevaṁ vattabbe .pe.
Uparimāya disāya buddho tiṭṭhatīti. Āmantā. Cātummahārājike
tiṭṭhati .pe. Tāvatiṁse tiṭṭhati yāme tiṭṭhati tusite tiṭṭhati nimmānaratiyā
tiṭṭhati paranimmitavasavattiyā tiṭṭhati .pe. Brahmaloke
tiṭṭhatīti. Na hevaṁ vattabbe .pe.
Sabbadisākathā.
-----------
Dhammakathā