[1677] Rūpaṁ vipāko rūpaṁ na sukhavedaniyaṁ na dukkhavedaniyaṁ
.pe. Anārammaṇaṁ natthi tassa āvajjanā .pe. Paṇidhīti.
Āmantā. Phasso vipāko phasso na sukhavedaniyo na dukkhavedaniyo
.pe. Anārammaṇo natthi tassa āvajjanā .pe. Paṇidhīti.
Na hevaṁ vattabbe .pe.

[1678] Na vattabbe rūpaṁ vipākoti. Āmantā. Nanu kammassa
katattā uppannā cittacetasikā dhammā vipākoti. Āmantā.
Hañci kammassa katattā uppannā cittacetasikā dhammā vipāko
tena vata re vattabbe kammassa katattā uppannaṁ rūpaṁ vipākoti.
Rūpaṁ vipākotikathā.
--------------
Rūpaṁ rūpāvacarārūpāvacarantikathā

[1679] Atthi rūpaṁ rūpāvacaranti. Āmantā. Samāpattesiyaṁ
upapattesiyaṁ diṭṭhadhammasukhavihāraṁ samāpattesiyena cittena upapattesiyena
cittena diṭṭhadhammasukhavihārena cittena sahagataṁ sahajātaṁ saṁsaṭṭhaṁ
Sampayuttaṁ ekuppādaṁ ekanirodhaṁ ekavatthukaṁ ekārammaṇanti. Na hevaṁ
vattabbe .pe. Nanu na samāpattesiyaṁ na upapattesiyaṁ na diṭṭhadhammasukhavihāraṁ
na samāpattesiyena cittena upapattesiyena cittena diṭṭhadhammasukhavihārena
cittena sahagataṁ sahajātaṁ saṁsaṭṭhaṁ sampayuttaṁ ekuppādaṁ
ekanirodhaṁ ekavatthukaṁ ekārammaṇanti. Āmantā. Hañci
na samāpattesiyaṁ na upapattesiyaṁ na diṭṭhadhammasukhavihāraṁ na samāpattesiyena
cittena .pe. Ekārammaṇaṁ no vata re vattabbe atthi
rūpaṁ rūpāvacaranti.

[1680] Atthi rūpaṁ arūpāvacaranti. Āmantā. Samāpattesiyaṁ
upapattesiyaṁ diṭṭhadhammasukhavihāraṁ samāpattesiyena cittena
upapattesiyena cittena diṭṭhadhammasukhavihārena cittena sahagataṁ sahajātaṁ
saṁsaṭṭhaṁ sampayuttaṁ ekuppādaṁ ekanirodhaṁ ekavatthukaṁ ekārammaṇanti.
Na hevaṁ vattabbe .pe. Nanu na samāpattesiyaṁ na upapattesiyaṁ
na diṭṭhadhammasukhavihāraṁ na samāpattesiyena cittena .pe. Ekārammaṇanti.
Āmantā. Hañci na samāpattesiyaṁ na upapattesiyaṁ
.pe. Ekavatthukaṁ ekārammaṇaṁ no vata re vattabbe atthi
rūpaṁ arūpāvacaranti.

[1681] Na vattabbaṁ atthi rūpaṁ rūpāvacaraṁ atthi rūpaṁ arūpāvacaranti.
Āmantā. Nanu kāmāvacarakammassa katattā rūpaṁ kāmāvacaranti.
Āmantā. Hañci kāmāvacarakammassa katattā rūpaṁ
Kāmāvacaraṁ tena vata re vattabbe rūpāvacarakammassa katattā rūpaṁ
rūpāvacaraṁ arūpāvacarakammassa katattā rūpaṁ arūpāvacaranti.
Rūpaṁ rūpāvacarārūpāvacarantikathā.
------------
Rūparāgo rūpadhātupariyāpannotiādikathā

[1682] Rūparāgo rūpadhātupariyāpannoti. Āmantā.
Samāpattesiyo upapattesiyo diṭṭhadhammasukhavihāro samāpattesiyena
cittena upapattesiyena cittena diṭṭhadhammasukhavihārena cittena sahagato
sahajāto saṁsaṭṭho sampayutto ekuppādo ekanirodho ekavatthuko
ekārammaṇoti. Na hevaṁ vattabbe .pe. Nanu na samāpattesiyo na
upapattesiyo na diṭṭhadhammasukhavihāro na samāpattesiyena cittena
.pe. Ekavatthuko ekārammaṇoti. Āmantā. Hañci na
samāpattesiyo na upapattesiyo na diṭṭhadhammasukhavihāro na
samāpattesiyena cittena .pe. Ekavatthuko ekārammaṇo no vata
re vattabbe rūparāgo rūpadhātupariyāpannoti.

[1683] Rūparāgo rūpadhātupariyāpannoti. Āmantā. Saddarāgo
saddadhātupariyāpannoti. Na hevaṁ vattabbe .pe. Rūparāgo rūpadhātu-
pariyāpannoti. Āmantā. Gandharāgo .pe. Rasarāgo .pe.
Phoṭṭhabbarāgo phoṭṭhabbadhātupariyāpannoti. Na hevaṁ vattabbe .pe.

[1684] Saddarāgo na vattabbaṁ saddadhātupariyāpannoti.
Āmantā. Rūparāgo na vattabbaṁ rūpadhātupariyāpannoti. Na
hevaṁ vattabbe .pe. Gandharāgo .pe. Rasarāgo .pe. Phoṭṭhabbarāgo
na vattabbaṁ phoṭṭhabbadhātupariyāpannoti. Āmantā.
Rūparāgo na vattabbaṁ rūpadhātupariyāpannoti. Na hevaṁ vattabbe .pe.

[1685] Arūparāgo arūpadhātupariyāpannoti. Āmantā.
Arūparāgo na vattabbaṁ arūpadhātupariyāpannoti. Na hevaṁ vattabbe
.pe. Arūparāgo arūpadhātupariyāpannoti. Āmantā. Samāpattesiyo
upapattesiyo diṭṭhadhammasukhavihāro samāpattesiyena cittena
upapattesiyena cittena diṭṭhadhammasukhavihārena cittena sahagato
sahajāto saṁsaṭṭho sampayutto ekuppādo ekanirodho ekavatthuko
ekārammaṇoti. Na hevaṁ vattabbe .pe. Nanu na samāpattesiyo
na upapattesiyo na diṭṭhadhammasukhavihāro na samāpattesiyena
cittena .pe. Ekavatthuko ekārammaṇoti. Āmantā. Hañci
na samāpattesiyo na upapattesiyo na diṭṭhadhammasukhavihāro na
samāpattesiyena cittena na upapattesiyena cittena na diṭṭhadhammasukhavihārena
cittena sahagato sahajāto saṁsaṭṭho sampayutto ekuppādo
ekanirodho ekavatthuko ekārammaṇo no vata re vattabbe
arūparāgo arūpadhātupariyāpannoti.

[1686] Arūparāgo arūpadhātupariyāpannoti. Āmantā.
Saddarāgo saddadhātupariyāpannoti. Na hevaṁ vattabbe .pe.
Arūparāgo arūpadhātupariyāpannoti. Āmantā. Gandharāgo .pe.
Rasarāgo .pe. Phoṭṭhabbarāgo phoṭṭhabbadhātupariyāpannoti. Na
hevaṁ vattabbe .pe.