[1727] Na vattabbaṁ buddhassa dinnaṁ mahapphalanti. Āmantā.
Atthi koci buddhena samasamo sīlena samādhinā paññāyāti.
Natthi. Hañci natthi koci buddhena samasamo sīlena samādhinā
paññāya tena vata re vattabbe buddhassa dinnaṁ mahapphalanti.

[1728] Na vattabbaṁ buddhassa dinnaṁ mahapphalanti. Āmantā.
Nanu vuttaṁ bhagavatā
na yimasmiṁ vā lokasmiṁ parasmiṁ vā pana
buddhena seṭṭho ca samo ca vijjati
yamāhuneyyānaṁ aggataṁ gato
puññatthikānaṁ vipulaphalesinanti
attheva suttantoti. Āmantā. Tena hi buddhassa dinnaṁ mahapphalanti.
Na vattabbaṁ buddhassa dinnaṁ mahapphalantikathā.
--------------
Dakkhiṇāvisuddhikathā

[1729] Dāyakatova dānaṁ visujjhati no paṭiggāhakatoti.
Āmantā. Nanu atthi keci paṭiggāhakā āhuneyyā pāhuneyyā
dakkhiṇeyyā añjalīkaraṇīyā anuttaraṁ puññakkhettaṁ lokassāti.
Āmantā. Hañci atthi keci paṭiggāhakā āhuneyyā pāhuneyyā
dakkhiṇeyyā añjalīkaraṇīyā anuttaraṁ puññakkhettaṁ lokassa no
vata re vattabbe dāyakatova dānaṁ visujjhati no paṭiggāhakatoti.

[1730] Dāyakatova dānaṁ visujjhati no paṭiggāhakatoti.
Āmantā. Nanu cattāro purisayugā aṭṭha purisapuggalā dakkhiṇeyyā
vuttā bhagavatāti. Āmantā. Hañci cattāro purisayugā aṭṭha
purisapuggalā dakkhiṇeyyā vuttā bhagavatā no vata re vattabbe
dāyakatova dānaṁ visujjhati no paṭiggāhakatoti.

[1731] Dāyakatova dānaṁ visujjhati no paṭiggāhakatoti.
Āmantā. Nanu atthi keci sotāpanne dānaṁ datvā dakkhiṇaṁ
ārādhentīti. Āmantā. Hañci atthi keci sotāpanne
dānaṁ datvā dakkhiṇaṁ ārādhenti no vata re vattabbe dāyakatova
dānaṁ visujjhati no paṭiggāhakatoti. Nanu atthi keci sakadāgāmissa
.pe. Anāgāmissa .pe. Arahato dānaṁ datvā dakkhiṇaṁ
ārādhentīti. Āmantā. Hañci atthi keci arahato dānaṁ
datvā dakkhiṇaṁ ārādhenti no vata re vattabbe dāyakatova
dānaṁ visujjhati no paṭiggāhakatoti.

[1732] Paṭiggāhakatova dānaṁ visujjhati no dāyakatoti.
Āmantā. Añño aññassa kārako parakataṁ sukhadukkhaṁ añño
karoti añño paṭisaṁvedetīti. Na hevaṁ vattabbe .pe.
Dāyakatova dānaṁ visujjhati no paṭiggāhakatoti. Āmantā.
Nanu vuttaṁ bhagavatā catasso kho imā ānanda dakkhiṇāvisuddhiyo.
Katamā catasso. Atthānanda dakkhiṇā dāyakato visujjhati no
paṭiggāhakato atthānanda dakkhiṇā paṭiggāhakato visujjhati no
Dāyakato atthānanda dakkhiṇā neva dāyakato visujjhati no
paṭiggāhakato atthānanda dakkhiṇā dāyakato ceva visujjhati
paṭiggāhakato ca kathañcānanda dakkhiṇā dāyakato visujjhati no
paṭiggāhakato idhānanda dāyako hoti sīlavā kalyāṇadhammo
paṭiggāhakā honti dussīlā pāpadhammā evaṁ kho ānanda
dakkhiṇā dāyakato visujjhati no paṭiggāhakato kathañcānanda
dakkhiṇā paṭiggāhakato visujjhati no dāyakato idhānanda dāyako
hoti dussīlo pāpadhammo paṭiggāhakā honti sīlavanto kalyāṇa
dhammā evaṁ kho ānanda dakkhiṇā paṭiggāhakato visujjhati no
dāyakato kathañcānanda dakkhiṇā neva dāyakato visujjhati no
paṭiggāhakato idhānanda dāyako ca hoti dussīlo pāpadhammo
paṭiggāhakā ca honti dussīlā pāpadhammā evaṁ kho ānanda
dakkhiṇā neva dāyakato visujjhati no paṭiggāhakato kathañcānanda
dakkhiṇā dāyakato ceva visujjhati paṭiggāhakato ca idhānanda
dāyako ca hoti sīlavā kalyāṇadhammo paṭiggāhakā ca honti
sīlavanto kalyāṇadhammā evaṁ kho ānanda dakkhiṇā dāyakato
ceva visujjhati paṭiggāhakato ca imā kho ānanda catasso
dakkhiṇāvisuddhiyoti 1 attheva suttantoti. Āmantā. Tena hi
na vattabbaṁ dāyakatova dānaṁ visujjhati no paṭiggāhakatoti.
Dakkhiṇāvisuddhikathā.
1 Ma. u. 421.
Sattarasamo vaggo.
Tassa uddānaṁ
atthi arahato puññūpacayo natthi arahato akālamaccu
sabbamidaṁ kammato indriyabaddhaññeva
dukkhaṁ ṭhapetvā ariyamaggaṁ avasesā saṅkhārā dukkhā
saṅgho dakkhiṇaṁ paṭiggaṇhāti saṅgho dakkhiṇaṁ
visodheti saṅgho bhuñjati pivati khādati sāyati
saṅghassa dinnaṁ mahapphalaṁ atthi dānaṁ visujjhatīti.
-----------
Manussalokakathā

[1733] Na vattabbaṁ buddho bhagavā manussaloke aṭṭhāsīti.
Āmantā. Nanu atthi buddhavutthāni cetiyāni ārāma vihāra gāmanigamanagarāni
raṭṭhāni janapadānīti. Āmantā. Hañci atthi buddhavutthāni
cetiyāni ārāmavihāragāmanigamanagarāni raṭṭhāni janapadāni
tena vata re vattabbe buddho bhagavā manussaloke aṭṭhāsīti.

[1734] Na vattabbaṁ buddho bhagavā manussaloke aṭṭhāsīti.
Āmantā. Nanu bhagavā lumbiniyā jāto bodhiyā mūle abhisambuddho
bārāṇasiyaṁ bhagavatā dhammacakkaṁ pavattitaṁ pāvāle cetiye āyusaṅkhāro
ossaṭṭho kusinārāyaṁ bhagavā parinibbutoti. Āmantā.
Hañci bhagavā lumbiniyā jāto .pe. Kusinārāyaṁ bhagavā parinibbuto
tena vata re vattabbe buddho bhagavā manussaloke aṭṭhāsīti.

[1735] Na vattabbaṁ buddho bhagavā manussaloke aṭṭhāsīti.
Āmantā. Nanu vuttaṁ bhagavatā ekamidāhaṁ bhikkhave samayaṁ
ukkaṭṭhāyaṁ viharāmi subhagavane sālarājamūleti ekamidāhaṁ bhikkhave
samayaṁ uruvelāyaṁ viharāmi ajapālanigrodhe paṭhamābhisambuddhoti ekamidāhaṁ
bhikkhave samayaṁ rājagahe viharāmi veḷuvane kalandakanivāpeti
ekamidāhaṁ bhikkhave samayaṁ sāvatthiyaṁ viharāmi jetavane anāthapiṇḍikassa
ārāmeti ekamidāhaṁ bhikkhave samayaṁ vesāliyaṁ viharāmi mahāvane
kuṭāgārasālāyanti attheva suttantoti. Āmantā. Tena hi
buddho bhagavā manussaloke aṭṭhāsīti.

[1736] Buddho bhagavā manussaloke aṭṭhāsīti. Āmantā.
Nanu bhagavā loke jāto loke saṁvaḍḍho lokaṁ abhibhuyya viharati
anupalitto lokenāti. Āmantā. Hañci bhagavā loke jāto
loke saṁvaḍḍho lokaṁ abhibhuyya viharati anupalitto lokena no vata
re vattabbe buddho bhagavā manussaloke aṭṭhāsīti.
Manussalokakathā.
------------
Dhammadesanākathā