[1767] Cakkhunā rūpaṁ passatīti. Āmantā. Rūpena rūpaṁ
passatīti. Na hevaṁ vattabbe .pe. Rūpena rūpaṁ passatīti. Āmantā.
Rūpena rūpaṁ paṭivijānātīti. Na hevaṁ vattabbe .pe. Rūpena rūpaṁ
paṭivijānātīti. Āmantā. Rūpaṁ manoviññāṇanti. Na hevaṁ vattabbe
.pe. Cakkhunā rūpaṁ passatīti. Āmantā. Atthi cakkhussa āvajjanā
.pe. Paṇidhīti. Na hevaṁ vattabbe .pe. Nanu natthi cakkhussa
āvajjanā .pe. Paṇidhīti. Āmantā. Hañci natthi cakkhussa
āvajjanā .pe. Paṇidhi no vata re vattabbe cakkhunā rūpaṁ passatīti.

[1768] Sotena saddaṁ suṇātīti .pe. Ghānena gandhaṁ ghāyatīti
.pe. Jivhāya rasaṁ sāyatīti .pe.
1. Ma. Yu. vutto.

[1769] Kāyena phoṭṭhabbaṁ phusatīti. Āmantā. Rūpena rūpaṁ
phusatīti. Na hevaṁ vattabbe .pe. Rūpena rūpaṁ phusatīti. Āmantā.
Rūpena rūpaṁ paṭivijānātīti. Na hevaṁ vattabbe .pe. Rūpena rūpaṁ
paṭivijānātīti. Āmantā. Rūpaṁ manoviññāṇanti. Na hevaṁ
vattabbe .pe. Kāyena phoṭṭhabbaṁ phusatīti. Āmantā. Atthi
kāyassa āvajjanā .pe. Paṇidhīti. Na hevaṁ vattabbe .pe.
Nanu natthi kāyassa āvajjanā .pe. Paṇidhīti. Āmantā.
Hañci natthi kāyassa āvajjanā .pe. Paṇidhi no vata re
vattabbe kāyena phoṭṭhabbaṁ phusatīti .pe.

[1770] Na vattabbaṁ cakkhunā rūpaṁ passati .pe. Kāyena
phoṭṭhabbaṁ phusatīti. Āmantā. Nanu vuttaṁ bhagavatā idha bhikkhave
bhikkhu cakkhunā rūpaṁ passati .pe. Kāyena phoṭṭhabbaṁ phusatīti
attheva suttantoti. Āmantā. Tena hi cakkhunā rūpaṁ passati
.pe. Kāyena phoṭṭhabbaṁ phusatīti.
Cakkhunā rūpaṁ passatītikathā.
Aṭṭhārasamo vaggo.
Tassa uddānaṁ
buddho bhagavā manussaloke aṭṭhāsi buddhena
bhagavatā dhammo desito natthi buddhassa bhagavato
karuṇā buddhassa bhagavato uccārapassāvo
Ativiya aññe gandhajāte adhiggaṇhāti
ekena ariyamaggena cattāri sāmaññaphalāni
sacchikaroti jhānā jhānaṁ saṅkamati atthi
jhānantarikā samāpanno saddaṁ suṇāti
cakkhunā rūpaṁ passati kāyena phoṭṭhabbaṁ phusatīti.
----------
Kilesajahanakathā

[1771] Atīte kilese jahatīti. Āmantā. Niruddhaṁ nirodheti
vigataṁ vigameti khīṇaṁ khepeti atthaṅgataṁ atthaṅgameti abbhatthaṅgataṁ
abbhatthaṅgametīti. Na hevaṁ vattabbe .pe. Atīte kilese jahatīti.
Āmantā. Nanu atītaṁ niruddhanti. Āmantā. Hañci atītaṁ niruddhaṁ
no vata re vattabbe atīte kilese jahatīti. Atīte kilese jahatīti.
Āmantā. Nanu atītaṁ natthīti. Āmantā. Hañci atītaṁ natthi
no vata re vattabbe atīte kilese jahatīti.

[1772] Anāgate kilese jahatīti. Āmantā. Ajātaṁ
ajaneti asañjātaṁ asañjaneti anibbattaṁ anibbatteti apātubhūtaṁ
apātubhāvetīti. Na hevaṁ vattabbe .pe. Anāgate kilese
jahatīti. Āmantā. Nanu anāgataṁ ajātanti. Āmantā.
Hañci anāgataṁ ajātaṁ no vata re vattabbe anāgate kilese
Jahatīti. Anāgate kilese jahatīti. Āmantā. Nanu anāgataṁ
natthīti. Āmantā. Hañci anāgataṁ natthi no vata re vattabbe
anāgate kilese jahatīti.

[1773] Paccuppanne kilese jahatīti. Āmantā. Ratto rāgaṁ
jahati duṭṭho dosaṁ jahati mūḷho mohaṁ jahati kiliṭṭho kilese
jahatīti. Na hevaṁ vattabbe .pe. Rāgena rāgaṁ jahati dosena
dosaṁ jahati mohena mohaṁ jahati kilesehi kilese jahatīti.
Na hevaṁ vattabbe .pe. Rāgo cittasampayutto maggo cittasampayuttoti.
Āmantā. Dvinnaṁ phassānaṁ .pe. Dvinnaṁ cittānaṁ
samodhānaṁ hotīti. Na hevaṁ vattabbe .pe. Rāgo akusalo maggo
kusaloti. Āmantā. Kusalākusalā sāvajjānavajjā hīnappaṇītā
kaṇhasukkasappaṭibhāgā dhammā sammukhībhāvaṁ āgacchantīti. Na hevaṁ
vattabbe .pe. Kusalākusalā .pe. Sappaṭibhāgā dhammā sammukhībhāvaṁ
āgacchantīti. Āmantā. Nanu vuttaṁ bhagavatā cattārīmāni
bhikkhave suvidūravidūrāni. Katamāni cattāri. Nabhañca bhikkhave paṭhavī ca
idaṁ paṭhamaṁ suvidūravidūraṁ .pe. Tasmā sataṁ dhammo asabbhi ārakāti
attheva suttantoti. Āmantā. Tena hi na vattabbaṁ kusalākusalā
.pe. Sammukhībhāvaṁ āgacchantīti.

[1774] Na vattabbaṁ atīte kilese jahati anāgate kilese
jahati paccuppanne kilese jahatīti. Āmantā. Natthi kilese
Jahatīti. Na hevaṁ vattabbe .pe. Tena hi atīte kilese jahati
anāgate kilese jahati paccuppanne kilese jahatīti.
Kilesajahanakathā.
---------
Suññatākathā

[1775] Suññatā saṅkhārakkhandhapariyāpannāti. Āmantā.
Animittaṁ saṅkhārakkhandhapariyāpannanti. Na hevaṁ vattabbe .pe.
Suññatā saṅkhārakkhandhapariyāpannāti. Āmantā. Appaṇihito
saṅkhārakkhandhapariyāpannoti. Na hevaṁ vattabbe .pe. Animittaṁ
na vattabbaṁ saṅkhārakkhandhapariyāpannanti. Āmantā. Suññatā
na vattabbā saṅkhārakkhandhapariyāpannāti. Na hevaṁ vattabbe .pe.
Appaṇihito na vattabbo saṅkhārakkhandhapariyāpannoti. Āmantā.
Suññatā na vattabbā saṅkhārakkhandhapariyāpannāti. Na hevaṁ vattabbe
.pe. Suññatā saṅkhārakkhandhapariyāpannāti. Āmantā. Saṅkhārakkhandho
na anicco na saṅkhato na paṭiccasamuppanno. Khayadhammo
na vayadhammo na virāgadhammo na nirodhadhammo na vipariṇāmadhammoti.
Na hevaṁ vattabbe .pe. Nanu saṅkhārakkhandho anicco saṅkhato
paṭiccasamuppanno khayadhammo vayadhammo virāgadhammo nirodhadhammo
vipariṇāmadhammoti. Āmantā. Hañci saṅkhārakkhandho anicco
.pe. Vipariṇāmadhammo no vata re vattabbe suññatā
saṅkhārakkhandhapariyāpannāti.

[1776] Rūpakkhandhassa suññatā saṅkhārakkhandhapariyāpannāti.
Āmantā. Saṅkhārakkhandhassa suññatā rūpakkhandhapariyāpannāti.
Na hevaṁ vattabbe .pe. Vedanākkhandhassa .pe. Saññākkhandhassa
.pe. Viññāṇakkhandhassa suññatā saṅkhārakkhandhapariyāpannāti.
Āmantā. Saṅkhārakkhandhassa suññatā viññāṇakkhandhapariyāpannāti.
Na hevaṁ vattabbe .pe.