[1847] Sabbe dhammā niyatāti. Āmantā. Micchattaniyatāti.
Na hevaṁ vattabbe .pe. Sammattaniyatāti. Na hevaṁ vattabbe
.pe. Natthi aniyato rāsīti. Na hevaṁ vattabbe .pe. Nanu
atthi aniyato rāsīti. Āmantā. Hañci atthi aniyato rāsi
no vata re vattabbe sabbe dhammā niyatāti.

[1848] Sabbe dhammā niyatāti. Āmantā. Nanu tayo rāsī
vuttā bhagavatā micchattaniyato rāsi sammattaniyato rāsi aniyato
rāsīti. Āmantā. Hañci tayo rāsī vuttā bhagavatā micchattaniyato
rāsi sammattaniyato rāsi aniyato rāsi no vata re vattabbe
sabbe dhammā niyatāti.

[1849] Rūpaṁ rūpaṭṭhena niyatanti. Āmantā. Micchattaniyatanti.
Na hevaṁ vattabbe .pe. Sammattaniyatanti. Na hevaṁ
vattabbe .pe. Vedanā .pe. Saññā .pe. Saṅkhārā .pe.
Viññāṇaṁ viññāṇaṭṭhena niyatanti. Āmantā. Micchattaniyatanti.
Na hevaṁ vattabbe .pe. Sammattaniyatanti. Na hevaṁ vattabbe .pe.

[1850] Na vattabbaṁ rūpaṁ rūpaṭṭhena niyataṁ .pe. Vedanā .pe.
Saññā .pe. Saṅkhārā .pe. Viññāṇaṁ viññāṇaṭṭhena niyatanti.
Āmantā. Rūpaṁ hoti vedanā hoti saññā hoti saṅkhārā honti
viññāṇaṁ hoti vedanā saññā hoti saṅkhārā .pe. Viññāṇaṁ rūpaṁ
hoti vedanā hoti saññā hoti saṅkhārā hontīti. Na hevaṁ
vattabbe. Tena hi rūpaṁ rūpaṭṭhena niyataṁ vedanā .pe. Saññā
saṅkhārā .pe. Viññāṇaṁ viññāṇaṭṭhena niyatanti.
Dhammakathā.
--------
Kammakathā

[1851] Sabbe kammā niyatāti. Āmantā. Micchattaniyatāti.
Āmantā. Micchattaniyatāti. Na hevaṁ vattabbe .pe.
Sammattaniyatāti. Na hevaṁ vattabbe .pe. Natthi aniyato rāsīti.
Na hevaṁ vattabbe .pe. Nanu atthi aniyato rāsīti. Āmantā.
Hañci atthi aniyato rāsi no vata re vattabbe sabbe kammā niyatāti.

[1852] Sabbe kammā niyatāti. Āmantā. Nanu tayo rāsī
vuttā bhagavatā micchattaniyato rāsi sammattaniyato rāsi aniyato
rāsīti. Āmantā. Hañci tayo rāsī vuttā bhagavatā micchattaniyato
rāsi sammattaniyato rāsi aniyato rāsi no vata re vattabbe
sabbe kammā niyatāti.

[1853] Diṭṭhadhammavedaniyaṁ kammaṁ diṭṭhadhammavedaniyaṭṭhena niyatanti.
Āmantā. Micchattaniyatanti. Na hevaṁ vattabbe .pe. Sammattaniyatanti.
Na hevaṁ vattabbe .pe. Upapajjavedaniyaṁ kammaṁ .pe.
Aparāpariyavedaniyaṁ kammaṁ aparāpariyavedaniyaṭṭhena niyatanti.
Āmantā. Micchattaniyatanti. Na hevaṁ vattabbe .pe. Sammattaniyatanti.
Na hevaṁ vattabbe .pe.

[1854] Na vattabbaṁ diṭṭhadhammavedaniyaṁ kammaṁ diṭṭhadhammavedaniyaṭṭhena
niyataṁ upapajjavedaniyaṁ kammaṁ .pe. Aparāpariyavedaniyaṁ
kammaṁ aparāpariyavedaniyaṭṭhena niyatanti. Āmantā. Diṭṭhadhammavedaniyaṁ
kammaṁ upapajjavedaniyaṁ hoti aparāpariyavedaniyaṁ hoti .pe.
Upapajjavedaniyaṁ kammaṁ diṭṭhadhammavedaniyaṁ hoti aparāpariyavedaniyaṁ
hoti .pe. Aparāpariyavedaniyaṁ kammaṁ diṭṭhadhammavedaniyaṁ hoti upapajjavedaniyaṁ
hotīti. Na hevaṁ vattabbe .pe. Tena hi diṭṭhadhammavedaniyaṁ
kammaṁ diṭṭhadhammavedaniyaṭṭhena niyataṁ upapajjavedaniyaṁ kammaṁ .pe.
Aparāpariyavedaniyaṁ kammaṁ aparāpariyavedaniyaṭṭhena niyatanti.
Kammakathā.
Ekavīsatimo vaggo.
Tassa uddānaṁ
sāsanaṁ navaṁ kataṁ atthi koci tathāgatassa sāsanaṁ navaṁ
karoti labbhā tathāgatassa sāsanaṁ puna navaṁ kātuṁ
puthujjano tedhātukehi dhammehi avivitto atthi
kiñci saññojanaṁ appahāya arahattappatti atthi
adhippāyaiddhi buddhānaṁ vā sāvakānaṁ vā atthi
buddhānaṁ buddhehi hīnātirekatā sabbā disā buddhā
tiṭṭhanti sabbe dhammā niyatā sabbe kammā niyatāti.
---------
Parinibbānakathā

[1855] Atthi kiñci saññojanaṁ appahāya parinibbānanti.
Āmantā. Atthi kiñci sakkāyadiṭṭhiṁ appahāya .pe. Anottappaṁ
appahāya parinibbānanti. Na hevaṁ vattabbe .pe.

[1856] Atthi kiñci saññojanaṁ appahāya parinibbānanti.
Āmantā. Arahā sarāgo .pe. Sakilesoti. Na hevaṁ vattabbe
.pe. Nanu arahā nīrāgo .pe. Nikkilesoti. Āmantā.
Hañci arahā nīrāgo .pe. Nikkileso no vata re vattabbe
atthi kiñci saññojanaṁ appahāya parinibbānanti.