[1747] Ekena ariyamaggena cattāri sāmaññaphalāni sacchikarotīti.
Āmantā. Catunnaṁ phassānaṁ .pe. Catassannaṁ paññānaṁ
samodhānaṁ hotīti. Na hevaṁ vattabbe .pe. Ekena ariyamaggena
cattāri sāmaññaphalāni sacchikarotīti. Āmantā. Sotāpattimaggenāti.
Na hevaṁ vattabbe .pe. Sakadāgāmimaggena .pe.
Anāgāmimaggenāti. Na hevaṁ vattabbe .pe. Katamena maggenāti.
Arahattamaggenāti. Arahattamaggena sakkāyadiṭṭhiṁ vicikicchaṁ sīlabbataparāmāsaṁ
Parāmāsaṁ jahatīti. Na hevaṁ vattabbe .pe. Arahattamaggena sakkāyadiṭṭhiṁ
vicikicchaṁ sīlabbataparāmāsaṁ jahatīti. Āmantā. Nanu tiṇṇaṁ
saññojanānaṁ pahānaṁ sotāpattiphalaṁ vuttaṁ bhagavatāti. Āmantā.
Hañci tiṇṇaṁ saññojanānaṁ pahānaṁ sotāpattiphalaṁ vuttaṁ bhagavatā
no vata re vattabbe arahattamaggena sakkāyadiṭṭhiṁ vicikicchaṁ sīlabbataparāmāsaṁ
jahatīti .pe. Arahattamaggena oḷārikaṁ kāmarāgaṁ oḷārikaṁ
byāpādaṁ jahatīti. Na hevaṁ vattabbe .pe. Arahattamaggena
oḷārikaṁ kāmarāgaṁ oḷārikaṁ byāpādaṁ jahatīti. Āmantā.
Nanu kāmarāgabyāpādānaṁ tanubhāvaṁ sakadāgāmiphalaṁ vuttaṁ bhagavatāti.
Āmantā. Hañci kāmarāgabyāpādānaṁ tanubhāvaṁ sakadāgāmiphalaṁ vuttaṁ
bhagavatā no vata re vattabbe arahattamaggena oḷārikaṁ kāmarāgaṁ
oḷārikaṁ byāpādaṁ jahatīti. Arahattamaggena aṇusahagataṁ kāmarāgaṁ
aṇusahagataṁ byāpādaṁ jahatīti. Na hevaṁ vattabbe .pe. Arahattamaggena
aṇusahagataṁ kāmarāgaṁ aṇusahagataṁ byāpādaṁ jahatīti.
Āmantā. Nanu kāmarāgabyāpādānaṁ anavasesappahānaṁ anāgāmiphalaṁ
vuttaṁ bhagavatāti. Āmantā. Hañci kāmarāgabyāpādānaṁ anavasesappahānaṁ
anāgāmiphalaṁ vuttaṁ bhagavatā no vata re vattabbe
arahattamaggena aṇusahagataṁ kāmarāgaṁ aṇusahagataṁ byāpādaṁ jahatīti.

[1748] Na vattabbaṁ ekena ariyamaggena cattāri sāmaññaphalāni
sacchikarotīti. Āmantā. Bhagavatā sotāpattimaggo bhāvitoti.
Āmantā. Bhagavā sotāpannoti. Na hevaṁ vattabbe .pe. Bhagavatā
sakadāgāmimaggo .pe. Anāgāmimaggo bhāvitoti. Āmantā.
Bhagavā anāgāmīti. Na hevaṁ vattabbe .pe.

[1749] Bhagavā ekena ariyamaggena cattāri sāmaññaphalāni
sacchikaroti sāvakā catūhi ariyamaggehi cattāri sāmaññaphalāni
sacchikarontīti. Āmantā. Sāvakā buddhassa bhagavato adiṭṭhaṁ
dakkhanti anadhigataṁ adhigacchanti asacchikataṁ sacchikarontīti. Na
hevaṁ vattabbe .pe.
Ekamaggakathā.
-----------
Jhānasaṅkantikathā

[1750] Jhānā jhānaṁ saṅkamatīti. Āmantā. Paṭhamā jhānā
tatiyaṁ jhānaṁ saṅkamatīti. Na hevaṁ vattabbe .pe. Jhānā jhānaṁ
saṅkamatīti. Āmantā. Dutiyā jhānā catutthaṁ jhānaṁ saṅkamatīti.
Na hevaṁ vattabbe .pe.

[1751] Paṭhamā jhānā dutiyaṁ jhānaṁ saṅkamatīti. Āmantā.
Yā paṭhamassa jhānassa uppādāya āvajjanā .pe. Paṇidhi sāva
dutiyassa jhānassa uppādāya āvajjanā .pe. Paṇidhīti. Na
hevaṁ vattabbe .pe. Paṭhamā jhānā dutiyaṁ jhānaṁ saṅkamatīti. Na
Vattabbaṁ yā paṭhamassa jhānassa uppādāya āvajjanā .pe. Paṇidhi
sāva dutiyassa jhānassa uppādāya āvajjanā .pe. Paṇidhīti.
Āmantā. Dutiyaṁ jhānaṁ anāvajjantassa uppajjati .pe. Apaṇidahantassa
uppajjatīti. Na hevaṁ vattabbe .pe. Nanu dutiyaṁ jhānaṁ
āvajjantassa uppajjati .pe. Paṇidahantassa uppajjatīti. Āmantā.
Hañci dutiyaṁ jhānaṁ āvajjantassa uppajjati .pe.
Paṇidahantassa uppajjati no vata re vattabbe paṭhamā jhānā
dutiyaṁ jhānaṁ saṅkamatīti. Paṭhamā jhānā dutiyaṁ jhānaṁ saṅkamatīti.
Āmantā. Paṭhamaṁ jhānaṁ kāme ādīnavato manasikaroto uppajjatīti.
Āmantā. Dutiyaṁ jhānaṁ kāme ādīnavato manasikaroto uppajjatīti.
Na hevaṁ vattabbe .pe. Paṭhamaṁ jhānaṁ savitakkaṁ savicāranti.
Āmantā. Dutiyaṁ jhānaṁ savitakkaṁ savicāranti. Na hevaṁ vattabbe
.pe. Paṭhamā jhānā dutiyaṁ jhānaṁ saṅkamatīti. Āmantā.
Taññeva paṭhamaṁ jhānaṁ taṁ dutiyaṁ jhānanti. Na hevaṁ vattabbe .pe.

[1752] Dutiyā jhānā tatiyaṁ jhānaṁ saṅkamatīti. Āmantā.
Yā dutiyassa jhānassa uppādāya āvajjanā .pe. Paṇidhi sāva
tatiyassa jhānassa uppādāya āvajjanā .pe. Paṇidhīti. Na hevaṁ
vattabbe .pe. Dutiyā jhānā tatiyaṁ jhānaṁ saṅkamatīti. Na vattabbaṁ
yā dutiyassa jhānassa uppādāya āvajjanā .pe. Paṇidhi sāva
tatiyassa jhānassa uppādāya āvajjanā .pe. Paṇidhīti. Āmantā.
Tatiyaṁ jhānaṁ anāvajjantassa uppajjati .pe. Apaṇidahantassa
uppajjatīti. Na hevaṁ vattabbe .pe. Nanu tatiyaṁ jhānaṁ
āvajjantassa uppajjati .pe. Paṇidahantassa uppajjatīti. Āmantā.
Hañci tatiyaṁ jhānaṁ āvajjantassa uppajjati .pe.
Paṇidahantassa uppajjati no vata re vattabbe dutiyā jhānā
tatiyaṁ jhānaṁ saṅkamatīti. Dutiyā jhānā tatiyaṁ jhānaṁ saṅkamatīti.
Āmantā. Dutiyaṁ jhānaṁ vitakkavicāre ādīnavato manasikaroto
uppajjatīti. Āmantā. Tatiyaṁ jhānaṁ vitakkavicāre ādīnavato
manasikaroto uppajjatīti. Na hevaṁ vattabbe .pe. Dutiyaṁ jhānaṁ
sappītikanti. Āmantā. Tatiyaṁ jhānaṁ sappītikanti. Na hevaṁ
vattabbe .pe. Dutiyā jhānā tatiyaṁ jhānaṁ saṅkamatīti. Āmantā.
Taññeva dutiyaṁ jhānaṁ taṁ tatiyaṁ jhānanti. Na hevaṁ
vattabbe .pe.

[1753] Tatiyā jhānā catutthaṁ jhānaṁ saṅkamatīti. Āmantā.
Yā tatiyassa jhānassa uppādāya āvajjanā .pe. Paṇidhi sāva
catutthassa jhānassa uppādāya āvajjanā .pe. Paṇidhīti. Na
hevaṁ vattabbe .pe. Tatiyā jhānā catutthaṁ jhānaṁ saṅkamatīti. Na
vattabbaṁ yā tatiyassa jhānassa uppādāya āvajjanā .pe.
Paṇidhi sāva catutthassa jhānassa uppādāya āvajjanā .pe.
Paṇidhīti. Āmantā. Catutthaṁ jhānaṁ anāvajjantassa uppajjati
.pe. Apaṇidahantassa uppajjatīti. Na hevaṁ vattabbe .pe.
Nanu catutthaṁ jhānaṁ āvajjantassa uppajjati .pe. Paṇidahantassa
uppajjatīti. Āmantā. Hañci catutthaṁ jhānaṁ āvajjantassa
uppajjati .pe. Paṇidahantassa uppajjati no vata re vattabbe
tatiyā jhānā catutthaṁ jhānaṁ saṅkamatīti. Tatiyā jhānā catutthaṁ
jhānaṁ saṅkamatīti. Āmantā. Tatiyaṁ jhānaṁ pītiṁ ādīnavato
manasikaroto uppajjatīti. Āmantā. Catutthaṁ jhānaṁ pītiṁ ādīnavato
manasikaroto uppajjatīti. Na hevaṁ vattabbe .pe. Tatiyaṁ jhānaṁ
sukhasahagatanti. Āmantā. Catutthaṁ jhānaṁ sukhasahagatanti. Na
hevaṁ vattabbe .pe. Tatiyā jhānā catutthaṁ jhānaṁ saṅkamatīti.
Āmantā. Taññeva tatiyaṁ jhānaṁ taṁ catutthaṁ jhānanti. Na hevaṁ
vattabbe .pe.

[1754] Na vattabbaṁ jhānā jhānaṁ saṅkamatīti. Āmantā.
Nanu vuttaṁ bhagavatā idha bhikkhave bhikkhu vivicceva kāmehi .pe.
Catutthaṁ jhānaṁ upasampajja viharatīti attheva suttantoti. Āmantā.
Tenahi jhānā jhānaṁ saṅkamatīti.
Jhānasaṅkantikathā.
--------
Jhānantarikakathā

[1755] Atthi jhānantarikāti. Āmantā. Atthi phassantarikā
.pe. Atthi paññantarikāti. Na hevaṁ vattabbe .pe. Atthi
jhānantarikāti. Āmantā. Dutiyassa ca jhānassa tatiyassa ca
jhānassa antare atthi jhānantarikāti. Na hevaṁ vattabbe .pe.
Atthi jhānantarikāti. Āmantā. Tatiyassa ca jhānassa catutthassa ca
jhānassa antare atthi jhānantarikāti. Na hevaṁ vattabbe .pe.

[1756] Dutiyassa ca jhānassa tatiyassa ca jhānassa antare
natthi jhānantarikāti. Āmantā. Hañci dutiyassa ca jhānassa
tatiyassa ca jhānassa antare natthi jhānantarikā no vata re vattabbe
atthi jhānantarikāti. Tatiyassa ca jhānassa catutthassa ca jhānassa
antare natthi jhānantarikāti. Āmantā. Hañci tatiyassa ca
jhānassa catutthassa ca jhānassa antare natthi jhānantarikā no
vata re vattabbe atthi jhānantarikāti.