[1887] Bodhisatto issariyakāmakārikāhetu gabbhaseyyaṁ
okkamatīti. Āmantā. Bodhisatto issariyakāmakārikāhetu nirayaṁ
upapajjeyya tiracchānayoniṁ upapajjeyyāti. Na hevaṁ vattabbe .pe.

[1888] Bodhisatto issariyakāmakārikāhetu gabbhaseyyaṁ okkamatīti.
1. Ma. mahātāpanaṁ.
Āmantā. Bodhisatto iddhimāti. Na hevaṁ vattabbe
.pe. Bodhisatto iddhimāti. Āmantā. Bodhisattena chandiddhipādo
bhāvito .pe. Viriyiddhipādo .pe. Cittiddhipādo .pe. Vīmaṁsiddhipādo
bhāvitoti. Na hevaṁ vattabbe .pe. Bodhisatto issariyakāmakārikāhetu
gabbhaseyyaṁ okkamatīti. Āmantā. Bodhisatto
issariyakāmakārikāhetu gabbhaseyyaṁ okkamatīti attheva suttantoti.
Natthi. Hañci bodhisatto issariyakāmakārikāhetu gabbhaseyyaṁ
okkamatīti nattheva suttanto no vata re vattabbe bodhisatto
issariyakāmakārikāhetu gabbhaseyyaṁ okkamatīti.

[1889] Bodhisatto issariyakāmakārikāhetu dukkarakārikaṁ
akāsīti. Āmantā. Bodhisatto issariyakāmakārikāhetu sassato
lokoti paccāgacchi asassato lokoti paccāgacchi antavā lokoti
.pe. Anantavā lokoti taṁ jīvaṁ taṁ sarīranti aññaṁ jīvaṁ
aññaṁ sarīranti hoti tathāgato parammaraṇāti na hoti tathāgato
parammaraṇāti hoti ca na ca hoti tathāgato parammaraṇāti .pe.
Neva hoti na na hoti tathāgato parammaraṇāti paccāgacchīti.
Na hevaṁ vattabbe .pe.

[1890] Bodhisatto issariyakāmakārikāhetu dukkarakārikaṁ
akāsīti. Āmantā. Bodhisatto issariyakāmakārikāhetu dukkarakārikaṁ
akāsīti attheva suttantoti. Natthi. Hañci bodhisatto
Issariyakāmakārikāhetu dukkarakārikaṁ akāsīti nattheva suttanto no vata re
vattabbe bodhisatto issariyakāmakārikāhetu dukkarakārikaṁ akāsīti.

[1891] Bodhisatto issariyakāmakārikāhetu aparantapaṁ akāsi
aññaṁ satthāraṁ uddisīti. Āmantā. Bodhisatto issariyakāmakārikāhetu
sassato lokoti paccāgacchi .pe. Neva hoti na na
hoti tathāgato parammaraṇāti paccāgacchīti. Na hevaṁ vattabbe
.pe. Bodhisatto issariyakāmakārikāhetu aññaṁ satthāraṁ uddisīti.
Āmantā. Bodhisatto issariyakāmakārikāhetu aññaṁ satthāraṁ
uddisīti attheva suttantoti. Natthi. Hañci bodhisatto
issariyakāmakārikāhetu aññaṁ satthāraṁ uddisīti nattheva suttanto no vata re
vattabbe bodhisatto issariyakāmakārikāhetu aññaṁ satthāraṁ uddisīti.
Issariyakāmakārikākathā.
------------------
Rāgapaṭirūpakādikathā

[1892] Atthi narāgo rāgapaṭirūpakoti. Āmantā. Atthi
naphasso phassapaṭirūpako atthi navedanā vedanāpaṭirūpikā atthi nasaññā
saññāpaṭirūpikā atthi nacetanā cetanāpaṭirūpikā atthi
nacittaṁ cittapaṭirūpakaṁ atthi nasaddhā saddhāpaṭirūpikā atthi naviriyaṁ
viriyapaṭirūpakaṁ atthi nasati satipaṭirūpikā atthi nasamādhi samādhipaṭirūpako
Atthi na paññā paññāpaṭirūpikāti. Na hevaṁ vattabbe
.pe. Atthi nadoso dosapaṭirūpako atthi namoho mohapaṭirūpako
atthi nakileso kilesapaṭirūpakoti 1 . Āmantā. Atthi naphasso
phassapaṭirūpako .pe. Atthi napaññā paññāpaṭirūpikāti. Na hevaṁ
vattabbe .pe.
Rāgapaṭirūpakādikathā.
-------------
Aparinipphannakathā

[1893] Rūpaṁ aparinipphannanti. Āmantā. Rūpaṁ nāniccaṁ
na saṅkhataṁ na paṭiccasamuppannaṁ na khayadhammaṁ na vayadhammaṁ na virāgadhammaṁ
na nirodhadhammaṁ na vipariṇāmadhammanti. Na hevaṁ vattabbe
.pe. Nanu rūpaṁ aniccaṁ saṅkhataṁ paṭiccasamuppannaṁ khayadhammaṁ vayadhammaṁ
virāgadhammaṁ nirodhadhammaṁ vipariṇāmadhammanti. Āmantā. Hañci
rūpaṁ aniccaṁ saṅkhataṁ .pe. Vipariṇāmadhammaṁ no vata re vattabbe
rūpaṁ aparinipphannanti.

[1894] Dukkhaññeva parinipphannanti. Āmantā. Nanu yadaniccaṁ
taṁ dukkhaṁ vuttaṁ bhagavatā rūpaṁ aniccanti. Āmantā. Hañci yadaniccaṁ
taṁ dukkhaṁ vuttaṁ bhagavatā rūpaṁ aniccaṁ no vata re vattabbe
dukkhaññeva parinipphannanti.
1. Ma. na kisesiyo kilesiyapaṭirūpako.

[1895] Vedanā .pe. Saññā saṅkhārā viññāṇaṁ .pe.
Cakkhāyatanaṁ .pe. Dhammāyatanaṁ .pe. Cakkhudhātu .pe. Dhammadhātu
.pe. Cakkhundriyaṁ .pe.

[1896] Aññātāvindriyaṁ aparinipphannanti. Āmantā.
Aññātāvindriyaṁ nāniccaṁ .pe. Na vipariṇāmadhammanti.
Na hevaṁ vattabbe .pe. Nanu aññātāvindriyaṁ aniccaṁ saṅkhataṁ .pe.
Vipariṇāmadhammanti. Āmantā. Hañci aññātāvindriyaṁ aniccaṁ saṅkhataṁ
paṭiccasamuppannaṁ khayadhammaṁ vayadhammaṁ virāgadhammaṁ nirodhadhammaṁ vipariṇāmadhammaṁ
no vata re vattabbe aññātāvindriyaṁ aparinipphannanti.