[1717] Saṅgho dakkhiṇaṁ visodhetīti. Āmantā. Maggo
visodheti phalaṁ visodhetīti. Na hevaṁ vattabbe .pe.
Na vattabbaṁ saṅgho dakkhiṇaṁ visodhetītikathā.
------------
Na vattabbaṁ saṅgho bhuñjatītikathā

[1718] Na vattabbaṁ saṅgho bhuñjati pivati khādati sāyatīti.
Āmantā. Nanu atthi keci saṅghabhattāni karonti uddesabhattāni
karonti yāgupānāni karontīti. Āmantā. Hañci atthi
keci saṅghabhattāni karonti uddesabhattāni karonti yāgupānāni
karonti tena vata re vattabbe saṅgho bhuñjati pivati khādati sāyatīti.

[1719] Na vattabbaṁ saṅgho bhuñjati pivati khādati sāyatīti.
Āmantā. Nanu vuttaṁ bhagavatā gaṇabhojanaṁ paramparabhojanaṁ atirittabhojanaṁ
anatirittabhojananti. Āmantā. Hañci vuttaṁ bhagavatā
gaṇabhojanaṁ paramparabhojanaṁ atirittabhojanaṁ anatirittabhojanaṁ tena vata
re vattabbe saṅgho bhuñjati pivati khādati sāyatīti.

[1720] Na vattabbaṁ saṅgho bhuñjati pivati khādati sāyatīti.
Āmantā. Nanu aṭṭha pānāni vuttāni bhagavatā ambapānaṁ
Jambupānaṁ cocapānaṁ mocapānaṁ madhupānaṁ muddikapānaṁ sālukapānaṁ
phārusakapānanti. Āmantā. Hañci aṭṭha pānāni vuttāni
bhagavatā ambapānaṁ jambupānaṁ cocapānaṁ mocapānaṁ madhupānaṁ muddikapānaṁ
sālukapānaṁ phārusakapānaṁ tena vata re vattabbe saṅgho bhuñjati
pivati khādati sāyatīti.

[1721] Saṅgho bhuñjati pivati khādati sāyatīti. Āmantā.
Maggo bhuñjati pivati khādati sāyati phalaṁ bhuñjati pivati khādati
sāyatīti. Na hevaṁ vattabbe .pe.
Na vattabbaṁ saṅgho bhuñjatītikathā.
-----------
Na vattabbaṁ saṅghassadinnaṁ mahapphalantikathā

[1722] Na vattabbaṁ saṅghassa dinnaṁ mahapphalanti. Āmantā.
Nanu saṅgho āhuneyyo pāhuneyyo dakkhiṇeyyo añjalīkaraṇīyo
anuttaraṁ puññakkhettaṁ lokassāti. Āmantā. Hañci saṅgho
āhuneyyo pāhuneyyo .pe. Anuttaraṁ puññakkhettaṁ lokassa
tena vata re vattabbe saṅghassa dinnaṁ mahapphalanti.

[1723] Na vattabbaṁ saṅghassa dinnaṁ mahapphalanti. Āmantā.
Nanu cattāro purisayugā aṭṭha purisapuggalā dakkhiṇeyyā vuttā
bhagavatāti. Āmantā. Hañci cattāro purisayugā aṭṭha
Purisapuggalā dakkhiṇeyyā vuttā bhagavatā tena vata re vattabbe
saṅghassa dinnaṁ mahapphalanti.

[1724] Na vattabbaṁ saṅghassa dinnaṁ mahapphalanti. Āmantā.
Nanu vuttaṁ bhagavatā saṅghe gotami dehi saṅghe te dinne
ahañceva pūjito bhavissāmi saṅgho cāti 1 attheva suttantoti.
Āmantā. Tena hi saṅghassa dinnaṁ mahapphalanti.

[1725] Na vattabbaṁ saṅghassa dinnaṁ mahapphalanti. Āmantā.
Nanu sakko devānamindo bhagavantaṁ etadavoca
yajamānānaṁ manussānaṁ puññapekkhāna pāṇinaṁ
karotaṁ opadhikaṁ puññaṁ kattha dinnaṁ mahapphalanti
cattāro ca paṭipannā cattāro ca phale ṭhitā
esa saṅgho ujubhūto paññāsīlasamāhito
yajamānānaṁ manussānaṁ puññapekkhāna pāṇinaṁ
karotaṁ opadhikaṁ puññaṁ saṅghe dinnaṁ mahapphalanti 2
eso hi saṅgho vipulo mahaggato
esappameyyo udadhīva sāgaro
ete hi seṭṭhā naravīrasāvakā
pabhaṅkarā dhammamudīrayanti
tesaṁ sudinnaṁ suhutaṁ suyiṭṭhaṁ
ye saṅghamuddissa dadanti dānaṁ
1 Ma. u. 416. 2 saṁ. sagātha. 295.
Sā dakkhiṇā saṅghagatā patiṭṭhitā
mahapphalā lokavidūna vaṇṇitā
etādisaṁ yaññamanussarantā
ye vedajātā vicaranti loke
vineyya maccheramalaṁ samūlaṁ
aninditā saggamupenti ṭhānanti
attheva suttantoti. Āmantā. Tena hi saṅghassa dinnaṁ mahapphalanti.
Na vattabbaṁ saṅghassa dinnaṁ mahapphalantikathā.
---------------
Na vattabbaṁ buddhassa dinnaṁ mahapphalantikathā

[1726] Na vattabbaṁ buddhassa dinnaṁ mahapphalanti. Āmantā.
Nanu bhagavā dipadānaṁ aggo dipadānaṁ seṭṭho dipadānaṁ pamokkho
dipadānaṁ uttamo dipadānaṁ pavaro asamo asamasamo appaṭisamo
appaṭibhāgo appaṭipuggaloti. Āmantā. Hañci bhagavā dipadānaṁ
aggo dipadānaṁ seṭṭho dipadānaṁ pamokkho dipadānaṁ uttamo
dipadānaṁ pavaro asamo asamasamo appaṭisamo appaṭibhāgo appaṭipuggalo
tena vata re vattabbe buddhassa dinnaṁ mahapphalanti.