[1687] Saddarāgo na vattabbaṁ saddadhātupariyāpannoti.
Āmantā. Arūparāgo na vattabbaṁ arūpadhātupariyāpannoti. Na
hevaṁ vattabbe .pe. Gandharāgo .pe. Rasarāgo .pe. Phoṭṭhabbarāgo
na vattabbaṁ phoṭṭhabbadhātupariyāpannoti. Āmantā.
Arūparāgo na vattabbaṁ arūpadhātupariyāpannoti. Na hevaṁ vattabbe .pe.

[1688] Na vattabbaṁ rūparāgo rūpadhātupariyāpanno arūparāgo
arūpadhātupariyāpannoti. Āmantā. Nanu kāmarāgo
kāmadhātupariyāpanno. Āmantā. Hañci kāmarāgo kāmadhātupariyāpanno
tena vata re vattabbe rūparāgo rūpadhātupariyāpanno
arūparāgo arūpadhātupariyāpannoti.
Rūparāgo rūpadhātupariyāpanno arūparāgo arūpadhātupariyāpannotikathā.
Soḷasamo vaggo.
Tassa uddānaṁ
cittaniggaho cittapaggaho sukhānuppadānaṁ
adhiggayhamanasikāro rūpaṁ hetu rūpaṁ sahetukaṁ
rūpaṁ kusalampi akusalampi rūpaṁ vipāko
Atthi rūpaṁ rūpāvacaraṁ atthi rūpaṁ arūpāvacaraṁ
sabbe kilesā kāmadhātupariyāpannāti.
--------------
Atthi arahato puññūpacayotikathā

[1689] Atthi arahato puññūpacayoti. Āmantā. Atthi
arahato apuññūpacayoti. Na hevaṁ vattabbe .pe. Natthi arahato
apuññūpacayoti. Āmantā. Natthi arahato puññūpacayoti.
Na hevaṁ vattabbe .pe.

[1690] Atthi arahato puññūpacayoti. Āmantā. Arahā
puññābhisaṅkhāraṁ abhisaṅkharoti āneñjābhisaṅkhāraṁ abhisaṅkharoti gatisaṁvattaniyaṁ
kammaṁ karoti bhavasaṁvattaniyaṁ kammaṁ karoti issariyasaṁvattaniyaṁ
kammaṁ karoti adhipaccasaṁvattaniyaṁ kammaṁ karoti mahābhogasaṁvattaniyaṁ
kammaṁ karoti mahāparivārasaṁvattaniyaṁ kammaṁ karoti
devasobhagyasaṁvattaniyaṁ kammaṁ karoti manussasobhagyasaṁvattaniyaṁ kammaṁ
karotīti. Na hevaṁ vattabbe .pe.

[1691] Atthi arahato puññūpacayoti. Āmantā. Arahā
ācinātīti. Na hevaṁ vattabbe .pe. Arahā apacinātīti. Na
hevaṁ vattabbe .pe. Arahā pajahatīti .pe. Arahā upādiyatīti
.pe. Arahā visinetīti .pe. Arahā ussinetīti .pe. Arahā
Vidhūpetīti .pe. Arahā sandhūpetīti. Na hevaṁ vattabbe .pe. Nanu
arahā nevācināti na apacināti apacinitvā ṭhitoti. Āmantā.
Hañci arahā nevācināti nāpacināti apacinitvā ṭhito no vata re
vattabbe atthi arahato puññūpacayoti.

[1692] Nanu arahā neva pajahati na upādiyati pajahitvā
ṭhito neva visineti na ussineti visinitvā ṭhito neva vidhūpeti
na sandhūpeti vidhūpetvā ṭhitoti. Āmantā. Hañci arahā neva
vidhūpeti na sandhūpeti vidhūpetvā ṭhito no vata re vattabbe
atthi arahato puññūpacayoti.

[1693] Natthi arahato puññūpacayoti. Āmantā. Arahā
dānaṁ dadeyyāti. Āmantā. Hañci arahā dānaṁ dadeyya no
vata re vattabbe natthi arahato puññūpacayoti.

[1694] Arahā cīvaraṁ dadeyya .pe. Piṇḍapātaṁ dadeyya
senāsanaṁ dadeyya gilānapaccayabhesajjaparikkhāraṁ dadeyya khādanīyaṁ
dadeyya bhojanīyaṁ dadeyya pānīyaṁ dadeyya cetiyaṁ vandeyya cetiye
mālaṁ āropeyya gandhaṁ āropeyya vilepanaṁ āropeyya .pe.
Cetiyaṁ abhidakkhiṇaṁ kareyyāti. Āmantā. Hañci arahā cetiyaṁ
abhidakkhiṇaṁ kareyya no vata re vattabbe natthi arahato puññūpacayoti.
Atthi arahato puññūpacayotikathā.
--------------
Natthi arahato akālamaccūtikathā

[1695] Natthi arahato akālamaccūti. Āmantā. Natthi
arahantaghātakoti. Na hevaṁ vattabbe .pe. Atthi arahantaghātakoti.
Āmantā. Atthi arahato akālamaccūti. Na hevaṁ vattabbe
.pe. Natthi arahato akālamaccūti. Āmantā. Yo arahantaṁ
jīvitā voropeti so sati jīvite jīvitāvasese jīvitā voropeti
asati jīvite jīvitāvasese jīvitā voropetīti. Sati jīvite jīvitāvasese
jīvitā voropetīti. Hañci sati jīvite jīvitāvasese jīvite voropeti
no vata re vattabbe natthi arahato akālamaccūti. Asati jīvite
jīvitāvasese jīvitā voropetīti. Natthi arahantaghātakoti. Na
hevaṁ vattabbe .pe.

[1696] Natthi arahato akālamaccūti. Āmantā. Arahato
kāye visaṁ na kameyya satthaṁ na kameyya aggi na kameyyāti.
Na hevaṁ vattabbe .pe. Nanu arahato kāye visaṁ kameyya satthaṁ
kameyya aggi kameyyāti. Āmantā. Hañci arahato kāye
visaṁ kameyya satthaṁ kameyya aggi kameyya no vata re vattabbe
natthi arahato akālamaccūti.