[1817] Atthi puthujjanassa ñāṇanti. Āmantā. Puthujjano
tena ñāṇena dukkhaṁ parijānāti samudayaṁ pajahati nirodhaṁ sacchikaroti
maggaṁ bhāvetīti. Na hevaṁ vattabbe .pe.
Ñāṇakathā.
--------
Nirayapālakathā

[1818] Natthi nirayesu nirayapālāti. Āmantā. Natthi nirayesu
kammakāraṇāti. Na hevaṁ vattabbe .pe. Atthi nirayesu kammakāraṇāti.
Āmantā. Atthi nirayesu nirayapālāti. Na hevaṁ
vattabbe .pe.

[1819] Atthi manussesu kammakāraṇā atthi ca kāraṇikāti.
Āmantā. Atthi nirayesu kammakāraṇā atthi ca kāraṇikāti.
Na hevaṁ vattabbe .pe. Atthi nirayesu kammakāraṇā natthi ca
kāraṇikāti. Āmantā. Atthi manussesu kammakāraṇā natthi
ca kāraṇikāti. Na hevaṁ vattabbe .pe.

[1820] Atthi nirayesu nirayapālāti. Āmantā. Nanu vuttaṁ
bhagavatā
na vessabhū nopi ca pettirājā
somo yamo vessavaṇo ca rājā
sakāni kammāni hananti tattha
ito paṇuṇṇaṁ paralokapattanti
attheva suttantoti. Āmantā. Tena hi natthi nirayesu nirayapālāti.

[1821] Natthi nirayesu nirayapālāti. Āmantā. Nanu vuttaṁ
bhagavatā tamenaṁ bhikkhave nirayapālā pañcavidhaṁ bandhanaṁ nāma kāraṇaṁ
kārenti tattaṁ ayokhilaṁ hatthe gamenti tattaṁ ayokhilaṁ dutiye
hatthe gamenti tattaṁ ayokhilaṁ pāde gamenti tattaṁ ayokhilaṁ dutiye
pāde gamenti tattaṁ ayokhilaṁ majjheurasmiṁ gamenti so tattha
dukkhā tibbā kaṭukā vedanā vedeti na ca tāva kālaṁ karoti
yāva na taṁ pāpakammaṁ byantī hotīti attheva suttantoti.
Āmantā. Tena hi atthi nirayesu nirayapālāti.

[1822] Natthi nirayesu nirayapālāti. Āmantā. Nanu vuttaṁ
bhagavatā tamenaṁ bhikkhave nirayapālā saṁvesitvā kudhārīhi tacchanti
.pe. Tamenaṁ bhikkhave nirayapālā uddhaṁpādaṁ adhosiraṁ ṭhapetvā
vāsīhi tacchanti .pe. Tamenaṁ bhikkhave nirayapālā rathe yojetvā
ādittāya paṭhaviyā sampajjalitāya sañjotibhūtāya sārentipi paccāsārentipi
.pe. Tamenaṁ bhikkhave nirayapālā mahantaṁ aṅgārapabbataṁ
ādittaṁ sampajjalitaṁ sañjotibhūtaṁ āropentipi oropentipi .pe.
Tamenaṁ bhikkhave nirayapālā uddhaṁpādaṁ adhosiraṁ gahetvā tattāya
lohakumbhiyā pakkhipanti ādittāya sampajjalitāya sañjotibhūtāya
so tattha pheṇuddehakaṁ paccati so tattha pheṇuddehakaṁ paccamāno
sakimpi uddhaṁ gacchati sakimpi adho gacchati sakimpi tiriyaṁ gacchati
so tattha dukkhā .pe. Tamenaṁ bhikkhave nirayapālā mahāniraye
pakkhipanti so kho pana bhikkhave mahānirayo
catukkaṇṇo catudvāro vibhatto bhāgaso mito
ayopākārapariyanto ayasā paṭikujjito
tassa ayomayā bhūmi jalitā tejasā yutā
samantā yojanasataṁ phalitvā tiṭṭhati sabbadāti 1
attheva suttantoti. Āmantā. Tena hi atthi nirayesu nirayapālāti.
Nirayapālakathā.
-------------
1 aṁ. tikka. 180. Ma. u. 316.
Tiracchānakathā

[1823] Atthi devesu tiracchānagatāti. Āmantā. Atthi
tiracchānagatesu devāti. Na hevaṁ vattabbe .pe. Atthi devesu
tiracchānagatāti. Āmantā. Devaloko tiracchānayonīti. Na hevaṁ
vattabbe .pe. Atthi devesu tiracchānagatāti. Āmantā. Atthi
tattha kīṭā paṭaṅgā makasā makkhikā ahī vicchikā satapadī gaṇḍupādāti.
Na hevaṁ vattabbe .pe.

[1824] Natthi devesu tiracchānagatāti. Āmantā. Nanu
atthi tattha erāvaṇo nāma hatthināgo sahassassayuttaṁ dibbaṁ
yānanti. Āmantā. Hañci atthi tattha erāvaṇo nāma
hatthināgo sahassassayuttaṁ dibbaṁ yānaṁ tena vata re vattabbe
atthi devesu tiracchānagatāti.

[1825] Atthi devesu tiracchānagatāti. Āmantā. Atthi
tattha hatthibandhā assabandhā yāvasikā kāraṇikā bhattakārakāti.
Na hevaṁ vattabbe .pe. Tena hi natthi devesu tiracchānagatāti.
Tiracchānakathā.
-----------
Maggakathā

[1826] Pañcaṅgiko maggoti. Āmantā. Nanu aṭṭhaṅgiko maggo
vutto bhagavatā. Seyyathīdaṁ. Sammādiṭṭhi .pe. Sammāsamādhīti.
Āmantā. Hañci aṭṭhaṅgiko maggo vutto bhagavatā. Seyyathīdaṁ.
Sammādiṭṭhi .pe. Sammāsamādhi no vata re vattabbe pañcaṅgiko
maggoti. Pañcaṅgiko maggoti. Āmantā. Nanu vuttaṁ bhagavatā
maggānaṭṭhaṅgiko seṭṭho saccānaṁ caturo padā
virāgo seṭṭho dhammānaṁ dipadānañca cakkhumāti 1
attheva suttantoti. Āmantā. Tena hi aṭṭhaṅgiko maggoti.