[1697] Arahato kāye visaṁ na kameyya satthaṁ na kameyya
aggi na kameyyāti. Āmantā. Natthi arahantaghātakoti. Na hevaṁ
vattabbe .pe.

[1698] Atthi arahato akālamaccūti. Āmantā. Nanu vuttaṁ
bhagavatā nāhaṁ bhikkhave sañcetanikānaṁ kammānaṁ katānaṁ upacitānaṁ
appaṭisaṁveditvā byantībhāvaṁ vadāmi tañca kho diṭṭheva dhamme
upapajje vā apare vā pariyāyeti attheva suttantoti. Āmantā.
Tena hi natthi arahato akālamaccūti.
Natthi arahato akālamaccūtikathā.
------------------
Sabbamidaṁ kammatotikathā

[1699] Sabbamidaṁ kammatoti. Āmantā. Kammampi kammatoti.
Na hevaṁ vattabbe .pe. Sabbamidaṁ kammatoti. Āmantā. Sabbamidaṁ
pubbekatahetūti. Na hevaṁ vattabbe .pe. Sabbamidaṁ kammatoti.
Āmantā. Sabbamidaṁ kammavipākatoti. Na hevaṁ vattabbe .pe.
Sabbamidaṁ kammavipākatoti. Āmantā. Kammavipākena pāṇaṁ
haneyyāti. Āmantā. Pāṇātipāto saphaloti. Āmantā.
Kammavipāko saphaloti. Na hevaṁ vattabbe .pe. Kammavipāko
aphaloti. Āmantā. Pāṇātipāto aphaloti. Na hevaṁ vattabbe
.pe. Kammavipākena adinnaṁ ādiyeyya .pe. Musā bhaṇeyya pisuṇaṁ
bhaṇeyya pharusaṁ bhaṇeyya samphaṁ palapeyya sandhiṁ chindeyya nillopaṁ
hareyya ekāgārikaṁ kareyya paripanthe tiṭṭheyya paradāraṁ gaccheyya
Gāmaghātakaṁ kareyya nigamaghātakaṁ kareyya kammavipākena dānaṁ dadeyya
cīvaraṁ dadeyya piṇḍapātaṁ dadeyya senāsanaṁ dadeyya gilānapaccayabhesajjaparikkhāraṁ
dadeyyāti. Āmantā. Gilānapaccayabhesajjaparikkhāro
saphaloti. Āmantā. Kammavipāko saphaloti. Na hevaṁ vattabbe
.pe. Kammavipāko aphaloti. Āmantā. Gilānapaccayabhesajjaparikkhāro
aphaloti. Na hevaṁ vattabbe .pe.

[1700] Na vattabbaṁ sabbamidaṁ kammatoti. Āmantā. Nanu
vuttaṁ bhagavatā
kammunā vattatī loko kammunā vattatī pajā
kammanibandhanā sattā rathassāṇīva yāyato 1
kammena kittiṁ labhate pasaṁsaṁ
kammena jāniñca vadhañca bandhaṁ
taṁ kammaṁ nānākaraṇaṁ viditvā
kasmā vade natthi kammanti loketi
attheva suttantoti. Āmantā. Tena hi sabbamidaṁ kammatoti.
Sabbamidaṁ kammatotikathā.
---------------
Indriyabaddhakathā

[1701] Indriyabaddhaññeva dukkhanti. Āmantā. Indriyabaddhaññeva
1 khu. su. 372.
Baddhaññeva aniccaṁ saṅkhataṁ paṭiccasamuppannaṁ khayadhammaṁ vayadhammaṁ virāgadhammaṁ
nirodhadhammaṁ vipariṇāmadhammanti. Na hevaṁ vattabbe .pe.
Nanu anindriyabaddhaṁ aniccaṁ saṅkhataṁ paṭiccasamuppannaṁ khayadhammaṁ vayadhammaṁ
virāgadhammaṁ nirodhadhammaṁ vipariṇāmadhammanti. Āmantā. Hañci
anindriyabaddhaṁ aniccaṁ saṅkhataṁ paṭiccasamuppannaṁ khayadhammaṁ vayadhammaṁ
virāgadhammaṁ nirodhadhammaṁ vipariṇāmadhammaṁ no vata re vattabbe
indriyabaddhaññeva dukkhanti.

[1702] Anindriyabaddhaṁ aniccaṁ saṅkhataṁ paṭiccasamuppannaṁ .pe.
Vipariṇāmadhammaṁ tañca na dukkhanti. Āmantā. Indriyabaddhaṁ
aniccaṁ saṅkhataṁ .pe. Vipariṇāmadhammaṁ tañca na dukkhanti. Na
hevaṁ vattabbe .pe. Indriyabaddhaṁ aniccaṁ saṅkhataṁ .pe. Vipariṇāmadhammaṁ
tañca dukkhanti. Āmantā. Anindriyabaddhaṁ aniccaṁ saṅkhataṁ
.pe. Vipariṇāmadhammaṁ tañca dukkhanti. Na hevaṁ vattabbe .pe.

[1703] Indriyabaddhaññeva dukkhanti. Āmantā. Nanu yadaniccaṁ
taṁ dukkhaṁ vuttaṁ bhagavatā anindriyabaddhaṁ aniccanti. Āmantā.
Hañci yadaniccaṁ taṁ dukkhaṁ vuttaṁ bhagavatā anindriyabaddhaṁ aniccaṁ
no vata re vattabbe indriyabaddhaññeva dukkhanti.

[1704] Na vattabbaṁ indriyabaddhaññeva dukkhanti. Āmantā.
Yathā indriyabaddhassa dukkhassa pariññāya bhagavati brahmacariyaṁ vussati
evameva anindriyabaddhassa dukkhassa pariññāya bhagavati brahmacariyaṁ
Vussatīti. Na hevaṁ vattabbe .pe. Yathā indriyabaddhaṁ dukkhaṁ
pariññātaṁ na puna uppajjati evameva anindriyabaddhaṁ dukkhaṁ
pariññātaṁ na puna uppajjatīti. Na hevaṁ vattabbe .pe. Tena hi
indriyabaddhaññeva dukkhanti.
Indriyabaddhakathā.
-------------
Ṭhapetvā ariyamaggantikathā

[1705] Ṭhapetvā ariyamaggaṁ avasesā saṅkhārā dukkhāti.
Āmantā. Dukkhasamudayopi dukkhoti. Na hevaṁ vattabbe .pe.
Dukkhasamudayopi dukkhoti. Āmantā. Tīṇeva ariyasaccānīti.
Na hevaṁ vattabbe .pe. Tīṇeva ariyasaccānīti. Āmantā.
Nanu cattāri ariyasaccāni vuttāni bhagavatā dukkhaṁ dukkhasamudayo
dukkhanirodho dukkhanirodhagāminī paṭipadāti. Āmantā. Hañci cattāri
ariyasaccāni vuttāni bhagavatā dukkhaṁ dukkhasamudayo dukkhanirodho dukkhanirodhagāminī
paṭipadā no vata re vattabbe tīṇeva ariyasaccānīti.

[1706] Dukkhasamudayopi dukkhoti. Āmantā. Kenaṭṭhenāti.
Aniccaṭṭhenāti. Ariyamaggo aniccoti. Āmantā. Ariyamaggo
dukkhoti. Na hevaṁ vattabbe .pe. Ariyamaggo anicco so ca na
dukkhoti. Āmantā. Dukkhasamudayo anicco so ca na dukkhoti.
Na hevaṁ vattabbe .pe. Dukkhasamudayo anicco so ca dukkhoti.
Āmantā. Ariyamaggo anicco so ca dukkhoti. Na hevaṁ
vattabbe .pe.