[1877] Natthi kāci āsevanapaccayatāti. Āmantā. Nanu
vuttaṁ bhagavatā sammāsaṅkappo bhikkhave āsevito bhāvito bahulīkato
.pe. Sammāsamādhi bhikkhave āsevito bhāvito bahulīkato amatogadho
hoti amataparāyano amatapariyosānoti attheva suttantoti.
Āmantā. Tena hi atthi kāci āsevanapaccayatāti.
Āsevanapaccayatākathā.
---------
Khaṇikakathā

[1878] Ekacittakkhaṇikā sabbe dhammāti. Āmantā.
Citte mahāpaṭhavī saṇṭhāti mahāsamuddo saṇṭhāti sinerupabbatarājā
saṇṭhāti āpo saṇṭhāti tejo saṇṭhāti vāyo saṇṭhāti tiṇakaṭṭhavanappatayo
saṇṭhahantīti. Na hevaṁ vattabbe .pe.

[1879] Ekacittakkhaṇikā sabbe dhammāti. Āmantā.
Cakkhāyatanaṁ cakkhuviññāṇena sahajātanti. Na hevaṁ vattabbe
.pe. Cakkhāyatanaṁ cakkhuviññāṇena sahajātanti. Āmantā.
Nanu āyasmā sārīputto etadavoca ajjhattikañceva āvuso
cakkhuṁ aparibhinnaṁ hoti bāhirā ca rūpā na āpāthaṁ āgacchanti
no ca tajjo samannāhāro hoti neva tāva tajjassa viññāṇabhāvassa
pātubhāvo hoti ajjhattikañceva āvuso cakkhuṁ aparibhinnaṁ
hoti bāhirā ca rūpā āpāthaṁ āgacchanti no ca tajjo
samannāhāro hoti neva tāva tajjassa viññāṇabhāvassa pātubhāvo
hoti yato ca kho āvuso ajjhattikañceva cakkhuṁ aparibhinnaṁ
hoti bāhirā ca rūpā āpāthaṁ āgacchanti tajjo ca samannāhāro
hoti evaṁ tajjassa viññāṇabhāvassa pātubhāvo hotīti 1 attheva
suttantoti. Āmantā. Tena hi na vattabbaṁ cakkhāyatanaṁ cakkhuviññāṇena
sahajātanti.

[1880] Sotāyatanaṁ .pe. Ghānāyatanaṁ .pe. Jivhāyatanaṁ .pe.
Kāyāyatanaṁ kāyaviññāṇena sahajātanti. Na hevaṁ vattabbe .pe.
Kāyāyatanaṁ kāyaviññāṇena sahajātanti. Āmantā. Nanu āyasmā
sārīputto etadavoca ajjhattiko ceva āvuso kāyo aparibhinno
hoti bāhirā ca phoṭṭhabbā na āpāthaṁ āgacchanti no ca
.pe. Ajjhattiko ceva āvuso kāyo aparibhinno hoti bāhirā ca
phoṭṭhabbā āpāthaṁ āgacchanti no ca .pe. Yato ca kho āvuso
1 Ma. mū. 342.
Ajjhattiko ceva kāyo aparibhinno hoti bāhirā ca phoṭṭhabbā
āpāthaṁ āgacchanti tajjo ca samannāhāro hoti evaṁ tajjassa
viññāṇabhāvassa pātubhāvo hotīti attheva suttantoti. Āmantā.
Tena hi na vattabbaṁ kāyāyatanaṁ kāyaviññāṇena sahajātanti.

[1881] Na vattabbaṁ ekacittakkhaṇikā sabbe dhammāti.
Āmantā. Sabbe dhammā niccā dhuvā sassatā avipariṇāmadhammāti.
Na hevaṁ vattabbe .pe. Tena hi ekacittakkhaṇikā sabbe dhammāti.
Khaṇikakathā.
Bāvīsatimo vaggo.
Tassa uddānaṁ
atthi kiñci saññojanaṁ appahāya parinibbānaṁ
arahā kusalacitto parinibbāyati arahā āneñje
ṭhito parinibbāyati atthi gabbhaseyyāya dhammābhisamayo
atthi gabbhaseyyāya arahattappatti atthi supinagatassa
dhammābhisamayo atthi supinagatassa arahattappatti
sabbaṁ supinagatassa cittaṁ abyākataṁ natthi kāci
āsevanapaccayatā ekacittakkhaṇikā sabbe dhammāti.
---------
Ekādhippāyakathā

[1882] Ekādhippāyena methuno dhammo paṭisevitabboti.
Āmantā. Ekādhippāyena assamaṇena hotabbaṁ abhikkhunā
hotabbaṁ chinnamūlena hotabbaṁ pārājikena hotabbanti. Na
hevaṁ vattabbe .pe.

[1883] Ekādhippāyena methuno dhammo paṭisevitabboti.
Āmantā. Ekādhippāyena pāṇo hantabbo adinnaṁ ādiyitabbaṁ
musā bhaṇitabbaṁ pisuṇaṁ bhaṇitabbaṁ pharusaṁ bhaṇitabbaṁ samphaṁ
palapitabbaṁ sandhi cheditabbo nillopaṁ hātabbaṁ ekāgāriyaṁ kātabbaṁ
paripanthe ṭhātabbaṁ paradāro gantabbo gāmaghātako kātabbo
nigamaghātako kātabboti. Na hevaṁ vattabbe .pe.
Ekādhippāyakathā.
----------
Arahantavaṇṇakathā

[1884] Arahantānaṁ vaṇṇena amanussā methunaṁ dhammaṁ paṭisevantīti.
Āmantā. Arahantānaṁ vaṇṇena manussā pāṇaṁ hananti
.pe. Adinnaṁ ādiyanti musā bhaṇanti pisuṇaṁ bhaṇanti pharusaṁ
bhaṇanti samphaṁ palapanti sandhiṁ chindanti nillopaṁ haranti ekāgāriyaṁ
Karonti paripanthe tiṭṭhanti paradāraṁ gacchanti gāmaghātakaṁ
karonti .pe. Nigamaghātakaṁ karontīti. Na hevaṁ vattabbe .pe.
Arahantavaṇṇakathā.
------------
Issariyakāmakārikākathā

[1885] Bodhisatto issariyakāmakārikāhetu vinipātaṁ gacchatīti.
Āmantā. Bodhisatto issariyakāmakārikāhetu nirayaṁ gacchati sañjīvaṁ
gacchati kālasuttaṁ gacchati tāpanaṁ gacchati patāpanaṁ 1 gacchati
saṅghāṭakaṁ gacchati roruvaṁ gacchati .pe. Avīciṁ gacchatīti.
Na hevaṁ vattabbe .pe.

[1886] Bodhisatto issariyakāmakārikāhetu vinipātaṁ gacchatīti.
Āmantā. Bodhisatto issariyakāmakārikāhetu vinipātaṁ gacchatīti
attheva suttantoti. Natthi. Hañci bodhisatto issariyakāmakārikāhetu
vinipātaṁ gacchatīti nattheva suttanto no vata re vattabbe
bodhisatto issariyakāmakārikāhetu vinipātaṁ gacchatīti.