[1567] Na vattabbaṁ pañca viññāṇā aññamaññassa samanantarā
uppajjantīti. Āmantā. Nanu atthi koci naccati gāyati
vādeti rūpañca passati saddañca suṇāti gandhañca ghāyati
rasañca sāyati phoṭṭhabbañca phusatīti. Āmantā. Hañci atthi
koci naccati gāyati vādeti rūpañca passati saddañca suṇāti gandhañca
ghāyati rasañca sāyati phoṭṭhabbañca phusati tena vata re vattabbe
pañca viññāṇā aññamaññassa samanantarā uppajjantīti.
Anantarapaccayakathā.
--------------
Ariyarūpakathā

[1568] Ariyarūpaṁ mahābhūtānaṁ upādāyāti. Āmantā.
Ariyarūpaṁ kusalanti. Āmantā. Mahābhūtā kusalāti. Na hevaṁ
Vattabbe .pe. Mahābhūtā abyākatāti. Āmantā. Ariyarūpaṁ
abyākatanti. Na hevaṁ vattabbe .pe. Ariyarūpaṁ mahābhūtānaṁ upādāyāti.
Āmantā. Ariyarūpaṁ anāsavaṁ asaññojaniyaṁ aganthaniyaṁ
anoghaniyaṁ ayoganiyaṁ anīvaraṇiyaṁ aparāmaṭṭhaṁ anupādāniyaṁ asaṅkilesikanti.
Āmantā. Mahābhūtā anāsavā .pe. Asaṅkilesikāti.
Na hevaṁ vattabbe .pe. Mahābhūtā sāsavā saññojaniyā .pe.
Saṅkilesikāti. Āmantā. Ariyarūpaṁ sāsavaṁ saññojaniyaṁ .pe.
Saṅkilesikanti. Na hevaṁ vattabbe .pe.

[1569] Na vattabbaṁ ariyarūpaṁ mahābhūtānaṁ upādāyāti.
Āmantā. Nanu vuttaṁ bhagavatā yaṅkiñci bhikkhave rūpaṁ cattāri
mahābhūtāni catunnañca mahābhūtānaṁ upādāyarūpanti attheva suttantoti.
Āmantā. Tena hi ariyarūpaṁ mahābhūtānaṁ upādāyāti.
Ariyarūpakathā
----------
aññoanusayotikathā

[1570] Añño kāmarāgānusayo aññaṁ kāmarāgapariyuṭṭhānanti.
Āmantā. Añño kāmarāgo aññaṁ kāmarāgapariyuṭṭhānanti.
Na hevaṁ vattabbe .pe. Sveva kāmarāgo taṁ kāmarāgapariyuṭṭhānanti.
Āmantā. Sveva kāmarāgānusayo taṁ kāmarāgapariyuṭṭhānanti.
Na hevaṁ vattabbe .pe.

[1571] Añño paṭighānusayo aññaṁ paṭighapariyuṭṭhānanti.
Āmantā. Aññaṁ paṭighaṁ aññaṁ paṭighapariyuṭṭhānanti. Na hevaṁ
vattabbe .pe. Taññeva paṭighaṁ taṁ paṭighapariyuṭṭhānanti.
Āmantā. Sveva paṭighānusayo taṁ paṭighapariyuṭṭhānanti. Na hevaṁ
vattabbe .pe.

[1572] Añño mānānusayo aññaṁ mānapariyuṭṭhānanti.
Āmantā. Añño māno aññaṁ mānapariyuṭṭhānanti. Na
hevaṁ vattabbe .pe. Sveva māno taṁ mānapariyuṭṭhānanti.
Āmantā. Sveva mānānusayo taṁ mānapariyuṭṭhānanti. Na hevaṁ
vattabbe .pe.

[1573] Añño diṭṭhānusayo aññaṁ diṭṭhipariyuṭṭhānanti.
Āmantā. Aññā diṭṭhi aññaṁ diṭṭhipariyuṭṭhānanti. Na hevaṁ
vattabbe .pe. Sāva diṭṭhi taṁ diṭṭhipariyuṭṭhānanti. Āmantā.
Sveva diṭṭhānusayo taṁ diṭṭhipariyuṭṭhānanti. Na hevaṁ vattabbe .pe.

[1574] Añño vicikicchānusayo aññaṁ vicikicchāpariyuṭṭhānanti.
Āmantā. Aññā vicikicchā aññaṁ vicikicchāpariyuṭṭhānanti.
Na hevaṁ vattabbe .pe. Sāva vicikicchā taṁ vicikicchāpariyuṭṭhānanti.
Āmantā. Sveva vicikicchānusayo taṁ vicikicchāpariyuṭṭhānanti.
Na hevaṁ vattabbe .pe.

[1575] Añño bhavarāgānusayo aññaṁ bhavarāgapariyuṭṭhānanti.
Āmantā. Añño bhavarāgo aññaṁ bhavarāgapariyuṭṭhānanti.
Na hevaṁ vattabbe .pe. Sveva bhavarāgo taṁ bhavarāgapariyuṭṭhānanti.
Āmantā. Sveva bhavarāgānusayo taṁ bhavarāgapariyuṭṭhānanti.
Na hevaṁ vattabbe .pe.

[1576] Añño avijjānusayo aññaṁ avijjāpariyuṭṭhānanti.
Āmantā. Aññā avijjā aññaṁ avijjāpariyuṭṭhānanti.
Na hevaṁ vattabbe .pe. Sāva avijjā taṁ avijjāpariyuṭṭhānanti.
Āmantā. Sveva avijjānusayo taṁ avijjāpariyuṭṭhānanti. Na
hevaṁ vattabbe .pe.